LONGO DIA 7
Gukotelesa Ginemo gia Akulu mu Hungu
‘Klisto udi fumu ya hungu udi mu huluishi wa hungu diene.’—EF. 5:23.
LUNGIMBO 137 Femmes de foi, chrétiennes fidèles
NDAGA JIDI MU LONGO EDI *
1. Ndaga itshi yana kuatesa fami ya Yehowa ha gujinga hamoshi?
TUANA zumba gukhala mukatshi dia fami ya Yehowa. Mukunda natshi tuana khala mu guhuima nu tuana jinga hamoshi? Handaga mukut’etu agasue, tuana nemesa athu anyi Yehowa ahanele ginemo gia gutuameza. Yadiago, gila tuakotelesa ndaga yatumile Yehowa ha gutomba athu ene, mbayitukuatesa ha gujinga hamoshi.
2. Mu longo edi tuza muhana mvutu gu mihu itshi?
2 Mu longo edi, tuza mumona athu Yehowa ahanele ginemo gia gutuameza hungu. Tuza nji muheta mvutu gu mihu eyi: Itshi aphangi a akhetu ana kalagala mu hungu? Phangi wagasue wa yala udi fumu wa phangi wagasue wa mukhetu mu hungu ba? Akulu adi naye gutuameza aphangi a mala nu a akhetu gifua luholo tata ana tuameza fami yenji ba? Thomo, tuzuelelenu luholo tudi naye gutadila aphangi a akhetu mu hungu.
LUHOLO TUDI NAYE GUTADILA APHANGI A AKHETU
3. Luholo lutshi tuajiya gumonesa egi tuana zula mudimo wana kalagala aphangi a akhetu nu ndando?
3 Tuana suanguluga muavula nu mudimo wakola aphangi akhetu ana tshita ha gukuatesa fami jiawo, gulongesa lukuma luabonga nu luholo ana kuatesa hungu. Ha gumonesa egi tuana guazula nu ndando, tudi naye guatadila gifua luholo Yehowa nu Yesu ana guatadila. Tuza nji mumona luholo gifezegeselo gia mupostolo Phaula, giza gutukuatesa hagujiya luholo tudi naye gukalegela aphangi a akhetu ndaga.
4. Luholo lutshi Biblia idi mumonesa egi Yehowa wana zula aphangi a akhetu nu a mala luholo lumoshi?
4 Biblia idi mumonesa egi Yehowa wana tadila aphangi a akhetu nu a mala luholo lumoshi. Ha gufezegesa, yana zuela egi mu siekle ya thomo, Yehowa wahanele nyuma yenji gudi mala nu akhetu. Waahanele nji ngolo jia gukalagala ndaga jia gushimana, gifua guzuela mu mazuelelo a gudisha. (Makal. 2:1-4, 15-18) Mu njila ya nyuma yenji, Yehowa wana tomba aphangi a mala nu akhetu anyi mbahinyina nu Klisto. (Gal. 3:26-29) Aphangi ako a mala nu akhetu, adi nu felela dia gujinga ha mavu mayilago. (Yat. 7:9, 10, 13-15) Mukut’awo agasue ana khala nu ginemo gia gumuanga nu gulongesa lukuma luabonga. (Mat. 28:19, 20) Ha gufezegesa, mukanda wa Makalegelo wana zuelela mudimo wakalegele phangi Prisile. Muene nu mulumi’enji Akila akuatesele Apolo wakhalele muthu ya gulonguga muavula, ha gukotelesa giamatshidia muabonga.—Makal. 18:24-26.
5. Luholo lutshi mukanda wa Luka 10:38, 39, 42 udi mumonesa egi Yesu wakhalele munemesa akhetu?
5 Yesu wakhalele munemesa akhetu. Alanduilego gifezegeselo gia Afalese anyi akhelele mutangiza egi akhetu ashigo nu ndando, ajiyilego guta nawo maga ha meso a athu avula, nu ashigo naye gulongesewa Mbimbi ya Nzambi. Uvi Yesu nu alandudi enji ako, akhalele mulongesa Mbimbi ya Nzambi ikhale gudi mala nga gudi akhetu. * (Tanga Luka 10:38, 39, 42.) Luko wahanele akhetu luendu lua gulongesa nenji lukuma luabonga. (Luka 8:1-3) Tangua Yesu afuzumugile, wahanele nji akhetu luendu lua guya muwambela apostolo egi wafuzumuga gale.—Yone 20:16-18.
