WANA gudimona egi wakhala nu khadilo dia guhana mersi ba? Muthu wagasue mukatshi dietu udi naye gutangigiza muhu owu. Biblia yadiangele guzuela egi, mu masugu a gisugishilo, athu ‘mbaahanyigo mvudi.’ (2 Tim. 3:2) Yajiya gukhala egi wataganele gale nu athu ako ana mona egi athu adi naye guaatshitshila ndaga nga guaahana ima. Athu ene ana mona egi ashigo gawo nu funu ya guhana mersi gu ima ana guheta. Wana tshigina gukhala nu athu a luholo elu ba?

Uvi akombeledi a Yehowa ana landula ndaga jiazuelele Biblia egi: ‘Khalenu muhana mvudi yavula.’ Luko egi, tudi naye ‘guhana mersi gu ndaga jiagasue.’ (Kol. 3:15; 1 Tes. 5:18) Yadiago, gukudisa khadilo dia guhana mersi gudi ndaga yabonga mukunda nu esue. Gudi nu ishina yavula yana gututuma ha guhana mersi.

Gishina gia thomo giana gututuma ha gukhala nu khadilo dia guhana mersi gidi egi, khadilo diene diana tukuatesa ha gukhala nu gusuanguluga. Gula muthu wahana mersi mukunda nu gima gahetshi, wana gudivua muabonga. Muthu yonu wamuhanyi gima giene, wana gudivua nji muabonga. Mukunda natshi guhana mersi guana tusuanguluisa nu guana suanguluisa nji athu ako? Tufezegese gale. Gula muthu wazula tangua dia gugukalegela gima gimoshi ngenyi, idi mumonesa egi aye udi nu ndando yavula gu meso enji. Muthu muene udi gudisagesa mukunda nu aye. Gula wakotelesa ngenyi, mbawusuanguluga lume. Tudi mutangiza egi, Luta nji wasuangulugile tangua Boaza amuhanele ima. Idi yadiago egi, Luta wasuangulugile muavula ha gumona egi Boaza wakhalele gudisagesa mukunda nu muene.—Luta 2:10-13.

Idi ndaga ya bonga gula tudi muhana Nzambi mersi. Idi yadiago egi, watangijile gale ima yavula ya mu nyuma nga ima iko Nzambi atukalegele gale nu inyi gadi gutukadigila mangino. (Mikh. 8:17, 18; Makal. 14:17) Uvi, uyitangigizago phamba holu-holu. Udi naye guzula tangua ha gutangigiza muavula gubonga guagasue guagukadigile gale Nzambi nu ogu gakadigidile gale athu ako wana zumba. Gutangigiza khadilo dia guhana dia Mufugi waye, mbagugutuma ha gumuhana luko mvudi yavula. Mbagukolesa nji gutshigina guaye egi muene waguzumba nu wana suanguluga nu ndaga wana tshita.—1 Yone 4:9.

Uvi tusugigo phamba ha gutangigiza khadilo dienji dia guhana nu gubonga ana gutukalegela. Tudi naye nji gumuhana mvudi yavula mukunda nu ima yene. (Ngi. 100:4, 5) Athu avula ana zuela egi, “guhana mersi gudi muthu wagukalegela gubonga, guana gukuatesa ha gukhala nu gusuanguluga.”

Gishina giko udi naye gukhalela nu khadilo dia guhana mersi gidi egi, khadilo diene diana kolesa ufuta. Mukut’etu agasue tuana tshigina egi athu ako atushimane. Jiya egi, gula wahana muthu mersi mukunda nu ndaga yabonga gakalagala, muyadi wenu mbamubua mafuta akola. (Lomo 16:3, 4) Luko, athu adi nu khadilo dia guhana mersi, akhala hehi ha gukuatesa athu ako. Ana gumona ndaga jiabonga jiana guaakalegela athu ako, ngenyi yana guaatuma ha gutshitshila nji athu ako ndaga jiabonga. Yadiago, gukuatesa athu ako, guana bata gusuanguluga. Yesu wazuelele egi: ‘Guhana guana gusuanguluisa muavula gubalega guzangula.’—Makal. 20:35.

Mulongeshi Robert Emmons, wa gu Université ya Californie walongugile khadilo dia guhana mersi. Udi muzuela gamba: “Muthu udi nu khadilo dia guhana mersi, wana jiya egi gula wahana mangino, lusugu luko muene nji mbawukhala nu funu egi athu ako amuhane.” Idi yadiago egi, muthu wagasue mukatshi dietu nga udi kenji nanyi, wakhala nu funu ya ukuateshi wa athu ako mu maluholo akudisha. Tangua diko, tuakhala nu funu ya ukuateshi  wa athu ako ha guheta ima ya gudia nga ha gusagewa. (1 Kol. 12:21) Muthu udi nu khadilo dia guhana mersi, wana suanguluga nu ima yana mukalegela athu ako. Aye giwa, wana suanguluga nu ima yana gugukalegela athu nu guaahana mersi ba?

