1-2. (a) Wano wa givo gia gusuanguluga guakoma udi itshi? (Tala galuanda “Givo gia Gusuanguluga Guakoma Giakhalele Itshi?”) (b) Mu Luka 4:16-18, itshi yazuelele Yesu mukunda nu wano wene?

MU IFUTSHI iko, gula fumu watagenesa ivo 50 mu ufumu, ana kalagala wano wakoma. Wano wene, wana tamegewa egi jubilé. Wano wene wajiya gutshita lusugu lumoshi, phoso imoshi, nga ndo masugu avula. Uvi gu gisugishilo, wana guhua. Luko, gusuanguluga guagasue guana buitshiwa mutshima.

² Tuza mutadila wano wa givo gia gusuanguluga guakoma wakhalele mukalegewa gungima dia ivo yagasue 50 mu Isalele ikulu. Wano wene wakhalele mukatula enya Isalele mu uhiga. Mukunda natshi tudi naye guzuelela wano wene mangino? Handaga wano wene udi gutuwunguluisa ndaga yabonga yalondele Yehowa ha gutukula mu uhiga sendese mangino, enji mayilago. Yesu wazuelele nji ndaga yene.—Tanga Luka 4:16-18.

3. Ha gutadila Levi 25:8-12, gubonga gutshi enya Isalele akhalele muheta gu wano wa givo gia gusuanguluga guakoma?

³ Ha gukotelesa muabonga gukudiwa mu uhiga guakhalele muzuelela Yesu, tutadilenu thomo wano wa givo gia gusuanguluga guakoma walondele Nzambi mukunda nu athu enji mu ginono. Yehowa wawambelele enya Isalele egi: ‘Mudi naye gubuisa givo gia 50 givo gimoshi gia gijila. Mudi naye guwambela athu agasue enya mavu egi uhiga wahua. Givo egi mbagitamegewa egi givo gia gusuanguluga guakoma. Muthu nu muthu mbawuvutuga gu mavu enji, mbawuya mu fami yenji.’ (Tanga Levi 25:8-12.) Mu longo diabalega, tuamonyi luholo enya Isalele akhalele muheta gubonga mu Lusugu lua Guhuluguga lua phoso yagasue. Henyaha, gubonga gutshi akhalele muheta gu wano wa givo gia gusuanguluga guakoma? Gula muenya Isalele udi nu mukudi wangane, yakhalele mutoga egi asumbise mavu enji ha gufuta mukudi  wene. Uvi mu sungi ya wano wa givo gia gusuanguluga guakoma, akhalele gumuvutudila mavu enji. Ngenyi, ‘wakhalele muvutuga mu mavu enji,’ nu gula muene wafua, an’enji ajiya guzula mavu a shawo. Luko, gula muthu udi nu mukudi wabalega gukoma, wakhalele naye gusumbishiwa mu uhiga hakhenji nga mun’enji ha gufuta mukudi wene. Uvi mu sungi ya wano wa givo gia gusuanguluga guakoma, muhiga muene wakhalele ‘muvutuga mu fami yenji.’ Ngenyi, nga muthu gakhalelego naye gukhala muhiga mayilago! Ndaga eyi idi mumonesa egi Yehowa wakhalele mudisagesa mukunda nu akombeledi enji!

4-5. Mukunda natshi idi nu ndando egi tujiye ndaga jiatadila wano wa givo gia gusuanguluga guakoma?

⁴ Gubonga gutshi akhalele muheta luko mu wano wene? Yehowa wazuelele gamba: ‘Mbagukhadigo nga muthu uphutu mu mavu adi Yehowa Nzambi wenu gumihua. Handaga muene mbawuzalesa mavu pha nu gusuanguluga.’ (Mikh. 15:4) Idi yagudisha diago nu ndaga tudi mumona mangino ha mavu. Athu adi nu umonyi, adi mubua amonyi gubalega. Uvi phutu, jidi mubua jiphutu sha!