6. Luholo lutshi mupostolo Phaula amonesele egi wakhalele munemesa akhetu?
6 Mupostolo Phaula wawambelele Timote ha gunemesa akhetu. Phaula wamuwambelele egi: Udi naye gutadila ‘akhetu a gukola gifua a mama, mavuala a akhetu gifua aphangi’aye.’ (1 Tim. 5:1, 2) Paula watshitshile ngolo ha gukuatesa Timote hagula abue mu Klisto wagukula mu nyuma. Uvi wakhalele mujiya egi, mama wa Timote nu khakha wenji wa mukhetu a mulongesele thomo ‘Mbimbi ya Nzambi.’ (2 Tim. 1:5; 3:14, 15) Paula watangele majina a aphangi a akhetu mu mukanda wasonegele muene gudi enya Roma. Wamonele mudimo wakola aphangi a akhetu akhalele mutshita, waahanele nji mersi mukunda nu mudimo wene.—Lomo 16:1-4, 6, 12; Fili. 4:3.
7. Mihu itshi tuza mutadila?
7 Luholo paragrafe jiabalega jiayimonesa, gushigo nga verse imoshi yana monesa egi aphangi a mala adi nu ndando yavula gubalega aphangi a akhetu. Aphangi a akhetu ana kuatesa hungu muavula. Akulu ana khala diago nu gusuanguluga luholo aphangi a akhetu ana kuatesa hungu ha gukhala mu guhuima nu ha gujinga hamoshi. Uvi tukambenu mvutu gu mihu eyi yalandula. Ha gufezegesa, mukunda natshi Yehowa wana toga aphangi a akhetu ha gutshuiga muto mu ba okazio ako? Luholo ana tomba phamba aphangi a mala ha gukhala akulu nga akuateshi a mudimo, idi mukotelesa egi aphangi agasue a mala adi naye gutuameza aphangi agasue a khetu a mu hungu ba?
APHANGI AGASUE A MALA ADI NAYE GUTUAMEZA APHANGI AGASUE A AKHETU MU HUNGU BA?
8. Hagutadila Efeso 5:23, phangi wagasue wa yala udi fumu wa aphangi agasue a akhetu mu hungu ba? Kotelesa.
8 Phangi wagasue wa yala, gashigo fumu wa aphangi agasue a akhetu mu hungu! Handaga Klisto udi Fumu ya hungu. (Tanga Efeso 5:23.) Mu fami, yala wana khala fumu ya mukaji’enji. Mona wayala wabatijiwe gale, gashigo fumu ya mama wenji. (Ef. 6:1, 2) Mu hungu, akulu ahanewe ginemo gia gutuameza aphangi a mala nu a akhetu mu ndaga jiko. (1 Tes. 5:12; Heb. 13:17) Phangi wa mukhetu udi khenji gazudiwe gale ndo mu ulo, ngatshima wakatugile gale gumbodiawo, wana landula gunemesa mvuanji jienji nu akulu. Uvi wana jiya egi Yesu udi fumu yenji, gifua phangi wagasue wa yala mu hungu.
Phangi wa yala udi khenji gazudilego mukhetu mu ulo nga phangi wa mukhetu yonu ashigo mu ulo, gila akatugile gale gumbodiawo ana khala mu utuameji wa Yesu (Tala paragrafe 8)
9. Mukunda natshi matangua ako aphangi a akhetu adi naye gutshuiga muto?
9 Yehowa watombele mala ha gulongesa nu ha gutadila ndaga mu hungu. Uvi ahanelego aphangi a akhetu ginemo gia luholo lumoshi. (1 Tim. 2:12) Mukunda natshi? Luholo lumoshi Yehowa watombele Yesu ha gukhala fumu wa yala hagula ndaga jiajiya guyila muabonga mu hungu. Gula mu okazio umoshi ngenyi phangi wa mukhetu udi mutshigina gukalagala ndaga aphangi a mala ana gukalagala, udi naye gutshuiga muto gifua luholo Yehowa ana gutshigina. * (1 Kol. 11:4-7) Yehowa wana togago aphangi a akhetu ha gukalagala ngenyi ha guasegulula. Uvi wana tshigina egi anemese athu anyi atombele muene ha gutuameza hungu. Henyaha tuhanenu mvutu gu muhu owu: Ginemo gitshi fumu wa fami nu akulu adi nagio?
