1. Ginemo gitshi Yehowa ahanele mvuaji?

YEHOWA wafugile yala nu mukhetu wa thomo, waahuile nzala ya guvuala. Gishina giene Biblia yana guzuela egi: ‘Ana adi khapho diana guhana Yehowa.’ (Ngi. 127:3) Idi mukotelesa itshi? Tangiza gale egi futa diaye mumoshi wakola, wagutoga ha gumubambela falanga jiavula. Wajiya gudivua luholo lutshi? Idi yadiago egi, mbawusuanguluga luholo ana gugushila mutshima. Uvi wajiya gudisagesa ha gujiya luholo lutshi wajiya gubamba falanga jiene kiawaha. Yehowa, futa dietu wakola, wahanele mvuaji ginemo gia gubamba gima gimoshi gidi nu ndando yavula gubalega falanga. Waahanele ginemo gia gutshita yagasue hagula an’awo akhale kiawaha nu gusuanguluga.

2. Mihu itshi tuza mutadila?

² Nanyi udi naye guwambela yala nu mukaji’enji ha guvuala ana, nu tangua adi naye guaavuala? Itshi mvuaji jiajiya gukalagala ha gukuatesa an’awo ha gukhala nu gusuanguluga? Tutalenu mikhuala ya Nzambi idi mu Biblia yajiya gukuatesa Aklisto adizudile gale mu ulo ha guzula desizio jiabonga.

3. (a) Gula yala nu mukhetu adizula mu ulo, nanyi udi naye guzula desizio dia guvuala nga ndo? (b) Verse itshi ya Biblia enya fami nu mafuta adi naye gujiya?

³ Mu ifutshi iko, gula yala nu mukhetu adizula mu ulo, athu ana tangiza egi adi naye guvuala ana gatshididi. Enya fami nu athu ako ajiya gushinjiga yala nu mukaji’enji ha guvuala ana mu phushi. Phangi Jethro, wa gu Asie, udi muzuela egi: “Mu hungu dietu, aphangi adi nu ana, ana shinjiga aphangi ashigo nu ana ha guvuala.” Phangi muko wa gu Asie mu jina dia Jeffrey, udi muzuela gamba: “Athu ako ana wambela aphangi ashigo nu  ana egi, mbaakamba muthu wa guaakuatesa tangua mbaakola.” Uvi, yala nu mukaji’enji ene hakhawo adi naye guzula desizio dia guvuala nga ndo. Gidi ginemo giawo, esue tushigo naye gudinginyisa. (Gal. 6:5) Idi yadiago egi enya fami nu mafuta, ana tshigina egi yala nu mukaji’enji akhale nu gusuanguluga mu ulo wawo uhe-uhe. Uvi adi naye gujiya egi, desizio dia guvuala ana nga ndo, didi desizio dia yala nu mukaji’enji.—1 Tes. 4:11.

4-5. (a) Mihu itshi mbadi yala nu mukhetu adi naye gutadila? (b) Tangua ditshi diatagana adi naye gutadila mihu yene? Kotelesa.

⁴ Gula yala nu mukhetu atshigina guvuala ana, adi naye gutadila mihu eyi mbadi ya ndando: Thomo, tangua ditshi diatshigina ene guvuala? Luko, ana guvula gutshi adi naye guvuala? Tangua ditshi diatagana adi naye gutadila mihu yene? Mukunda natshi mihu eyi mbadi idi nu ndando?

⁵ Gutuama dia gudizula mu ulo, yala nu mukhetu adi naye guta maga ha gujiya gula mbaavuala ana nga ndo. Mukunda natshi? Handaga idi nu ndando egi muyadi wawo akhale nu matangi amoshi ha ndaga eyi. Luko, adi naye gudivua gula adi diago hehi ha gutshigina ginemo gia gubua mvuaji. Mu ma ulo ako, yala nu mukhetu ana gudivua ha gunengena givo gimoshi nga mbadi gutuama egi avuale ana. Mukunda natshi? Handaga gusansa ana guana toga tangua nu ngolo jiavula. Ana mona egi, gunengena gandambo guana guaahana tangua diatagana ha gudijiya muabonga mu ulo wawo. Luko, yana guaakuatesa ha gubua mafuta akola gutuama egi abue mvuaji.—Ef. 5:33.