⁵ Esue Aklisto, tuana tuamezewago gu mikhuala ya Moize. Yakotelesa egi, tuanago gulandula mukhuala wa wano wa givo gia gusuanguluga guakoma wakhalele mukatula athu mu uhiga, nu gutotesa mikudi yawo, nu guaavutudila mavu awo. (Lomo 7:4; 10:4; Ef. 2:15) Uvi idi nu ndando egi tujiye ndaga jiatadila wano wene. Mukunda natshi? Handaga guwunguluga gubonga guakhalele muheta enya Isalele, gudi gutusuanguluisa luholo Yehowa atukatula mu uhiga.

6. Mukut’etu agasue tudi nu funu egi tuhuluishiwe mu itshi?

⁶ Mukut’etu agasue tudi ahiga a gubola. Gishina giene tuana kola, tuana kata nu tuana fua. Hene, tudi nu funu egi tukudiwe mu uhiga wene. Athu ana mona uhiga wa gubola guene tangua ana guditala mu nganza, nu tangua anaya gudi minganga. Luko, gula tuatshita gubola, muila wana gutuleba. Mupostolo Phaula wazuelele egi, wakhalele ‘mu uhiga wa mukhuala wa gubola wakhalele mu mutshima wenji.’  Wazuelele luko egi: ‘Ngudi muenya malamba avula! Nanyi wajiya giwa gunguhuluisa gu muila owu udi mungutuala gu gufua?’—Lomo 7:23, 24.

7. Itshi yazuelele Yeshaya mukunda nu gukudiwa mu uhiga?

⁷ Ndaga ya gusuanguluga idi egi, Nzambi walondegele ndaga ha gutukatula mu uhiga wa gubola. Tuajiya gukatuga mu uhiga wene phamba mu njila ya Yesu. Ivo gubalega 700 gutuama egi Yesu aze ha mavu, profete Yeshaya wazuelele egi, athu mbaakatuga mu uhiga mu luholo luakoma gubalega enya Isalele mu sungi ya wano wa givo gia gusuanguluga guakoma. Wazuelele gamba: ‘Yehowa Fumu wanguzalesele pha nu nyuma yenji. Wangutombele ha gubatela jiphutu mene jiabonga. Wangutumine ha guwalagana athu adi nu mitshima ya gikenene, nu ha guwambela athu adi mu uhiga egi uhiga wawo wahua.’ (Yesh. 61:1) Profesi eyi idi mutadila nanyi?

8. Profesi ya Yeshaya idi muzuelela gukudiwa mu uhiga idi mutadila nanyi?

⁸ Profesi eyi yatadila gukudiwa mu uhiga, yasendesele gutagenesewa tangua diasendesele Yesu midimo yenji. Tangua diayile Yesu mu sinagoga ya mu dimbo diawo dia Nazaleta, watangele mbimbi eji jia profesi ya Yeshaya gutuama dia enya Yuda adibungishile ha fundo diene. Wamonesele egi mbimbi jiene jiakhalele gumutadila muene. Wazuelele egi: ‘Yehowa Fumu wanguzalesele pha nu nyuma yenji, wangutombele ha gubatela jiphutu mene jiabonga. Wangutumine ha guwambela athu adi mu uhiga egi uhiga wawo mbawuhua, nu ha gujiyisa ifofo egi meso awo mbaakanguga, nu ha guhuluisa athu adi musagesewa. Wangutumine ha gulongesa givo ginyi Yehowa mbaadijiga khenda jienji.’ (Luka 4:16-19) Luholo lutshi Yesu gataganesele profesi yene?

9. Athu avula a mu tangua dia Yesu akhalele munengena ha gukudiwa mu uhiga utshi?

⁹ Gukudiwa mu uhiga guazuelele Yeshaya gunu guatangele Yesu, guasendesele gutagenesewa mu siekle ya thomo. Yesu wayimonesele haphelo tangua gazuelele egi: ‘Mangino, mbimbi eyi ya mukanda wa Nzambi imuadivuila nu matshui enu, yatagenesewa.’ (Luka 4:21) Yajiya gukhala egi, athu avula anyi avuile mbimbi jiatangele Yesu, akhalele munengena egi akatudiwe mu uhinyinyi wa enya Roma. Atangijile gifua muazuelele mala mbadi anyi akhalele muya mu njila ya Emause egi: ‘Esue tuakhalele mudifelela egi muene mbawukula Isalele.’ (Luka 24:13,  21) Uvi tudi mujiya egi Yesu gatuminego alandudi enji ha gulumbugila enya Roma. Waalezele ha guhana “Sezale ima idi ya Sezale.” (Mat. 22:21) Luholo lutshi giwa Yesu ahuluishile athu?

