1-2. Ha gutadila lumene lua phangi Angelito, itshi muthu wagasue mukatshi dietu adi naye gutshita?

MVUAJI jiaye jiakhala Matemue a Yehowa ba? Gila idi ngenyi, jiya egi wabuilego futa dia Yehowa handaga ene nji adi mafuta enji. Ikhale mvuaji jietu jiana kombelela Nzambi nga ndo, muthu wagasue mukatshi dietu, udi naye hakhenji gukuata ufuta nu Yehowa.

² Tutadilenu gifezegeselo gia phangi Angelito, wakudile mu fami ya Matemue a Yehowa. Tangua gakhalele mona galenge, gakhalelego mumona diago Nzambi gifua futa dienji. Udi muzuela gamba: “Ngakhalele mukombelela Yehowa handaga ngakhalele mumona enya fami yami akhalele gumukombelela.” Uvi, Angelito wazudile desizio dia gutanga Biblia muavula nu gutangigiza ndaga gakhalele mutanga. Luko, wasendesele gukombelela Yehowa muavula. Gubonga gutshi gahetele? Udi muzuela gamba: “Ngakotelesele egi ha gukhala nu ufuta wabonga nu Yehowa, ngudi naye gumujiya muabonga ame hakhami.” Lumene lua Angelito ludi gututuma ha gudihula egi: Gudisha gutshi gudi mukatshi dia gujiya ndaga jiazonda jiatadila Yehowa nu gumujiya muabonga? Luholo lutshi tuajiya gujiya Yehowa muabonga?

3. Gudisha gutshi gudi mukatshi dia gujiya ndaga jiazonda jiatadila Yehowa nu gumujiya muabonga?

³ Tuajiya gutangiza egi tuana gujiya Yehowa handaga tudi mujiya jina dienji nu ima iko gazuelele nga gatshitshile. Uvi gujiya Yehowa muabonga gudi mutoga ima yavula. Tudi naye guzula tangua diatagana ha gujiya ndaga jia Yehowa nu makalegelo enji abonga. Gungima, tuajiya gukotelesa mukunda natshi  Yehowa gazuelele nga gatshitshile ndaga. Gutshita luholo elu mbagutukuatesa ha gujiya gila muene wana tshigina matangi’etu, nu desizio jietu, nu ndaga tuana tshita. Gula tuakotelesa ndaga jidi gututoga Yehowa, mbatujitshita muabonga.

4. Luholo lutshi gutadila ifezegeselo idi mu Biblia guajiya gutukuatesa?

⁴ Athu ako ajiya gutusegulula handaga tudi mukombelela Yehowa. Ajiya gutusagesa luko muavula gula amona egi tuasendesa gudibungisa nu akombeledi a Yehowa. Uvi, gula tuadifelela gudi Yehowa, muene mbagatubembigo nga hazonda. Mbatusendesa gukuata ufuta nu Nzambi, enji ufuta wene mbawusala mayilago. Tuajiya lume gujiya Yehowa muabonga ba? Ayi! Ifezegeselo ya athu ashigo atagana, gifua Moize nu Fumu Davidi, idi mumonesa egi tuajiya gujiya Yehowa muabonga. Hatudi mutadila ndaga jiatshitshile ene, tuza muheta mvutu gu mihu eyi mbadi: Luholo lutshi ene ajiyile Yehowa? Ifezegeselo yawo idi gutulongesa itshi?

5. Itshi yatombele Moize ha gutshita?

⁵ Moize watombele ha gukombelela Yehowa. Tangua Moize ataganesele ivo 40, watombele ha gudibungisa nu akombeledi a Nzambi, enya Isalele, ha fundo dia gujiyiwa egi “mun’a mona mukhetu wa Pharaon.” (Heb. 11:24) Moize watunyine lukuma lunu luakoma. Tangua Moize ayile gu khanda ya enya Isalele, wajiyile egi Pharaon mbawuvua khabu jiakola, handaga wakhalele fumu wakoma, enji enya gu Egypte akhalele gumuzula gifua nzambi. Yamonesele egi Moize wakhalele nu gutshigina guakola! Moize wadifelele gudi Yehowa. Gudifelela guene guamukuatesele ha gukuata ufuta wakola nu Yehowa, enji ufuta wawo wasalele monyo wenji wagasue.—Ish. 3:5.

