1-2. Mu luholo lutshi tuajiya gulandula nganyo jia Yesu? Hana gifezegeselo.

 TANGIZA gale egi mudi muwenda ha fundo didi nu ingonza yavula, uvi muthu mumoshi udi nu eksperianse yavula udi gumituameza. Hadi muene muwenda udi mubemba nganyo jienji gungima. Ngatshima tangua diko muajiyilego gumumona, uvi muajiyilego guvua gikenene handaga mudi mulandula muabonga nganyo jienji!

² Luholo tudi Aklisto a giamatshidia, esue nji tudi gifua athu adi muwenda mukatshi dia ingonza ya ha mavu awa abola. Hene, Yehowa watuhanele Mutuameji watagana. Mutuameji muene udi Mun’enji Yesu Klisto, tudi naye gulandula nganyo jienji muabonga. (1 Phet. 2:21) Mukanda umoshi wana kotelesa Biblia udi muzuela egi mu verse eyi Phetelo wafuanesele Yesu nu mutuameji. Gifua luholo mutuameji wana bemba nganyo gungima dienji, Yesu nji watubembele nganyo tuajiya gulandula. Tutadilenu mihu eyi thathu yatadila gulandula nganyo jia Yesu: Gulandula nganyo jia Yesu guakotelesa itshi? Mukunda natshi tudi naye gulandula nganyo jia Yesu? Luholo lutshi tuajiya gulandula nganyo jia Yesu?

3. Gulandula nganyo jia muthu guakotelesa itshi?

³ Gulandula nganyo jia muthu guakotelesa itshi? Mu Biblia, mbimbi eji “guwenda” nu “ikanzo,” matangua avula jiana gukotelesa ndaga muthu wana gukalagala mu monyo wenji. (Gis. 6:9; Ish. 4:26) Tuajiya gufuanesa ndaga muthu wana kalagala mu monyo wenji nu nganyo jiana bemba muthu gula udi muwenda. Hene, gulandula nganyo jia muthu, gudi mukotelesa gulandula gifezegeselo gienji.

4. Gulandula nganyo jia Yesu guakotelesa itshi?

⁴ Na gulandula nganyo jia Yesu guakotelesa itshi? Mu mbimbi  jiazonda, gudi mukotelesa gulandula gifezegeselo gienji. Mu verse yakuata longo edi, mupostolo Phetelo udi muzuelela gifezegeselo giabonga giatubembele Yesu luholo akolesele mu malamba, ngatshima gudi nji nu ndaga jiko jiakalegele muene tuajiya gulandula. (1 Phet. 2:18-25) Ndaga ya giamatshidia idi egi, ndaga jiagasue jiazuelele Yesu nu jiakadigile muene mu monyo wenji jidi gifezegeselo mukunda nu esue.

5. Luholo tushigo athu atagana, tuajiya diago gulandula gifezegeselo giatagana gia Yesu ba? Kotelesa.

⁵ Luholo tushigo athu atagana, tuajiya diago gulandula gifezegeselo gia Yesu ba? Ayi. Tujimbilago egi Phetelo wazuelelego egi tudi naye gulandula nganyo jia Yesu mu luholo luatagana, uvi wazuelele egi tudi naye ‘gulandula nganyo jia [Yesu] muabonga.’ Gula tuakalagala yagasue tuajiya gukalagala ha gulandula nganyo jia Yesu ikhale tushigo athu atagana, mbatumonesa diago egi tudi mutumagela mbimbi jiatuwambelele mupostolo Yone ha ‘gulandula guwenda gifua muawendele Yesu.’—1 Yone 2:6.

6-7. Mukunda natshi tuajiya guzuela egi gulandula nganyo jia Yesu mbagutukuatesa ha gukuata ufuta wakola nu Yehowa?

⁶ Gulandula nganyo jia Yesu mbagutukuatesa ha gukuata ufuta wakola nu Yehowa. Mukunda natshi tuazuela ngenyi? Thomo, Yesu watubembele gifezegeselo giabonga giatadila ndaga tudi naye gukalagala ha gusuanguluisa Nzambi. (Yone 8:29) Gula tualandula nganyo jia Yesu, mbatusuanguluisa lume Yehowa. Tudi naye gusha mutshima egi Tata wetu wa mu dilu wana khala hehi nu athu ana tshita yagasue ha gubua mafut’enji.—Yak. 4:8.

