Ngavualewe mu dimbo dia Québec, mu gifutshi gia Canada, mu provense ya zuelelelo dia Français. Mvuaji jiami, jiakhalele Louis nu Zélia, akhalele gunguzumba muavula. Tata wakhalele muthu wahuiminyina, nu wakhalele muzumba gutanga muavula. Ngakhalele muzumba gusonega muavula, hagula mbangubue journaliste.

Tangua ngatagenesele ivo 12, Rodolphe Soucy futa dia tata wa mudimo wajile nu futa dienji muko gumbo dietu gututala. Akhalele Matemue a Yehowa. Ngakhalelego mujiya ndaga jiavula jiatadila Matemue a Yehowa, nu ngakhalelego musuanguluga nu gikombelelo giawo. Uvi, ngakhalele musuanguluga nu luholo akhalele mukalegela Biblia ha guhana mvutu. Mvuaji jiami jiasuangulugile nji, hene tuasendesele gulonguga Biblia.

Mu tangua diene, ngakhalele mungina gu mavula a enya Katolika. Lusugu lumoshi, ngakhalele muta maga nu mafuta ami a khalasa gu ndaga ngakhalele mulonguga mu Biblia nu Matemue a Yehowa. Mandombi anyi akhalele miphe avuile maga tuakhalele muta. Akhalele ndo mukalegela Biblia ha gutuna ndaga ngakhalele muzuela, uvi akhalele mutuna phamba gu kano, hene mulongeshi mungoshi mukatshi diawo wanguwambelele ha meso a ana khalasa diagasue egi, ngudi muenya nguma! Yakhalele ndaga ya gikenene, uvi ngasuangulugile handaga yangukuatesele ha gujiya egi malongo akhalele gutulongesa gu katolika, akhalelego gudivua nu Biblia. Ngazudile desizio dia gukatuga gu mavula ene. Mvuaji jiami jiatshiginyile nji, hene ngasombegesele mavula.

Ngalanduile gulonguga Biblia, uvi ngakhalelego mukula mu nyuma handaga ngakhalele muvua  woma wa gulongesa inzo nu inzo. Enya dingumba dia Katolika akhalelego mutshigina egi tukalagale mudimo wetu wa gulongesa. Maurice Duplessis wakhalele premier ministre wa gu Québec, nu wakhalele nu ufuta wakola nu dingumba dia Katolika. Wakhalele mutuma athu avula ha gusagesa Matemue a Yehowa. Yakhalele mutoga diago gikhesa giavula ha gulongesa.

Muthu wangukuatesele ha gukatula woma udi phangi John Rae, wakatugile mu khalasa dia 9 dia Gileade. Wakhalele nu eksperianse yavula, wakhalele nji muthu wahuiminyina, yakhalelego lamba ha guta n’enji maga. Ngatshima gakhalelego gunguhana malongo tangua diagasue, uvi gifezegeselo gienji giabonga giangukuatesele muavula. Gakhalelego muzuela Français muabonga, hene ngakhalele muzoga n’enji muavula mu mudimo wa gulongesa ha gumukuatesa ha guzuela Français. Gubalegesa n’enji tangua diavula guangukuatesele ha guzula desizio dia gubua Temue wa Yehowa. Sendese ngadimonele nu Matemue a Yehowa mbala ya thomo, ivo 10 yabalegele. Gungima ngabatijiwe mu lusugu lua 26 Mai 1951.

Aphangi avula a mu hungu dietu dia gu Québec akhalele avundji a muhola. Makalegelo a aphangi awa angukuatesele ha gubua nji muvundji wa muhola. Gungima, tuakhalele mulongesa inzo nu inzo uvi tuakhalele mukalegela phamba Biblia. Tuakhalelego nu mikanda, hene tuakhalele mukalegela Biblia muavula. Ngatshitshile ngolo ha gujiya verse jiavula ha gulongesa giamatshidia. Uvi, athu avula akhalele mutuna gutanga Biblia gula ishigo ya enya Katolika.

Mu 1952, tuadizudile mu ulo nu Simone Patry, wakhalele phangi wa mukhetu wa gujinginyina gudi Yehowa. Gungima dia givo gimoshi, tuayile gu Montreal, guene tuavalele mun’etu wa mukhetu mu jina dia Lise. Ngatshima ngabembele mudimo wa gipionye matangua azonda gutuama dia gudizula mu ulo, ame nu Simone tualanduile gujinga lujingu lua leba ha guheta tangua diavula dia gutshita ndaga jia mu hungu nu jia mu fami.