6. Gifezegeselo gia Moize gidi gutulongesa itshi?

⁶ Lumene lua Moize ludi gutulongesa itshi? Gifua Moize, mukut’etu agasue tudi naye guzula desizio dia gutomba gukombelela Nzambi nu gudibungisa nu akombeledi enji. Tuajiya gutuna lukuma nga ndaga jiko jiavula ha gukombelela Nzambi. Luko, athu anago gujiya Yehowa ajiya gutuluisa. Uvi, gula tuasha mutshima wetu gudi Shetu wa mu dilu, muene mbawutukuatesa!

7-8. Moize walanduile gulonguga itshi?

⁷ Moize walanduile gulonguga makalegelo a Yehowa nu gutshita gutshigina guenji. Tangua Yehowa alezele Moize ha gutuameza enya Isalele ha guaazola mu uhiga gu Egypte, Moize wamuwambelele egi gakhalelego watagana ha guaatuameza. Nzambi wamutayele nu khenda jiagasue, wamukuatesele. (Guz. 4:10-16) Hene, Moize wabingile ha guwambela Pharaon ndaga jiazuelele Yehowa. Hangima, Moize wamonele ngolo jia Yehowa tangua gahuluishile enya Isalele nu gashiyile Pharaon nu masut’enji mu Kianga gia Benga.—Guz. 14:26-31; Ngi. 136:15.

⁸ Gungima dia guzola enya Isalele mu Egypte, asendesele gufueta Moize nu gumuhagela matululu. Uvi Moize wamonele guhuiminyina guakoma guakhalele nago Yehowa mukunda nu athu azolele muene mu uhiga. (Ngi. 78:40-43) Moize wamonele luko gudibulumuisa gua Yehowa luholo amuvuidile ha gutuna gushiya enya Isalele.—Guz. 32:9-14.

9. Ha gutadila Hebelu 11:27, luholo lutshi ufuta wa Moize nu Yehowa wakhalele wakola?

⁹ Gungima dia guzoga mu Egypte, ufuta wa Moize nu Yehowa wakolele mangololo; yakhalele gifua Moize udi mumona sh’enji wa mu dilu nu meso enji. (Tanga Hebelu 11:27.)  Ha gumonesa egi ufuta wa Moize nu Yehowa wakhalele wakola, Biblia idi muzuela gamba: ‘Yehowa wakhalele muta maga nu Moize phala nu phala, gifua muthu udi muzuela nu futa dienji.’—Guz. 33:11.

10. Ha gujiya Yehowa muabonga, itshi tudi naye gutshita?

¹⁰ Ndaga eyi idi gutulongesa itshi? Ha gujiya Yehowa muabonga, tushigo naye phamba gujiya makalegelo enji, uvi tudi naye nji gukalagala gutshigina guenji. Mangino, gutshigina gua Yehowa gudi egi ‘athu a maluholo agasue ahuluishiwe nu ateme gukotelesa ndaga ya giamatshidia.’ (1 Tim. 2:3, 4) Ha gumonesa egi tudi mutshita gutshigina gua Nzambi, tudi naye gulongesa athu ako ndaga jia Yehowa.

11. Tangua tuana longesa athu ako ndaga jia Yehowa, luholo lutshi tuana gumujiya muabonga?

¹¹ Iphungu yavula, tuana jiya Yehowa muabonga tangua tuana longesa athu ako ndaga jienji. Ha gufezegesa, tuana mona muabonga khenda jia Yehowa tangua ana gututuameza ha guya gudi athu adi nu mitshima yatagana. (Yone 6:44; Makal. 13:48) Tuana mona ngolo jia Mbimbi ya Nzambi tangua tuana mona athu tuana longesa Biblia mubemba makalegelo awo abola ha gusudiga umuthu uhe-uhe. (Kol. 3:9, 10) Tuana mona guhuiminyina gua Nzambi luholo ana hana athu a mu terituare yetu tangua dia gumujiya hagula ahuluishiwe.—Lomo 10:13-15.

12. Ha gutadila Guzoga 33:13, ndaga itshi yatogele Moize? Mukunda natshi?

¹² Moize wakhalele muzula ufuta wenji nu Yehowa nu ndando yavula. Yehowa wakuatesele Moize ha gutshita ndaga jiavula jia gushimana. Hene, Moize wajiyile Yehowa kiawaha lume. Uvi, walanduile gutoga Yehowa ha gumukuatesa hagula amujiye luko muabonga. (Tanga Guzoga 33:13.) Mu tangua diene, Moize wakhalele nu ivo gubalega 80. Uvi, wajiyile egi wakhalele nu ndaga jiavula jia gujiya gudi Shenji wa mu dilu wa guzumba.

