1. Itshi idi mumonesa egi Yesu wakhalele muzula Mbimbi ya Nzambi nu ndando?

 TANGIGIZA luholo athu akhalele gudivua tangua akhalele mutegelela malongo a Yesu. Tangua diakhalele muene mulongesa, wakhalele muzuelela ndaga jiakhalele jia gusonega mu Mbimbi ya Nzambi mbala jiavula. Mbimbi jia thomo jiazuelele Yesu gungima dia gubatijiwa guenji nu mbimbi jia gisugishilo jiazuelele muene gutuama dia gufua guenji, jiakatugile mu Mbimbi ya Nzambi. b (Mikh. 8:3; Ngi. 31:5; Luka 4:4; 23:46) Mu ivo thathu nu ndambo yabalegesele Yesu ha mavu, wakhalele mutanga Mbimbi ya Nzambi mbala jiavula mu mafundo a athu avula. Wakhalele guyizuelela nu guyikotelesela athu.​—Mat. 5:17, 18, 21, 22, 27, 28; Luka 4:16-20.

2. Itshi yakuatesele Yesu ha gujiya Mbimbi ya Nzambi muabonga tangua diakhalele mukula muene? (Tala gifuanesa holu dia gizula.)

² Yesu wakhalele mutanga nu gutegelela Mbimbi ya Nzambi ivo yavula gutuama dia gusendesa mudimo wa gulongesa. Idi naye gukhala egi, wakhalele mumona luholo Madiya nu Yozefe akhalele muzuelela ndaga jidi mu Mbimbi ya Nzambi tangua akhalele muta maga mu fami lusugu nu lusugu. c (Mikh. 6:6, 7) Tuajiya gusha mutshima egi mu lusugu luagasue lua guhuluguga Yesu nu enya fami yawo akhalele muya gu sinagoga. (Luka 4:16) Idi naye gukhala egi tangua diakhalele muene gu sinagoga, wakhalele mutegelela muabonga tangua akhalele mutanga Mbimbi ya Nzambi. Gungima, Yesu muene hakhenji wasendesele gutanga Mbimbi ya Nzambi. Ndaga yene yamukuatesele  ha guyijiya muabonga, ha guyizumba nu ha gutshita ndaga mu gudivua nu Mbimbi yene. Ha gufezegesa, tangiza ndaga jiabalegele mu tempelo tangua Yesu wakhalele nu ivo 12. Alongeshi akhalele mujiya Mikhuala ya Moize muabonga “akhalele gudihula mukunda nu ndunge jienji nu mvutu jienji.”​—Luka 2:46, 47, 52.

3. Itshi tuza mulonguga mu longo edi?

³ Esue nji tuajiya gujiya Mbimbi ya Nzambi muabonga nu guyizumba gula tudi guyitanga lusugu nu lusugu. Luholo lutshi tuajiya guheta gubonga guavula mu ndaga tudi mutanga? Tuajiya guzula malongo mu ndaga Yesu wawambelele alongeshi a mikhuala, Afalese nu Asadoke. Mafumu a ikombelelo ene akhalele mutanga Mbimbi ya Nzambi muavula, uvi akhalelego muheta gubonga gua ndaga akhalele mutanga. Yesu wamonesele ndaga thathu athu ene akhalele naye gutshita ha guheta gubonga gua ndaga akhalele mutanga. Ndaga jiaawambelele Yesu jiza gutukuatesa ha gujiya ndaga tuajiya gutshita ha (1) gukotelesa ndaga tudi mutanga, (2) guheta malongo mu Biblia (3) nu ha gubemba egi Mbimbi ya Nzambi isombegese makalegelo etu.

4. Luka 10:25-29 idi gutulongesa itshi mu ndaga yatadila gutanga Mbimbi ya Nzambi?

⁴ Tudi naye gukamba gukotelesa ndaga tudi mutanga mu Mbimbi ya Nzambi. Gula ndo tuajiyilego guheta gubonga gua ndaga jiene. Ha gufezegesa, tutadilenu maga Yesu watele nu “muthu mumoshi wakhalele mujiya mikhuala muabonga.” (Tanga Luka 10:25-29.) Tangua muthu muene wamuhudile egi, itshi adi naye gutshita ha guheta monyo wa ivo nu ivo, Yesu wamukuatesele ha guheta mvutu mu Mbimbi ya Nzambi. Wamuhudile egi: “Itshi idi yagusonega mu Mukhuala? Itshi wana tanga?” Muthu muene wahanele mvutu yabonga, handaga wazuelele ndaga jiakhalele mu Mbimbi ya Nzambi jiatadila guzumba Nzambi nu athu ako. (Levi 19:18; Mikh. 6:5) Uvi gungima wahudile Yesu egi: “Nanyi udi lume muthu na muku’etu?” Muthu muene wamonesele diago egi, gakhalelego mukotelesa muabonga ndaga jiakhalele muene mutanga mu Mbimbi ya Nzambi. Hene gakhalelego mujiya luholo lua gukalegela ndaga jiakhalele muene mutanga mu Mbimbi ya Nzambi.

