Tangua ngatagenesele ivo 13, ufuta wami nu Yehowa wasendesele guleba. Yakhalele ndaga ya gikenene lume. Mafuta ami a khalasa akhadile mutshita ndaga jiagasue akhalele mutshigina, ame nji ngakhalele mutshigina gukhala gifua ene. Ngasendesele gumona mikhuala ya mvuaji jiami nu ya Uklisto egi idi yakola, ngakhadile nji mutangiza egi gukombelela Yehowa gudi mudimo wakola. Ngakhalele gami mutshigina egi Yehowa wakhala guene, uvi ngakhalelego luko gudivua hehi nenji.

Ngabembelego mudimo wa gulongesa, uvi ngakhalelego guwukalagala muavula. Luko, ngakhalelego gudilondega ha guya mulongesa, ngakhalele muvua sonyi ha gusendesa guta maga nu athu. Gishina giene, ngakhalelego muvutugila athu, ngakhalelego nji nu athu a gulongesa Biblia. Ngakhalelego nu gusuanguluga mu mudimo wa gulongesa. Ngadihudile egi: ‘Luholo lutshi muthu wajiya gulandula gulongesa phoso nu phoso nga mbeji nu mbeji mu luholo elu?’

Tangua ngatagenesele ivo 17, ngakhalele mutshigina gudikhadila, hene ngakatugile gumbo dietu ha guya gu Australie. Ndaga yene yasagesele mvuaji jiami muavula. Akhalele gawo nu gikenene, uvi akhalele musha mutshima egi gula ngaya guene, mbangulandula gukombelela Yehowa.

 Tangua ngahetele gu Australie, ngakhalelego diago mukombelela Yehowa muavula. Ngakhalelego nji muya mu gudibungisa tangua diagasue. Ngakuatele ufuta nu mavuala ako anyi akhalele musuanguluga ha guya mu gudibungisa mu ngueze, uvi gungima gila azoga ayi gawo munua matombe nu gukina mu ba boîte de nuit. Tangua ngana tangiza ndaga jiene, ngana kotelesa egi ngakhalele kulu mu giamatshidia, kulu mu ndaga jia ha mavu awa. Uvi, ngakhalelego diago mujiya fundo diami.

Ivo mbadi gungima, ngataganele nu phangi mumoshi wa mukhetu munu wangukuatesele ha gutangiza luholo ngakhalele mujinga, ikhale muene hakhenji gakoteleselego ndaga yene. Ngakhalele mujinga mu inzo imoshi nu aphangi akhetu 5, mukut’etu agasue tuakhalele undumbu. Tuatamegele mutadi muwendji nu mukaji’enji Tamara ha gukhala gumbo dietu mukunda nu phoso imoshi. Tuakhalele mubalegesa tangua nu gulela hamoshi nu Tamara tangua mulum’enji wakhalele muya mukalagala ndaga jia mu hungu. Yakhalele gungusuanguluisa diago. Tamara wakhalele mukotelesa athu muabonga nu yakhalele nji yaleba ha guta nenji maga. Ngakhadile diago gudihula luholo muthu udi nu ndaga jiavula jia gukalagala mu mudimo wa Yehowa wajiya gukhala nu tangua dia gubalegesa nu athu ako.

Tamara wakhalele nu gikhesa giavula. Guzumba guenji mukunda nu giamatshidia nu guya mulongesa guangutumine ha gulandula gifezegeselo gienji. Wakhalele nu gusuanguluga ha gudihana muavula mu mudimo wa Yehowa, tangua ngakhalelego musuanguluga nu mudimo wene. Makalegelo enji nu gusuanguluga guenji guasombegesele diago monyo wami. Gifezegeselo gienji giangutumine ha gutangiza giamatshidia egi gia ndando: Yehowa wana tshigina egi mukut’etu agasue tumukombelele “nu gusuanguluga”, “nu jingimbo jia gusuanguluga.”—Ngi. 100:2.

Ngakhalele mutshigina gukhala nu gusuanguluga gifua Tamara, uvi ngakhalele naye gusombegesa ndaga jiko. Yanguzudile tangua diavula, uvi ngayile nu gusombegesa mage-mage. Ngasendesele gudilondega gutuama dia guya mu mudimo wa gulongesa, ngabuile nji muvundji wa njila wa tangua diazonda. Gukalagala ngenyi guangukuatesele ha  gutuna guvua woma nu ha gudivua muabonga. Luholo ngakhalele mukalegela Biblia muavula mu mudimo wa gulongesa, yangukuatesele ha gukhala nu gusuanguluga guavula. Matangua azonda gungima, ngasendesele gukalagala mudimo wa muvundi wa njila mbeji yagasue.

Ngakuatele ufuta nu athu a indongo yagasue anyi akhadile mukalegela Yehowa muavula nu akhadile nu gusuanguluga mu mudimo wenji. Gifezegeselo giawo giabonga giangukuatesele ha gutangiza ndaga jidi diago nu ndando mu monyo wami nu ha gusendesa gutanga Biblia lusugu nu lusugu. Ngasendesele guzumba muavula mudimo wa gulongesa, ngasendesele nji mudimo wa muvundji wa njila wa tangua diagasue. Mukunda nu giphungu gia thomo gungima dia ivo yavula, ngakhalele diago nu gusuanguluga gua gudivua egi ngudi gumbodietu mukatshi dia hungu.

