1. Ndaga itshi yajiya guhana muthu gikenene? Ndaga yene yajiya gumutuma ha gutangiza itshi?

WATAGENELE gale nu ndaga yaguhanele gikenene * ba? Yajiya gukhala egi wavuile gikenene handaga muthu mumoshi waguwambelele nga wagukalegele ndaga yabola. Nga ndo wavuile gikenene mukunda nu ndaga yabola wazuelele nga wakalegele. Yajiya gukhala nji egi, wakalegele ndaga imoshi yabola nu wana gudisagesa egi, Yehowa gajiyilego gugutotesela nga hazonda. Wajiya gusendesa gutangiza egi, luholo udi muvua gikenene mukunda nu gubola watshitshile, ushigo luko nu gutshigina, nga ndo egi udi muthu wabola. Uvi idi ngenyi ba?

2. Ifezegeselo tshi ya Biblia idi mumonesa egi gukhala nu gikenene gushigo mukotelesa egi tushigo nu gutshigina?

² Tutadile ifezegeselo idi mu Biblia. Ana yonu wabuile gin’a profete Samuele wakhalele nu gutshigina guakola gudi Nzambi. Wakhalele nu gikenene giavula tangua mbanda yenji gakhalele gumusagesa. (1 Sam. 1:7) Mupostolo Phaula wakhalele nu gutshigina guakola, uvi wakhalele ‘gudisagesa mukunda nu mahungu agasue.’ (2 Kol. 11:28) Fumu Davidi wakhalele nu gutshigina guakola, hene Yehowa gakhalele gumuzumba muavula. (Makal. 13:22) Ikhale ngenyi, muene watshitshile nji ndaga jiabola jiamuhanele gikenene giavula. (Ngi. 38:4) Uvi mukut’awo agasue, Yehowa waakolesele nu waawalagenele. Tutadile malongo tuajiya guzula mu ifezegeselo yawo.

3. Mukunda natshi tuajiya guvua gikenene gula muthu watuwambela mbimbi yabola?

³ Tangua athu adi gutuwambela nga gututshitshila ndaga jiabola, tuajiya guvua gikenene. Tuajiya guvua gikenene giavula gubalega gula muthu watutshitshila gubola udi futa dietu diakola nga muenya fami yetu. Tuajiya gudisagesa muavula egi ufuta wetu nu muthu muene wajiya gubola. Matangua ako, muthu wajiya guzuela mbimbi jiabola jinyi gatangijilego. Mbimbi jiene jiajiya gutuhana lamba diavula gu mutshima! (Ish. 12:18) Nga ndo, muthu wajiya guzuela mbimbi gadi mujiya egi jiajiya gutusagesa. Ndaga ya luholo elu yabuidile gale phangi mumoshi wa mukhetu. Udi muzuela egi: “Ivo yazonda gungima, futa diami wa mutshima wasendesele gungumbila mambo mu Internet. Ndaga yene yanguhanele lamba nu gikenene. Ngakoteleselego mukunda natshi futa diami wa mutshima gadi naye gungukalegela ndaga jia luholo elu.” Gula futa diaye dia mutshima nga muenya fami yaye wagukalegele ndaga yabola, gifezegeselo gia Ana giajiya gugukuatesa.

4. Ndaga jitshi jia lamba Ana gatagenele najio?

⁴ Ana watagenele nji nu ndaga jiamuhanele lamba. Wabalegesele ivo yavula mu ulo uvi, gakhelelego muvuala ana. (1 Sam. 1:2) Enya Isalele avula akhalele mutangiza egi, gula mukhetu gashigo muvuala ana, Nzambi wamutele mukumbu. Ndaga yene yakhalele gumuhana musonyi. (Gis. 30:1, 2) Gudi nu ndaga iko yavudishile gikenene gia Ana. Mulumi’enji wahagele mukhetu muko, jina dienji Penina, nu avualele n’enji ana avula. Penina wakhalele muvuila Ana fuwa diakola, nu ‘wakhalele mutshita ndaga ha gumusagesa.’ (1 Sam. 1:6) Thomo, ndaga yene yakhalele diago musagesa Ana muavula. Wakhalele diago gudisagesa muavula, hene ‘gakhalele mudila nu gakhalele mutuna gudia.’ Wakhalele diago nu ‘gikenene giavula’ mu mutshima wenji. (1 Sam. 1:7, 10) Luholo lutshi Ana gahetele ngolo?