6. Mukunda nu masugu a lamba awa tudi mujinga, desizio ditshi diazudile aphangi ako nu akaji’awo?

⁶ Aphangi ako a Aklisto ana tshigina gulandula gifezegeselo gia ana a Nowa nu akaji’awo. Ana a Nowa nu akaji’awo, abalegesele tangua diavula gutuama egi avuale ana. (Gis. 6:18; 9:18, 19; 10:1; 2 Phet. 2:5) Yesu wafuanesele sungi yetu nu “masugu a Nowa.” Idi yadiago egi tudi mujinga mu sungi ya “ndaga jiakola.” (Mat. 24:37; 2 Tim. 3:1) Hene, aphangi ako nu akaji’awo azudile desizio dia gunengena gutuama egi avuale, hagula ajiya guheta tangua dia gudihana muavula mu mudimo wa Yehowa.

7. Luholo lutshi lubelo ludi mu Luka 14:28, 29 nu mu Ishima 21:5, luajiya gukuatesa yala nu mukhetu mu ulo?

⁷ Idi muabonga egi yala nu mukaji’enji adiangele ‘gutadila depanse’ gutuama egi azule desizio dia guvuala, nga dia gutomba guvula gua ana mbaavuala. (Tanga Luka 14:28, 29.) Mvuaji jiasansele gale ana, jiana jiya egi gusansa ana guana toga falanga. Luko, guana toga  tangua nu ngolo jiavula. Hene, idi nu ndando egi yala nu mukhetu atshigina guvuala, adihule mihu eyi: ‘Muyadi’etu tudi naye gutshita mudimo ha guheta falanga jia gusumba ima ya funu mu fami ba? Tudi mbimbi imoshi ha ndaga yatadila ima tudi nayo funu mu fami ba? Gula muyadi’etu tudi naye gutshita mudimo, ana mbaabambewa gudi nanyi? Ana ajiya gulandula matangi nu makalegelo a muthu muene ba?’ Tangua yala nu mukhetu adi mutadila mihu eyi, ana tumagela mbimbi jidi mu Ishima 21:5.—Tanga.

8. (a) Malamba atshi mala nu akhetu adi mu ulo ajiya gutagana nawo? (b) Yala wana zumba mukaji’enji udi naye gutshita itshi?

⁸ Gusansa ana guana toga tangua nu ngolo jiavula gudi mvuaji jiagasue mbadi. Hene, gula mvuaji jiavuala ana avula mu sungi yahihia, yajiya guaakhalela lamba ha gukuatesa mona wagasue mu luholo luatagana. Mvuaji jinyi jiavualele ana avula hehi-hehi, jiana zuela egi ndaga yene yakhalele guaasugisa matangi. Mvuaji ya mukhetu wajiya gukhala yaguhuila tangua diagasue. Ngenyi, yajiya gumukhalela lamba ha gutanga Biblia, ha gukombelela, nu guya mu mudimo wa gulongesa. Luko, yajiya gumukhalele lamba ha gulandula muabonga gudibungisa gua mu hungu. Hene, yala wana zumba mukaji’enji, udi naye gutshita yagasue ha gumukuatesa gula ana adi musagesa, ikhale mu gudibungisa gua mu hungu nga gu inzo. Wajiya gukuatesa mukaji’enji nu midimo gu inzo. Yala wabonga udi naye gutshita yagasue hagula mukaji’enji nu an’enji ahete gubonga gua Gukombelela gua mu Fami phoso nu phoso. Luko, udi naye guya mu mudimo wa gulongesa hamoshi nu mukaji’enji nu an’enji iphungu yavula.

