1-2. Ha gutadila Matayo 5:11, luholo lutshi tudi naye gutadila malamba tuana tagana nawo?

YESU wawambelele alandudi enji egi mbaakhala nu gusuanguluga gua giamatshidia. Waawambelele nji egi athu ana gumulandula mbaatagana nu malamba. (Mat. 10:22, 23; Luka 6:20-23) Tuana khala nu gusuanguluga handaga tudi alandudi a Klisto. Uvi, luholo lutshi tuajiya gudivua gula enya fami yetu adi gututunyisa ha gukombelela Yehowa, mafumu a leta adi gutusagesa, mafuta etu a mudimo nu a khalasa adi gututuma ha gukalagala ndaga yabola? Idi yadiago egi ndaga eji jiajiya gutuhana diago gikenene.

² Athu ana gutangiza egi gula muthu udi mutagana nu malamba gajiyilego gukhala nu gusuanguluga. Uvi Mbimbi ya Nzambi yana zuela egi tuajiya gukhala nu gusuanguluga ngatshima tudi mutagana nu malamba. Ha gufezegesa, mulandudi Yakoba wasonegele egi, gila tudi mutagana nu malamba tushigo naye guleba muila uvi tudi naye gutadila malamba ene gifua luendu lua gukhala nu gusuanguluga. (Yak. 1:2, 12) Yesu wazuelele egi, tudi naye gukhala nu gusuanguluga ngatshima tudi mutagana nu usageshi. (Tanga Matayo 5:11.) Luholo lutshi tuajiya gubamba gusuanguluga guetu ngatshima tudi mutagana nu malamba? Tuajiya guzula malongo avula mu mukanda wasonegele Yakoba gudi Aklisto a mu siekle ya thomo. Henyaha tutadilenu malamba Aklisto ene atagenele nawo.

3. Tangua Yakoba wabuile mulandudi ndaga tshi yabuile gungima?

³ Tangua Yakoba phangi wa Yesu wabuile mulandudi, gungima dia tangua diazonda Aklisto a gu Yelusalema atagenele nu usageshi. (Makal. 1:14; 5:17, 18) Tangua mbalagaji jiashiyile mulandudi  Etiene, Aklisto avula ‘amuangenele mukhanda jiagasue jia Yudea nu gu Samaliya’ nu mu mafundo a gualeha gifua gu Shipre nu gu Antiokia. (Makal. 7:58–8:1; 11:19) Aklisto awa atagenele diago nu malamba avula. Uvi, akhalele mulongesa lukuma luabonga nu gikhesa giagasue mafundo agasue akhalele muya. Gungima mu mafundo ene athu avula abuile akombeledi a Yehowa. (1 Phet. 1:1) Gungima Aklisto ene atagenele nu malamba avula.

4. Malamba atshi ako Aklisto a mu siekle ya thomo ataganele nawo?

⁴ Aklisto a mu siekle ya thomo atagenele diago nu malamba avula. Ha gufezegesa hehi nu givo 50 gia Tangua Dietu, Fumu Claude ya gu Roma wazuelele egi enya Yuda agasue adi naye gukatuga gu Roma. Ngenyi enya Yuda anyi abuile Aklisto akhalele mushinjigiwa ha gubemba jinzo jiawo ha guya mu mafundo ako. (Makal. 18:1-3) Hehi nu givo 61 gia Tangua Dietu, mupostolo Phaula wasonegele egi athu akalegele ndaga jiavula jiabola mukunda nu aphangi’enji a Aklisto, ambiwe mu bologo nu azangudile ima yawo. (Heb. 10:32-34) Gifua athu agasue, Aklisto awa akhalele nji mutagana nu lamba dia uphutu nu ukhashi.—Lomo 15:26; Fili. 2:25-27.

5. Mihu itshi tuza muzuelela?

⁵ Tangua Yakoba asonegele mukanda wenji gutuama dia givo 62 gia Tangua Dietu, wakhalele mujiya muabonga malamba aphangi a mala nu a akhetu akhalele mutagana nawo. Yehowa wahanele Yakoba nyuma yenji ha gusonegela Aklisto ene malongo ajiya guakuatesa ha gulandula gukhala nu gusuanguluga ngatshima akhalele mutagana nu malamba. Tutadilenu mukanda wa Yakoba ha guhana mvutu gu mihu eyi: Gusuanguluga gutshi Yakoba akhalele muzuelela? Itshi yajiya gutshita egi Muklisto atotese gusuanguluga guenji? Luholo lutshi ndunge nu gutshigina nu gikhesa yajiya gutukuatesa ha gubamba gutshigina guetu ikhale tudi mutagana nu malamba a luholo lutshi?