Gima giko giajiya gututuma ha gukudisa khadilo dia guhana mersi gidi egi, khadilo diene diana tukuatesa ha guhaga matangi etu gu makalegelo abonga a athu ako, uvi ndo ha gutala phamba guleba guawo. Matangi’etu akhala gifua musalo wana balegesa phupha, uvi wana bamba senge. Gila tudi nu khadilo dia guhana mersi, matangi’etu mbaabamba phamba ima yabonga yana gutukalegela athu ako, uvi mbaabalegesa guleba guawo. Hene, gula udi nu khadilo dia guhana mersi, mbawumona ndaga jiabonga gudi athu ako. Gula mu lujingu luaye udi nu khadilo dia guhana mersi, mbayigukuatesa ha gulandula mbimbi jiazuelele mupostolo Phaula egi: ‘Suangulugenu mu Fumu tangua diagasue.’—Fili. 4:4.

Mbawumona egi khadilo dia guhana mersi diana kuatesa ha gukatula matangi abola. Athu adi nu khadilo edi, anago guvuila athu ako fuwa nga khabu. Luko, anago gukhala nu nzala ya ima ya vula-vula. Uvi, ana suanguluga nu ima adi nayo, anakambago tangua diagasue ha guheta ima ya vula-vula.—Fili. 4:12.

Luholo udi Muklisto, udi mujiya egi Satana wana tshigina egi malamba udi mutagana nawo mu masugu awa a gisugishilo agulebese muila. Satana mbawusuanguluga muavula gula wamona egi ushigo luko nu gusuanguluga nu udi mulaba gudila tangua diagasue. Gula watshita ngenyi, mbayikhala lamba egi athu agutegelele tangua udi guaalongesa lukuma luabonga. Khadilo dia guhana mersi diana gudivua kiawaha nu bundu dia nyuma ya Nzambi. Tufezegese gale. Tuana suanguluga tangua tuana mona ndaga jiabonga jiana tukalegela Nzambi. Luko, tuana gusha gutshigina egi ndaga atulayele mbajitagenesewa.—Gal. 5:22, 23.

Gula udi mukombeledi wa Yehowa, idi yadiago egi wasuanguluga lume nu ndaga tuamona mu longo edi jidi muzuelela khadilo dia guhana mersi. Uvi, tangua diagasue yakhala ndo mulonga waleba ha guhana mersi nu gutadila lujingu mu luholo luawaha. Ubembigo egi ndaga jiene jigulebese muila. Wajiya gukudisa nu gubamba khadilo dia guhana mersi. Luholo lutshi? Lusugu nu lusugu, zula tangua dia gutangigiza ndaga jia lujingu luaye jiajiya gugutuma ha guhana mersi. Gula watshita ngenyi, mbayikhadigo luko lamba ha gumonesa khadilo dia guhana mersi. Ngenyi, mbawukhala nu gusuanguluga guavula gubalega athu ana haga matangi phamba gu malamba awo. Hene, khala mutangigiza ndaga jiagasue jiabonga jiana gugutshitshila Nzambi nu athu ako, jinyi jiajiya gugusuanguluisa nu guguhua ngolo. Wajiya gusendesa gusonega ndaga jiene. Sonega ndaga mbadi nga thathu jiajiya gugutuma ha guhana mersi lusugu nu lusugu.

Athu ana longuga ndaga jiatadila khadilo dia guhana mersi, ana zuela egi: “Gula tudi muhana athu mersi tangua diagasue, khadilo diene mbaditungina mu wongo, mbatujidila nadio. Ngenyi, mbayikhadigo lamba ha guhana athu mersi.” Muthu wana hana athu ako mersi, wakhala nu gusuanguluga. Hene, khala mutangigiza ndaga jiagasue jiabonga jiagukadigile gale athu ako, suanguluga najio, nu khala muhana mersi tangua diagasue! Gula muthu wagukalegela ndaga nga ndo waguhana gima, utangizago egi idi ginemo gienji ha gugutshitshila ngenyi. Uvi khala ‘muhana Yehowa mersi handaga muene udi wabonga.’ ‘Khala muhana mersi gu ndaga jiagasue.’—1 Gudi. 16:34; 1 Tes. 5:18.