1-2. Mukunda natshi Yesu wavuile gikenene giavula?

MU LUSUGU luenji lua gisugishilo ha mavu, Yesu wavuile gikenene giavula. Guasalele matangua azonda hagula asagesewe nu ashiyiwe gudi athu abola. Uvi Yesu gakhalelego muvua gikenene mukunda nu gufua guakhalele gumunenga. Wakhalele muzumba She’nji muavula nu wakhalele mutshigina gumusuanguluisa. Yesu wakhalele mujiya egi gula wasala ya gujinginyina gu malamba aza mutagana nawo, mbawutshita egi jina dia Yehowa ditumbuishiwe. Yesu wakhalele nji muzumba athu, wakhalele mujiya egi athu mbaaheta monyo wa ivo nu ivo phamba gula muene wasala ya gujinginyina gudi Yehowa.

² Ngatshima Yesu wakhalele nu gikenene giavula, uvi wakhalele nu guhuima. Wawambelele apostolo enji egi ‘Ngudi gumihua guhuima guami.’ (Yone 14:27) Wakhalele nu “guhuima gua Nzambi,” guhuima guana gukhala nago muthu udi nu ufuta wabonga nu Yehowa. Guhuima guene guakuatesele Yesu hagula gavuigo gikenene.—Fili. 4:6, 7.

3. Ndaga tshi tuza muzuelela mu longo edi?

³ Gushigo nga muthu mungoshi wajiya gutagana nu malamba Yesu wataganele nawo, uvi athu agasue adi mulandula Yesu mbaatagana nu malamba. (Mat. 16:24, 25; Yone 15:20) Matangua ako, tuana guvua gikenene gifua Yesu. Luholo lutshi tuajiya gudibamba hagula malamba atubalegago ngolo nu atukatulago guhuima guetu? Tuzuelele ndaga thathu Yesu watshitshile mu mudimo wenji ha mavu, nu luholo tuajiya gulandula gifezegeselo gienji tangua tudi mutagana nu malamba.

4. Ha gutadila 1 Tesalonike 5:17, hana ifezegeselo idi mumonesa egi Yesu wasambele muavula mu lusugu luenji lua gisugishilo ha mavu?

⁴ Tanga 1 Tesalonike 5:17. Yesu wakombelele muavula lusugu luenji lua gisugishilo ha mavu. Tangua Yesu wasendesele gudibungisa gua guwunguluga gufua guenji, watshitshile gisambu mukunda nu mapha nu vinyo. (1 Kol. 11:23-25) Watshitshile nji gisambu nu alandudi enji gutuama dia gukatuga fundo akalegele Wano wa Pake. (Yone 17:1-26) Mu phipha yene, tangua muene nu alandudi enji ahetele gu Mulundu wa Olive, wasambele muavula. (Mat. 26:36-39, 42, 44) Mbimbi jia gisugishilo jiazuelele Yesu gutuama dia gufua guenji jiakhalele nji gisambu. (Luka 23:46) Yesu wakalegele gisambu gudi Yehowa ha gumuwambela ndaga yagasue yakhalele naye gumubuila mu lusugu lua gisugishilo gia lujingu luenji ha mavu.

5. Mukunda natshi apostolo alebele tangua ataganele nu malamba?

⁵ Ndaga iko yakuatesele Yesu ha gukolesela mu malamba idi egi wasambele muavula ha gutoga ukuateshi gudi Sh’enji. Uvi mu phipha yene apostolo akoleselego mu gisambu. Luholo akoleselego mu gisambu, ngolo jiawo jialebele tangua ataganele nu malamba. (Mat. 26:40, 41, 43, 45, 56) Esue nji mbatusala yagujinginyina mu malamba phamba gula tudi mulandula gifezegeselo gia Yesu nu tudi ‘mulandula gukombelela.’ Ndaga jitshi tuajiya gutoga Yehowa mu gisambu?