6. Ha gutaladila Luka 6:22, 23, mukunda natshi Muklisto wajiya gukhala nu gusuanguluga ngatshima udi mutagana nu malamba?

⁶ Athu ajiya gutangiza egi ha gukhala nu gusuanguluga, adi naye gukhala nu sante yabonga, mbongo jiavula, adi naye nji gukhala nu guhuima mu fami. Uvi, gusuanguluga Yakoba akhalele muzuelela gudi mukatshi dia bundu dia nyuma yabonga. Guanago gukatuga mu ndaga tuana tagana najio. (Gal. 5:22) Muklisto wajiya gukhala nu gusuanguluga gua giamatshidia gila udi mujiya egi wana suanguluisa Yehowa nu wana landula gifezegeselo gia Klisto. (Tanga Luka 6:22, 23; Kol. 1:10, 11) Tuajiya gufuanesa gusuanguluga guetu nu tshuiya tudi mukatshi dia muenda. Muenda wana kuatesa tshuiya ha gulandula gulema ngatshima funji idi guene. Esue nji tuajiya gulandula gukhala nu gusuanguluga ngatshima tudi mutagana nu lamba dia luholo lutshi mu monyo wetu gifua ukhashi nga tushigo nu makuta avula. Mbatulandula nji gukhala nu gusuanguluga ngatshima athu adi gutukalegela ndaga jiabola, enya fami yetu nga athu ako adi gutusagesa. Tuajiya nji gukhala nu gusuanguluga guavula tangua diagasue mbalagaji jidi mutshigina gutukatula nago. Malamba tuana tagana nawo mukunda nu gutshigina guetu, ana monesa diago egi tudi alandundi a giamatshidia a Klisto. (Mat. 10:22; 24:9; Yone 15:20) Gishina giene, Yakoba wasonegele egi: ‘Anetu khalenu nu gusuanguluga tangua mudi mutagana nu malamba a luholo nu luholo.’—Yak. 1:2.

7-8. Mukunda natshi gutshigina guetu guana kola tangua tuana tagana nu malamba?

⁷ Yakoba wamonesele ndaga jiana kuatesa Aklisto ha gukolesela tangua ana tagana nu malamba akola. Wazuelele egi: ‘Tangua gutshigina guenu guana lolewa, yana gumikuatesa ha gukolesela.’ (Yak. 1:3) Tuajiya gufanesa malamba tuana tagana nawo nu tshuiya ana kalegela ha gufula phogo. Gula utadi wazula tshuiya gungima tshuiya tuene tuahua, wana kola. Luholo lumoshi nji tangua tuana kolesela mu malamba gutshigina guetu guana kola diago. Gishina giene Yakoba asonegele egi: ‘Bemba egi gukolesela gumanesele mudimo wenji, hagula muajiya gukhala atagana nu gukalagala ndaga jiagasue mu luholo luabonga.’ (Yak. 1:4) Gujiya egi malamba tuana tagana nawo ana kolesa gutshigina guetu, mbagutukuatesa ha gukolesela malamba ene nu gusuanguluga guagasue.

⁸ Mu mukanda wenji, Yakoba wamonesele nji ndaga jiko jiajiya gutukatula gusuanguluga. Ndaga tshi jiene? Luholo lutshi tuajiya gujibinga?

9. Mukunda natshi tuana khala nu funu ya ndunge?

⁹ Ndaga tuajiya gukalagala gila tuatagana nu lamba. Gila tuatagana nu malamba, tudi naye gutoga Yehowa ha gutukuatesa hagula tuajiya guzula ba desizio ajiya gumusunguluisa, anyi ajiya gubatela aphangi’etu gubonga nu ajiya gutukuatesa ha gusala agujinginyina. (Yel. 10:23) Tuana  khala nu funu ya ndunge ha gujiya ndaga tudi naye gukalagala nu ndaga tudi naye guwambela athu adi gutusagesa. Gula tushigo mujiya ndaga tudi naye gukalagala, tuajiya guleba muila nu gutotesa gusuanguluga guetu.

10. Hagutadila Yakoba 1:5, itshi tudi naye gukalagala ha guheta ndunge?

¹⁰ Ndaga udi naye gukalagala: Toga Yehowa ndunge. Hagula tukhale nu gusuanguluga tangua tudi mukolesela mu malamba, tudi naye gutoga Yehowa ndunge ha guzula ba desizio awaha. (Tanga Yakoba 1:5.) Itshi tudi naye gutshita gula Yehowa ashigo muhana mvutu gu isambu yetu mu tangua diene? Yakoba udi muzuele egi: ‘Landula gutoga’ Nzambi. Yehowa anago guvua khabu tangua tuana landula gumutoga ndunge. Tangua tuana gumutoga ndunge ha gukolesela mu malamba etu, Tata wetu wa mu dilu wana ‘gutuhana nu gusuanguluga guagasue.’ (Ngi. 25:12, 13) Wana gumona malamba tuana gutagana nawo, wana gudisagesa nu wana khala hehi ha gutukuatesa. Gujiya ngenyi guana gutusuanguluisa muavula diago! Na, luholo lutshi Yehowa ana gutuhana ndunge jiene?

