Yajiya gukhala egi ndo. Diabulu gawambelelego Eva egi gula wadia bundu dia gijila, phamba muila wenji mbawufua uvi monyo wenji mbawulandula gujinga. Tangua Satana gazuelele nu Eva mu njila ya nyoga, wamulezele egi gula wadia bundu dia mutshi wene, ‘mbagafuigo nga hazonda.’ Wamutshiginyishile egi mbawulandula gujinga, mbawukhala nu lujingu luawaha ha mavu, nu mbagakhadigo luko mutuamezewa gudi Nzambi.—Gis. 2:17; 3:3-5.

Gula longo dia mambo didi mulongesewa mangino egi monyo wanago gufua, diasendeselego mu dihia dia Edene, na tangua ditshi diasendesele giwa? Tushigo mujiya diago. Uvi tudi mujiya egi ikombelelo yagasue ya mambo yakulugile mu tangua dia Nowa. Guasalelego nga longo dimoshi dia mambo handaga athu ahuluishiwe akhalele Nowa nu fami yenji. Ene akhalele akombeledi a Nzambi wa giamatshidia.

Hene, idi naye gukhala egi longo dia mambo didi muzuela egi monyo wanago gufua diasendesele gungima dia Mvula ya Nowa. Tangua Nzambi avudishile mazuelelo gu Babele, athu amuangenene “ha mavu agasue.” Idi yadiago egi, ayile nu matangi egi athu adi nu monyo wanago gufua. (Gis. 11:8, 9). Tushigo mujiya lume tangua longo edi diasendesele. Uvi tudi mujiya egi, Satana Diabula, “sha mambo,” muene wakhalele ha gishina gia longo diene. Wakhalele nu gusuanguluga ha gumona luholo longo diene diamuangenene ha mavu agasue.—Yone 8:44.