6. Luholo lutshi gutshigina guana gutukuatesa ha gukhala mu guhuima?

⁶ Tuajiya gutoga Yehowa ha ‘gutuhana gutshigina guavula.’ (Luka 17:5; Yone 14:1) Tudi naye gukhala nu gutshigina handaga  Satana mbawulola athu agasue ana gulandula Yesu. (Luka 22:31) Luholo lutshi gutshigina mbagutukuatesa ha gukhala mu guhuima ngatshima tuatagana nu malamba a luholo nu luholo? Gula tuatshitshi gale ndaga yagasue tuajiya gutshita ha gulua nu malamba, gutshigina mbagututuma ha gubemba malamba ene ha mago a Yehowa. Luholo tuana gusha mutshima egi Yehowa wana gujiya muabonga malamba etu, yana gutuhana guhuima mu matangi nu mu mutshima.—1 Phet. 5:6, 7.

7. Ndaga jiazuelele phangi Robert jidi gugulongesa itshi?

⁷ Gisambu giana gutukuatesa ha gubamba guhuima gua matangi ngatshima tuatagana nu malamba luholo lutshi. Tuzuelele gifezegeselo gia phangi Robert yonu udi mukulu nu ivo 80. Udi muzuela egi: “Ndaga mukanda wa Filiphi 4:6, 7 idi muzuela, yangukuatesele ha gulua nu malamba mu lujingu luami. Ngatagenele nu lamba dia mbongo. Mu tangua dimoshi ngenyi ngakhalelego luko mukulu.” Itshi yakuatesele phangi Robert ha gubamba guhuima guenji? Udi muzuela egi: “Ngana gutshita gisambu gula gikenene giangukuata. Ngumujiya nji egi gutshita gisambu tangua diagasue guana gungukuatesa ha guheta guhuima guavula.”

8. Ha gutadila Yone 8:29, ndaga tshi iko yakhalele muhana Yesu guhuima?

⁸ Tanga Yone 8:29. Ikhale mu tangua dia malamba, Yesu wakhalele nu guhuima handaga wajiyile egi wakhalele musuanguluisa Sh’enji. Wakhalele gumutumagela nu mu tangua dia lamba. Wakhalele muzumba  Sh’enji, nu wakhalele musha mudimo wa Yehowa ha fundo dia thomo mu lujingu luenji. Gutuama dia guza ha mavu, Yesu wakhalele “gaphita ga mudimo” wa Nzambi (Ish. 8:30). Hakhalele muene ha mavu, walongesele athu nu gikhesa giagasue ndaga jiatadila Sh’enji. (Mat. 6:9; Yone 5:17) Mudimo owu wakhalele gumusuanguluisa muavula.—Yone 4:34-36.

9. Luholo lutshi gubalegesa tangua diavula mu mudimo wa gulongesa guana gutukuatesa ha gukhala mu guhuima?

⁹ Ha gulandula gifezegeselo gia Yesu tudi naye gutumagela Yehowa, nu ‘gukhala tangua diagasue nu ndaga jiavula jia gukalagala mu mudimo wa Fumu.’ (1 Kol. 15:58) Gula ‘tuadihana diago’ mu mudimo wa gulongesa, yajiya gutukuatesa ha gutuna gudisagesa muavula tangua tudi mutagana nu malamba. (Makal. 18:5) Athu tuana gutagana nawo mu mudimo wa gulongesa ana gutagana nji nu malamba ako a gubalega etu. Uvi, tangua ana gulonguga ha guzumba Yehowa nu gukalegela malongo enji, lujingu luawo luana gubonga nu ana gusuanguluga. Gumona luholo aphangi ene adi musuanguluga, guana gututuma ha gusha mutshima egi Yehowa mbawutukuasa diago. Gujiya ndaga eyi guana gutukuatesa nji ha gukhala mu guhuima. Guakuatesele nji phangi mumoshi wa mukhetu wakhalele gudisagesa lujingu luenji luagasue mu matangi nu gudivua gifua gashigo nu ndando. Phangi muene udi muzuela egi: “Gula ngabalegesa tangua diavula mu mudimo wa gulongesa, ngana gudivua muabonga nu ngana gusuanguluga. Ngana gudivua nji hehi nu Yehowa gula ngudi mu mudimo wa gulongesa.”