13. Luholo lutshi tuajiya gumonesa egi tuana guzula ufuta wetu nu Nzambi nu ndando yavula?

¹³ Ndaga eyi idi gutulongesa itshi? Idi gutulongesa egi, ikhale tuana kombelela Yehowa sendese mualeha, tudi naye gulandula guzula ufuta wetu nu muene nu ndando yavula. Luholo lumoshi lua guyimonesa ludi, guta nenji maga mu gisambu.

14. Mukunda natshi gukombelela Yehowa gudi nu ndando yavula ha gumujiya muabonga?

¹⁴ Ha gukhala nu ufuta wakola nu muthu, udi naye guta nenji maga iphungu yavula. Luholo lumoshi nji, ha gukhala nu ufuta wakola nu Nzambi, khala gumukombelela iphungu yavula. Uvuigo woma wa gumuwambela ndaga udi mutangiza nu luholo udi gudivua. (Ef. 6:18) Phangi Krista, wa gu Turquie, udi muzuela egi: “Tangua ngana wambela Yehowa matangi ami mu gisambu, guzumba guami nu gudifelela guami gudi muene guana gukola, enji muene wana gungukuatesa. Tangua ngana mona Yehowa muhana mvutu gu gutoga guami, yana gungukuatesa ha gumumona gifua Sh’ami nu futa diami.”

15. Yehowa wazuelele itshi mukunda nu Fumu Davidi?

¹⁵ Fumu Davidi wavalewe mu fami ya akombeledi a Yehowa Nzambi. Uvi, Davidi gakombelelego Yehowa mukunda nu mvuanji jienji. Muene hakhenji wakuatele ufuta nu Nzambi, nu Yehowa wamuzumbile mangololo. Yehowa hakhenji wazuelele egi Davidi udi “muthu udi musuanguluisa mutshima wami.” (Makal. 13:22, NWT) Luholo lutshi Davidi akuatele ufuta wakola ngenyi nu Yehowa?

16. Tangua Davidi gatalele ima yafugile Yehowa, itshi akotelesele?

 ¹⁶ Davidi wajiyile Yehowa mu njila ya ima yafugiwe. Tangua Davidi akhalele muvuala, wakhalele mubalegesa matangua avula mu temu ha gubamba imeme ya shenji. Yajiya gukhala egi mu tangua diene, wasendesele gutala ima yafugile Yehowa nu guyitangigiza. Ha gufezegesa, tangua Davidi akhalele mutala dilu mu phipha, wamonele themua jiavula. Uvi muene gamonelego phamba themua jiene. Wakhalele mumona makalegelo a muthu wafugile themua jiene. Davidi wasonegele egi: ‘Dilu didi mumonesa lutumbu lua Nzambi. Didi mumonesa midimo yatshitshile muene nu mago enji.’ (Ngi. 19:1, 2) Tangua Davidi gatangijile luholo athu afugiwe, wamonele diago ndunge jia Yehowa mu midimo. (Ngi. 139:14) Hatangijile muene ima ya gushimana yafugile Yehowa, wakotelesele egi gu meso a Nzambi, udi naye gudibulumuisa.—Ngi. 139:6.

17. Itshi tuajiya gulonguga gula tudi mutala ima yafugile Yehowa?

¹⁷ Ndaga eyi idi gutulongesa itshi? Khala musuanguluga nu ima yafugile Yehowa. Zula tangua dia gutala ima yabonga yafugile Yehowa mu dilu nu ha mavu. Suanguluga nu ima yene! Lusugu luagasue, khala mutangigiza ima idi ha fundo udi, gifua: mitshi, shitu, nu athu. Hangima, kamba gujiya gula ima yene idi gugulongesa itshi mukunda nu Yehowa. Ngenyi, lusugu nu lusugu, mbawujiya ndaga jiavula jiatadila Tata wetu wa guzumba. (Lomo 1:20) Luko, lusugu nu lusugu, guzumba guaye gudi muene mbagukola sha.

18. Ha gutadila Ngimbo 18, itshi yakotelesele Davidi?

¹⁸ Davidi wakotelesele egi Yehowa wakhalele gumukuatesa. Tufezegese gale. Tangua Davidi gahuluishile imeme ya sh’enji ha mago a khoshi nu uluse, wakotelesele egi Yehowa wamukuatesele ha gushiya shitu eji. Tangua diashiyile muene Goliyata, Davidi wamonele haphelo egi Yehowa wakhalele gumutuameza. (1 Sam. 17:37) Tangua Davidi alengele Fumu Saula wakhalele mukamba gumushiya, wakotelesele egi Yehowa wamuhuluishile ha mago enji. (Mbimbi jidi gutuama dia Ngimbo 18) Nga Davidi wakhalele muenya lulendo, nga watangijile egi muene watshitshile ndaga eji nu ngolo jienji. Uvi, Davidi wakhalele muthu wa gudibulumuisa. Hene, wakotelesele egi Yehowa wakhalele gumukuatesa.—Ngi. 138:6.

