1. Ndaga itshi yabuidile fami ya Yozefe luholo aphangi enji amuvuidile giphi?

YAKOBA wakhalele muzumba an’enji agasue a mala, uvi wakhalele muzumba muavula mun’enji Yozefe wakhalele nu ivo 17. Itshi aphangi a Yozefe akalegele? Amuvidile giphi, hene amuhagele umbalagaji wakola. Yozefe gaakalegelego nga gima gimoshi giabola hagula ene amuhagele umbalagaji. Uvi, ene adigile Yozefe mu uhiga nu ambidile sh’awo mambo egi, shitu yabala ya shiyi mun’enji wa guzumba. Giphi giawo giakatudile guhuima mu fami yawo nu giahanele sh’awo gikenene giavula.—Gis. 37:3, 4, 27-34.

2. Ha gutadila Galatiya 5:19-21, mukunda natshi giphi giakhala gima giabola?

² Mu Biblia, giphi * gidi mukatshi dia ndaga jia ‘midimo ya muila’ ya gufua yajiya gukanga muthu njila ha gungina mu Ufumu wa Nzambi. (Tanga Galatiya 5:19-21.) Giphi giakhala ha gishina gia makalegelo abola gifua umbalagaji, nguma nga khabu jiakola.

3. Itshi tuza mumona mu longo edi?

³ Gifezegeselo gia aphangi a Yozefe gidi mumonesa egi giphi giajiya gubolesa ufuta nu athu, giajiya gukatula guhuima mu fami. Ngatshima tuajiyilego gutshita ndaga gifua aphangi a Yozefe, mukut’etu agasue tushigo athu atagana, mitshima yetu yakhala nu mambo. (Yel. 17:9) Hene, tuajiyilego gudihula gula matangua ako tuavuila athu giphi. Tutadile ifezegeselo ya Biblia yajiya gutukuatesa ha gujiya gishina giphi giana kula mu mitshima  yetu. Tudi muza mutadila maluholo tuajiya guluisa khadilo dia giphi ha gubamba guhuima.

4. Mukunda natshi enya Filistiya akhalele muvuila Isaka giphi?

⁴ Gula muthu waheta umonyi. Isaka wakhalele nu umonyi wavula, hene enya Filistiya akhalele gumuvuila giphi. (Gis. 26:12-14) Ashitshile mawina a meya a Isaka akhalele gumukuatesa ha gunuisa shitu jienji. (Gis. 26:15, 16, 27) Athu avula mangino akhala gifua enya Filistiya, ana khala nu giphi mukunda nu athu anyi adi nu umonyi wavula guabalega ene. Ana khala nu fuwa diavula gu ima ya ngane, nu ana tshigina ndo egi athu ene akhale nu ima yene.

5. Mukunda natshi mafumu a mangumba akhalele muvuila Yesu ginjiongo?

⁵ Gula athu adi muzumba muthu muko muavula. Mafumu a mangumba a enya Yuda akhalele muvuila Yesu ginjiongo, handaga athu akhalele gumuzumba muavula. (Mat. 7:28, 29) Yesu wakhalele mumoneshi wa Nzambi, nu wakhalele mulongesa athu giamatshidia. Uvi, mafumu awa a mangumba amumbidile mambo akoma, ha gubolesa jina dienji. (Mako 15:10; Yone 11:47, 48; 12:12, 13, 19) Longo tshi tuajiya guzula mu ndaga eyi? Tudi naye gutuna khadilo dia guvuila athu giphi gula aphangi mu hungu adi guatshigina mukunda nu makalegelo awo abonga. Uvi, tudi naye gulandula guazumba.—1 Kol. 11:1; 3 Yone 11.