11. Ndaga tshi iko tudi naye gutshita ha guheta ndunge?

¹¹ Yehowa wana gutuhana ndunge mu njila ya Mbimbi yenji Biblia. (Ish. 2:6) Ha guheta ndunge tudi naye gulonguga Biblia nu mikanda yetu iko yana gukotelesa Biblia. Uvi tushigo naye phamba gutanga Biblia ha guheta ujiyi wavula. Tudi naye gukalagala ndaga jiagasue jiana gututoga Nzambi. Yakoba wasonegele egi: ‘Tushigo naye gukhala phamba athu ana gutegelela uvi tudi naye gutshita ndaga Mbimbi ya Nzambi idi muzuela.’ (Yak. 1:22) Tangua tuana kalegela malongo a Nzambi, tuana khala mu guhuima, tuana khalago enya ndaga jiakola, tuana khala nji nu khadilo dia khenda. (Yak. 3:17) Makalegelo awa agasue, ana gutukuatesa ha gukolesela malamba etu agasue nu gusuanguluga guagasue.

12. Mukunda natshi idi nu ndando ha gujiya Biblia muabonga?

 ¹² Mbimbi ya Nzambi idi gifua nganza handaga yana gutukuatesa ha guditadila muabonga nu ha gujiya ndaga tudi naye gusombegesa. (Yak. 1:23-25) Ha gufezegesa, gungima dia gulonguga Biblia tuajiya gukotelesa makalegelo tudi naye gusombegesa. Yehowa wana gutukuatesa ha gukhala nu guhuiminyina tangua athu ana gutukalegela ndaga jiana gutuhana khabu. Guhuiminyina guana gutukuatesa ha gutshita ndaga mu luholo luabonga gula tuatagana nu lamba. Guana gutukuatesa nji ha gutangigiza muabonga nu ha guzula ba desizio awaha. (Yak. 3:13) Idi diago nu ndando yavula ha gujiya Biblia muabonga!

13. Mukunda natshi tudi naye gulonguga ifezegeselo ya athu anyi Biblia idi muzuelela?

¹³ Matangua ako tuana zula malongo phamba gungima dia gutshita gubola. Uvi ishigo luholo luabonga lua guzula malongo. Luholo luabonga lua guyikalagala, idi guzula malongo mu ndaga jiabonga nu jiabola athu ako ana kalagala. Gishina giene Yakoba udi gutukolesa ha gutadila ifezegelo idi mu Biblia gifua gia Abalahama, Rahaba, Yobo, nu Eliya. (Yak. 2:21-26; 5:10, 11, 17, 18) Akombeledi awa a Yehowa a gujinginyina akolesele mu malamba anyi akhalele naye gukatula gusuanguluga guawo. Ifezegeselo yawo idi mumonesa egi Yehowa wajiya gutukuatesa ha gukalagala ndaga jia luholo lumoshi.

14-15. Mukunda natshi tushigo naye gukhala nu badute?

¹⁴ Gila tudi nu badute mukunda nu gutshigina guetu. Matangua ako yajiya gukhala lamba mukunda nu esue ha gukotelesa ndaga imoshi mu Biblia. Tuajiya nji gutangiza egi Yehowa ahanelego mvutu gu isambu yetu luholo tuakhadi gudifelela. Ndaga eji jiajiya gututuma ha gukhala nu badute. Uvi gula tualandula gukhala nu badute mbatukhadigo nu gutshigina guakola. Yajiya nji gubolesa ufuta wetu nu Yehowa. (Yak. 1:7, 8) Luko tuajiya gutotesa felela dietu mukunda nu masugu adi muza.

¹⁵ Mupostolo Phaula wafuanesele felela dietu mukunda nu masugu adi muza nu longo. (Heb. 6:19) Longo diana kuatesa masuwa gu funji yakola, diana guamagenesa ha gula adikumigo gu maseso. Uvi longo diana khala nu ndando phamba gila malenge (chaîne) adi a gujitshiga gu masuwa ashigo a gubatuga. Gifua luholo ukelengenye wana bolesa chaîne ya longo, esue nji gila tudi nu badute gutshigina guetu guajiyilego gukhala guakola. Tangua tuana tagana nu malamba muthu yonu wana khala nu badute wajiya gutangiza egi Yehowa mbaashigo mutagenesa mafelela enji. Gila tushigo nu gutshigina mbatutotesa felela dietu. Yakoba wazuelele egi: muthu udi nu giphapha ‘udi gifua matshiphatshipha a muta anyi funji yana bata khanda nu khanda.’ (Yak. 1:6) Muthu ya luholo elu gajiyilego gukhala nu gusuanguluga nga hazonda!