5. Luholo lutshi gisambu giakuatesele Ana?

⁵ Ana wawambelele Yehowa ndaga jienji jiagasue jia lamba mu gisambu. Gungima dia gusamba, watele lumene lua lamba dienji gudi Eliya Nganga-nzambi Wakoma. Eliya wamuwambelele egi: ‘Nda nu guhuima, Nzambi wa Isalele aguhue ndaga wakhadi gumutoga.’ Ndaga itshi yabuile gungima? Ana ‘wayile gumbo dienji nu wadile ima ya gudia, gu phala yenji guakhalelego luko nu gikenene.’ (1 Sam. 1:17, 18) Gisambu giakuatesele Ana ha gubamba guhuima.

6. Malongo atshi atadila gisambu tuajiya guzula gudi Ana, nu mu Filiphi 4:6, 7?

 ⁶ Tuajiya gubamba guhuima guetu gula tudi mulandula gusamba. Ana wakalegele gisambu gialeha gudi Sh’enji wa mu dilu. (1 Sam. 1:12) Esue nji tuajiya gutshita gisambu gialeha gudi Yehowa gula tudi nu gikenene, nu woma nga nu ndaga imoshi idi gutusagesa. Gisambu gietu gishigo naye gukhala gifua lungimbo, nga gukamba egi gikhale nu mbimbi jia gulonda muabonga. Matangua ako tuajiya gudila tangua tudi mutshita gisambu handaga malamba atubalegela. Ngatshima idi ngenyi, Yehowa mbagashigo muhuila ha gutegelela isambu yetu. Gula tuakatula gutshita gisambu mukunda nu milonga yetu, tudi naye nji gujiya ndaga yazuelele Phaula idi mu Filiphi 4:6, 7. (Tanga.) Phaula udi gutuwambela egi tudi naye guhana Yehowa mersi mu gisambu. Tudi diago nu ishina yavula idi gututuma ha guhana Yehowa mersi. Ha gufezegesa, tuajiya gumuhana mersi mukunda nu lujingu gatuhuile, mukunda nu ima yafugile muene, mukunda nu guzumba guenji, nu mukunda nu felela diabonga diatuhuile muene. Longo tshi diko tuajiya guzula mu lumene lua Ana?

7. Ndaga tshi Ana nu mulumi’enji akhalele mutshita mbala nu mbala?

⁷ Ngatshima Ana wakhalele nu gikenene giavula, uvi muene wakhalele muya mbala jiavula nu mulumi’enji gu Shilo ha gukombelela Yehowa. (1 Sam. 1:1-5) Hakhalele muene gu inzo ya tenta, Nganga-nzambi Wakoma Eliya wamuhanele gikhesa egi, Yehowa mbawudi muvua isambu yenji, ndaga yene yamuhanele diago gikhesa nu ngolo.—1 Sam. 1:9, 17.

8. Luholo lutshi guya mu gudibungisa gua mu hungu guana gutukuatesa? Kotelesa.

⁸ Tuajiya gubamba guhuima guetu gula tudi muya mu gudibungisa gua mu hungu. Phangi yonu wana tshita gisambu gia gisendeselo mu gudibungisa gua mu hungu, wana toga nyuma ya Nzambi ha gutukuatesa. Guhuima guakhala gitshinyi gia bundu dia nyuma ya Nzambi. (Gal. 5:22) Gula tuaya mu gudibungisa gua mu hungu, ngatshima tudi nu gikenene, tuana hana Yehowa nu aphangi etu luendu lua gutuhana gikhesa, nu ha gutukuatesa ha guheta guhuima gua mu matangi nu gua mu mutshima. Gutshita gisambu nu guya mu gudibungisa gua mu hungu gudi ndaga jia ndando Yehowa gana gukalegela ha gutuwalagana. (Heb. 10:24, 25) Tutadile longo diko tuajiya guzula mu lumene lua Ana.

