Phangi Winston, tuwambele luholo wajiyile Nzambi.

Ngakudile gu ferme gu Queensland mu gifutshi gia Australie. Tuakhalelego muya nga mu dingumba dimoshi. Luholo tuakhalele gu ferme, tuakhalelego gudimona muavula nu athu ako phamba enya fami yami. Ngasendesele gukamba Nzambi tangua ngatagenesele ivo 12. Ngamutogele mu gisambu hagula ngujiye giamatshidia giamutadila. Ngakatugile gu ferme, ngahetele mudimo gu dimbo dia Adélaïde gu Sud ya Australie. Tangua ngatagenesele ivo 21, ngayile gu Sydney gu konje, tuadimonele nu Pam guene, wangutele lumene lua dingumba dia enya Yuda a gu Angleterre diana gutamegewa egi Anglo-israélisme. Enya dingumba diene akhalele muzuela egi adi ajigulu a iphuta ya Isalele yatotele. Ana guzuela egi, iphuta yene idi iphuta kumi ya ufumu wa nordi yayile mu uhiga mu siekle ya 8 G.T.D. Tangua ngavutugile gu Adélaïde, tuazuelele ndaga yene nu futa diami wa mudimo yago wakhalele mulonguga Biblia nu Matemue a Yehowa. Gungima dia guzuelela nenji ndaga Matemue Yehowa ana gulongesa, ngakotelesele egi ngaheta mvutu ya gisambu giami gia mu ulenge. Ngalongugile giamatshidia giatadila Mufugi nu Ufumu wenji! Ngahetele “Musanga wa Ndando Yavula.”—Mat. 13:45, 46.

Phangi Pam aye nji wasendesele gukamba musanga wa ndando mu ulenge, luholo lutshi wawuhetele?

Ngakudile mu fami ya Aklisto mu dimbo dia Coffs Harbour gu Nouvelle-Galles du Sud. Mvuaji jiami nu akhakha ami akhalele mutshigina malongo a dingumba dia Anglo-israélisme. Ame nu galenge gami ga yala nu mbuta yetu ya mukhetu nu isonyi yetu, tuakhalele musha gutshigina egi Nzambi wana  gutshigina athu anyi akhakhawo adi enya gu Angleterre. Uvi, ame ngakhalelego mutshigina ndaga jiene nu ngakhalelego gudivua hehi nu Nzambi. Tangua ngakhalele nu ivo 14, ngayile mu mangumba avula gifua dingumba dia Anglican, dia Baptiste, nu dia adventiste du septième jour. Uvi mangumba ene angukuateselego ha gujiya Nzambi.

Gungima, fami yetu yayile gu Sydney, guene ngataganele nu Winston hakhalele muene gu congé. Gifua muazuedi Winston, ndaga tuazuelele nenji jiamutumine ha gulonguga nu matemue a Yehowa. Gungima dienji, wakhalele gungusonegela mikanda nu verse jia Biblia jiavula! Muguzuela guabonga, thomo ngavuile gikenene nu khabu. Gungima ngakotelesele egi ndaga jiakhalele muene gungusonegela jiakhalele giamatshidia giatadila Nzambi.

Mu 1962, ngakatugile gu Adélaïde ngayile musanga Winston. Wanguwambelele egi nguye ngukhale gumbo dia Thomas nu mukaji’enji Janice Sloman, akhalele ba misionere a Matemue a Yehowa gu Papouasie-Nouvelle-Guinée. Ngakhalele nu ivo phamba 18, aphangi ene anguyambele nu gisemo guagasue, angukuatesele nji muavula ha gujiya Yehowa. Ngasendesele nji gulonguga Biblia, gungima ngakotelesele diago egi ngaheta giamatshidia. Gungima dia gudihaga nu Winston, tuasendesele lujingu luabonga mu mudimo wa Yehowa. Ikhale tuatagenele nu malamba, uvi tualandudile gusuanguluga mukunda nu musanga wa ndando yavula tuahetele.