6. Luholo lutshi Diotrefese gamonesele khadilo dia fuwa?

⁶ Gula muthu waheta inemo mu hungu. Muthu mumoshi mujina dia Diotrefese mu siekle ya thomo, wakhalele muvuila Aklisto anyi akhalele nu inemo mu hungu fuwa. Wakhalele mutshigina “gudibuisa mutuameji” wa athu agasue mu hungu. Hene wasendesele guzuela muabola mukunda nu mu postolo Yone nu aphangi ako hagula aphangi ako mu hungu atune guanemesa. (3 Yone 9, 10) Tushigo nu makalegelo gifua Diotrefese, uvi tuajiya gusendesa guvuila phangi muko fuwa gula waheta ginemo ginyi tuana gudifelela guheta mu hungu. Ndaga eyi yajiya gutubuila gula tudi gudivua egi phamba esue tuatagana ha gutagenesa ginemo giene muabonga.

7. Giphi giajiya gututuma ha gutshita itshi?

⁷ Giphi giakhala gifua mayiji abola a puazo. Gula mayiji ene abola ahaga miji mu mutshima wetu, yajiya gukhala lamba ha guakatula. Giphi giana zola makalegelo ako abola gifua gudikanduisa, fuwa nu ginjiongo. Giphi giajiya gubolesa makalegelo abonga, gifua guzumba, khenda nu gisemo. Gula khadilko dia giphi diasendesa gutujila, tudi naye gutshita ngolo ha gudikatula. Luholo tshi tuajiya guluisa khadilo dia giphi?

8. Makalegelo tshi ajiya gutukuatesa ha gubinga giphi?

⁸ Tuajiya guluisa giphi gula tudi nu gudibulumuisa nu tudi musuanguluga nu ima tudi naye. Gula mutshima wetu udi wazala pha nu makalegelo awa abonga, giphi mbagishigo mukhala nu fundo mu mutshima wetu. Gudibulumuisa mbagutukuatesa ha gutuna gudimona gifua tudi nu ndando yavula. Muthu ya gudibulumuisa gana gudimona ndo gifua wabalega athu ako. (Gal. 6:3, 4) Muthu udi nu matangi abonga wana suanguluga nu ima gadi nayo, gana gudifuanesa ndo nu athu ako. (1 Tim. 6:7, 8) Muthu wa gudibulumuisa wana suanguluga gula muthu muko waheta gima gia ndando.

9. Ha gutadila Galatiya 5:16 nu Filiphi 2:3, 4, nyuma ya Nzambi mbayitukuatesa ha gutshita itshi?

⁹ Tudi naye gutoga ukuateshi wa nyuma ya Nzambi ha gukatula khadilo dia giphi; tudi naye nji gukudisa khadilo dia gudibulumuisa  nu dia gusuanguluga nu ima tudi naye. (Tanga Galatiya 5:16; Filiphi 2:3, 4.) Nyuma ya Yehowa yajiya gutukuatesa ha gutala muabonga matangi a mu mutshima wetu. Nzambi wajiya gutukuatesa ha gukatula matangi abola mu mutshima wetu, nu guahinganesa nu matangi abonga. (Ngi. 26:2; 51:10) Tutadile gifezegeselo gia athu mbadi abingile khadilo dia giphi: Moize nu Phaula.

10. Ndaga tshi yalolele gudibulumuisa gua Moize? (Tala gifuanesa holu dia gizula.)

¹⁰ Moize wakhalele nu ginemo giakoma gia gutuameza akombeledi a Nzambi. Uvi gakhalelego muvua ginjiongo gula athu ako aheta ginemo. Lusugu lumoshi, Yehowa wakatuile ndambo ya nyuma yenji gudi Moize, wayihanele gudi akulu ako a enya Isalele anyi akhalele mumagana hehi nu inzo ya tenta ya gudibungisa. Gungima, Moize wavile egi akulu ako mbadi anyi ayilego gutuama dia tenta ya gudibungisa, ahetele nji nyuma yabonga nu asendesele gutshita ndaga gifua ba profete. Itshi Moize gatshitshile tangua Yoshua gamudijigile ha gutunyisa akulu ene mbadi? Moize gavuidilego athu ene giphi luholo Yehowa gasendesele guakalegela. Uvi wadibulumuishile nu wasuangulugile diago luholo athu ene ahetele inemo. (Lutang. 11:24-29) Longo tshi tuajiya guheta mu gifezegeselo gia Moize?