Gungima dia ivo kumi ngasendesele luko mudimo wa muvundji wa muhola. Mu 1962, nganginyile École du ministère du Royaume ya akulu mbeji imoshi gu Betele ya gu Canada. Ngayile guene, anguhagele sugu imoshi nu phangi Camille Ouellette. Gikhesa gia phangi Camille mukunda nu mudimo wa gulongesa gianguyitugishile muavula handaga wakhalele nu mukhetu nu ana. Mu tangua diene, gu Québec guakhalelego nu mvuaji jiakhalele ba pionye, gu khanda iko nu gusansa ana; uvi,  Camille wazudile desizio dia gutshita ngenyi. Masugu tuabalegesele n’enji, wangukuatesele ha gutangiza muabonga ndaga yami. Gungima dia mbeji jiazonda, ngamonele egi ngudi naye gusendesa gutshita luko mudimo wa gipionye. Athu akhalele gudihula gula desizio diami diakhalele diabonga, uvi ngavutugilego gungima, ngashile mutshima egi Yehowa mbawunguhana ngolo jia gutshita mudimo wa muvundji wa muhola.

Mu 1964, ame nu Simone tuatumiwe ha guya mutshita mudimo wa Pionye spesiale gu dimbo dietu gu Québec, tuatshitshile ivo yavula guene. Mu tangua diene, umbalagaji wakhalelelego luko wavula gifua ha thomo, uvi athu ako akhalele mulandula gututuna.

Mu ngueze imoshi ya Lusugu lua samano, angukuatele gu Sainte-Marie, dimbo dimoshi hehi nu dimbo dia Québec. Fumu ya maphulushi wangukatudile gu biro dia maphulushi nu wangumbile mu bologo handaga ngakhalele mulongesa inzo nu inzo. Gungima angubatele gutuama dia nzuji mungoshi mu jina dia Baillargeon, wakhalele muthu wakoma. Wanguhudile egi, avocat waye nanyi. Tangua ngazuelele egi Glen How, * avocat wa Temue yonu waakhalele mujiyiwa mubonga, nzuji muene wazuelele nu khabu egi: “Oh, ndo sha! Muene ndo!” Phangi Glen How wakhalele mujiyiwa gifua avocat wabonga wakhalele musophela Matemue a Yehowa milonga. Gungima, manzuji ajile gunguwambela egi milonga yaye yahui.

Tuakhalelego nu fundo diabonga dia gukalegela gudibungisa gua mu hungu handaga umbalagaji wakhalele wakola gu Québec. Tuakhalele gudibungisa mu garage gamoshi gahuma. Mu sungi ya huma, tuakhalele mukalegela mashinyi a pétrole (radiateur) ha guhaga tshuya mu garage gene. Tuakhalele mujieta radiateur yene ha guweta tshuya nu gudihana gikhesa matangua azonda gu tuama egi gudibungisa gusendese.

Idi ndaga ya gusuanguluga ha gumona mbuto jiabonga jia mudimo wa gulongesa mu ivo eyi. Mu ivo 1960 uu nu mu 1969, dimbo dia Québec, nu Côte-Nord, nu gu Gaspé guakhalele nu mahungu azonda-zonda. Uvi mangino, mahungu ene adi avula gubalega circonscription mbadi, aphangi adi nji gudibungisa mu Jinzo jia Ufumu jiawaha.

Mu 1970, atutamegele nu mukaji’ami Simone ha gukalagala mudimo wa mutadi muwendji. Mu 1973, ngabuile surveillant de district. Mu ivo yene, ngalongugile ndaga jiavula gudi aphangi a eksperianse gifua: Laurier Saumur * nu David Splane, * tangua akhalele atadi awendji. Gungima dia asamble agasue, ame nu David tuakhalele muzuelela ndaga tuajiya gutshita ha gukudisa luholo Iuetu lua gulongesa. Lusugu lumoshi, phangi David wanguwambelele egi: “Léonce, ngasuanguluga nu diskure diaye. Diakhadi diabonga, uvi ame ngajiya guzola ba diskure thathu mu diskure diaye!” Ngakhalele muzuelela ndaga jiavula mu ba diskure ami. Yakhalele mutoga  egi ngujiye luholo lua guzuelela phamba ndaga jia ndando.

Surveillant de district wakhalele muhana gikhesa gudi atadi awendji a mu circonscription. Alongeshi avula gu Québec akhalele gungujiya muabonga. Akhalele muzumba gulongesa nu ame tangua ngakhalele muya mutala ba circonscription avula. Ngakhalele musuanguluga gulongesa hamoshi nawo, uvi ngakhalelego mubalegesa tangua diavula nu atadi awendji. Lusugu lumoshi, mutadi muwendji mumoshi wanguwambelele egi: “Idi ndaga yabonga egi ubalegese tangua nu aphangi, uvi ujimbilago egi muthu wa thomo waji mutala haha udi ame. Ngudi nji nu funu ya gikhesa!” Longo dienji diangukuatesele diago muavula.

Mu 1976, ngataganele nu ndaga imoshi ya lamba diago. Mukaji’ami Simone, wakatele misongo yakola, gungima wafuile. Wakhalele mukhetu watagana, handaga wakhalele muzumba Yehowa, nu wakhalele nu khadilo dia gudihana ha gukuatesa athu ako. Gulongesa lukuma luabonga tangua diagasue guangukuatesele diago ha gulua nu lamba ngatagenele nadio. Ngana hana Yehowa mersi luholo gangukuatesele ha gukolesela mu tangua diene dia lamba. Gungima, ngahagele Carolyn Elliott, wakhalele muvundji wa muhola wa gikhesa wa zuelelo dia Anglais. Wajile gu Québec ha guhana mago fundo akhalele nu funu ya alongeshi avula. Yana khalago lamba ha guta maga nu Carolyn, wana suanguluga nu wana jidila nu athu ako mu phushi, ikhale enya musonyi wavula. Wangukuatesele diago muavula mu mudimo wa mutadi muwendji.