Phangi Winston, tuwambele luholo wasendele mudimo wa Yehowa.

Matangua azonda gungima dia gudizula mu ulo nu Pam, Yehowa wasendesele gutuhana inemo iko mu mudimo wenji. (1 Kol. 16:9) Phangi Jack Porter wakhalele mutadi muwendji, watukuatesele ha guheta ginemo gia thomo tangua ajile mutala hungu dietu. (Mangino tudi nenji ba membre a komite ya filiale ya gu Australasie.) Muene nu mukaji’enji Roslyn, atukuatesele ha gubua ba pionye. Tuatshitshile mudimo wene ivo itano. Tangua ngakhalele nu ivo 29, atutogele nu Pam ha guya gu mahongo a gu Pacifique Sud, akhalele mutalewa gu filiale ya Fidji. Mahongo ene akhalele: Samoa américaines, Samoa, Kiribati, Nauru, Niue, Tokelau, Tonga, Tuvalu nu Vanuatu.

Mu masugu ene, athu a mu mahongo ako akhalelego mutshigina Matemue a Yehowa, hene tuakhalele naye guwenda nu gutema. (Mat. 10:16) Mahungu akhalelego nu aphangi avula, hene mafundo a gubanda akhalele lamba. Tuakambele mafundo a gubanda gudi enya mu dimbo, akhalele gutuyamba nu gisemo.

Phangi Wiston, itshi yagutumile ha gusuanguluga nu mudimo wa gubalumuna mikanda?

Tangua ngakhalele gu hongo dia Tonga, aphangi akhalele phamba nu ba trakte nu tumikanda tuazonda mu zuelelo dia Tongien diana guzuelewa gu Polynésie. Mu mudimo wa gulongesa, akhalele mukalegela mukanda La vérité qui conduit à la vie éternelle wa mu Anglais. Tangua tuatshitshile khalasa dia akulu mu phoso nguana, akulu mutatu atshiginyile ha gubalumuna mukanda wene mu zuelelo dia Tongien ngatshima akhalelego mujiya Anglais muabonga. Pam wakhalele musonega mukanda wene, gungima tuawutumile gu filiale ya États-Unis hagula awuzole. Mudimo wene watshitshile phoso hehi nu nage. Ngatshima mukanda wene wabalumuiwego diago muabonga, uvi wakuatesele athu ana guzuela Tongien ha gujiya giamatshidia. Ame nu Pam tuanago gubalumuna mikanda, uvi tuasuangulugile nu mudimo wene luholo tuawutshitshile.

Phangi Pam, wajingile gu mahongo nu gu Australie, gudisha gutshi wamonele mu mafundo ene?

Gudisha guakhalele guavula! Mu mafundo ako jimue jiakhalele jiavula, ako akhalele nu kiza giavula ako ahuma, ako akhalele nu indemba (imbololo), ukhashi, matangua ako gudia guakhalele lamba. Uvi lusugu luagasue mungueze, tuakhalele musuanguluga gutala océan gula tudi gu fale yetu—fale idi muzuelelo dia Samoan, idi jina dia jinzo jia  gu Polynésie jiana gutungiwa phamba nu yangi dia muangu uvi ibayi ndo. Mu phipha jiko, mu mueji wa ngonda tuakhalele mumona mitshi ya makoko, mueji wakhalele mumonega holu dia océan. Matangua ane abonga atutumile ha gutangigiza nu ha gusamba; gutshita ngenyi guatukuatesele ha gutangiza phamba ndaga jiabonga.

Tuakhalele musuanguluga nu ana anyi akhalele muza gututala handaga akhalele muyituga ha gumona ngenji jia mindele. Tangua tuayile gu vizite gu Niue, mona mumoshi wakhalele mukuata uvuji wa mu mago a Winston nu wazuelele egi: “Ngasuanguluga nu mavuji aye.” Yadiago, mona muene wakhalele khenji gamonelego uvuji wa luholo elu, gakhalelego mujiya nji luholo lua guwutamega!

