1. Luholo lutshi athu avula ana taladila mudimo?

LUHOLO lutshi athu avula ana tadila mudimo mu dimbo dienu? Mu ifutshi yavula, athu ana tshita mudimo muavula gubalega mu ginono. Ngenyi, ana khalago nu tangua dia guhuluguga, dia gubalegesa nu fami jiawo nga dia gutshita ndaga jia mu nyuma. (Mulo. 2:23) Uvi, athu ako akhala imonya, anatshiginago gutshita mudimo.—Ish. 26:13, 14.

2-3. Gifezegeselo gitshi giabembele Yehowa nu Yesu mukunda nu mudimo?

² Tuamona egi mangino, athu avula ana tshita mudimo muavula, uvi athu ako akhala gawo imonya. Tutadilenu matangi a Yehowa nu Yesu mu ndaga yatadila mudimo. Tudi mujiya egi, Yehowa wakhala mutshitshi wakola wa mudimo. Yesu wayimonesele haphelo. Wazuelele egi: ‘Tata udi mutshita mudimo uu nu luenyelu, ame nji, ngudi naye ya gutshita.’ (Yone 5:17) Tangiza gale mudimo wagasue wakalegele Nzambi tangua gafugile anjelo nu ima yagasue idi mu dilu. Tudi mumona luko ima yabonga yafugile Nzambi ha mavu. Muyimbi wa ngimbo wazuelele gamba: ‘Yehowa aye watshitshile ndaga jiavula! Aye wajitshitshile nu jindunge sha! Mavu azala pha nu ima wafugile.’—Ngi. 104:24.

³ Yesu walanduile khadilo dia Shenji. Wakuatesele Nzambi tangua dia ‘londele muene dilu.’ Wakhalele hehi nu Yehowa “gifua gaphita ga mudimo.” (Ish. 8:27-31) Tangua diakhalele Yesu ha mavu, wakhalele mutshitshi wakola wa mudimo. Wakhalele muzula mudimo gifua ima yenji ya gudia. Midimo yenji yakhalele mumonesa diago egi watumiwe gudi Yehowa.—Yone 4:34; 5:36; 14:10.

4. Gifezegeselo gia Yehowa nu Yesu gidi gutulongesa itshi mu ndaga yatadila guhululuga?

⁴ Luholo Yehowa nu Yesu adi atshitshi akola a mudimo, idi mumonesa egi tuajiyilego guhuluguga ba? Ndo sha. Yehowa gajiyilego guhuila nga hazonda. Hene, gashigo nu funu ya guhuluguga ha guhuimisa  muila. Uvi Biblia idi muzuela egi gungima dia gufuga dilu nu mavu, Nzambi “wabembele mudimo wenji, wahulugugile.” (Guz. 31:17) Yakotelesa itshi? Idi mukotelesa egi, Yehowa wabembele gufuga ima, wazudile tangua dia gusuanguluga nu ima afugile. Ngatshima Yesu wakhalele mutshita mudimo muavula tangua diakhalele muene ha mavu, wakhkalele muzula tangua dia guhuluguga nu dia gudia hamoshi nu mafut’enji.—Mat. 14:13; Luka 7:34.

5. Malamba atshi ana tagana nawo akombeledi a Nzambi?

⁵ Biblia idi mukolesa akombeledi a Nzambi ha gukhala atshitshi a mudimo. Akombeledi a Yehowa ashigo naye gukhala imonya. Adi naye gukhala atshitshi akola a mudimo. (Ish. 15:19) Yajiya gukhala egi, wana tshita mudimo ha gukuatesa enya fami yaye. Luholo udi mulandudi wa Klisto, udi nji nu ginemo gia gulongesa lukuma luabonga. Uvi, udi naye guzula tangua diatagana dia guhululuga. Yakhala lamba egi uhete tangua dia gutshita mudimo waye, dia gulongesa lukuma luabonga nu dia guhululuga ba? Luholo lutshi tuajiya gukhaphumuna matangua a gutshita mudimo nu a guhuluguga?