⁷ Ya mbadi, Yesu walanduile muabonga gifezegeselo gia Sh’enji. Gishina giene Yesu wazuelele egi: “Muthu wangumona ame, wamona nji Tata.” (Yone 14:9, NWT) Tuajiya gulandula makalegelo awaha a Yesu nu luholo akhadile mukadigila athu ako ndaga. Ha gufezegesa, wavuidile muthu wakhalele nu misongo ya hute khenda,  wamonesele nji khenda gudi mukhetu wakhalele nu misongo yakola, wakhalele nji gudihaga ha fundo dia athu afuishile aphangi’awo a guzumba. Gula tuakalagala ngenyi, mbatumonesa diago egi tudi mulandula gifezegeselo gia Yehowa muabonga. (Mako 1:40, 41; 5:25-34; Yone 11:33-35) Gula tualandula muabonga makalegelo a Yehowa, mbatukolesa nji ufuta wetu n’enji.

8. Kotelesa mukunda natshi gulandula nganyo jia Yesu mbagutukuatesa ha “gubinga” mavu.

⁸ Gulandula nganyo jia Yesu mbagutukuatesa ha gutuna gubemba egi mavu awa abola atuwunganese matangi. Mu phipha ya gisugishilo ya monyo wenji ha mavu, Yesu wazuelele nu gikhesa giagasue egi: “Ame ngabinga mavu.” (Yone 16:33, NWT) Mbimbi eji jiakhalele mukotelesa egi, Yesu abembelego egi matangi nga mafelela nga ndaga jia athu a ha mavu awa jimuwunganese matangi. Yesu gajimbidilego egi wajile ha mavu ha guwevua jina dia Yehowa nu gukalagala egi jina diene dinemesewe. Uvi esue giwa? Gudi nji nu ndaga jiavula jiajiya gutuwunganesa matangi ha mavu awa. Uvi gula tualandula gukalagala gutshigina gua Yehowa gifua Yesu, “mbatubinga” nji mavu awa.—1 Yone 5:5.

9. Itshi tudi naye gutshita ha guheta monyo wa ivo nu ivo?

⁹ Gulandula nganyo jia Yesu mbagutukuatesa ha guheta monyo wa mayilago. Tangua muvuala mumoshi wakhalele nu umonyi wavula wahudile Yesu ndaga adi naye gukalagala ha guheta monyo wa ivo nu ivo, Yesu wamuwambelele egi: “Iza ungulandule.” (Mat. 19:16-21, NWT) Yesu wawambelele enya Yuda ako anyi akhalelego mutshigina egi muene udi Klisto egi: “Imeme yami . . . yana gungulandula. Ame ngudi guyihana monyo wa ivo nu ivo.” (Yone 10:24-29) Yesu wawambelele nji Nikodemo wakhalele mukalagala gu tribinale yakoma ya enya Yuda, munu wakhalele mutshigina gujiya malongo enji avula egi, muthu wagasue “wamonesa gutshigina guenji gudi muene,” “mbawuheta monyo wa ivo nu ivo.” (Yone 3:16) Tuana monesa gutshigina gudi Yesu tangua tuana kalegela malongo enji nu luholo tuana landula gifezegeselo gienji. Gula tuatshita ngenyi, mbatuheta monyo wa ivo nu ivo.—Mat. 7:14.

10. Ha gutadila Yone 17:3 “Gujiya” Yesu muabonga gudi mukotelesa itshi?

¹⁰ Gutuama dia gulandula nganyo jia Yesu muabonga, tudi naye thomo gumujiya. (Tanga Yone 17:3.) “Gujiya” Yesu gudi ndaga tudi naye gulandula gukalagala. Tudi naye gulandula gulonguga muabonga ndaga jiavula jiamutadila gifua makalegelo enji nu luholo luenji lua gutangiza nu malongo enji. Ikhale tuakalagala gale ivo yavula mu giamatshidia nga ndo, tudi naye gulandula “gukamba gujiya” Yehowa nu Mun’enji.

11. Mene jitshi jiana khala mu ba Evanjile nguana?

¹¹ Yehowa watukuatesele ha gujiya Mun’enji luholo akalegele egi lumene luenji lusonegewe mu ba Evanjile nguana adi mu Mbimbi yenji. Ba Evanjile ene ana zuelela monyo wa Yesu nu mudimo wenji wa gulongesa ha mavu. Mikanda eyi  nguana idi gutuwambela ndaga jiazuelele Yesu nu ndaga jiatshitshile muene nu luholo akhalele gudivua. Idi nji gutukuatesa ha gulandula ‘gutangigiza muabonga’ gifezegeselo gia Yesu. (Heb. 12:3) Luko, idi nji nu nganyo jiatubembele Yesu. Hene, gula tudi mutanga ba Evanjile, mbatujiya Yesu kiawaha diago. Ngenyi mbatulandula muabonga nganyo jienji.

