LONGO DIA 14
Wana Gutagenesa Muabonga Mudimo Waye Wa Gulongesa Ba?
“Tshita mudimo wa gulongesa lukuma luabonga, tagenesa mudimo waye muabonga.”—2 TIM. 4:5, NWT
LUNGIMBO 57 Prêchons à toutes sortes de gens
NDAGA JIDI MU LONGO EDI *
Ha fuzumugine Yesu, wadimonele nu alandudi enji nu wawambelele egi ‘ndenu, . . . mubuise athu alandudi’ (Tala paragrafe 1)
1. Itshi akombeledi agasue adi naye gutshita, nu mukunda natshi? (Tala gifuanesa holu dia gizula.)
KLISTO YESU wawambelele alandudi enji egi ‘ndenu, . . . mubuise athu a ifutshi yagasue alandudi ami.’ (Mat. 28:19) Akombeledi agasue a Nzambi adi naye gujiya luholo ajiya ‘gutagenesa muabonga’ mudimo waahanewe ha gutshita. (2 Tim. 4:5) Hene, mudimo wene udi nu ndando yavula, tudi naye guwukalagala muphushi gubalega midimo iko. Uvi, yajiya gukhala lamba ha gubalegesa matangua avula mu mudimo wene luholo tuana gutshigina.
2. Malamba tshi tuana gutagana nawo tangua tuana gutshita mudimo wetu?
2 Gudi nu midimo iko ya ndando yana gutoga egi tuhane tangua dietu nu ngolo jietu. Yajiya gukhala egi tuana gutshita mudimo matangua avula mu lusugu ha guheta mbongo jiajiya gutukuatesa ha gusumba ima tudi nayo funu mu fami. Tuajiya gulua nu inemo iko ya mu fami nu misongo, malamba, nga malamba athu agukola ana gutagana nawo. Luholo lutshi tuajiya gutaganesa muabonga mudimo wetu ngatshima tudi mutagana nu malamba a luholo elu?
3. Mbimbi jia Yesu jidi mu Matayo 13:23 jidi gutulongesa itshi?
3 Gula malamba tudi mutagana nawo ashigo gutuhana njila ya gutshita matangua avula mu mudimo wa Yehowa, tuajiyilego guleba muila. Yesu wakhalele mujiya muabonga egi athu agasue mukatshi dietu mbaashigo muzola mbuto jia Ufumu luholo lumoshi. (Tanga Matayo 13:23.) Yehowa wana guzula nu ndando ndaga jiagasue tuana gutshita mu mudimo wenji mu gudivua nu ngolo jietu. (Heb. 6:10-12) Gukhanda iko, ndaga jia lujingu jiajiya gutuhana njila ya gutshitshila Yehowa muavula. Mu longo edi, tuza muzuelela luholo tuajiya guhaga mudimo wa Nzambi ha fundo dia thomo mu lujingu luetu, nu gulebesa lujingu luetu, nu gukudisa luholo luetu lua gumuanga nu gulongesa lukuma luabonga. Uvi tuzuelelenu thomo gula gutagenesa mudimo wetu muabonga guakotelesa itshi.
4. Gutagenesa mudimo wetu muabonga guakotelesa itshi?
4 Gutaganesa mudimo wetu muabonga guakotelesa egi tudi naye gulongesa lukuma luabonga muavula mu ngolo jietu. Uvi gutshita muavula mu mudimo wa Nzambi gushigo mukotelesa phamba gubalegesa matangua avula mu mudimo wa gulongesa. Yehowa wana gusuanguluga gula tudi mutshita mudimo wene nu mutshima wabonga. Tuana gulongesa nu mutshima umoshi, handaga tuana guzumba Yehowa nu athu n’akuetu. * (Mako 12:30, 31; Kol. 3:23) Gukalegela Nzambi nu mutshima umoshi guakotelesa gudihana gudi muene nu ngolo jietu jiagasue nu ndunge jietu jiagasue ha gutshita mudimo wenji. Gujiya egi tudi nu luendu luakoma lua gutshita mudimo wa gulongesa, guana gututuma ha gutshita ngolo ha gumuanga lukuma luabonga gudi athu avula mu ngolo jietu.
