Tata nu mama ajiyile giamatshidia mu 1920 gutuama egi adizule mu ulo. Ngavualewe mu givo 1939. Tangua ngakhalele mona wazonda tuakhalele mujinga gu Angleterre. Tuakhalele muya nawo mu gudibungisa gua mu hungu. Ngugima ngasonegesele jina gu Khalasa dia Mudimo wa Teokrasi (École du ministère théocratique). Ngudi muwunguluga luko lusugu lua thomo ngakalegele devuare. Ashile gagife ngangina holu hagula ngajiya gumona athu agasue akhalele gungutegelela. Mu tangua diene ngakhalele nu ivo 6. Ngavuile diago woma tangua ngamonele egi mambuta nji adi gungutegelela.

Mu mudimo wa gulongesa, tata wakhalele gungusonegela gu papie ndaga ngudi naye gulongesa. Ngakhalele nu ivo 8 ha ngasendesele gulongesa ame hakhami. Ngasuangulugile muavula tangua muthu mumoshi atangele ndaga jiakhalele gu papie yami nu atshiginyile mukanda “Que Dieu soit reconnu pour vrai!” Ngayile phushi muwambela tata ndaga yene. Mudimo wa gulongesa nu gudibungisa gua mu hungu ya ngubatele gusuanguluga guavula. Ya ngukuatesele nji ha gukudisa nzala yami ya gukalegela Yehowa mudimo wa tangua diagasue.

Ngasendesele guzumba Biblia muavula tangua tata ahanele mbongo (abonnement) hagula ngukhale muzula Inzo Yaleha Ya Mutaledi mbeji nu mbeji. Tangua ngakhalele muheta Inzo Yaleha Ya Mutaledi ngakhalele guyitanga nu gusuanguluga guagasue. Ngasendesele guhagela Yehowa mutshima muavula nu ngazudile desizio dia gudihana gudi muene.

Mu 1950 tuayile gu New York gu Asamble akhelele nu muto wa lumene egi: Gukula gua Teokrasi. Muto wa lumene wa Lusugu lua Thano 3 Août wakhalele egi, “Lusugu lua ba Misionere.” Lusugu luene, phangi Carey Barber wakhalele mutshita gu  Hunji dia Akulu Atuameji, muene wakalegele diskur dia gubatijiwa. Gu gisugishilo gia diskur dienji wahudile mihu mbadi gudi athu akhalele naye gubatijiwa, ame nji ngakhalele mukatshi dia athu ene ngazugile mu molu ngazuela egi, “Ayi!” Mu tangua diene ngakhalele nu ivo 11 ngakotelesele egi ngazudile desizio diabonga. Uvi, ngavuile woma haguya mungina mu piscine, handaga ngakhalelego mujiya guzua mu muta. Tata wa galenge wayile gungutuala, wanguwambelele egi uvuigo woma ndaga jidi mubalega muabonga. Angubatijile muphushi, malu ami akumilego hashi. Aphangi mbadi anguthuphudile mungoshi wa ngubatiza muko wanguzola gonze. Sendese lusugu luene lua ndando Yehowa walanduile gungudijiga njila yabonga.

Tangua ngamanesele khalasa, ngakhalele mutshigina gukalagala mudimo wa muvundji wa njila. Uvi, mandombi ami akhalele gungushinjiga ha gutshita université. Ngavuile ndaga jiawo hene ngasendesele université. Uvi, gungima ngakotelesele egi mbangushigo musala ya gujinginyina mu giamatshidia gila ngalandula khalasa. Hene ngazudile desizio dia gubemba université. Ngawambelele Yehowa ndaga yene mu gisambu, gungima ngasonegele mandombi mukanda egi gudi naye gubemba khalasa gusuga ya givo. Ngashile mutshima wami wagasue gudi Yehowa, ngasendesele mudimo wa muvundji wa njila.

Mu Juillet 1957 ngasendesele mudimo wa tangua diagasue mudimbo dia Wellingborough. Ngatogele aphangi a gu Betele ya Londres gila ajiya gungutumile phangi mumoshi ya muvundji wa njila wakhalele nu eksperianse. Phangi Bert Vaisey wangulongesele ndaga jiavula, wakhalele mulongesa lukuma luabonga nu gikhesa. Wangukuatesele ha gulondega programe yabonga mukunda nu mudimo wa gulongesa. Mu hungu tuakhalele ame, phangi Vaisey nu aphangi akhetu a gukola samano. Gulondega gudibungisa guagasue gua mu hungu nu guhana mvutu, guangukuatesele ha guhagela Yehowa mutshima nu ha gukolesa gutshigina guami.