9. Ndaga tshi jiasombegeselego mu lujingu lua Ana, uvi itshi yamukuatesele?

⁹ Ndaga yakhalele muhana Ana gikenene yahuile ndo mbala imoshi. Tangua Ana gakatugile gu inzo ya tenta ha guvutuga gumbo dienji, walandudile gujinga inzo imoshi nu Penina. Biblia ishigo muzuela egi makalegelo a Penina asombegesele. Ana walanduile gukolesela ngatshima mbanda yenji wakhalele muzuela mbimbi jiabola. Uvi Ana walanduile gubamba guhuima guenji gua mu matangi. Jiya egi tangua Ana gabembele ima yagasue ha mago a Yehowa, gakhalelego luko nu gikenene. Wabembele egi Yehowa amuhane gikhesa nu amuwalagane. Matangua azonda gungima, Yehowa washimbigile Ana, hene gavualele ana avula!—1 Sam. 1:19, 20; 2:21.

10. Longo tshi tuajiya guzula mu gifezegeselo gia Ana?

¹⁰ Tuajiya gubamba guhuima guetu ngatshima lamba dietu dishigo muhua. Ngatshima tudi muya mu gudibungisa gua mu hungu, nu tudi musamba tangua diagasue, ndaga jiko jia lamba jiajiya guzula matangua avula. Uvi gifezegeselo gia Ana gidi gutulongesa egi, gula tuabemba egi Yehowa atukuatese, gushigo nga gima giajiya gumukanga njila ha gutuwalagana. Yehowa mbagatujimbilago nga hazonda, mbawudi gutushimbiga nga itshi yabua.—Heb. 11:6.

11. Ndaga jitshi Phaula gatagenele najio jiakhalele gumuhana gikenene?

¹¹ Gudi nu ndaga jiavula jiakhalele muhana Phaula gikenene. Ha gufezegesa, Phaula wakhalele muvua gikenene giavula mukunda nu malamba akhalele mutagana nawo aphangi, handaga wakhalele guazumba. (2 Kol. 2:4; 11:28) Tangua mupostolo Phaula gakhalele mulongesa, mbalagaji jienji jiamubetele, gungima jia mumbile mu bologo. Watagenele nji nu malamba ako amuhanele gikenene, gifua gukhala ‘nzala.’ (Fili. 4:12) Luko, wabundugile mu masuwa mbala thathu mu lujingu luenji; ndaga eyi yakhalele naye gumuhana gikenene gula udi mutshita vuayaji mu muta. (2 Kol. 11:23-27) Itshi yakuatesele Phaula tangua gakhalele nu gikenene?

12. Itshi yakuatesele Phaula ha gulebesa gikenene gienji?

¹² Phaula wavuile gikenene mukunda nu aphangi akhalele mutagana nu malamba, uvi gakhalelego nu luholo lua gumanesela malamba awo agasue muene hakhenji. Wakhalele mujiya egi gajiyilego gutshita ndaga jiagasue muene hakhenji. Hene gatogele ukuateshi gudi athu ako ha gukuatesa aphangi a mu hungu. Wahanele inemo gudi Timote nu Tito, handaga wakhalele guashila mutshima. Mudimo aphangi awa akalegele wakuatesele diago Phaula ha gulebesa gikenene gienji.—Fili. 2:19, 20; Tito 1:1, 4, 5.