9-10. Itshi mvuaji jidi naye gukalagala ha gukuatesa an’awo?

⁹ Ndaga jitshi mvuaji jiajiya gukalagala ha gukuatesa an’awo ha guzumba Yehowa? Luholo lutshi mvuaji jiajiya gubamba an’awo gu ndaga jiabola jia ha mavu awa? Tutadilenu ndaga mvuaji jiajiya gukalagala.

¹⁰ Toga Yehowa agukuatese. Tala ndaga yatshitshile Manowa nu mukaji’enji gutuama egi avuale mun’awo Samson. Tangua Manowa ajiyile egi mukaji’enji mbawuvuala mona yala, watogele Yehowa ha guaahana lubelo lua gujiya luholo adi naye gusansa mun’awo.

11. Luholo lutshi mvuaji jiajiya gulandula gifezegeselo gia Manowa gidi mukanda wa Manzuji 13:8?

¹¹ Phangi Nihad nu mukaji’enji Alma, a gu Bosnie-Herzégovine, alanduile gifezegeselo gia Manowa. Adi muzuela egi: “Gifua Manowa, esue nji tuatogele Yehowa ha gutulongesa luholo tudi naye gukhala mvuaji jiabonga. Hene, Yehowa watuhuile mvutu mu maluholo a gudisha:  mu njila ya Biblia, ya mikanda yetu, gudibungisa gua mu hungu nu mu njila ya ba asamble etu.”—Tanga Manzuji 13:8.

12. Gifezegeselo gitshi Yozefe nu Mariya ahanele an’awo?

¹² Hana an’aye gifezegeselo giabonga. Ndaga wana zuela, jiakhala nu ndando. Uvi, ndaga wana kalagala, jiakhala nu ndando yavula gubalega. Jiene jiana kuata diago mitshima ya an’aye. Idi yadiago egi Yozefe nu Mariya ahanele gifezegeselo giabonga gudi an’awo nu gudi Yesu. Yozefe wakhalele mutshita mudimo wakola ha gukuatesa enya fami yenji. Luko, Yozefe wakuatesele enya fami yenji ha guzumba gukombelela Yehowa. (Mikh. 4:9, 10) Ha gutadila mukhuala wa Moize, Yozefe gakhalelego naye guya nu enya fami yenji gu Yelusalema ‘givo nu givo’ mukunda nu Wano wa Pake. Uvi, muene wayitshitshile. (Luka 2:41, 42) Yajiya gukhala egi atata ako a mu tangua dinyi, akhalele mutangiza egi, guzangula fami yagasue ha guya nayo mu njila yaleha luholo elu, yakhalele ndaga yakola sha, yakhalele muzula tangua nu falanga jiavula. Uvi Yozefe wakhalele muzumba ndaga jia mu nyuma. Walongesele nji an’enji ha guzumba ndaga jia mu nyuma. Luko, Mariya wakhalele mujiya Mbimbi ya Nzambi kiawaha lume. Idi yadiago egi, walongesele an’enji mu mbimbi jienji nu mu makalegelo enji ha guzumba Mbimbi ya Nzambi.

13. Luholo lutshi phangi mumoshi nu mukaji’enji alanduile gifezegeselo gia Yozefe nu Mariya?

¹³ Phangi Nihad nu mukaji’enji Alma anyi tuazuelela mu paragrafe 11, alanduile gifezegeselo gia Yozefe nu Mariya. Luholo lutshi yaakuatesele ha gulongesa mun’awo wa yala ha guzumba Nzambi nu gumukombelela? Adi muzuela egi: “Mu mbimbi jietu nu mu makalegelo etu, tuamonesele mun’etu gubonga tuajiya guheta gula tudi munemesa mikhuala ya Yehowa.” Phangi Nihad udi muzuela luko egi: “Aye hakhaye mvuaji, monesa makalegelo udi mutshigina egi an’aye akhale nawo.”