GINEMO MAFUMU A FAMI NU AKULU ANA KHALA NAGIO
10. Mukunda natshi matangua ako mukulu wajiya guhana aphangi a mu hungu malongo?
10 Akulu ana zumba Klisto, ana zumba nji “imeme” Yehowa nu Yesu a ahanele ha gubamba. (Yone 21:15-17) Mukulu wajiya gutangiza egi udi tata mukunda nu aphangi handaga ahanewe ginemo gia gubamba hungu. Wajiya nji gutangiza egi luholo fumu ya fami ana haga mikhuala ha gubamba enya fami yenji, muene nji wajiya guhana malongo ha gubamba imeme ya Yehowa. Aphangi ako a mala nu a akhetu ajiya gutadila akulu gifua atata awo a mu nyuma, ajiya guatoga malongo gula adi mutshigina guzula ba desizio. Akulu mu hungu nu mafumu a fami, ana khala nu ginemo gia luholo lumoshi ba?
Akulu ana kuatesa aphangi a mu hungu ha gukhala nu ufuta wakola nu Yehowa nu ha gudivua egi ana zumbiwa. Yehowa waahanele ginemo gia guzola mu hungu muthu watshitshi gubola gila abalumuinego mutshima (Tala paragrafe 11-12)
11. Luholo lutshi inemo yana tagenesa mafumu a fami, yana gudivua nu ndaga jiko jiana kalagala akulu?
11 Mupostolo Phaula wamonesele egi gudivua guana khala mukatshi dia ndaga jiko tata wana kalagala mukunda nu fami yenji nu jinyi akulu ana kalagala mukunda nu hungu. (1 Tim. 3:4, 5) Ha gufezegesa, Yehowa wana tshigina egi fami ya mudidi idi naye gutumagela tata. (Kol. 3:20) Wana tshigina nji egi aphangi a mu hungu atumagele akulu. Yehowa wana tshigina egi mafumu a fami nu akulu, adi naye gutshita yagasue ha gukuatesa athu ana tuameza ha gukhala nu ufuta wakola nenji. Adi naye nji guazumba. Gifua luholo mafumu a fami ana kalagala, akulu ana tshita yagasue ha gukuatesa aphangi a muhungu anyi adi mutagana nu malamba. (Yak. 2:15-17) Yehowa wana tshigina nji egi akulu nu mafumu a fami, akuatese athu ako ha gutumagela mikhuala yenji. Uvi wazuelele nji egi: ‘Ashigo naye gukalagala ndaga jinyi jishigo jia gusonega’ mu Biblia.—1 Kol. 4:6.
Yehowa wahanele mafumu a fami ginemo gia gutuameza fami jiawo. Yala wana zumba mukaji’enji wana gudivua nenji thomo gutuama dia guzula ba desizio mu fami (Tala paragrafe 13)
12-13. Gifua luholo Lomo 7:2 idi guyimonesa, luholo lutshi ndaga Yehowa atogele mafumu a fami ha gukalagala, jidi jia gudisha nu jinyi atogele akulu?
12 Gudisha guana khala nji mukatshi dia inemo Yehowa ahanele akulu nu inyi ahanele mafumu a fami. Ha gufezegesa, Yehowa wahanele akulu ginemo gia gukalagala gifua manzuji nu guzola muthu munu watshitshi gubola mu hungu gula ashigo mubalumuna mutshima.—1 Kol. 5:11-13.
13 Yehowa wahanele mafumu a fami inemo iko inyi akulu ana khalago naye. Ha gufezegesa, wahanele tata njila ya gushila fami yenji mikhuala nu gujiya gula adi munemesa mikhuala yene. (Tanga Lomo 7:2.) Tata wajiya nji guzula desizio dia gujiya tangua an’enji adi naye guvutuga gu inzo mu ngueze. Wajiya nji guhana an’enji ndola gula ashigo mutumagela mikhuala yene. (Ef. 6:1) Uvi tata wa guzumba, gutuama dia gusha mikhuala mu fami yenji wana gudivua thomo nu mukaji’enji handaga adi muthu “mumoshi.” *—Mat. 19:6.
KHALA MUNEMESA KLISTO FUMU YA HUNGU
Yehowa wahanele Yesu ginemo gia gutuameza hungu dia Uklisto (Tala paragrafe 14)
14. (a) Ha gutadila Mako 10:45, mukunda natshi Yehowa atombele Yesu ha gukhala fumu ya hungu? (b) Ndaga tshi Hunji dia Akulu Atuameji ana kalagala? (Tala galuanda “ Ndaga Jiana Kalagala Hunji dia Akulu Atuameji.”)