5-6. Hana gifezegeselo gidi mumonesa luholo tuajiya guhaga mudimo wa gulongesa ha fundo dia thomo ngatshima tushigo nu matangua avula.
5 Tufezegese: Muvuala mumoshi wa yala wana gutshigina gushiga gitare. Wana gusuanguluga gushiga miziki tangua diagasue. Gungima, waheta mudimo wa gushiga gitare mu phoso gu restaurant. Uvi mudimo wene ushigo gumuhana falanga jiatagana jiajiya gumukuatesa. Hene, waya mukamba mudimo uko, wabua caissier mu magasin. Ngatshima udi mubalegesa tangua diavula fundo didi muene mutshita mudimo uvi udi mutangiza phamba gushiga miziki. Udi nu funu ya gukudisa luholo luenji lua gushiga miziki tangua diagasue ha gubua musicien. Uvi wana gukamba okazio nga wa tangua diazonda ha gushiga miziki.
6 Luholo lumoshi nji, yajiya gukhala egi wanago gubalegesa matangua avula mu mudimo wa gulongesa gifua luholo wana gutshigina. Uvi wana gutshigina mudimo wene muavula. Udi mutshita ngolo ha gukudisa luholo luaye lua gulongesa lukuma luabonga ha gukuata mitshima ya athu. Uvi luholo udi nu ndaga jiavula jia gutshita, wajiya gudihula gula luholo lutshi wajiya guhaga mudimo wa gulongesa ha fundo dia thomo mu lujingu luaye.
LUHOLO TUAJIYA GUSHA MUDIMO WA GULONGESA HA FUNDO DIA THOMO
7-8. Luholo lutshi tuajiya gulandula gifezegeselo gia Yesu mu ndaga yatadila mudimo wa gulongesa?
7 Yesu wabembele gifezegeselo giabonga mukunda nu mudimo wa gulongesa. Gulongesa lukuma luabonga lua Ufumu wa Nzambi guakhalele ndaga ya gubalega ndando mu lujingu luenji. (Yone 4:34, 35) Wakhalele muwenda ba kilometre avula ha gulongesa athu avula lukuma luabonga. Wakhalele mulongesa athu mu ba okazio agasue ikhale mu mafundo a athu avula nga gu jinzo jiawo. Yesu wakhalele musha mudimo wa gulongesa ha fundo dia thomo mu lujingu luenji.
8 Tuajiya gulandula gifezegeselo gia Klisto ha gulongesa lukuma luabonga tangua diagasue nu mu mafundo agasue gula luholo ludi guene. Tuana gukhala hehi ha gubemba ima yetu ya ndando ha gutshita mudimo wa gulongesa. (Mako 6:31-34; 1 Phet. 2:21) Aphangi ako mu hungu adi ba pionniers spéciaux, ako avundji a njila a tangua diagasue nu a tangua diazonda. Ako alongugile zuelelo diko nga ndo ana guya mu mafundo adi nu funu ya alongeshi avula. Uvi aphangi ako, adi alongeshi a lukuma luabonga lua Ufumu mu ma hungu awo. Ikhale mudimo tudi mutshita mukunda nu Yehowa udi wavula nga ndo, Yehowa wanago gututoga ha gutshita ndaga jiavula gubalega ngolo jietu. Wana gutshigina egi mukut’etu agasue tusuanguluge nu mudimo wetu wa gulongesa “lukuma luabonga lua Nzambi wa gusuanguluga.”—1 Tim. 1:11; Mikh. 30:11.
9. (a) Ngatshima Phaula wakhalele naye gutshita mudimo wa ma tenta, uvi luholo lutshi wahagele mudimo wa gulongesa ha fundo dia thomo? (b) Ha gutadila Makalegelo 28:16, 30, 31, luholo lutshi phaula wakhalele mutadila mudimo wa gulongesa?