14. Mukunda natshi mvuaji jidi naye gujiya mafuta a an’awo?

¹⁴ Kuatesa an’aye ha gutomba mafuta awaha. Tata nu mama adi naye gujiya akuatshi adi mafuta a an’awo, nu itshi ana gukalagala. Yakotelesa itshi? Mvuaji jidi naye gujiya akuatshi ana guta maga nu an’awo mu Internet nu mu telefone. Mukunda natshi? Handaga mafuta ajiya gubolesa matangi nu makalegelo a an’awo.—1 Kol. 15:33.

15. Gifezegeselo gia phangi Jessie gidi mulongesa itshi gudi mvuaji?

¹⁵ Itshi mvuaji jidi naye gutshita gula ashigo mujiya gukalegela ordinateur nga telefone? Jessie, tata mumoshi wa gu Philippines, udi muzuela egi: “Tushigo mujiya muavula luholo lua gukalegela ordinateur, tablette nga telefone. Uvi yatukangelego njila ha gulongesa an’etu malamba ajiya guaabuila gula adi mukalegela ba apareye mu luholo luabola.” Phangi Jessie gatunyishilego an’enji ha gukalegela ba apareye handaga muene hakhenji gakhalelego mujiya luholo lua guaakalegela. Udi muzuela gamba: “Ngawambelele an’ami ha gukalegela ba apareye awo ha gulonguga zuelelo dihe-dihe, ha gudilondega mukunda nu gudibungisa gua mu hungu, nu ha gutanga Biblia lusugu nu lusugu.” Mu jw.org^®, ha fundo diasonegewa egi “Adolescents,” gudi nu malongo adi mumonesa luholo luabonga lua guditumina message nu athu, nu guhaga foto mu internet. Gula udi mvuaji, watangele gale malongo ene nu an’aye ha guaazuelela nawo ba? Watalele gale nawo video idi muzuela egi: Nu Aye nu Telefone, Nanyi Wana Gutuameza Muko? nu video idi muzuela egi Monesa Gutema Tangua udi Mukalegela Internet. * Malongo awa ajiya gugukuatesa muavula tangua udi  mulongesa an’aye luholo adi naye gukalegela ba apareye nu gutema guagasue.—Ish. 13:20.

16. Itshi mvuaji jiavula jiana kalagala? Gubonga gutshi ana heta?

¹⁶ Mvuaji jiavula jiana londega ndaga hagula an’awo abalegese tangua hamoshi nu akombeledi a Nzambi. Gu Côte d’Ivoire, phangi N’Déni nu mukaji’enji Bomine, akhalele mutamega muavula mutadi muwendji ha guza mukhala gumbo diawo. Phangi N’Déni udi muzuela egi: “Yakuatesele mun’etu wa yala wa somi. Wabuile muvundji wa muhola. Mangino, muene nji udi mutadi muwendji suppléant.” Aye nji, wajiya gutamega aphangi a mala nu akhetu ha guza mubalegesa tangua hamoshi nu an’aye ba?

17-18. Tangua ditshi mvuaji jidi naye gusendesa gulongesa an’awo?

¹⁷ Sendesa gulongesa an’aye hadi ene alenge. Gila wasendesa gulongesa an’aye hadi ene alenge, mbayaakuatesa diago ha gukula muabonga. (Ish. 22:6) Tangiza gale Timote, wawendele nu mupostolo Phaula. Gin’enji Eunice, nu khakhi’enji Loïs, amulongesele “sendese ulenge” wenji.—2 Tim. 1:5; 3:15.

¹⁸ Gu Côte d’Ivoire, phangi Jean-Claude nu mukaji’enji Peace, alongesele an’awo agasue samano ha guzumba Yehowa nu gumukombelela. Itshi yaakuatesele ha gubinga? Alanduile gifezegeselo gia Eunice nu Loïs. Adi muzuela egi: “Tualongesele an’etu Mbimbi ya Nzambi sendese ulenge wawo, tangua diazonda gungima dia guvualewa guawo.”—Mikh. 6:6, 7.