12. Itshi tuajiya gutshita ha gujiya ndaga jiavula jidi mu ba Evanjile?

¹² Ha gujiya ndaga jiavula jidi mu ba Evanjile, tudi naye gujitanga, tudi naye nji gutshita ndaga jiko. Tudi naye guzula tangua dia gulonguga ba Evangile ene kiawaha nu gutangigiza ndaga jiene muavula. (Tala nji Yoshua 1:8, NWT, mbimbi goshi’a diyiji.) Tutadilenu ndaga mbadi jiajiya gutukuatesa ha gutangigiza nu gukalegela ndaga tudi mutanga mu ba Evanjile.

13. Itshi yajiya gugukuatesa ha gumona ndaga udi mutanga mu Evanjile gifua jidi mubalega mangino?

¹³ Thomo, tadila mene jidi mu Evanjile yene gifua jidi mubalega mangino. Kalegela matangi aye ha gumona nu ha gutegelela. Kalagala nji gifua aye nji wakhalele hene tangua ndaga yene yakhalele mukalegewa. Gukalagala ba recherche mu mikanda yana gutuhana organizasio wa Yehowa, guajiya gugukuatesa mu ndaga eyi. Tadila nji ndaga jiakalegewe gutuama nu gungima dia lumene udi mulonguga. Tadila nji ndaga jiko jiavula jiatadila athu nu mafundo adi mu lumene luene. Tadila gudivua gudi mukatshi dia lumene udi mutanga nu lumene luko lua luholo lumoshi ludi mu Evanjile iko. Matangua ako muthu wasonegele Evanjile imoshi wajiya guzuelela ndaga iko inyi ishigo mu Evanjile iko.

14-15. Itshi tudi naye gutshita ha gukalegela ndaga tualonguga mu lumene lua Yesu?

¹⁴ Ya mbadi, kalegela ndaga watangi mu Evanjile mu monyo waye. (Yone 13:17) Gungima dia gulonguga muabonga Evanjile imoshi, dihule egi: ‘Longo ditshi ngazula mu lumene elu ngajiya gukalegela mu monyo wami? Luholo lutshi ngajiya gukalegela longo edi ha gukuatesa muthu muko?’ Tangiza muthu uza muwambela lumene luene, mu tangua diatagana muwambele nu guzumba guagasue longo wazudi mu lumene luene.

 ¹⁵ Tutadilenu gifezegeselo gia luholo tuajiya gukalegela maluholo awa mbadi. Tuza mumona nji lumene lua mukhetu wa gafunda wakhalele phutu munu Yesu wamonele mu tempelo.

16. Zuelela ndaga idi mu Mako 12:41.

¹⁶ Tangiza gifua lumene elu ludi mubalega mangino. (Tanga Mako 12:41.) Tangiza gale lumene elu. Yakhalele mu lusugu lua 11 Nisana lua givo 33 gia T.D.—masugu azonda gutuama egi Yesu afue. Yesu wakhalele wabalegesa gale lusugu lua mudidi nu gulongesa mu tempelo. Uvi mafumu a gikombelelo anyi akhalele mbalagaji jienji akhalele gumutunyisa. Matangua azonda gutuama, ako mukatshi diawo akhalele gumuhula gula gui ana guzula ngolo jia gukalagala ndaga. Ako akhalele gumuhula mihu inyi akhalele mutangiza egi idi yakola gudi muene ha guhana mvutu. (Mako 11:27-33; 12:13-34) Gungima Yesu wazogele, wayile ha fundo diko mu tempelo diakhalele mutamegewa egi Luphango lua Akhetu. Wanginyine guene ha gutala gibambelo gia mbongo. Hene, wasendesele gutala luholo athu akhalele mumba misomonyi mu gibambelo giene. Wamonele enya umonyi avula akhalele mumba makuta avula. Yajiya gukhala egi wakhalele nji muvua matululu a makuta ene tangua akhalele mubua mu gibambelo gia mbongo.

17. Ndaga itshi yatshitshile mukhetu wa gafunda idi mu Mako 12:42?

¹⁷ Tanga Mako 12:42. Gungima, Yesu wamonele mukhetu mumoshi. Mukhetu muene wakhalele phutu, wakhalele nji “mukhetu wa gafunda.” (Luka 21:2) Wakhalele nu lamba diakola, yakhalele nji lamba gudi muene ha guheta makuta a gusumba ima akhalele nayo funu. Tangua mukhetu muene ahetele gu gibambelo gia mbongo, wambile mbongo mbadi mu gibambelo giene. Yajiya gukhala egi luholo makuta ene akhalele azonda, ambilego nga matululu tangua abuile mu gibambelo giene. Yesu wajiyile guvula gua makuta ambile mukhetu muene mu gibambelo gia mbongo. Akhalele makuta mbadi a utadi. Makuta ene akhalelego nga nu ndando ya gusumba gambodio nga gamoshi ganyi gakhadile ima ya gudia ya ndando yaleba.