16. Itshi tudi naye gutshita gula tudi nu badute?

¹⁶ Ndaga udi naye gukalagala: Tshita yagasue ha gutuna gukhala nu badute ha gukolesa gutshigina guaye. Tushigo naye guzula ba desizio phushi-phushi. Mu masugu a profete Eliya, akombeledi a Yehowa akhalele nu badute mukunda nu gutshigina guawo. Eliya waawambelele egi: ‘Uu nu tangua ditshi mudi naye gukhala nu giphapha? Gila Yehowa udi Nzambi ya giamatshidia mukombelelenu uvi gila Bale mukombelelenu!’ (1 Maf. 18:21) Idi nji luholo lumoshi nu mangino. Tudi naye gukalagala ba recherche ha gujiya diago egi Yehowa udi Nzambi ya giamatshidia, Biblia idi Mbimbi yenji, Matemue a Yehowa adi akombeledi enji. (1 Tes. 5:21) Gutshita ngenyi mbagutukuatesa ha gutuna gukhala nu badute nu ha gukolesa gutshigina guetu. Gila tudi nu funu ya gutuna gukhala nu badute, tuajiya gutoga ukuateshi gudi akulu. Tudi naye guzula desizio dia gukatula badute mutangua diene ha gubamba gusuanguluga guetu mu mudimo wa Yehowa!

17. Itshi yajiya gutubuila gila tuatotesa gikhesa gietu?

¹⁷ Gila tualeba muila. Biblia idi muzuela egi: ‘Gila waleba muila mu masugu a lamba, mbawukhadigo nu ngolo jiavula.’ (Ish. 24:10)  Mbimbi ya Hebelu yabalumuiwe egi “guleba muila” yajiya gukotelesa “gutotesa gikhesa.” Mbawukhadigo nu gusuanguluga gula watotesa gikhesa giaye.

18. Mbimbi gukolesela idi mukotelesa itshi?

¹⁸ Ndaga tudi naye gukalagala: Toga Yehowa a guhane ngolo jia gukolesela. Tuana khala nu funu ya gikhesa ha gukolesela mu malamba tuana tagana nawo. (Yak. 5:11) Mbimbi ‘gukolesela’ inyi Yakoba akalegele, idi muhana matangi a muthu wana sala ya gujinginyina mu ba desizio enji. Ha gufezegesa suta dia ngolo wana sala yagumagana nu ana lenga ndo tangua mbalagaji jiawo jiana gualuisa.

19. Longo ditshi tuajiya guzula mu gifezegeselo gia mupostolo Phaula?

¹⁹ Mupostolo Phaula watubembele gifezegeselo giawaha mu ndaga yatadila gikhesa nu gukolesela. Matangua ako muene nji wakhalele muleba muila. Uvi wakhalele mukolesela malamba ene handaga wakhalele musha mutshima egi Yehowa udi gumuhana ngolo jiakhalele muene najio funu. (2 Kol. 12:8-10; Fili. 4:13) Esue nji tuajiya gukhala nu ngolo jia luholo lumoshi nu gikhesa, gila tudi mujiya nu gudibulumuisa guagasue egi tudi nu funu ya ukuateshi wa Yehowa.—Yak. 4:10.

20-21. Itshi tudi naye gujiya?

²⁰ Tudi naye gujiya egi malamba tuana tagana nawo ana katuga ndo gudi Yehowa. Yakoba udi gutuwambela egi: ‘Gila muthu udi mutagana nu malamba gashigo naye guzuela egi: “Nzambi udi gungulola.” Handaga Nzambi ajiyilego gulolewa mu ndaga jiabola, muene gukhanda yenji ana lolago nga muthu.’ (Yak. 1:13) Gila tuatshigina giamatshidia egi mbatukhala nu ufuta wakola nu Yehowa Tata wetu wa mu dilu.—Yak. 4:8.

²¹ Yehowa ‘wana sombegesago.’ (Yak. 1:17) Wakuatesele Aklisto a mu siekle ya thomo tangua akhalele mutagana nu malamba. Mangino nji wana kuatesa muthu wagasue mukatshi dietu. Toga Yehowa agukuatese ha gukhala nu ndunge, gutshigina guakola nu gikhesa. Yehowa mbawuhana mvutu gu isambu yaye. Ngenyi wajiya gukhala nu gutshigina egi mbawugukuatesa ha gubamba gusuanguluga guaye tangua udi mukolesela nu malamba.