Mu Janvier 1978, angutumile ha guya gu Québec ha gubua mulongeshi gu khalasa dia thomo dia avundji a muhola. Ngavile woma, handaga ngakhalele khenji nganginyile ndo khalasa diene, nu khenji ngamonele ndo mukanda wa avundji a muhola, ngakhalele mumona ima yagasue ihe-ihe gifua luholo avundji a muhola akhalele guyimona. Ndaga yangusuanguluishile idi egi, mu khalasa diene, avundji a muhola avula akhalele nu eksperianse. Ngatshima ngakhalele mulongeshi, uvi ngalongugile ndaga jiavula gudi ana a khalasa!

 Mu 1978, Assemblée Internationale akalegewe mu stade Olympique ya gu Montreal, akhalele nu muto wa lumene egi: « la foi victorieuse ». Akhalele diago asamble akoma a gu Québec, athu 80 000 adibungishile guene. Ngatumiwe ha gutshita gu Département ya service presse gu asamble ene. Ngatele maga nu ba journaliste avula, ngasuangulugile luholo asonegele ndaga jiavula jiabonga jiatadila matemue a Yehowa. Télévision nu radio jiazuelele ndaga jiene nu ba interview matangua gubalega 20, ba journaux avula azuelele nji ndaga yene muavula. Yakhalele luholo luabonga lua gulongesa lukuma luabonga!

Ngahetele usombegeshi wakoma mu 1996. Sendese ngabatijiwe, ngakhalele mukalagala mudimo phamba gu Québec mu zuelelo dia Français, uvi angutumile ha gukalagala mudimo mu district dia Toronto, mu zuelelo dia Anglais. Ngakhalele muvua woma ha gutshita ba diskure handaga ngakhalelego mujiya Anglais muabonga. Ngakhalele musamba muavula nu guhaga mutshima gudi Yehowa.

Ngakhalele muvua woma ha gusendesa gutshita mudimo mu district diene, uvi henyaha ngajiya guzuela egi ngabalegesele ivo mbadi mu mudimo gu Toronto. Carolyn wangukuatesele muavula ha gujiya guzuela Anglais, aphangi ako akhalele gungukuatesa nu gunguhana gikhesa. Tuashiphilego ha gukuata mafuta ahe-ahe avula.

Tuakhalele nu midimo yavula ya gutshita, nu gudilondega mukunda nu asamble mu phoso. Uvi ngakhalele mubalegesa kumbi dimoshi lusugu luagasue lua thano ha gulongesa inzo nu inzo. Athu ako akhalele muhula egi, ‘Mukunda natshi wana guya mu mudimo wa gulongesa gu tuama dia guya gu asamble mu phoso?’ Uvi, ngakhalele mujiya egi guta maga nu athu mu mudimo wa gulongesa guakhalele gunguhana ngolo. Uu nu mangino ngana suanguluga muavula gulongesa lukuma luabonga.

Mu 1998, ame nu Carolyn atuvutudile luko gu Montreal gifua ba pionye spesiale. Mu ivo yagasue tuabalegesele guene, ngakhalele nu ginemo gia gulondega mudimo wa gulongesa mu mafundo a athu avula, nu guta maga nu ba journasliste ha gukatula athu matangi abola akhalele nawo mukunda nu Matemue a Yehowa. Henyaha, ame nu Carolyn tudi mulongesa ngenji jiana guza gu Canada, nu athu anyi ana tshigina gulonguga ndaga jiavula jia Biblia.

Gula ngatangiza ivo eyi 68 ngabalegesa mu sendese ngabatijiwe, ngana mona diago egi Yehowa wangushimbigile. Ngahetele gusuanguluga guavula handaga ngakhalele musuanguluga gulongesa nu gukuatesa athu ha gujiya giamatshidia. Mun’ami wa mukhetu Lise, nu mulumi’enji asendesele mudimo wa muvundji wa muhola, uvi ene akhalele nu ana. Gumona gikhesa giawo mu mudimo wa gulongesa guakhalele gungusuanguluisa diago. Ngudi muhana mersi avula gudi aphangi Aklisto anyi anguhanele gifezegeselo giabonga, nu malongo abonga angukuatesele ha gukula mu nyuma nu ha guheta inemo ya gudisha mu nyuma. Ngakotelesele egi, ha gukalagala ndaga jidi gututoga ulondegi wa Yehowa, tudi naye phamba guhaga mutshima gu nyuma yabonga ya Yehowa. (Ngi. 51:11) Ngana landula guhana Yehowa mersi luholo ganguhanele luendu lua gutumbuisa jina dienji!—Ngi. 54:6.