13. Luholo lutshi akulu ajiya gulandula gifezegeselo gia Phaula?

¹³ Toga ukuateshi gudi athu ako. Akulu avula mangino, ana guvua nji lamba gifua Phaula gula aphangi ako mu hungu adi mutagana nu lamba. Uvi mukulu mumoshi gajiyilego gukuatesa aphangi agasue mu hungu muene hakhenji. Khadilo dia gudibulumuisa mbadimutuma ha gukalagala hamoshi nu aphangi ako, nu ha guhana mavuala formasio ha gubamba imeme ya Nzambi.—2 Tim. 2:2.

14. Phaula gavuilego woma gu ndaga itshi, nu longo ditshi tudi muzula mu gifezegeselo gienji?

¹⁴ Jiya egi udi naye guhanewa gikhesa. Phaula wakhalele muthu wa gudibulumuisa, wakhalele mujiya egi udi nu funu ya gikhesa, hene mafuta enji amuhanele nagio. Gavuilego woma egi, athu ako ajiya gutangiza egi udi muthu waleba handaga mafuta enji akhalele gumuhana gikhesa. Tangua gasonegele Filemona mukanda, wazuelele egi: ‘Ame ngasuangulugile, nu ngahetele ngolo tangua ngavuile ndaga yatadila guzumba guaye.’ (File. 7) Phaula udi mutanga mafuta enji ako avula a mudimo anyi amuhanele  gikhesa giavula tangua gakhalele mu lamba. (Kol. 4:7-11) Gula tuajiya nu gudibulumuisa guagasue egi tudi nu funu ya ukuateshi, aphangi etu a mala nu a akhetu mbaatukuatesa tangua mbatukhala nu funu ya ukuateshi.

15. Itshi Phaula gatshitshile tangua gataganele nu lamba?

¹⁵ Khala Mutanga Mbimbi ya Nzambi. Phaula wakhalele mujiya egi Mbimbi ya Nzambi yajiya gumukuatesa. (Lomo 15:4) Yakhalele nji gumuhana ndunge jia gulua nu malamba. (2 Tim. 3:15, 16) Tangua Phaula gambiwe mu bologo mu mbala ya mbadi gu Roma, watangijile egi gufua guenji guasuena. Itshi Phaula gatshitshile tangua gataganele nu ndaga eyi ya lamba? Wawambelele Timote ha gumubatela ‘ba rulo’ muphushi. (2 Tim. 4:6, 7, 9, 13) Mukunda natshi? Handaga rulo jiene jiakhalele nu gitshinyi gia mbimbi ya Nzambi mu zuelelo dia hebelu. Phaula wakhalele nu funu ya gujikalegela ha gulonguga Mbimbi ya Nzambi. Gula tudi mutanga Biblia tangua diagasue gifua Phaula, Yehowa mbawutuwalagana mu njila ya Mbimbi yenji, ngatshima tuatagana nu malamba.

16. Luholo lutshi Davidi gadivuile tangua gakalegele gubola guakoma?

¹⁶ Davidi watshitshile ndaga imoshi yabola yakhalele gumusagesa muavula. Wakalegele uthambi nu Batesheba, washiyishile mulumi’a Batesheba, gungima wasuegele ndaga eji jiabola jiatshitshile muene. (2 Sam. 12:9) Thomo, Davidi gavilego lubelo luakhalele gumuhana mutshima wenji. Hene, ufuta wenji nu Yehowa wabolele, wamonele lamba mu matangi nu mu muila. (Ngi. 32:3, 4) Itshi yakuatesele Davidi ha gulua nu gikenene gakhalele muvua mukunda nu gubola guatshitshile muene, nu itshi yajiya gutukuatesa gula tuatshita gubola guakoma?