Ngabiwe mu bologo handaga gatunyile mudimo wa gisuta. Gungima dia tangua diazonda ngadimonele nu pionnière spéciale mumoshi mu jina dia Barbara. Tuadizudile nenji mu ulo mu 1959. Tuakhalele hehi ha guya fundo diagasue akhalele gututuma. Thomo tuayile gu Lancashire gu nord-ouest ya Angleterre. Mu Javier 1961, angutamegele gu École du ministère du Royaume gu Betele ya Londres. Tuatshitshile mbeji imoshi gu khalasa diene. Ndaga ya gushimana idi egi gungima dia khalasa ngabuile mutadi muwendji. Ngazudile formasio phoso mbadi mu dimbo dia Birmingham gudi mutadi muwendji wakhalele nu eksperianse. Mukaji’ami wajile gungusaga guene. Gungima atuwambelele ha guvutuga gu Lancashire nu gu Cheshire ha gukalagala mudimo wa mutadi muwendji.

Mu Août 1962, tuakhalele gu konje, mu tangua diene tuahetele mukanda wakatugile gu Betele. Yakhalele ba formilere ha gungina Khalasa dia Gileade. Gungima dia gukombelela Yehowa mukunda nu ndaga yene, ame nu mukaji’ami tuazalesele formilere jiene. Tuajitumile gu Betele muphushi luholo yakhalele mutoga. Gungima dia mbeji thano atutamegele gu Brooklyn gu New York, ha gungina  khalasa dia 38 dia Gileade. Tuatshitshile mbeji kumi gu khalasa diene.

Gu khalasa dia Gileade tualongugile ndaga jiavula jiatadila Mbimbi ya Nzambi, ulondegi wenji nu ndaga jiatadila aphangi a mala nu a akhetu a ha mavu agasue. Mu tangua diene ame ngakhalele nu ivo 24, mukaji’ami 23. Tualongugile ndaga jiavula gudi ana ako akhalasa dietu. Ngakhalele nu luendu lua gutshita lusugu nu lusugu nu Phangi Fred Rusk, wakhalele nji mulongeshi wetu. Phangi Fred wazuelele muavula ndaga yatadila guhana malongo mu luholo luabonga nu gutshita yagasue hagula malongo ene adivue nu Biblia. Phangi Nathan Knorr, Frederick Franz nu Karl Klein akhalele mukatshi dia aphangi akhalele muhana ba diskur tangua tuakhalele gukhalasa diene. Tuazudile malongo mu gifezegeselo gia gudibulumuisa gia Phangi Macmillan, yonu watulongesele luholo Yehowa akuatesele akombeledi enji tungua ataganele nu malamba mu givo 1914 nu 1919.

Gungima dia gumanesela khalasa, Phangi Knorr wanguwambelele egi muatombewa ha guya gu Burundi gu Afrique. Tuayile mu bibliothèque ya Betele ha gutala mu Annuaire hagula tujiye mutango wa alongeshi a gu Burundi. Uvi, ndaga ya gudihula idi egi tuamonelego nga lumene lumoshi luatadila gifutshi giene! Atutumile mu terituare imoshi yakhalele khenji alongesele gale ndo gu Afrique. Muila watulebele diago! Tuakombelele Yehowa gungima tuahetele guhuima gua matangi.

Mu mudimo wetu uhe-uhe ndaga jiagasue jiakhalele jia gudisha, dimbo (climat), luholo lua gukalagala ndaga nu zuelelo. Tuasendesele gulonguga Français. Tuataganele nji nu lamba dia guheta fundo dia gukhala. Gungima dia masugu mbadi phangi Harry Arnott, yago tuakhalele nenji gukhalasa dia Gileade wajile gututala tangua akhalele muvutuga gu Zambie fundo akhalele mutshita mudimo. Watukuatesele ha guheta inzo, yabuile inzo ya thomo ya ba misionere. Tangua diazonda gungima mafumu a mudimbo diene asendesele gutusagesa muavula. Akhalelego mujiya nga gima gimoshi giatadila Matemue a Yehowa. Tuasendesele gusuanguluga nu mudimo wetu muavula. Uvi mafumu ene atuwambelele egi muajiyilego gukhala mu dimbo edi gila mushigo nu mukanda udi gumihana njila ya gutshita mudimo wenu. Hene tuayile gu Uganda.