10. Mu uhiga utshi Yesu gakatuile athu?

¹⁰ Mun’a Nzambi wajile ha gukatula athu mu uhiga mu maluholo mbadi. Thomo, Yesu wakatuile athu mu uhiga wa ndaga jia mambo jiakhalele guaalongesa mafumu a ikombelelo. Enya Yuda avula a mu tangua dinyi, akhalele mushinjigiwa ha gulandula kutime jia athu nu malongo a mambo. (Mat. 5:31-37; 15:1-11) Mafumu a ikombelelo akhalele muzuela egi adi atuameji a mu nyuma. Uvi mu guzuela guabonga, akhalele diago ifofo. Luholo lutshi? Luholo atunyile Masiya nu giamatshidia galongesele, asalele ifofo, enji gubola guawo guatotesewego. (Yone 9:1, 14-16, 35-41) Uvi, Yesu walongesele athu giamatshidia, waahanele nji gifezegeselo giabonga. Ngenyi, wamonesele athu a gudibulumuisa luholo ajiya gukatuga mu uhiga wa malongo a mambo.—Mako 1:22; 2:23–3:5.

11. Mu luholo lusthi lua mbadi Yesu gakatudile athu mu uhiga?

¹¹ Luko, Yesu wakatudile athu a ha mavu agasue mu uhiga wa gubola guatukambele Adama. Mu njila ya mulambu wa Yesu, Nzambi mbawutotesa gubola gua athu anyi ana gusha gutshigina guawo mu mulambu wa Yesu nu ana monesa gutshigina guene mu makalegelo awo. (Heb. 10:12-18) Yesu wazuelele egi: ‘Gula mona wamikula mu uhiga, mbamukatuga diago mu uhiga.’ (Yone 8:36) Gukudiwa mu uhiga ogu gudi nu ndando yavula gubalega gunu guakhalele muheta enya Isalele mu sungi ya wano wa givo gia gusuanguluga guakoma! Ha gufezegesa, muthu wajiya gukatuga mu uhiga mu sungi ya wano wene, uvi gungima abui luko muhiga. Luko, wajiya gufua genji muhiga. Uvi Yesu wakatudile athu mu uhiga mayilago.

12. Akuatshi akatudiwe thomo mu uhiga wazuelele Yesu mu sinagoga ya gu Nazaleta?

¹² Mu lusugu lua Pantekote ya givo 33 gia tangua dietu, Yehowa wambile apostolo nu enya gutshigina ako maji mu nyuma. Waabuishile an’enji hagula mu tangua dimoshi ngenyi, afuzumuge ha guya mu dilu ha guhinyina hamoshi nu Yesu. (Lomo 8:2, 15-17) Aklisto awa akhalele athu a thomo akudiwe mu uhiga gifua luholo luazuelele Yesu mu sinagoga ya gu Nazaleta. Aklisto ene akhalelego luko mu uhiga wa ndaga jia mambo nu kutime jia athu jiakhalele mulongesa mafumu a ikombelelo ya enya Yuda. Luko, Nzambi wakhalele guaamona gifua athu akatudiwe mu uhiga wa gubola guana gubata gu gufua. Wano wa givo gia gusuaganguluga guakoma wa Aklisto wasendesele mu givo 33 gia  tangua dietu, tangua Yehowa gambile Aklisto maji mu nyuma. Mbawuhua gu gisugishilo gia Uhinyinyi wa Yesu wa Ivo 1000. Uvi gutuama egi uhue, gudi nu ndaga jiabonga jidi naye gukalegewa. Ndaga jitshi?

13-14. Gula tuakatula Aklisto ambiwe gale maji mu nyuma, akuatshi mbaakudiwa luko mu uhiga gifua luholo luazuelele Yesu?