6. Luholo lutshi Mako 6:30-34 idi mumonesa egi Yesu wakhalele mutshita mudimo uvi wakhalele nji muhululuga?

⁶ Idi nu ndando egi tutshite mudimo, uvi tukambe nji tangua dia guhululuga. Fumu Solomo wasonegele egi: “Ndaga yagasue idi nu tangua diayo.” Mukatshi dia ndaga jiene, watangele gukuna, gutunga, gudila, gulela, gukina, nu ndaga jiko. (Mulo. 3:1-8, NWT) Yadiago, mu lujingu lua muthu, mudi ima mbadi ya ndando: gutshita mudimo nu guhuluguga. Yesu wakhalele mutshita mudimo, uvi wakhalele nji muzula tangua dia guhululuga. Lusugu lumoshi, apostolo ahuidile muavula gungima dia gulongesa, nu ‘akhalelego nu tangua dia gudia.’ Yesu waawambelele egi: “Tuyenu mutemu muhuluguga hazonda.” (Tanga Mako 6:30-34.) Ikhale muene nu alandudi enji akhalelego muheta tangua diatagana dia guhululuga, Yesu wajiyile egi mukut’awo agasue akhalele nu funu ya guhuima hazonda.

7. Luholo lutshi gutalela mukuala wa Lusugu lua Guhuluguga guajiya gutukuatesa?

⁷ Matangua ako, tuakhala nu funu ya guhuluguga nga ya gusombegesa ndaga jiko jia gutshita. Tuajiya gumona ndaga yene mu ulondegi watshitshile Nzambi mukunda nu enya Isalele. Waalezele ha guhululuga lusugu lumoshi mu phoso. Tushigo mutuamezewa gu Mukuala wa Moize. Uvi, gula tualandula ndaga jidi muzuela mukuala wene mukunda nu Lusugu lua Guhuluguga, tuajiya guheta malongo abonga. Malongo ene ajiya gutukuatesa ha gutshita mudimo nu guzula tangua dia guhululuga.

8. Ha gutadila Guzoga 31:12-15, Lusugu lua Guhuluguga luakhalele mukunda natshi?

⁸ Biblia idi muzuela egi, Nzambi wafugile ima ha mavu “masugu” samano. Gungima, wahulugugile. (Gis. 2:2) Yehowa wana zumba gutshita mudimo. Wana “guwutshita uu nu luenyelu.” (Yone 5:17) Yehowa watshitshile mudimo “masugu” samano. Mu “lusugu” lua sambadi, wahulugugile. Hene walezele enya Isalele ha guhuluguga mu lusugu lua sambadi. Nzambi wazuelele egi Lusugu lua Guhuluguga luakhalele njimbu hakatshi dienji nu enya Isalele. Luakhalele lusugu lua ‘guhuluguga diago, lua gijila gudi Yehowa.’ (Tanga Guzoga 31:12-15.) Nga muthu mumoshi gakhalelego naye gutshita mudimo, ikhale ana, ahiga, nga shitu jiawo. (Guz. 20:10) Ngenyi, yakhalele muhana enya Isalele tangua dia gudihana muavula mu ndaga jia mu nyuma.

9. Matangi atshi abola akhalele nawo athu a mu tangua dia Yesu mukunda nu Lusugu lua Guhululuga?

⁹ Lusugu lua Guhuluguga luakhalele lusugu luabonga gudi akombeledi a Nzambi. Uvi mu  tangua dia Yesu, mafumu a ikombelelo ya enya Yuda akhalele mukolesa mukhuala wa lusugu luene. Akhalele muzuela egi, gula muthu wabela mbuto ha gudia mu Lusugu lua Guhuluguga, nga wasaga muthu udi mukata, wakhalele mushiya mukhuala. (Mako 2:23-27; 3:2-5) Uvi, Yesu wamonesele haphelo egi matangi a mafumu a ikombelelo akhalelego gudivua nu gutshigina gua Nzambi.