Tuakhalele gudisagesa muvuala ha guya gu Uganda handaga tuakhalelego nu viza. Uvi tuahagele  mutshima gudi Yehowa. Phangi mumoshi wa yala ya gu Canada wakhalele mutshita fundo diakhalele nu funu ya alongeshi gu Uganda, wayile mumona muthu wakhalele mutadila ndaga jia athu ana katuga mu ifutshi iko ha gumukotelesela ndaga yetu. Gungima muthu muene wazuelele egi muajiya gukhala mukunda nu mbeji jiazonda uu nu tangua mbaamihana njila ya gujinga haha. Ndaga yene yamonesele diago egi Yehowa watukuatesele.

Gu Uganda ndaga jiakhalele jia gudisha nu jia gu Burundi. Gu Uganda akhalele ana longesa gale lukuma luabonga lua Ufumu, ngatshima Matemue a Yehowa akhalele phamba 28 mu gifutshi giagasue. Mu terituare yene athu avula akhalele muzuela Anglais. Tuakotelesele egi hagula tukuatese athu avula ajiye giamatshidia, tudi naye gulonguga mazuelelo akhalele muzuelewa guene. Tuasendesele gulongesa mu dimbo dia Kampala, fundo ana zuela Luganda. Tuazudile desizio dia gulonguga zuelelo diene. Tuakalegele ivo yavula ha gujiya guzuela zuelelo diene muabonga. Tangua tuasendesele gudizuela muabonga yatukuatesele ha gulongesa lukuma luabonga! Tuasendesele gukotelesa muabonga ndaga athu tuakhalele mulongese Biblia akhalele najio funu. Ene nji akhalele gutuwambela ndaga jiakhalele mu mitshima yawo nu luholo akhalele gudivua mukunda nu ndaga tuakhalele gualongesa.

Tuakhalele nu gusuanguluga guavula luholo tuakuatesele athu ha gujiya giamatshidia. Tuasuangulugile nji muavula tangua atutogele ha gukalagala mudimo wa mutadi muwendji. Mu utuameji wa Betele ya gu Kenya, tuawendele ha gutala mafundo anyi akhalele nu funu ya ba pionye spesiale. Matangua avula athu akhalele gutumonesela khadilo dia guyamba. Akhalele nji mulondega ima ya gudia mukunda nu esue, ngatshima akhalele khenji amonele galego Matemue a Yehowa.

Gungima tuatshitshile vuayaje jiavula. Ngakatugile gu Kampala ha guya gu mbungu ya gu Kenya gu Mombasa, tuatshitshile masugu mbadi mu train ha gukuma guene. Gungima ngazudile masuwa haguya gu hongo dia Seychelles, gu océan Indien. Mu givo 1965 nu 1972, tuakhalele muya mutala aphangi a gu Seychelles iphungu yavuala. Thomo alongeshi akhalele phamba mbadi guene, gungima akangudile groupe, gungima hungu. Ngatshitshile nji vuayaje ha guya mutala aphangi a gu Érythrée, Éthiopie, nu gu Soudan.

Tangua tuavutugile gu Uganda ndaga jia sombegesele, handaga masuta a sendesele gutala ndaga jia guvernema. Ivo yalanduile yakhalele ya lamba diago. Ngakotelesele egi idi nu ndando ha gutumagela mukhuala wa Biblia wana zuela egi “hanenu Sezale ima idi ya Sezale.” (Mako 12:17) Mu tangua dimoshi ngenyi azuelele egi athu agasue akatugile mu ifutshi iko adi naye guya musonega majina awo gu biro dia maphulushi. Tuatumagele mukhuala wene. Masugu azonda, ame nu misionere muko tuakhalele muya gu Kampala, mu njila maphulushi atumagenesele. Tuavuile diago woma! Azuelele egi mudi mbalagaji mueji mutala dimbo. Tuawambelele egi tushigo mbalagaji, tudi ba misionere, tuasonegele gale majina etu gu biro dienu. Atunyile guvua ndaga tuakhalele muzuela. Atubatele gu biro dia maphulushi dia khalele hehi nu inzo ya ba misionere. Tuasuangulugile handaga atubatele gu biro tuasonegele majina. Ha tuahetele guene atujiyile gungima a wambelele maphulushi ene egi abembenu aye.

