Ndaga idi mu Mikhuala 22:25-27 yazuelewego ha gukamba gujiya gula yala watshitshile gubola, handaga gubola guenji guakhalele mujiyiwa haphelo. Mukhuala owu wahanewe ha gubingisa mukhetu milonga. Ha gukotelesa ndaga eyi muabonga, tutadilenu verse jidi gutuama dia Mikhuala 22:25-27.

Verse jia gutuama jidi muzuelela yala wabungisa muila “mukatshi dia dimbo” nu mukhetu wasogewe gale. Gula yatshitshiwa ngenyi, yala muene wakhalele mutshita uthambi handaga mukhetu udi mutangewa gifua mukhetu wa ulo. Mukhetu giwa? “Muene gatamegenego athu ha guza gumukuatesa hakhadi ndaga mutshitshiwa mukatshi dia dimbo.” Gula nga watamegele, nga athu ajile gumukuatesa. Uvi muene gatamegenego genji athu. Ngenyi, muene nji wakhalele mutangewa egi watshitshile uthambi luholo lumoshi nu yala.—Mikh. 22:23, 24.

Mukuala udi mu verse jialandula wakhalele mumonesa ndaga iko ya gudisha. Wakhalele muzuela egi: ‘Uvi gula yakhadi mu temu muatagana yala nu muvual’a mukhetu udi khenji gajiyago yala nu wasogewa gudi yala muko, wamukuata gungolo, yala hakhenji muene udi naye gushiyiwa. Muvuala wa mukhetu, mumutshitshigo gima, ndagaya muene gatshitshilego ndaga yabola adi naye ya gufuila. Ndag’eyi idi gifua ndaga ya muthu udi mubandemena muko ha gumushiya. Athu atagenene mutemu, ngatshima muvuala wa mukhetu wakalugile mutamega athu ha guza gumukuatesa, guakhalelego muthu ha gumuhuluisa.’—Mikh. 22:25-27.

Mu ndaga ya luholo elu, manzunji akhalele mutshigina ndaga yazuelele muvual’a mukhetu. Mukunda natshi? Handaga muene ‘wakalugile, uvi guakhalelego nga muthu ha gumuhuluisa.’ Ngenyi, gatshitshilego genji uthambi. Uvi yala wakhalele naye gushiyiwa handaga muene ‘wakuatele muvuala mukhetu gungolo, wakhalele wasogewa gudi yala muko’ ha gutshita nenji uthambi.

Mukhuala owu wakhalele mukuatesa ha gubingisa mukhetu. Uvi wakhalele nji mumonesa haphelo gubola gua yala wamukuatele gungolo ha gutshita nenji uthambi. Tudi musha mutshima egi manzunji akhalele ‘mutema guhululula mulonga wene’ nu akhalele guwukoka mu gudivua nu mikhuala ya Nzambi, yakhalele muzuelela ndaga yene muavula.—Mikh. 13:14; 17:4; Guz. 20:14.