5. Luholo lutshi gutshita gisambu nu gutanga Biblia mage-mage guajiya gugukuatesa ha gukotelesa muabonga ndaga udi mutanga?

⁵ Gula tudi mutshigina gukotelesa Mbimbi ya Nzambi muabonga tudi naye guyitanga lusugu nu lusugu. Tala ndaga jiajiya gugukuatesa. Khala mutshita gisambu gutuama dia gusendesa gutanga. Tuana khala nu funu ya ukuateshi wa Yehowa ha gukotelesa mbimbi yenji. Hene, tudi naye gutoga nyuma yenji hagula itukuatese ha guhaga matangi mu ndaga tudi mutanga. Gungima tudi naye guyitanga mage-mage. Gutshita ngenyi mbagutukuatesa ha gukotelesa ndaga tudi mutanga. Wajiya guheta gubonga gua ndaga udi mutanga gula udi mutanga mu dijui diakola nga udi mutegelela enregistrement a lutango lua Biblia. Gula udi mutegelela enregistrement a lutango lua Biblia nu gulandula ndaga jiene mu Biblia yaye, mbayigukuatesa ha gukotelesa muabonga ndaga udi mutanga nu guwunguluga ndaga jiene. Mbawuheta nji malongo avula. (Yosh. 1:8) Gula wamanesela gutanga Biblia, tshita luko gisambu ha guhana Yehowa mersi mukunda nu kado ga Mbimbi yenji. Toga ukuateshi wenji hagula wajiya gukalegela ndaga watangi.

6. Luholo lutshi gudihula mihu nu gusonega matangi a ndando guajiya gugukuatesa tangua udi mutanga? (Tala nji gifuanesa.)

⁶ Tutadilenu ndaga mbadi jiajiya gutukuatesa ha gukotelesa Biblia muabonga. Khala gudihula mihu mu ndaga udi mutanga. Gula udi mutanga lumene lumoshi mu Biblia, dihule egi: ‘Akuatshi adi muzuelela mu lumene luene? Nanyi udi muzuela? Udi muwambela nanyi? Mukunda natshi? Fundo ditshi  nu tangua ditshi ndaga jiene jiakalegewe?’ Mihu ya luholo elu mbayigukuatesa ha gutangigiza nu gukotelesa muabonga matangi a ndando mu ndaga udi mutanga. Tangua udi mutanga khala musonega nji matangi a ndando. Gula wasonega ndaga watangi, mbayigukuatesa ha gutangigiza ndaga jiene muavula, ha gujikotelesa muabonga nu ha guwunguluga ndaga jiene. Wajiya gusonega mihu nga ndaga wahetshi tangua watshitshi ba recherche. Wajiya nji gusonega matangi a ndando mu guhihia nga luholo wajiya gukalegela ndaga watangi nu luholo udi gudivua mukunda nu ndaga jiene. Gutshita ngenyi mbagugukuatesa ha gumona egi Mbimbi ya Nzambi yasonegewe mukunda nu aye.

7. Itshi tudi naye gutshita ha gukotelesa muabonga ndaga tudi mutanga? Mukunda natshi? (Matayo 24:15)

⁷ Yesu wamonesele egi ha gukotelesa muabonga Mbimbi ya Nzambi, tudi naye gutangigiza muabonga ha gukotelesa ndaga tudi mutanga. (Tanga Matayo 24:15.) Luholo lutshi tuajiya guyitshita? Tudi naye gukamba gukotelesa gudivua nu gudisha gudi mukatshi dia ndaga tudi mutanga. Tudi naye nji gukamba gukotelesa matangi anyi azolewego haphelo. Yesu wamonesele egi, tudi naye gutangigiza muabonga ha gukotelesa ndaga jidi mutagenesa profesi jia Biblia jidi. Gula tuatshita ngenyi, mbayitukuatesa ha guheta gubonga guavula mu ndaga jiagasue tudi mutanga mu Biblia.

8. Luholo lutshi tuajiya gukotelesa ndaga tudi mutanga?

⁸ Yehowa wana kuatesa akombeledi enji ha gukotelesa muabonga ndaga adi mutanga. Hene, tudi naye gutshita gisambu ha gumutoga ukuateshi ha gukudisa khadilo diene. (Ish. 2:6) Luholo lutshi wajiya gutshita ndaga jidi gudivua nu isambu yaye? Tangiza muabonga ndaga udi mutanga, kamba gujiya luholo lutshi jidi gudivua nu ndaga jinyi wana jiya gale. Ha gukotelesa muabonga ndaga udi mutanga, kalegela mikanda yana gutukuatesa ha gulonguga Biblia gifua Guide de recherche. Gutanga mikanda yene mbagugukuatesa ha gukotelesa muabonga ndaga jidi mu Biblia nu ha gumona luholo wajiya gujikalegela. (Heb. 5:14) Gula udi mukamba gujiya muabonga ndaga udi mutanga, mbawukotelesa muabonga Biblia.

