Mukunda natshi Yesu wazuelele mbimbi jia Davidi jidi mu Ngimbo 22:1 gutuama egi afue?

Gutuama egi Yesu afue, wazuele mbimbi jidi mu Matayo 27:46 egi: “Nzambi wami, Nzambi wami, mukunda natshi wangubemba?” Tangua Yesu wazuelele mbimbi jiene, wataganesele mbimbi jia muyimbi wa ngimbo Davidi jidi mu Ngimbo 22:1. (Mako 15:34) Tushigo naye gutangiza egi Yesu wazuelele mbimbi jiene handaga Yehowa wamutunyile nga ndo handaga gutshigina guenji gudi Yehowa gualebele mu tangua diene. Yesu wakhadile mujiya muabonga gishina wakhalele naye gufua; wakhalele nji hehi ha gufua ngenyi. (Mat. 16:21; 20:28) Wakhadile nji mujiya egi mu tangua diene, Yehowa wakhalele naye gubemba gumubamba. (Yobo 1:10) Yehowa wabembele gubamba Yesu, hagula Yesu amonese egi wajiya gusala wagujinginyina gudi muene ikhale watagana nu malamba a luholo lustshi.—Mako 14:35, 36.

Na mukunda n’atshi Yesu wazuelele mbimbi jidi mu Ngimbo 22:1? Tushigo mujiya diago ndaga yamutumine ha guvutugila mbimbi jiene, uvi yajiya gukhala mukunda nu ndaga eji jialandula. *

Hazuelele Yesu mbimbi jiene, yajiya gukhala egi wakhalele mutshigina gumonesa egi Yehowa mbaashigo gumukuatesa gu gufua guenji. Yehowa gakhalelego naye gukuatesa Yesu tangua diahanele muene gibawu gia mulambu wenji. Wakhalele naye gufua ‘ha fundo dia athu agasue.’—Heb. 2:9.

Hazuelele Yesu mbimbi jia mukanda wa ngimbo, yajiya gukhala egi watshiginyile gukuatesa  athu ha gutangiza mbimbi jiagasue jia mukanda wa Ngimbo. Hakhalele Yesu ha mavu, enya Yuda akhalele nu khadilo dia gukuata mbimbi jia mukanda wa ngimbo mu muto. Tangua akhalele mutegelela verse imoshi ya ngimbo, yakhalele guawunguluisa (kuayabuluisa) mbimbi jiagasue jia gitshinyi giene gia mukanda wa ngimbo. Gila matangi awa ene Yesu wakhalele nawo mu muto, yajiya gukhala egi wakhalele mutshigina gukuatesa alandudi enji a enya Yuda ha guwunguluga profesi jiagasue jidi mu mukanda wa ngimbo jidi muzuelela ndaga jiatadila gufua guenji. (Ngi. 22:7, 8, 15, 16, 18, 24) Luko, verse jia gisugishilo jia gitshinyi giene gia mukanda wa ngimbo, jiana tumbuisa Yehowa nu jiana monesa egi muene udi Fumu ha mavu agasue.—Ngi. 22:27-31.

Havutugidile Yesu mbimbi jia Davidi jiene, wakhalele mutshigina gumonesa egi ashigo muthu wabola. Gutuama egi Yesu ashiyiwe, manzuji a gikombelelo gia enya Yuda (Sanhédrin) amusophesele mu luholo luabola. Amufuishile milonga handaga akhalele muzuela egi Yesu udi mushinga Nzambi. (Mat. 26:65, 66) Manzuji ene atumagelego mikhuala tangua asophesele Yesu mu phipha. (Mat. 26:59; Mako 14:56-59) Hene, tangua Yesu wazuele egi: “Nzambi wami, Nzambi wami, mukunda natshi wangubemba?”, yajiya gukhala egi wakhalele mutshigina gumonesa athu egi wakalegelego nga ndaga imoshi yabola hagula amushiye ngenyi.

Hazuelele Yesu mbimbi jiene, yajiya gukhala egi wakhalele muwunguluisa athu egi lamba diamonele Davidi, diakoteleselego egi Yehowa wamutunyile. Muhu wahudile Davidi wakhalelego mumonesa egi gakhalelego luko nu gutshigina gudi Yehowa. Gungima dia guhula muhu wene, Davidi wasonegele egi wakhalele nu felela egi Yehowa wajiya guhuluisa akombeledi enji. Yehowa walandudile nji gumukuatesa. (Ngi. 22:23, 24, 27) Luholo lumoshi nji Yesu “Mun’a David” wakhalele naye gumona lamba ha mutshi wa lamba, uvi ndaga yene ishigo mukotelesa egi Yehowa gakhalelego luko gumutshigina.—Mat. 21:9.

Yajiya gukhala egi Yesu watshiginyile gumonesa luholo wakhalele gudivua, handaga mu tangua diene Yehowa wabembele gumubamba, hagula gutshigina guenji gulolewe diago mu luholo luatagana. Felela dia thomo dia Yehowa diakhadilego egi Mun’enji amonesewe lamba, gungima afue. Uvi halumbugile Adama nu Eva, yatogele diago egi Yesu afue. Yesu gakalegelego gubola, uvi wakhalele naye gumonesewa lamba nu gushiyiwa ha guhana mvutu gu mihu ya Satana nu ha gufuta gibawu mukunda nu guhuluisa athu mu uhiga wa gufua nu wa masumu. (Mako 8:31; 1 Phet. 2:21-24) Ndaga yene yakhadile naye gukalegewa ngenyi phamba gula Yehowa wabemba gubamba Yesu mukunda nu tangua diazonda mukunda nu giphungu gia thomo mu monyo wenji.

Yajiya nji gukhala egi Yesu wakhadile mutshigina gukuatesa alandudi enji ha gutangiza gishina Yehowa wahanele njila egi afue ha mutshi wa lamba. * Yesu wakhadile mujiya egi gufua ha mutshi wa lamba gifua mbundudi guakhadile naye gukhakhuisa athu avula. (1 Kol. 1:23) Gula alandudi enji adihana muavula ha gutadila phamba gishina wakhadile naye gufuila, mbayakuatesa ha gujiya ukoteleshi wa giamatshidia wa gufua guenji. (Gal. 3:13, 14) Hene, mbaajiya egi wakhalelego mbundudi, uvi wakhadile muhuluishi wawo.

Ikhale gishina gitshi Yesu wavutugidile mbimbi jiene, wakhalele mujiya egi gufua guenji ha mutshi wa lamba guakhalele ha gutaganesa gutshigina gua Yehowa. Matangua azonda gungima dia guzuela mbimbi jidi mu mukanda wa ngimbo, Yesu wazuelele egi: ‘Yatagenesewa!’ (Yone 19:30; Luka 22:37) Yadiago, habembele Yehowa gubamba Yesu mukunda nu tangua diazonda, wamuhanele njila ya gutagenesa muabonga ndaga jiagasue jiamutumile muene ha gutshita ha mavu. Yahanele nji Yesu njila ha gutaganesa ndaga jiagasue jiasonegewe mukunda nu muene ‘mu Mukhuala wa Moise, mu mikanda ya Baprofete nu mu Ngimbo.’—Luka 24:44.