Tuakhalele muvua gikenene giavula, handaga athu avula akhalele phutu. Akhalele nu membo abonga, uvi akhalelego musagewa muabonga, yakhalele nji lamba ha guheta meya a gunua. Uvi ndaga yene yakhalelego musagesa aphangi. Yakhalele luholo luawo lua gujinga. Akhalele musuanguluga handaga akhalele mujinga hamoshi nu fami yawo, akhalele nu fundo mukunda nu gudibungisa nu akhalele nji mutumbuisa Yehowa. Gifezegeselo giawo giatukuatesele ha gusha ndaga jia ndando ha fundo dia thomo nu ha gulebesa lujingu luetu.

Phangi Pam, wakhalele mutshita gikuatshi ha guthaya meya nu ha gutelega ima yenu ya gudia matangua ako?

Ngudi muhana tata mersi. Wangulongesele ndaga jiavula gifua gusha tshuya tua khunyi nu gutelega ha kunyi jiene, wangulongesele nji luholo lua gujinga nu ima yazonda. Tangua tuayile gu Kiribati, tuakhalele mu ganzo gazonda ga muangu, ga gumba maseso hashi nu ibayi ya mimbungu. Ha gutelega ima ya gudia, ngakhalele muhaga wina ha gusha tshuya nu izula ya makoko handaga khunyi jiakhalelego. Ha guthaya meya mu wina (puits), tuakhalele musha ndonga nu akhetu a mu dimbo. Ha gunana meya, akhalele mukalegela mutshi wa ba metre hehi nu 2 wagujitshiga gashinga gazonda gu songi gifua shinga ya gulowela. Ha fundo dia gujitshiga ngowela gu songi ya shinga yene, ene akhalele mujitshiga bidon. Muthu nu muthu wakhalele mubalega gula tangua dienji diatagana ha guthaya meya. Bidon yakhalele mushiwuga izadi nu meya. Ngatangijile gifua ishigo yakola—uu nu hataganele tangua diami. Ngambile shinga mahugo avula uvi meya anginyinego, bidon yakhalele muzaluga! Tangua athu agasue abembele gungulela, mukhetu mumoshi wajile gungukuatesa. Enya mu dimbo diene akhalele gutukuatesa nu akhalele nu gisemo giavula.

Muakhalele muzumba mudimo wenu gu mahongo. Muajiya gutuwambela ndaga jiabonga muataganele najio guene ba?

Winston: Ha gujiya kutime jiko yatutogele tangua diavula. Matangua avula, tangua aphangi akhalele gutuhana ima ya gudia, akhalele gutuhana ima yagasue akhalele nawo. Thomo, tuakhalelego mujiya egi tuajiya guabembela nga gima. Hene, tuakhalele mudia ima yagasue akhalele gutuhana! Uvi tangua tuakotelesele egi akhalele phutu, tuasendesele guabembela ima ya gudia. Tuakhalele mutshita ndaga jiko jiakhalelego musuanguluisa aphangi, uvi akhalele gututotesela. Tangua tuakhalele muya gu vizite gungima dia mbeji 6 aphangi akhalele musuanguluga. Aphangi a mu hungu akhalelego gudimona nu Matemue a mu mahungu ako phamba esue.

Vizite jietu jiakhalele nji muhana uthemua wabonga gudi enya mu dimbo. Athu avula mu dimbo akhalele mutangiza egi dingumba dia Matemue a Yehowa diazolewe gudi Matemue a mu dimbo diawo. Hene, gula amona mutadi muwendji nu mukaji’enji eza mutala aphangi, akhalele mukotelesa diago egi Matemue akhala mu organizasio wa giamatshidia.

Pam: Ndaga imoshi ngana gutangiza muavula yabalegele gu hungu dia Kiribati, hungu diene diakhalelego nu alongeshi avula. Akhalele phamba nu mukulu mumoshi jina dienji Itinikai Matera, muene wakhalele gutukuatesa. Lusugu lumoshi wajile nu gitunga nu diyi moshi. Wazuelele egi “ngamibatela diyi.” Mayi  a susua akhalelego mumonega. Yakhalele kado gazonda uvi yatusuanguluishile diago.