10. Ha gutadila Matayo 12:9-12, matangi a Yesu mukunda Lusugu lua Guhululuga akhalele itshi?

¹⁰ Yesu nu alandudi enji akhalele munemesa mukhuala wa Lusugu lua Guhuluguga handaga akhalele enya Yuda, nu akhalele mutuamezewa gu Mikhuala ya Moize. * Uvi Yesu wamonesele mu mbimbi nu mumakalegelo enji egi, ishigo ndaga yabola gula muthu watshita gima giabonga, nu wakuatesa muthu muko mu Lusugu lua Guhuluguga. Wazuelele gamba: “Mukhuala wetu udi mutuhua njila ya gutshita ndaga yabonga mu Lusugu lua Guhuluguga.” (Tanga Matayo 12:9-12.) Muene gamonelego egi, idi gushiya mukhuala gula muthu watshita ndaga yabonga mu Lusugu lua Guhululuga. Ndaga jiatshitshile Yesu jiamonesele egi wakotelesele gishina Nzambi gawambelele athu ha guhuima mu Lusugu lua Guhululuga. Luholo akombeledi a Nzambi akhalele mubemba midimo yawo ha guhululuga, akhalele muheta tangua dia gudihana muavula mu ndaga jia mu nyuma. Yesu wakudile mu fami yakhalele mukombelela Yehowa mu Lusugu lua Guhululuga ha gusuena hehi nenji. Luholo lutshi tudi guyijiya? Tangua diavutugile Yesu gumbo diawo gu Nazaleta, Biblia idi muzuela egi: ‘Mu Lusugu lua  Guhuluguga, wanginyine mu gikombelelo gifua muakhalele khadilo dienji. Wazugile ha gutanga mukanda wa Nzambi.’—Luka 4:15-19.

11. Gifezegeselo gitshi giabonga Yozefe gahanele Yesu?

¹¹ Yozefe walongesele mun’enji Yesu mudimo wa mabaya. Ngenyi, wamonesele matangi a Nzambi mukunda nu mudimo. (Mat. 13:55, 56) Yesu wakhalele mumona luholo Yezefe, sh’enji wa gusansa, gakhalele mutshita mudimo wakola ha gukuatesa fami yenji yakhalele nu ana avula. Idi ndaga yabonga ha gumona egi, Yesu wawambelele alandudi enji gungima egi: ‘Muenya mudimo udi naye guhanewa gishimbigo gienji.’ (Luka 10:7) Yadiago, Yesu wakhalele mujiya lume luholo lua gutshita mudimo wakola.

12. Verse jitshi jidi mumonesa egi Aklisto adi naye gukhala atshitshi akola a mudimo?

¹² Mupostolo Phaula nji wakhalele mutshitshi wakola wa mudimo. Mudimo wenji wa thomo wakhalele wa gulongesa athu jina dia Yesu nu ndaga jialongesele muene. Uvi, Phaula wakhalele nji mutshita mudimo wa mago ha guheta falanga jia gudikuatesa najio. Aklisto a gu Tesalonike akhalele mujiya egi, Phaula wakhalele mutshita ‘mudimo nu guhuila guakola, phipha nu muanya’ hagula gakhadigo “ginemo” gudi muthu nga mumoshi. (2 Tes. 3:8; Makal. 20:34, 35) Yajiya gukhala egi Phaula wakhalele muzuelela mudimo wenji wa gunyiga matenta. Hakhalele muene gu Kolinto, wasalele gumbo dia Akila nu Prisile, ‘akhalele mutshita mudimo hamoshi, handaga akhalele munyiga jinzo jia matenta.’ Tangua diazuelele Phaula egi wakhalele mukalagala mudimo ‘phipha nu muanya,’ ishigo mukotelesa egi gakhalelego muhuluguga. Gakhalelego mutshita mudimo wa matenta mu Lusugu lua Guhululuga. Mu lusugu luene, wakhalele mulongesa enya Yuda anyi akhalelego mutshita mudimo mu Lusugu lua Guhuluguga.—Makal. 13:14-16, 42-44; 16:13; 18:1-4.

13. Gifezegeselo gia Phaula gidi gutulongesa itshi?

¹³ Mupostolo Phaula watubembele gifezegeselo giabonga. Wakhalele mutshitshi wakola wa mudimo wa mago. Uvi, wakhalele mudihana muavula mu ‘mudimo wa gijila wa gulongesa lukuma luabonga lua Nzambi.’ (Lomo 15:16; 2 Kol. 11:23) Wawambelele nji aphangi’enji Aklisto ha gudihana muavula mu mudimo wa gulongesa. Akila nu Prisile akhalele mutshita hamoshi nu Phaula mudimo wa gutunga matenta. Uvi, ndaga yabalega ndando idi egi akhalele ‘mafut’enji a mudimo mu Klisto Yesu.’ (Lomo 12:11; 16:3) Phaula wawambelele Aklisto a gu Kolinto ha gukhala “nu ndaga jiavula jia gutshita mu mudimo wa Fumu.” (1 Kol. 15:58, NWT; 2 Kol. 9:8) Yehowa wahanele Phaula nyuma yenji ha gusonega egi: ‘Gula muthu watuna gutshita mudimo, gashigo naye gudia.’—2 Tes. 3:10.