10. Longo ditshi wazula mu ndaga jiazuelele Brenda?

¹⁰ Tuzuelelenu luko gifezegeselo gia phangi Brenda. Muene nu mun’enji wa mukhetu ana gukata misongo ya sclérose. Brenda wana guwenda phamba ha nguasa. Matangua ako wana gulongesa inzo nu inzo, uvi ha gulongesa muavula, wana gusonegela athu mikanda. Udi muzuela egi: “Tangua ngajiyile egi misongo yami mbayishigo musagewa ha mavu awa a Satana, ngadihanele muavula mu mudimo wa gulongesa. Mudimo wa gulongesa wana gungukuatesa ha gutuna gutangiza ukhashi wami tangua diagasue. Wana gungutuma nji ha gutangiza ukuateshi ngajiya guhana athu ngana gutagana nawo mu terituare. Mudimo wa gulongesa wana gunguwunguluisa tangua diagasue felela diami dia masugu adi muza.”

11-13. (a) Ndaga tshi apostolo nu athu ako atshitshile ha gumonesa egi akhalele mafuta abonga a Yesu? (b) Mafuta a Yesu amukuatesele ha gudivua gikuatshi?

¹¹ Masugu agasue Yesu wakhalele mulongesa, apostolo enji agujinginyina akhalele mafuta enji abonga. Akhalele diago mafuta abonga adi muzuelewa mu mukanda wa Ishima egi: “Ufuta wa diago udi mubalega uphangi gukola.” (Ish. 18:24) Yesu wakhalele muzula ufuta wene nu ndando. Hakhalele Yesu ha mavu, nga phangi enji mumoshi gashilego gutshigina gudi muene. (Yone 7:3-5) Lusugu luko, enya fami yenji atangijile egi wasaluga. (Mako 3:21) Uvi, gutuama egi Yesu ashiyiwe wawambelele apostolo enji a gujinginyina egi: “Enue mudi athu muafubidile nu ame mu gulolewa guami.”—Luka 22:28.

¹² Matangua ako apostolo atshitshile ndaga jiakhalelego musuanguluisa Yesu. Uvi Yesu gatalelego phamba gubola guawo, wamonele gutshigina guawo gudi muene. (Mat. 26:40; Mako 10:13, 14; Yone 6:66-69) Mu phipha ya gisugishilo gutuama egi ashiyiwe, Yesu wawambelele mala ene a gujinginyina egi: ‘Ngudi gumitamega  egi mafuta ndaga ya ngamijiyisa ndaga jiagasue ngavuile gudi Tata.’ (Yone 15:15) Idi yadiago egi mafuta a Yesu akhalele gumuhana diago gikhesa giavula. Ukuateshi ahanele Yesu hakhalele muene mutshita mudimo wenji wamusuangulushile diago.—Luka 10:17, 21.

¹³ Yesu wakhalele nji nu mafuta ako a mala nu a akhetu, akhalele gumukuatesa mu mudimo wenji wa gulongesa nu mu ndaga jiko. Ako akhalele gumutamega gumbo diawo ha gudia nawo. (Luka 10:38-42; Yone 12:1, 2) Ako akhalele muwenda nenji nu akhalele gumukhaphela ima akhalele naye. (Luka 8:3) Yesu wakhalele nu mafuta abonga handaga muene nji wakhalele futa diabonga. Wakhalele guatshitshila ndaga jiabonga, gakhalelego guatoga ha gutshita ndaga jiakola gubalega. Yesu wakhalele muthu watagana uvi wakhalele musuanguluga nu ukuateshi wa mafuta enji akhalelego athu atagana. Idi naye gukhala egi ene nji amukuatesele ha gubamba guhuima.

14-15. Luholo lutshi tuajiya gukuata mafuta abonga? Luholo lutshi mafuta ene ajiya gutukuatesa?