9 Mupostolo Phaula udi gifezegeselo giabonga, handaga wakhalele musha mudimo wa gulongesa ha fundo dia thomo. Hakhalele muene gu dimbo dia Kolinto mu vuayaje yenji ya mbadi ya gimisionere, gakhalelego nu makuta avula, hene matangua ako wakhalele mutunga ma tenta ha guheta makuta. Uvi, Phaula gashilego mudimo wa gutunga ma tenta ha fundo dia thomo mu lujingu luenji. Wakhalele mutshita mudimo wene hagula umukuatese ha gulandula gulongesa lukuma luabonga gudi enya gu Kolinto, ‘gakhalelego guatoga makuta.’ (2 Kol. 11:7) Ngatshima Phaula wakhalele naye gutshita mudimo wajiya gumuhana makuta, uvi walanduile guhaga mudimo wa gulongesa ha fundo dia thomo, wakhalele mulongesa masugu agasue a Guhuluguga. Tangua gahetele ima ya gujingila, Phaula wadihanele muavula mu mudimo wa gulongesa. ‘Wasendesele gudihana diago ha gulongesa nu ha gudijiga enya Yuda egi Yesu udi Klisto.’ (Makal. 18:3-5; 2 Kol. 11:9) Gungima, tangua amumbile mu bologo mu inzo akhalele mufutshila ivo mbadi gu Rome, Phaula wakhalele mulongesa athu akhalele muza gumutala nu wakhalele musonega mikanda. (Tanga Makalegelo 28:16, 30, 31.) Phaula gabembelego nga gima gimoshi gimuwunganese matangi mu mudimo wenji wa gulongesa. Wasonegele egi: “Handaga tudi nu mudimo owu . . . , tubembigo.” (2 Kol. 4:1) Gifua Phaula, ngatshima tudi naye gubalegesa matangua avula gu mudimo wetu uko, tudi naye gulandula guzula mudimo wa Ufumu nu ndando yavula mu lujingu luetu.
Gudi nu maluholo avula tuajiya gutagenesa muabonga mudimo wetu (Tala paragrafe 10-11)
10-11. Luholo lutshi tuajiya gutagenesa muabonga mudimo wetu, ngatshima ukhashi ushigo gutuhana njila ya guwutshita?
10 Gula ivo yetu nga sante yetu ishigo gutuhana njila ya gulongesa inzo nu inzo luholo tuana gutshigina, tuajiya gulongesa luholo luko. Aklisto a mu siekle ya thomo akhalele mulongesa mu mafundo agasue akhalele musanga athu. Akhalele mukalegela ba okazio agasue akhalele muheta ha gulongesa athu giamatshidia mu inzo nu inzo nu mu mafundo a athu avula. (Makal. 17:17; 20:20) Gula tushigo luko nu ngolo jia guwenda muavula ha gulongesa, tuajiya guya mukhala mu mafundo a athu avula ha gulongesa athu adi mubalega. Tuajiya gulongesa gula tuaheta okazio; tuajiya nji gusonegela athu mikanda nga gualongesa gu telefone. Alongeshi anyi ashigo nu luholo lua gulongesa muavula inzo nu inzo mukunda ukhashi nga gukola ajiya gusuanguluga gukalegela maluholo awa a gulongesa.
11 Wajiya gutagenesa muabonga mudimo waye, ngatshima ukhashi ushigo guguhana njila ya gulongesa muavula. Tutadilenu luko gifezegeselo gia mupostolo Phaula. Wazuelele egi: “Mundaga jiagasue ngudi nu ngolo mukunda nu muthu wana gunguhana ngolo.” (Fili. 4:13, NWT) Phaula wakhalele nu funu ya ngolo jiene tangua wakhalele mukata nu tangua diakhalele muene mu vuajaje ya gimisionere. Wawambelele enya gu Galatiya egi: “Enue mujiya egi ngakhalele nu misongo ha ngamilongesele lukuma luabonga hugo dia gudiangela.” (Gal. 4:13) Luholo lumoshi nji, ukhashi waye wajiya guguhana njila ya gulongesa lukuma luabonga gudi minganga nu gudi athu adi gugutalela. Athu avula mukatshi diawo ana gukhala gu mudimo tangua alongeshi ana guya gu jinzo jiawo ha gualongesa.