Masugu ene tuakhalele musagesewa muvuala mu mafundo masuta ana magenesa athu mu njila. Yakhalele lamba gila tuamagenesewa gudi masuta akhalele munua matombe avula. Tangua diagasue  tuakhalele mutagana nu ndaga jia luholo elu, tuakhalele mukombelela muavula, gungima tuakhalele mu heta guhuima gua Matangi nu akhalele gutubemba ha guya. Ndaga ya gikenene idi egi mu 1973 azuelele egi ba misionere agasue a ifutshi iko ashigo naye gujinga luko gu Uganda.

Mu tangua diene atutumile gu Côte d’Ivoire, gu Westi ya Afrika. Yakhalele diago usombegeshi wakoma mukunda nu esue. Tuakhalele naye gujiya ndaga jia gumbodiawo, guzuela luko Français muavula nu gujidila nu ba misionere a katugile mu ifutshi ya gudisha. Tuamonele diago ukuateshi wa Yehowa, handaga athu a mitshima yabonga akhalele musuanguluga nu giamatshidia. Tuakotelesele diago egi Yehowa watudijigile njila yabonga handaga tua mushile mutshima.

Ndaga ya lamba idi egi mukaji’ami wakatele cancer. Tuakhalele muya iphungu yavula gu Europe hagula amusage. Uvi mu 1983 tuakotelesele egi misongo yenji yakhalelego gutuhana njila ya gukalagala luko mudimo gu Afrique. Ndaga yene yatusagesele diago muavula!

Tangua tuayile gu Betele ya gu Londres misongo ya mukaji’ami yadivudishile muavula, gungima wafuile. Aphangi a gu Betele angukuatesele muavula. Phangi mumoshi nu mukaji’enji angukuatesele ha gusombegesa matangi’ami nu ha gushila Yehowa mutshima. Gungima tuadimonele nu phangi mumoshi wa mukhetu mu jina dia Ann gu Betele, wakhalele thomo pionnière spéciale. Wakhalele muzumba Yehowa muavula diago. Tuadizudile nenji mu ulo mu 1989 tuasendesele gukalagala nenji gu Betele ya gu Londres.

Mu givo 1995 uu nu mu 2018, ngakhalele nu luendu lua gukalagala gifua mumoneshi wa Hunji dia Akulu Atuameji (yonu akhalele mutamega egi surveillant de zone), ngakhalele muya nu gutala aphangi a ifutshi hehi nu 60. Mu ifutshi yagasue ngakhalele muya, ngakhalele diago mumona egi Yehowa wakhalele mukuatese akombeledi enji ngatshima akhalele mutagana nu malamba avula.

Mu 2017 tangua ngakhalele muya nu gutala aphangi, ngavutugile luko gu Afrique. Ngakhalele nu gusuanguluga guavula ha gudijiga aphangi a gu Burundi mukaji’ami Ann. Tuasuangulugile muavula ha gumona luholo athu avula asalele mujiya giamatshidia guene! Mu avenue ngakhalele mulongesa inzo nu inzo mu 1964, mangino atungile gale Betele yabonga. Alongeshi adi gubalega 15 500 mu gifutshi giene.

Ngasuangulugile tangua a ngutumidile liste ya ifutshi ngakhalele naye gutala mu 2018. Mu liste yene Côte d’Ivoire yakhalele nji mukatshi. Tangua tuakumile gu Abidjan, tuadivuile diago gifua gumbodietu. Tangua ngakhalele mutala mu liste ya ba nimero a telefone a aphangi ana kalagala gu Betele yene, ngamonele jina dia phangi Sossou, sugu yenji yakhalele hehi nu sugu yetu tangua tuakhalele gu Betele. Ngawungulugile egi wakhalele surveillant de ville, tangua ngakhalele gu Abidjan. Uvi, ngadihuigile. Yakhalelego muene, uvi mun’enji.

Yehowa wana tagenesa ndaga jiagasue jiana zuela muene. Ngatshima tuatagenele nu malamba avula, ngana suanguluga muavula handaga ngana jiya egi gila tuashila Yehowa mutshima muene mbawutudijiga njila yabonga. Henyaha ngudi nu gusuanguluga ha gulandula njila ishigo nu gisugishilo inyi mbayitubatela monyo wa ivo nu ivo mu mavu ahe-ahe.—Ish. 4:18.