17. Luholo lutshi mbimbi jidi mu Ngimbo 51:1-4 jidi mumonesa egi Davidi wabalumuine diago mutshima wenji?

¹⁷ Kombelela Hagula Yehowa Agutotesele Gubola Guaye. Davidi wakambele ukuateshi wa Yehowa mu gisambu. Wabalumuine mutshima wenji, nu wawambelele Yehowa gubola guenji. (Tanga Ngimbo 51:1-4.) Gungima wahetele guhuima gua matangi nu gusuanguluga! (Ngi. 32:1, 2, 4, 5) Gula watshita gubola guakoma, ukambigo gusuega gubola guene. Uvi, dijiga Yehowa gubola guaye guagasue mu gisambu. Ngenyi, mbawuheta guhuima gua matangi, nu mbawudisagesago luko muavula. Ushigo naye phamba gusamba, uvi gudi nu ndaga iko udi naye gutshita gula watshigina guvutula ufuta waye nu Yehowa.

18. Itshi Davidi gatshitshile tangua amuhanele disipline?

 ¹⁸ Khala mutshigina disipline. Tangua Yehowa gatumine profete Natana ha gudijiga Davidi gubola guenji, Davidi gakambelego gudibingisa nga gumonesa gifua ndaga yatshitshile muene yakhalelego diago yabola. Watshiginyile egi watshitshile gubola luholo gashiyile mulumi’a Batesheba, nu watshitshile diago gubola guakoma gudi Yehowa. Davidi watshiginyile disipline dia Yehowa, hene Yehowa gamutotesele. (2 Sam. 12:10-14) Gula tuatshita gubola guakoma, tudi naye gudijiga ndaga yene gudi athu Yehowa gahanele ginemo gia gutubamba. (Yak. 5:14, 15) Tushigo naye gukamba gudibingisa. Gula tuatshigina nu tuakalegela disipline atuhanyi, mbatuheta guhuima nu gusuanguluga mu phushi.

19. Tudi naye guzula desizio dia gutshita itshi?

¹⁹ Zula desizio dia gutuna guvutugila ndaga imoshi yabola watshitshile. Fumu Davidi wajiyile egi udi naye gukamba ukuateshi wa Yehowa hagula gavutugilago luko gubola guenji. (Ngi. 51:7, 10, 12) Tangua Yehowa gamutotesele gubola, Davidi wazudile desizio dia gukatula matangi agasue abola. Hene gahetele guhuima gua mu mutshima.

20. Luholo lutshi tuajiya gumonesa egi tuana suanguluga nu luholo Yehowa gana gututotesela gubola?

²⁰ Tuana monesa egi tuana suanguluga nu luholo Yehowa gana gututotesela gubola, tangua tuana gumusamba gula tuatshita gubola, tangua tuana tshigina disipline, nu tangua tuana tshita ngolo ha gutuna guvutugila gutshita gubola guene. Gula tuatshita ndaga eji, mbatuheta guhuima gua mu mutshima. Phangi James watshitshile ndaga eji, tangua gakalegele gubola guakoma. Udi muzuela egi: “Tangua ngadijigile akulu gubola ngatshitshile, ngavuile gifua angukatula ginemo ha phanga. Ngahetele luko guhuima gua matangi.” Idi diago gutusuanguluisa ha gujiya egi ‘Yehowa wakhala hehi gudi athu adi nu gikenene; wana huluisa anyi adi mila yaleba’!—Ngi. 34:18.

21. Luholo lutshi tuajiya gubemba egi Yehowa atuwalagane?

²¹ Luholo gisugishilo gia mavu giasuena hehi, ndaga jiana hana gikenene jidi muya nu guvula. Gula gikenene giagujila, toga ukuateshi wa Yehowa mu gisambu muphushi. Longuga Biblia muabonga. Zula malongo mu gifezegeselo giabembele Ana, Phaula nu Davidi. Toga Tata waye wa mu dilu hagula agukuatese ha gujiya ndaga idi guguhana gikenene. (Ngi. 139:23) Bemba Yehowa agukuatese gu malamba aye agasue, nga gu malamba anyi agubalega ngolo. Gula watshita ngenyi, mbawukhala gifua muyimbi wa ngimbo yonu wayimbidile Yehowa egi: ‘Tangua ngana khala nu gikenene giavula mu mutshima, aye wana gunguhana ngolo, nu wana gunguwalagana.’—Ngi. 94:19.