11. Luholo tshi akulu ajiya gulandula gifezegeselo gia Moize?

¹¹ Gula udi mukulu, agutogele gale ha guhana phangi muko formasio mukunda nu ginemo gimoshi gia mu hungu aye wana zumba ba? Ha gufezegesa, yajiya gukhala egi wana zumba gutuameza Inzo Yaleha ya Mutaledi phoso nu phoso. Uvi gula udi muthu wa gudibulumuisa gifua Moize, mbawushigo mutangiza egi ushigo luko nu ndando, gula agutoga egi uhane phangi mungoshi formasio, hagula mbaahete ginemo giene mu masugu adi muza. Uvi, mbawusuanguluga gukuatesa phangi muene.

12. Luholo lutshi Aklisto avula mangino ana monesa khadilo dia gusuanguluga nu dia gudibulumuisa?

¹² Tutadilenu ndaga iko aphangi avula agukola ana tagana nayo. Avula mukatshi diawo akhalele atuameji a hunji dia akulu ivo yavula. Uvi tangua ana tagenesa ivo 80, ana bemba ginemo giene. Gula atadi awendji atagenesa ivo 70, ana bemba mudimo wawo, nu ana tshigina nu gudibulumuisa guagasue mudimo wa luholo luagasue ana guahana. Mu ivo eyi yabalega, aphangi avula a gu Betele jia ha mavu a mudidi atumiwe mu terituare ha gutshita midimo ihe-ihe. Aphangi awa a mala nu a akhetu ana guvua ndo fuwa mukunda nu aphangi adi mukalagala midimo yakhalele ene mutshita thomo.

13. Ndaga itshi yakhalele naye gutuma mupostolo Phaula ha guvuila apostolo 12 giphi?

¹³ Mupostolo Phaula udi gifezegeselo giabonga gudi athu ana monesa khadilo dia gudibulumuisa, nu dia gusuanguluga nu ima adi nayo. Phaula gabembelego egi giphi gikule mu mutshima wenji. Watshitshile muavula mudimo wa gulongesa, uvi wazuelele nu gudibulumuisa guagasue egi: ‘Ame ngabalega guzonda mukatshi dia apostolo agasue, nu ngushigo watagana ha gutamegewa egi mupostolo.’ (1 Kol. 15:9, 10) Apostolo 12 alandudile Yesu mu mudimo wenji ha mavu, uvi Phaula wabuile Muklisto gungima dia gufua nu gufuzumuga gua Yesu. Ngatshima muene watombewe ha gukhala ‘mupostolo wa ifutshi iko,’ Phaula ganginyile ndo nga hazonda mu ndonga ya apostolo 12. (Lomo 11:13; Makal. 1:21-26) Phaula gavuile ndo giphi mukunda nu apostolo 12 luholo awendele nu Yesu, uvi wakhalele musuanguluga nu ginemo gakhalele nagio.

14. Itshi mbatutshita gula tudi nu khadilo dia gusuanguluga nu ima tudi naye, nu dia gudibulumuisa?

¹⁴ Gula tudi ya gudibulumuisa nu tudi musuanguluga nu ima tudi naye, mbatukhala  gifua Phaula nu mbatunemesa athu anyi Yehowa gahanele ginemo gia gutuameza. (Makal. 21:20-26) Yehowa wahanele akulu ginemo gia gutuameza hungu dia Uklisto. Yehowa wana zula akulu gifua ‘kado ga athu’, ngatshima ashigo athu atagana. (Ef. 4:8, 11) Gula tuanemesa nu tualandula utuameji wa akulu nu gudibulumuisa guagasue, mbatusala yagujinginyina nu mbatukhala nu guhuima nu aphangi etu Aklisto.