Phangi Pam, ivo yazonda gungima wavualele mona wa gufua, itshi yagukuatesele ha gubinga lamba diene?

Ngamitshile mu 1973 tangua ame nu Winston tuakhalele gu Pacifique Sud. Tuavutugile gu Australie, gungima dia mbeji nguana ngavualele mona wa gufua. Winston wavile gikenene giavula luholo tuavualele mona wa gufua. Gikenene giami giakhalele muhua mage-mage, uvi giahuile diago tangua tuahetele Inzo Yaleha ya Mutaledi ya 15 Avril 2009. Mu longo diana guzuela egi “Mihu yana Guhula Athu ana Gutanga Mikanda Yetu,” muakhalele nu muhu owu: “Gula mona wafua mu vumo dia gin’enji, tuajiya gudifelela egi mbawufuzumuga ba?” Longo diene diamonesele egi ndaga yene idi mutadila Yehowa, handaga tangua diagasue wana gukalagala ndaga jiabonga. Mbawukalegela Mun’enji nu guzumba guagasue ha gukatula malamba agasue tuana gumona ha mavu awa abola nu ha ‘gushiya midimo ya Satana.’ (1 Yone 3:8) Longo diene diatukuatesele nji ha gusuanguluga muavula nu “musanga wa ndando” tuahetele luholo tudi akombeledi a Yehowa! Nga felela dia Ufumu ndo, nga mbatuyila gui!

Gungima dia guvuala mona wa gufua, tuavutugile luko mu mudimo wa tangua digasue. Tuatshitshile mbeji jiazonda gu Betele ya gu Australie, gungima tuabuile luko atadi awendji. Gungima dia gutshita ivo nguana gu Nouvelle-Galles du Sud nu gu Sydney, mu 1981 atutamegele gu Betele ya gu Australie, guene tudi uu nu mangino.

Phangi Winston, luholo lutshi eksperianse ya mudimo watshitshile gu mahongo a gu Pacifique Sud yagukuatesele tangua wabuile membre ya Komite ya filiale ya gu Australasie?

Yangukuatesele muavula diago. Thomo, atogele Betele ya gu Australie ha gutala hongo dia Samoa américaines nu Samoa. Gungima abungishile Betele ya gu Nouvelle-Zélande nu ya gu Australie. Mangino, filiale ya Australasie yana tala gifutshi gia Australie nu hongo dia Samoa américaines nu Samoa nu mahongo a gu Cook nu gu Nouvelle-Zélande nu gu Niue nu gu Timor oriental nu gu Tokelau nu gu Tonga—ngakhalele nu luendu lua guya mutala membo avula mukatshi diawo gifua mumoneshi wa filiale. Mudimo ngatshitshile hangoshi nu aphangi a mu mahongo awa, wana gungukuatesa luholo ngudi mutshita gu komite ya filiale.

Ngajiya guzuela egi ame nu Pam tuana gujiya sendese mualeha egi ishigo phamba mambuta ana gukamba Nzambi. Idi ndaga tuataganele nayo. Mavuala ana gutshigina nji guheta “musanga wa ndando yavula” ngatshima enya fami jiko anago gusuanguluga nu musanga wene. (2 Maf. 5:2, 3; 2 Gudi. 34:1-3) Yadiago, Yehowa Nzambi wa guzumba wana gutshigina egi athu agasue, ikhale mavuala nga athu a gukola ahete monyo wa ivo nu ivo!

Tangua tuasendesele gukamba Nzambi nu Pam ivo 50 nu ndambu yabalega gale, tuakhalelego mujiya nga hazonda egi tuajiya guheta luendu elu. Giamatshidia giatadila Ufumu wa Nzambi gidi diago Musanga wa ndando yavula! Tuazudile desizio dia gubamba musanga owu wa ndando yavula nu gikhesa giagasue!