LUHOLO WAJIYA GULEBESA LUJINGU LUAYE
12. Gukhala nu iso didi ‘mumona muabonga’ guakotelesa itshi?
12 Yesu wazuelele egi: “Meso adi gifua muenda wa muila. Ngenyi gula iso diaye didi mumona muabonga, muila waye wagasue mbawuzala nu muanya.” (Mat. 6:22) Itshi Yesu watshiginyile guzuela? Watshiginyile guzuela egi tudi naye gulebesa lujingu luetu nga ndo gusha matangi etu mu felela dimoshi, uvi tuajiyilego guawunganesa mu ndaga jiko. Yesu wakhalele musha mudimo wa gulongesa ha fundo dia thomo, hene walongesele nji alandudi enji ha guhaga mudimo wa Yehowa nu Ufumu wenji ha fundo dia thomo mu lujingu luawo. Tuana gulandula Yesu Klisto gula tudi muhaga mudimo wa gulongesa ha fundo dia thomo mu lujingu luetu, nu ha ‘gukamba thomo Ufumu wa Nzambi nu gubonga guenji.’—Mat. 6:33.
13. Itshi yajiya gutukuatesa ha guhaga mudimo wa gulongesa ha fundo dia thomo?
13 Luholo luko tuajiya guhaga mudimo watuhanele Nzambi ha fundo dia thomo, ludi gulebesa lujingu luetu nu gubalegesa matangua avula mu mudimo wa gulongesa, hagula tukuatese athu avula ha gujiya Yehowa nu gumuzumba. * Ha gufezegesa, tuajiya guzondesa matangua tuana gubalegesa gu mudimo wetu hagula tulongese matangua avula mukatshi dia phoso. Nga ndo tuajiya gutuna saga jiko jia gudikenesa jinyi jiana gutuzula matangua avula.
14. Ndaga jitshi phangi mumoshi nu mukaji’enji asombegesele ha gulongesa muavula?
14 Tala ndaga mukulu mumoshi mu jina dia Elias akalegele nu mukaji’enji. Udi muzuela egi: “Tuabuilego ba pionye tangua tuazudile desizio, uvi tuakhalele naye gutshita ndaga jiko ha gubalegesa tangua diavula mu mudimo wa gulongesa. Hene, tuasombegesele ndaga jiazonda-zonda ha gulongesa muavula. Tuazondesele ba depanse nu tangua dia gudikenesa, tuatogele nji fumu wetu wa mudimo ha gusombegesa programe ya mudimo wetu hagula tuajiya gulongesa muavula. Gutshita ngenyi guatukuatesele ha gulongesa mu ngueze, nu gulonguga Biblia nu athu avula, tuasendesele nji gulongesa mukatshi dia phoso, mahugo mbadi mu mbeji yagasue. Yatusuanguluishile diago!”
LUHOLO LUA GUKUDISA LUHOLO LUETU LUA GUMUANGA NU GULONGESA LUKUMA LUABONGA
Gukalegela malongo tudi mulonguga mu gudibungisa gua mukatshi dia phoso, mbagutukuatesa ha gulandula gulongesa muabonga nu gumuanga lukuma luabonga (Tala paragrafe 15-16) *
15-16. Ha gutadila 1 Timote 4:13, 15, luholo lutshi tuajiya gulandula gukudisa luholo luetu lua gulongesa? (Tala nji galuanda “ Mafelela Ajiya Gungukuatesa ha Gutagenesa Muabonga Mudimo Wami.”)
15 Luholo luko lua gutagenesa muabonga mudimo wetu, ludi gukudisa luholo luetu lua gulongesa lukuma luabonga. Mafumu avula a midimo ana gutoga enya mudimo awo ha gulandula guzula formasio yajiya guakuatesa ha gukudisa ndunge nu luholo luawo lua gutshita mudimo. Idi luholo lumoshi nji nu alongeshi a Ufumu. Tudi naye gulandula gulonguga luholo tuajiya gubua alongeshi abonga.—Ish. 1:5; tanga 1 Timote 4:13, 15.