19. Gifegeselo gia Davidi gidi gutulongesa itshi?

¹⁹ Ndaga eyi idi gutulongesa itshi? Tushigo naye phamba gutoga Yehowa egi atukuatese. Uvi, tudi naye nji gukamba gujiya tangua ditshi nu luholo lutshi Yehowa ana tukuatesa. Gula tudi athu a gudibulumuisa, mbatukotelesa egi tuajiyilego gutshita ndaga jiagasue esue hakhetu. Luko, mbatukotelesa egi Yehowa wana tukuatesa ha gutshita ndaga jituajiyilego gukalagala. Gumona tangua diagasue luholo Yehowa adi gutukuatesa, mbagukolesa ufuta wetu nu muene. Phangi wa yala Isaac, wa gu Fidji wakhalele mukombeledi wa Yehowa ivo yavula, udi mutshiginyisa ndaga eyi. Udi muzuela egi: “Gula ngatangiza lujingu luami, ngana mona luholo Yehowa agungukuatesele gusadiga tangua ngasendesele gulonguka Biblia uu nu mangino. Ngenyi gu meso ami, Yehowa udi diago muthu wa giamatshidia.”

20. Ufuta wa Davidi nu Yehowa udi gutulongessa itshi?

²⁰ Davidi walanduile makalegelo a Yehowa. Yehowa watufugile nu luholo luatagana lua gulandula makalegelo enji. (Gis. 1:26) Gula tualonguga muavula makalegelo a Yehowa, mbayikhala ndaga yaleba ha gutshita ndaga gifua muene. Davidi wajiyile sh’enji wa mudilu muabonga,  hene walanduile gifezegeselo gienji tangua milonga yamubuidile nu athu ako. Tutalelenu phamba gifezegeselo gimoshi. Davidi watshitshile gubola gu meso a Yehowa tangua akadigile uthambi nu Batesheba nu tangua ashiyishile mulumi’enji. (2 Sam. 11:1-4, 15) Uvi Yehowa wavuidile Davidi khenda, wamutotesele gubola guenji. Hangima, Davidi nji watotesele athu ako gubola guawo. Handaga Davidi wakhalele nu ufuta wabonga nu Yehowa, enya Isalele amuzumbile muavula. Luko, wabuile gifezegeselo kiawaha gudi mafumu ako a mu Isalele.—1 Maf. 15:11; 2 Maf. 14:1-3.

21. Ha gutadila Efeso 4:24 nu 5:1, “gulandula gifezegeselo gia Nzambi” guana gutubatela itshi?

²¹ Ndaga eyi idi gutulongesa itshi? Tudi naye “gulandula gifezegeselo gia Nzambi.” Gula tuatshita ngenyi, mbatuheta gubonga nu mbayitukuatesa ha gumujiya luko muabonga. Tangua tuana landula gifezegeselo gia Nzambi mu makalegelo etu, tuana monesa egi tudi an’enji.—Tanga Efeso 4:24; 5:1, NWT.

22-23. Itshi mbayibalega gula tudi mutumagela ndaga jia Yehowa tuana longuga?

²² Gifua luholo tuayimona, tuajiya gujiya Yehowa mu njila ya ima gafugile nu mu njila ya Biblia. Biblia idi nu ifesegeselo yavula ya akombeledi a Nzambi akhalele nu gutshigina guakola. Tuajiya gulandula gifezegeselo gia athu gifua Moize nu Davidi. Yehowa watshita khapo dienji. Esue nji, tudi naye gutshita khapho dietu, yakotelesa egi tukangule meso etu, nu matshui etu nu mitshima yetu ha gumujiya.

²³ Mbatubembigo gulonguga ndaga jia Yehowa. (Mulo. 3:11) Gima giabalega ndando gishigo guvula gua ndaga tudi mujiya mukunda Yehowa, uvi gidi gujiya gula tuana tumagela ndaga eji tudi mujiya gale. Gula tudi mutumagela ndaga tuana longuga nu tudi mulandula gifezegeselo gia sh’etu wa guzumba, muene mbawusuena lume hehi nu esue. (Yak. 4:8) Yehowa udi gutuwambela mu Biblia egi, muene mbagabembigo nga hazonda athu adi mutshita yagasue ha gumujiya muabonga.