¹⁴ Mafuta abonga mbaatukuatesa ha gusala ya gujinginyina gudi Yehowa. Ha gukuata mafuta abonga, esue hakhetu tudi naye gukhala futa diabonga. (Mat. 7:12) Biblia idi gututoga ha gukalegela tangua nu ngolo jietu mukunda nu gukuatesa athu, tudi naye guyikalagala muavula gubalega gudi athu adi nu ‘funu ya ima.’ (Ef. 4:28) Tangiza nanyi mukatshi dia hungu dienu udi nu funu ya ukuateshi? Wajiya nji gukuatesa phangi mumoshi wa gukola nga yonyi udi mukata ha guya gumusumbila ima. Wajiya gukuatesa fami imoshi ishigo  nu makuta ha guahana ima ya gudia. Gula udi mujiya luholo lua gukalegela site jw.org^® nu JW Library^®, wajiya gukuatesa aphangi ako a mu hungu dienu ha gujiya guyikalegela. Tangua tuana gudihana ha gukuatesa athu ako, tuana gusuanguluga muavula.—Makal. 20:35.

¹⁵ Mafuta etu mbatukuatesa tangua mbatutagana nu malamba nu mbaatukuatesa nji ha gubamba guhuima. Mafuta etu ana gutukuatesa tangua ana gututegelela muabonga ha gujiya luholo tudi gudivua, gifua luholo Elihu wategelele tangua Yobo wakhalele muzuelela malamba enji. (Yobo 32:4) Tushigo naye gunengena egi mafuta etu atuzudile desizio, uvi idi ndaga yabonga gula tuategelela malongo a mu Biblia adi gutuhana. (Ish. 15:22) Gifua luholo Fumu Davidi watshiginyile ukuateshi wa mafuta enji nu gudibulumuisa guagasue, esue nji tushigo naye gubemba egi lulendo lutukange njila ha gutshigina ukuateshi mafuta etu adi gutuhana. (2 Sam. 17:27-29) Yadiago, mafuta a luholo elu adi kado ga Yehowa.—Yak. 1:17.

16. Ha gutadila Filiphi 4:6, 7, phamba mu njila ya nanyi tuajiya guheta guhuima? Kotelesa.

¹⁶ Tanga Filiphi 4:6, 7. Mukunda natshi Yehowa udi gutuwambela egi tuajiya guheta guhuima ana gutuhana ‘mu njila ya Klisto Yesu’? Handaga tuajiya guheta guhuima mu matangi nu mu mutshima phamba gula tuakotelesa nu tuasha gutshigina mu mudimo Yesu wana gutagenesa. Ha gufezegesa, munjila ya mulambu wa Yesu, Yehowa mbawututotesela gubola guagasue. (1 Yone 2:12) Gutangiza ndaga eyi guana gutuhana diago ngolo! Yesu mbawukatula malamba agasue Satana nu mavu enji ana gutubatela handaga Yesu udi Fumu wa Ufumu wa Nzambi. (Yesh. 65:17; 1 Yone 3:8; Yat. 21:3, 4) Didi diago felela diabonga mukunda nu esue! Yesu watuhanele mudimo wakola, uvi gatubembelego hakhetu. Wana gutukuatesa uu nu mu masugu a gisugishilo gia mavu awa. (Mat. 28:19, 20) Ndaga eyi yana gutuhana diago ngolo! Ndaga jia ndando jiajiya gutukuatesa ha gukhala mu guhuima, jidi ukuateshi wa Yesu, felela, nu ngolo.

17. (a) Luholo lutshi Muklisto wajiya gubamba guhuima guenji? (b) Luholo Yone 16:33 yayimonesa, ndaga itshi mbatukalagala?

¹⁷ Uvi luholo lutshi wajiya gubamba guhuima guaye gula udi mutagana nu malamba akola? Wajiya gubamba guhuima gula udi mutshita ndaga jiatshitshile Yesu. Thomo, ikhale watagana nu ndaga ya luholo lutshi tshita gisambu muavula. Ya mbadi, tumagela Yehowa, longesa nu gikhesa nga mu tangua dia lamba. Ya thathu kamba ukuateshi gudi mafuta tangua udi mutagana nu malamba. Ngenyi guhuima gua Nzambi mbagubamba matangi nu mutshiwa waye. Mbawubinga malamba gifua Yesu.—Tanga Yone 16:33.