15. Ndaga tshi tudi naye gutshita?

¹⁵ Gula tudi nu giphi mukunda nu athu ako, nga ndo athu ako adi gutuvuila giphi, mbatushigo mukhala nu guhuima mukatshi dietu. Tudi naye gukatula khadilo diagasue dia giphi mu mutshima wetu, nu tudi naye gutuna gutshita ndaga jidi mutuma athu ako ha guvua giphi. Tudi naye gutshita ndaga eji jia ndando gula tudi mutshigina gutumagela mukhuala wa Yehowa udi muzuela egi: ‘Tulandulenu ndaga jidi mubata guhuima nu jidi gutukolesa hamoshi.’ (Lomo 14:19) Itshi tuajiya gutshita ha gukuatesa athu ha gukatula khadilo dia giphi, nu luholo tshi tuajiya gubamba guhuima?

16. Luholo lutshi tuajiya gukuatesa athu ako ha gubinga khadilo dia giphi?

¹⁶ Khadilo dietu nu ndaga tuana tshita jiajiya gusagesa athu ako. Mavu awa a Satana ana tshigina egi esue tukhale ‘mudijiga haphelo’ ima tuakhala nayo. (1 Yone 2:16) Uvi khadilo edi diana zola giphi. Mbatushigo mutuma athu ako ha guvua giphi, gula tushigo guadijiga tangua diagasue ima tuakhala nayo, nga inyi tudi mutshigina gutshita. Ndaga iko tudi naye gutshita  hagula athu ako avuigo giphi, idi gukhala ya gudibulumuisa tangua tuaheta inemo mu hungu. Gula tudi muzuelela inemo tudi naye tangua diagasue, tuajiya gutuma athu ako ha guvua giphi. Uvi, gula tuadihaga ha fundo dia athu ako, nu tuajiya ndaga jiabonga ana tshita, mbatuakuatesa ha gukhala nu gusuanguluga, nu mbatujinga hamoshi mu guhuima mu hungu.

17. Ndaga tshi yabonga aphangi a Yozefe akalagele, nu mukunda natshi?

¹⁷ Tuajiya gukatula khadilo dia giphi! Tutadilenu luko gifezegeselo gia aphangi a Yozefe. Asagesele Yozefe muavula, uvi gungima dia ivo yavula, adimonele n’enji gu Egypte. Gutuama egi Yozefe adijige aphangi enji gula udi nanyi, waalolele ha gujiya gula asombegesa gale khadilo diawo. Waatamegele ha gudia nawo, nu wahanele galenge gawo Benjame ima ya gudia yavula gubalega aphangi enji ako. (Gis. 43:33, 34) Guakhalelego nga gima gimoshi giamonesele egi, aphangi a Yozefe avidile Benjame giphi. Uvi amonesele guzumba gua giamatshidia mukunda nu phangi awo nu mukunda nu sh’awo Yakoba. (Gis. 44:30-34) Aphangi a Yozefe abembele khadilo dia giphi, hene avutudile guhuima mu fami yawo. (Gis. 45:4, 15) Luholo lumoshi nji, gula tuabemba khadilo dia giphi, mbatubamba guhuima mu fami yetu nu mu hungu.

18. Ha gutadila Yakoba 3:17, 18, ndaga tshi mbayibua gula tuabamba guhuima mukatshi dietu?

¹⁸ Yehowa wana tshigina egi tukatule khadilo dia giphi, nu tubambe guhuima. Tudi naye gukalagala ngolo ha gutshita ngenyi. Gifua luholo tuayimonyi mu longo edi, matangua avula tuana khala nu khadilo dia giphi. (Yak. 4:5) Luko, tudi mujinga nu athu adi nu khadilo dia giphi. Uvi gula tudi nu khadilo dia gudibulumuisa nu tudi musuanguluga nu ima tudi nayo, nu tudi muhana mersi, mbatushigo mukhala nu giphi. Mbatukhala nu guhuima nu athu tudi mujinga nawo, nu mbatukudisa makalegelo abonga.—Tanga Yakoba 3:17, 18.