14. Mbimbi jiazuelele Yesu mu Yone 14:12 jidi mukotelesa itshi?

¹⁴ Mudimo wabalega ndando mu masugu awa a gisugishilo udi: gulongesa lukuma luabonga nu gubuisa athu alandudi. Yesu wazuelele egi, alandudi enji mbaatshita ndaga jiakoma gubelega jiatshitshile muene! (Tanga Yone 14:12.) Ishigo mukotelesa egi mbaatshita ndaga jia gushimana gifua jiatshitshile muene. Yakotelesa egi, alandudi enji mbaalongesa muavula mbimbi ya Nzambi mu sungi yaleha, mu membo avula gubalega, nu gudi athu avula gubalega.

15. Mihu itshi tudi naye gudihula? Mukunda natshi?

¹⁵ Gula wana kalagala mudimo, dihule egi: ‘Ha fundo diami dia mudimo, athu angujiya gifua mutshitshi wakola wa mudimo ba? Ngana manesela mudimo wami mu tangua diatagana, nu ngana guwutshita nu mutshima wagasue ba?’ Gula wazuela egi ayi, fumi’aye wa mudimo mbawuguzumba muavula. Luko, athu wana tshita nawo mudimo, mbaatshigina gutegelela lukuma luabonga udi guaalongesa. Mukunda nu mudimo  wa gulongesa, dihule egi: ‘Athu angujiya gifua mutshitshi wakola wa mudimo wa gulongesa ba? Ngana dilondega kiawaha ha guta maga nu athu mu mudimo wa gulongesa ba? Gula muthu wasuanguluga nu giamatshidia, ngana gumuvutugila gatshididi ba? Ngana dihana muavula ha gulongesa mu maluholo a gudisha ba?’ Gila wazuela egi ayi, mbawusuanguluga nu mudimo wa gulongesa.

16. Gudisha gutshi gudi mukatshi dia matangi a athu avula mangino nu matangi a Yesu nu apostolo enji mu ndaga yatadila guhuluguga?

¹⁶ Yesu wajiyile egi matangua ako muene nu apostolo enji, akhalele nu funu ya guhuluguga hazonda. Uvi, athu avula mangino nu a mu siekle ya thomo, adi gifua muenya umonyi Yesu gakhalele muzuelela mu gifezegeselo. Yala muene wazuelele egi: “Uhuluguge, udie, unue, usuanguluge gaye.” (Luka 12:19; 2 Tim. 3:4) Yala muene watangijile egi ima yabalega ndando mu lujingu idi guhuluguga nu gusuanguluga. Uvi, Yesu nu apostolo enji akhalelego gudihana ha gukamba phamba gubonga guawo.

17. Gula tuayilego gu mudimo, luholo lutshi tudi naye gukadigila tangua dietu?

¹⁷ Luholo lutshi tuajiya gulandula gifezegeselo gia Yesu mangino? Gula tuayilego gu mudimo, tushigo naye gukadigila tangua dietu phamba ha guhuluguga. Uvi tudi naye gudikalegela ha gulongesa lukuma luabonga nu ha guya mu gudibungisa gua mu hungu. Gubuisa athu alandudi a Yesu nu guya mu gudibungisa gua mu hungu guakhala nu ndando yavula gudi esue. Hene, tuana kalagala ngolo ha guyitshita. (Heb. 10:24, 25) Ikhale tudi mu congé, tudi naye gulandula guya mu gudibungisa gua mu hungu fundo diagasue tudi. Luko, tudi naye gukamba ba okazio a gulongesa lukuma luabonga gudi athu agasue tudi mutagana nawo.—2 Tim. 4:2.

18. Fumi’etu Klisto Yesu wana tshigina egi tutshite itshi?

¹⁸ Tudi nu gusuanguluga guavula luholo Fumi’etu Klisto Yesu ganago gututoga ha gutshita ndaga jiavula jituajiyilego gukalagala! (Heb. 4:15) Yesu wana tshigina egi tuzule tangua dia guhululuga. Luko, wana tshigina egi tukhale atshitshi akola a mudimo ha guheta ima tudi nayo funu, nu tudihane muavula mu mudimo wa gubuisa athu alandudi. Mu longo dialandula, mbatumona ndaga yatshitshile Yesu ha gutukatula mu uhiga umoshi wabola.