Givo gimoshi gungima, ngadimonele nu Alex, wakhalele muzumba Yehowa muavula nu mudimo wa gulongesa. Wakhalele mukuateshi wa mudimo nu muvundji wa njila ivo 6. Alex walongesele nji gu Malawi handaga akhalele nu funu ya alongeshi. Ufuta wenji nu ba misionere wamukuatesele ha gulandula gusha mudimo wa Yehowa ha fundo dia thomo mu monyo wenji.

Mu 2003, ngadizudile mu ulo nu Alex, tualandudile nji gukalagala mudimo wa tangua diagasue. Tualongugile ndaga jiavula diago. Yehowa nji watushimbigile muavula lume.

Mu 2009, atutamegele ha gubua ba misionere gu Timor-Oriental, gu Indonésie. Ndaga yene yatusuanguluishile muavula, uvi tuakhadile nji nu woma. Gungima dia mbeji 5, tuahetele gu Dili kapitale, ga Timor-Oriental.

Luholo luetu lua gujinga guene luakhalele lua gudisha. Tuakhalele naye gujidila nu kutime jiawo, zuelelo diawo, ima ya gudia nu luholo luawo lua gujinga. Tangua tuakhalele muya mu mudimo wa gulongesa, tuakhalele mumona athu akhalele diago phutu, anyi alongugilego muavula, ako nji akhalele mumonesewa lamba. Tuakhalele mumona athu anyi asagesewe  ikhale mumuila nga mu Matangi mukunda nu ita nga ndaga jiko jia khuta. *

Mudimo wa gulongesa wakhalele mukalegewa muabonga diago! Ha gufezegesa ngatagenele nu mona mukhetu mumoshi jina dienji Maria * wakhalele nu ivo 13. Mama wenji wakhadile wafile gale, nu akhalelego gudimona nji nu tata wenji muavula. Maria akhalelego mujiya ndaga adi naye gukalagala mu monyo wenji gifua ana avula a gindongo gienji. Ngumuwunguluga lusugu lumoshi luakhalele muene mudila tangua gakhalele gungutela luholo luakhalele muene gudivua. Ngakoteleselego ndaga gakhalele gunguwambela, handaga ngakhaleIego mujiya zuelelo diawo kiawaha. Ngakombelele Yehowa hagula wajiya gungukuatesa ha gumuhana gikhesa, ngasendesele gumutangela ba verse ajiya gumukuatesa. Ivo yazonda gungima ngamonele luholo giamatshidia giasombegesele makalegelo a Maria nu monyo wenji. Wabatijiwe gale, mangino wana longesa athu ako Biblia. Maria wahetele gale fami yakoma ya akombeledi a Yehowa anyi ana gumuzumba muavula.

Yehowa washimbigile mudimo wa gulongesa gu Timor-Oriental. Ngatshima alongeshi avula adi nu ivo phamba 10 mu giamatshidia, avula mukatshi diawo adi avundji a njila, akuateshi a mudimo nga akulu. Ako ana kalagala gu ba antenne de traduction nu ana kuatesa ha gubalumuna mikanda yetu mu mazuelelo a guene. Ngana khala nu gusuanguluga ha guamona muyimba mu gudibungisa, ha gumona gusuanguluga gu phala jiawo nu ha guamona mulandula gukula mu nyuma.

Luholo luetu lua gujinga gu Timor-Oriental luakhalele diago lua gudisha nu lua gu Australie. Uvi, tuakhalele nu gusuanguluga guavula. Matangua ako, tuakhalele mutshita ba vuayaje mu gamiyo gazonda gazala pha nu athu nu jishui nu ima iko ya gudia akhalele mukatuga nayo gu zando. Gudi nu masugu ako tuakhalele mulongesa muthu Biblia mu inzo ya mavu yazonda yila tshuya-tshuya mukatshi, yakhalele nu susua muene. Ngatshima tuataganele nu malamba, uvi ngajiya guzuela egi, ‘Monyo wami udi wabonga diago!’

Tangua ngana tangiza ndaga jiene, ngana hana mvuaji jiami mersi luholo angulongesele njila jia Yehowa nu luholo angukuatesele mu tangua ufuta wami nu Yehowa wakhalele waleba. Ngana mona diago gutaganesewa gua longo didi mu Ishima 22:6 mu monyo wami. Tata nu mama ana khala lume nu gusuanguluga tangua ana mona luholo ame nu Alex tudi mulandula gukalegela Yehowa. Sendese 2016, tuana kalagala mudimo gifua atadi awendi mu terituare ya filiale ya Australasie.

Yana khalago ndaga yaleba ha gutshigina egi ivo yavula gutuama ngakhalelego muzumba mudimo wa gulongesa. Uvi mangino, ngana suanguluga diago nu mudimo wene! Ngakotelesele egi ikhale ndaga jitshi jiajiya gukalegewa mu monyo wetu, tuajiya gukhala nu gusuanguluga gua giamatshidia, phamba gula tudi mukalegela Yehowa nu mutshima wetu wagasue. Yadiago, ivo 18 ngabalegesa mu mudimo wagulongesa hamoshi nu Alex, idi ivo yabalega gubonga ya monyo wami. Mangino ngudi mukotelesa diago giamatshidia muyimbi wa ngimbo Davidi awambelele Yehowa egi: ‘Athu agasue adi mulengela gudi aye mbakhala nu gusuanguluga. Mbayimba ngimbo jia gusuanguluga masugu agasue. . . . Luko, athu anyi ana zumba jina diaye, mbakhala nu gusuanguluga.’—Ngi. 5:11.