16 Luholo lutshi tuajiya gulandula gukula mu mudimo watuhanele Nzambi? Gula tudi mulandula muabonga malongo tuana guheta mu gudibungisa gua Lujingu nu Mudimo wa Uklisto. Gudibungisa guene guana gutuhana formasio ya ndando yana gutukuatesa ha gulandula gukudisa luholo luetu lua gulongesa. Hene, tangua mutuameji wa gudibungisa udi muhana malongo gudi athu atshitshi ba devuare, kamba ha gujiya ndaga yajiya gugukuatesa ha gukudisa luholo luaye lua gulongesa. Gungima tuajiya gukalegela ndaga jiene gula tuaya mulongesa lukuma luabonga gudi muthu. Tuajiya gutoga ukuateshi gudi mutadi wa mudimo wa gulongesa nga guya mulongesa nenji nga nu mulongeshi muko udi nu eksperianse, pionye nga mutadi muwendji. Gula tudi mukalegela muabonga mikanda nu video jia mudimo wa gulongesa, mbatusuanguluga muavula nu mudimo wetu wa gumuanga nu gulongesa lukuma luabonga.
17. Gubonga gutshi wajiya guheta gula udi mutaganesa muabonga mudimo wa Nzambi?
17 Tuana gusuanguluga diago muavula nu luendu Yehowa watuhanele ha gubua ‘mafuta enji a mudimo’! (1 Kol. 3:9) Gula mudi ‘mukamba ndaga jidi nu ndando yavula gubalega,’ nu mudi muhaga mudimo wa Uklisto ha fundo dia thomo ‘mbamukombelela Yehowa nu gusuanguluga.’ (Fili. 1:10; Ngi. 100:2) Luholo udi mukombeledi wa Nzambi, jiya egi muene mbawuguhana ngolo udi najio funu ha gutagenesa mudimo wa Uklisto ngatshima udi mutagana nu malamba nga ukhashi. (2 Kol. 4:1, 7; 6:4) Ikhale udi nu luholo lua gulongesa muavula nga ndo, wajiya gukhala nu ‘gishina gia gusuanguluga’ tangua udi gudihana nu mutshima umoshi mu mudimo wa Uklisto. (Gal. 6:4) Gula udi mutagenesa muabonga mudimo watuhanele Nzambi, udi mumonesa guzumba guaye mukunda nu Yehowa nu mukunda nu athu n’akuenu. ‘Gula watshita ngenyi, mbawudihuluisa nu mbawuhuluisa nji athu adi gugutegelela.’—1 Tim. 4:16.
LUNGIMBO 58 Cherchons les amis de la paix
^ par. 5 Yesu watuhanale ginemo gia gulongesa lukuma luabonga nu gubuisa athu alandudi. Mu longo edi tumuza mumona luholo tuajiya gutagenesa muabonga mudimo watuhanele Nzambi, ngatshima tudi mutagana nu malamba avula. Tumuza mumona luko luholo tuajiya gubua alongeshi abonga nu luholo tuajiya gusuanguluga muavula nu mudimo wene.
^ par. 4 LUHOLO LUA GUKOTELESA MBIMBI: Mudimo watuhanele Nzambi wanago gusuga phamba ha gulongesa nu gumuanga lukuma luabonga, uvi umutadila nji gutunga nu gulondega Jinzo jia Ufumu nu Betele, nu gukuatesa aphangi adi mutagana nu malamba.—2 Kol. 5:18, 19; 8:4.
^ par. 13 Tala maluholo 7 a gulebesa lujingu adi mu galuanda gadi nu muto wa lumene egi: “Comment simplifier ta vie” mu Inzo Yaleha ya Mutaledi ya Juillet 2016 diyiji 10.
^ par. 62 UKOTELESHI WA IFUANESA: Phangi mumoshi wa mukhetu udi mutshita gifezegeselo gia guvutugila muthu mu gudibungisa gua mukatshi dia phoso. Gungima, mutuameji wa gudibungisa udi gumuhana malongo, phangi muene udi musonega mu gamukanda Gulongesa. Tangua phangi muene udi mu mudimo wa gulongesa, udi mukalegela malongo amuhanele mu gudibungisa gua mu hungu.