¹³ Mangino, ba milio a athu a mitshima yabonga, a mu ifutshi yagasue, adi mukatshi dia “imeme iko.” (Yone 10:16) Atombewego gudi Nzambi ha guhinyina nu Yesu mu dilu. Uvi, Biblia idi muzuela egi adi nu felela dia gujinga mayilago ha mavu. Aye nji udi nu felela dia gujinga ha mavu ba?

¹⁴ Sendese mangino, wajiya guheta gubonga guana heta Aklisto ambiwe gale maji mu nyuma. Gula udi musha gutshigina mu mulambu wa Yesu, wajiya gutoga Yehowa ha gugutotesela gubola guaye. Ngenyi, wajiya gukhala nu guhuima luholo udi nu ufuta wawaha nu Nzambi. (Ef. 1:7; Yat. 7:14, 15) Tangiza nji gubonga wana guheta luholo wakatuga mu uhiga wa malongo a mambo. Yesu wazuelele egi: “Mbamujiya giamatshidia, nu giamatshidia mbagimikula mu uhiga.” (Yone 8:32, NWT) Tudi nu gusuanguluga guavula luholo tuakatuga mu uhiga owu!

15. Luholo lutshi mbatukatuga mayilago mu uhiga? Gusuanguluga gutshi mbatuheta?

¹⁵ Khala nu felela egi mbatukudiwa mu uhiga mayilago. Mu masugu adi muza, Yesu mbawushiya  ikombelelo yagasue ya mambo nu ufumu wa athu a ha mavu awa. Uvi Nzambi mbawubamba “thundu yakoma ya athu” yana gumukombelela. Mbawaakuatesa ha guheta gubonga mu phaladiso ha mavu. (Yat. 7:9, 14) Athu avula mbaafuzumuga nu mbaakatuga mu uhiga wa malamba agasue atubatele gubola gua Adama.—Makal. 24:15.

16. Mu masugu adi muza, athu mbaakudiwa mu uhiga utshi wakoma?

¹⁶ Mu Uhinyinyi wa Klisto wa Ivo 1 000, Yesu nu Aklisto ambiwe gale maji mu nyuma, mbaakuatesa athu agasue ha mavu ha gukhala nu muila watagana nu ufuta watagana nu Nzambi. Sungi yene mbayikhala gifua wano wa givo gia gusuanguluga guakoma wakhalele nawo enya Isalele. Yakotelesa egi, athu agasue ana kombelela Yehowa nu gujinginyina guagasue, mbaabua athu atagana, ashigo nu gubola.

17. Yeshaya 65:21-23 yazuelele itshi mukunda nu akombeledi a Nzambi? (Tala gifuanesa holu dia gizula.)

¹⁷ Profesi ya Yeshaya 65:21-23. (Tanga.) Idi mumonesa luholo lujingu mbalukhala ha mavu. Mbatukambigo luko midimo ya gukalagala. Biblia idi muzuela egi, mu tangua diene, akombeledi a Nzambi mbaaheta midimo yawaha idi guaasuanguluisa. Gu gisugishilo gia Uhinyinyi wa Yesu wa Ivo 1 000, “ima yafugiwe mbayikudiwa nji mu uhiga wa gubola. Mbayiheta nji diphamba dia gutumbuga gua ana a Nzambi.”—Lomo 8:21, NWT.

18. Mukunda natshi tuajiya gusha mutshima egi mbatukhala nu gusuanguluga mu masugu adi muza?

¹⁸ Yehowa walondele ndaga hagula enya Isalele ahete tangua dia guhuluguga gu midimo yawo. Mu Uhinyinyi wa Yesu wa Ivo 1 000, Yehowa mbawutshita nji ngenyi mukunda nu akombeledi enji. Mbayikhala diago tangua dia gukombelela Yehowa. Gukombelela Nzambi gudi nu ndando yavula hagula tukhale nu gusuanguluga mangino. Mu mavu ahe-ahe, mbayikhala nji ngenyi. Athu agasue adi agujinginyina gudi Yehowa, mbatukhala nu gusuanguluga mu sungi ya Uhinyinyi wa Yesu wa Ivo 1 000 handaga mukut’etu agasue mbatuheta midimo yawaha, nu mbatukombelela Nzambi.