18. Ha gutadila Mako 12:43, 44, ndaga itshi Yesu wazuelele mukunda nu musomonyi wambile mukhetu owu wa gafunda?

¹⁸ Tanga Mako 12:43, 44. Yesu wadihudile muavula mu ndaga yakadigile mukhetu owu. Hene, watamegele alandudi enji, waalezele mukhetu muene nu waawambelele egi: ‘Makuta ambi mukhetu owu wa gafunda, adi avula gubalega anyi athu agasue ambi.’ Wazuelele luko egi: ‘Mukut’awo agasue [enya umonyi] azangula ndambo ya mbongo ya umonyi wawo ha gumba. Uvi mukhetu owu wa gafunda udi phutu; uvi muene wamba ima yenji yagasue akhalele nayo.’ Tangua mukhetu owu wa gafunda wahanele makuta enji agasue akhadile nawo, wamonesele lume egi wakhadile gusha mutshima egi Yehowa mbawumukuatesa.—Ngi. 26:3.

19. Longo ditshi dia ndando tuajiya guzula mu mbimbi jiazuelele Yesu mukunda nu mukhetu wa gafunda?

¹⁹ Kalegela ndaga watangi mu lumene elu mu monyo waye. Dihule egi: ‘Longo ditshi ngajiya guzula mu mbimbi jia Yesu mukunda nu mukhetu wa gafunda yonu wakhalele phutu?’ Tangiza gale mukhetu muene wa gafunda. Yajiya gukhala egi wakhalele mutshigina guhana Yehowa ima yavula. Uvi wahanele genji Yehowa inyi akhalele nayo. Yesu nji wajiyile egi musomonyi wa mukhetu muene wakhalele nu ndando yavula gu meso a Sh’enji. Longo tuajiya guzula didi egi: Yehowa wana gusuanguluga muavula tangua tuana gumuhana ima yetu ya ndando. Ima yene idi: Gumukalegela mudimo nu mutshima wetu wagasue nu monyo wetu wagasue. (Mat. 22:37; Kol. 3:23) Yehowa wana suanguluga muavula tangua ana gutumona mutshita yagasue tuajiya gukalagala! Tuajiya gumukalegela tangua tuana gudihana muavula mu mudimo wa gulongesa nu tangua tuana guya mu gudibungisa.

20. Luholo lutshi wajiya gukalegela longo tuazula mu lumene lua mukhetu wa gafunda? Hana gifezegeselo.

 ²⁰ Luholo lutshi wajiya gukalegela longo didi mu lumene lua mukhetu wa gafunda? Tangiza athu anyi udi mujiya egi ajiya guheta ngolo gula waawunguluisa (waayabuluisa) egi Yehowa wana suanguluga mu ndaga jiagasue ana gumukadigila. Ha gufezegesa, udi mujiya phangi wa mukhetu wa gukola wana gudivua hakhenji handaga ashigo nu sante yawaha nga ndo ashigo luko nu ngolo jia guya mu mudimo wa gulongesa ba? Nga ndo, udi mutangiza phangi wa yala wana khala nu ukhashi mu muila nu walebele gale muila handaga ashigo luko nu luholo lua guya mu gudibungisa mu Inzo ya Ufumu ba? Kuatesa aphangi a luholo elu nu mbimbi “jiabonga jidi muhana ngolo.” (Ef. 4:29, NWT) Awambele nji longo dia ndando tuazudi mu lumene lua mukhetu wa gafunda munu wakhalele phutu. Mbimbi jiaye jiayiya guahana gikhesa, jiajiya nji guakolesa ha gujiya gamba Yehowa wana gusuanguluga tangua tuana gumuhana ima yetu ya ndando. (Ish. 15:23; 1 Tes. 5:11) Gula udi mushimana athu ako luholo ana hana ima yawo ya ndando gudi Yehowa ngatshima idi yazonda, wana monesa diago egi udi mulandula nganyo jia Yesu.

21. Desizio ditshi wazula?

²¹ Tudi nu gusuanguluga luholo tudi nu ba Evanjile ana gutuwambela mene jiavula jiatadila monyo wa Yesu jiana gutukuatesa ha gulandula gifezegeselo gienji nu ha gulandula nganyo jienji muabonga! Muajiya gulonguga ba Evanjile mu Gukombelela guenu gua mu Fami. Tushigo naye gujimbila gamba, ha gukotelesa muabonga ndaga tudi mutanga, tudi naye gutangiza gifua ndaga jiene jidi mubalega mangino, tudi naye nji gujikalegela mu monyo wetu. Tudi naye gulandula ndaga jiakalegele Yesu, tudi naye nji gutegelela ndaga jiazuelele muene. Mu longo dialandula, mbatuzuelela malongo tuajiya guzula mu mbimbi jia gisugishilo jiazuelele Yesu gutuama egi afue.