14 Mu njila ya gibawu Yehowa wahanele muthu wagasue mu hungu luendu lua guheta monyo wa mayilago. (Tanga Mako 10:45; Makal. 20:28; 1 Kol. 15:21, 22) Yehowa watombele Yesu yonu wahanele monyo wenji gifua mulambu, ha gukhala fumu ya hungu. Gishina giene, Yesu wana hagela athu mikhuala hagujiya ndaga adi neye gukalagala, ikhale mu fami nga mu hungu. Wana tshita nji yagasue ha gujiya gula tudi mutumagela mikhuala yene. (Gal. 6:2) Uvi Yesu wana hagago phamba mikhuala. Wana kalagala ndaga jiavula gifua: Gutudisa nu wana gutuzumba nji.—Ef. 5:29.
15-16. Malongo atshi tuajiya guzula mu ndaga jiazuela phangi Marley nu phangi Benjamin?
15 Aphangi a akhetu ana monesa egi ana nemesa Klisto tangua ana tumagela ndaga jiana zuela athu atombele muene ha guakuatesa. Aphangi a akhetu avula gifua phangi Marley, yonu wana jinga gu États-Unis, udi muzuela egi: “Ngana suanguluga nu ndaga Yehowa wana gututoga ha gukalagala mu fami nga mu hungu. Ngana tshita yagasue ha gunemesa mulumi’ami nu akulu, handaga Yehowa wa ahanele ginemo gia gutuameza. Uvi mulumi’ami nu aphangi a mala mu hungu ana gungukuatesa muavula handaga ana gungunemesa nu ana gunguhana mersi mu ndaga jiagasue ngana kalagala.”
16 Aphangi a mala ana monesa egi ana suanguluga nu ginemo Yehowa ahanele, tangua ana nemesa aphangi a akhetu. Phangi Benjamin wana jinga gu Angleterre udi muzuela egi: “Mvutu jiana hana aphangi akhetu mu gudibungisa gua mu hungu, luholo ana tshita gulonguga guawo hakhawo nu gikhesa giawo mu mudimo wa gulongesa giana gungukolesa diago. Ndanga ana kalagala jiana khala diago nu ndando yavula.”
17. Mukunda natshi tudi naye gunemesa athu Yehowa ahanele ginemo gia gutuameza?
17 Gila athu agasue mu hungu, ikhale mala, akhetu, mafumu a fami nu akulu adi mukotelesa nu adi munemesa athu Yehowa ahanele ginemo gia gutuameza, hungu mbadikhala mu guhuima. Ndaga ya gubalega ndando idi egi tuana tumbuisa nji Yehowa Sh’etu wa mu dilu.—Ngi. 150:6.
LUNGIMBO 123 Fidèlement soumis à l’ordre théocratique
^ par. 5 Ndaga tshi aphangi a akhetu ana kalagala mu hungu? Phangi wagasue wa yala, udi fumu ya phangi wagasue wa mukhetu ba? Akulu nu mafumu a fami ana tagenesa inemo ya luholo lumoshi ba? Mu longo edi Biblia iza gutukuatesa ha guheta mvutu gu mihu eyi.
^ par. 5 Tala paragrafe 6 ya longo didi mu zuela egi: “Kuatesa Aphangi a Akhetu a mu Hungu Dienu,” diazolewe mu Inzo Yaleha ya Mutaledi ya Septembre 2020.
^ par. 9 Tala galuanda “ Tangua Ditshi Phangi wa Mukhetu adi Naye Gutshuiga Muto?”
^ par. 13 Hagujiya muthu udi naye guzula desizio dia gutomba hungu fami idi naye guya, tala paragrafe 17-19 ya longo didi muzuele egi: “Khala Munemesa Muthu Wagasue mu Hungu,” diazolewe mu Inzo Yaleha Ya Mutaledi ya Août 2020.
^ par. 59 Ha gujiya ndaga jiavula jiatadila mulonga owu tuazuelela tala mukanda “Gardez-vous dans l’amour de Dieu”, diyiji 209-212.
^ par. 64 Ha gujiya ndaga jiavula jiatadila inemo ya Hunji dia Akulu Atuameji, tala Inzo Yaleha ya Mutaledi, 15 Juillet, 2013 ya Français diyiji 20-25.