19. “Gulongesa” an’aye Mbimbi ya Nzambi guakotelesa itshi?

¹⁹ “Gulongesa” an’aye Mbimbi ya Yehowa guakotelesa itshi? Mbimbi “gulongesa,” idi mukotelesa egi “gunginyisa gima mu muto wa muthu, guvutugila gima giene mahugo avula.” Ha guyitshita, mvuaji jidi naye gubalegesa tangua hamoshi nu an’awo azonda. Matangua ako, mvuaji jiajiya guvua mulege-lege ha guvutugila ndaga imoshi-imoshi iphungu yavula gudi an’awo. Uvi, mvuaji jidi naye gutshita ngolo ha guvutugila ndaga ha gukuatesa an’awo hagula akotelese Mbimbi ya Nzambi nu ayitumagele.

20. Monesa luholo Ngimbo 127:4 yajiya gukuatesa mvuaji ha gusansa ana.

²⁰ Jiya an’aye kiawaha. Mukanda wa Ngimbo 127 udi mufuanesa ana nu mifula. (Tanga Ngimbo  127:4.) Mifula yagasue yana khalago luholo lumoshi, enji yanago gufudiwa nu utadi wa luholo lumoshi. Luholo lumoshi nji, ana akhala agudisha. Hene, mvuaji jidi naye gujiya luholo lutshi ajiya gulongesa mona wagasue mu fami. Phangi mumoshi nu mukaji’enji gu Israël, abingile ha gusansa an’awo mbadi ha gukombelela Yehowa. Itshi yaakuatesele? Adi muzuela egi: “Tuakhalelego mulonguga Biblia nu ana agasue fundo dimoshi. Tuakhalele guaalongesa mumoshi-mumoshi.” Ishigo mukhuala egi aye nji udi naye gulandula metode awa. Mutuameji wagasue wa fami mbawutomba gula wajiya gukalegela metode awa nga metode ako atagana ha gulongesa an’enji Biblia.

21. Ukuateshi utshi mvuaji jiajiya guheta gudi Yehowa?

²¹ Matangua ako, mvuaji jiajiya gumona egi idi lamba ha gulongesa an’awo. Uvi adi naye gujiya egi ana adi guhana gua Yehowa, nu muene udi hehi ha gukuatesa mvuaji. Yehowa wana tegelela gutoga gua mvuaji, nu wana hana mvutu gu gutoga guawo. Wana hana mvutu mu njila ya Biblia, ya mikanda yetu, nu mu njila ya gifezegeselo nu lubelo lua mvuaji jia mu hungu jidi nu eksperianse.

22. Ima itshi yabalega ndando mvuaji jiajiya guhana an’awo?

²² Athu ako ana zuela egi, gusansa ana guana zula ivo 20. Uvi ginemo gia gukhala mvuanji gianago guhua. Ima itshi yabalega ndando mvuaji jiajiya guhana an’awo? Jidi naye guaazumba, nu gubalegesa nawo tangua hamoshi, nu guaalongesa malongo a Biblia. Ana agasue mbaatshiginago malongo ene luholo lumoshi. Uvi, ana avula anyi avualewe gudi mvuaji jiana zumba Yehowa, ana gudivua gifua muadivuile phangi mumoshi wa mukhetu Joanna Mae, wa gu Asie. Udi muzuela egi: “Gula ngatangiza malongo nu lubelo luanguhanele mvuaji jiami, ngana guaahana mvudi yavula luholo angukuatesele nu angulongesele ha guzumba Yehowa. Anguvualelego phamba guvuala, uvi angulongesele nji ha guzumba Yehowa.” (Ish. 23:24, 25) Aphangi avula a mala nu a akhetu ana zuela nji luholo elu.