9. Giamatshidia gitshi gia ndando gidi mu Mbimbi ya Nzambi Asadoke akhalelego mujiya?

⁹ Asadoke akhalele mujiya muabonga mikanda thano ya thomo yasonegewe mu Hebelu. Uvi akhalelego mutshigina giamatshidia gia ndando giakhalele mu mikanda yene. Ha gufezegesa, tutadilenu mvutu Yesu wahanele Asadoke tangua amuhudile mihu mukunda nu gufuzumuga. Waahudile egi: “Enue khenji muatangelego mu mukanda wa Moize, mu lumene lua gamutshi gakhalele mulema tshuya, egi Nzambi wamuwambelele egi: ‘Ame ngudi Nzambi wa Abalahama, Nzambi wa Isaka nu Nzambi wa Yakoba ba’?” (Mako 12:18, 26) Asadoke akhalele mutanga lumene luene mbala jiavula, uvi muhu waahudile Yesu wamonesele egi akhalelego mujiya giamatshidia gia ndando giatadila gufuzumuga.​—Mako 12:27; Luka 20:38. d

10. Itshi tudi naye gutshita tangua tudi mutanga?

¹⁰ Ndaga yene idi gutulongesa itshi? Tangua tudi mutanga tudi naye gukamba gujiya ndaga jiagasue verse imoshi nga lumene lumoshi lua Biblia ludi gutulongesa. Tushigo naye gukamba gukotelesa phamba ndaga jialeba jidi mu verse imoshi, uvi tudi naye gukamba gujiya giamatshidia nu malongo a ndando adi mu verse yene.

11. Luholo lutshi tuajiya gukalegela 2 Timote 3:16, 17, ha guheta malongo a ndando mu Biblia?

¹¹ Luholo lutshi wajiya guheta malongo tangua udi mutanga Biblia? Tutadilenu ndaga jidi mu 2 Timote 3:16, 17. (Tanga.) Verse jiene jidi muzuela egi: “Ndaga jiagasue jidi mu mukanda wa Nzambi . . . jidi nu ndando” ha (1) gulongesa, (2) gubalela, (3) guvutula ndaga mu njila (4) nu guhana ndola. Wajiya guheta gubonga gua ndaga eji nguana nga mu mikanda ya Biblia inyi wanago gutanga muavula. Tangua udi mutanga, kamba gujiya gula lumene luene ludi gugulongesa itshi mukunda nu Yehowa, mukunda nu ndaga jialayele muene nga mukunda nu mikhuala yenji. Tutadilenu luholo Biblia yana gutubalela. Tangua tuana tanga verse imoshi yana gutukuatesa ha gumona khadilo dimoshi diabola tudi naye gubemba ha gusala agujinginyina gudi Yehowa. Tutadilenu luholo tuajiya gukalegela Biblia ha guvutula ndaga mu njila. Ha gufezegesa, tangua tudi mu mudimo wa gulongesa, gula muthu mumoshi wazuela ndaga ishigo gudivua nu matangi a Biblia, Biblia yana kuatesa ha guvutula ndaga mu njila. Biblia yana gutuhana nji ndola tangua yana gutuwambela ndaga jiajiya gutukuatesa ha gutadila ndaga gifua Yehowa. Gujiya ndaga eji nguana, mbagugukuatesa ha guheta malongo a ndando mbaagukuatesa ha guheta gubonga tangua udi mutanga Biblia.

12. Mukunda natshi Yesu wahudile Afalese egi “Enue khenji muatangelego?”

¹² Yesu wahudile Afalese egi “Enue khenji muatangelego?” ha guamonesa egi akhalele nu matangi abola tangua akhalele mutanga Mbimbi  ya Nzambi. (Mat. 12:1-7) e Mu lusugu luene Afalese azuelele egi, alandudi a Yesu anemeselego mukhuala watadila Lusugu lua Guhuluguga. Ha guahana mvutu, Yesu wahanele ifezegeselo mbadi ya Biblia. Wazuelediele nji verse imoshi idi mu mukanda wa Hoshea ha guamonesa egi akhalelego mukotelesa mukunda natshi ahagele mukhuala wa Lusugu lua Guhuluguga nu ha guamonesa egi akhalelego muvuila athu khenda. Mukunda natshi athu awa asombegeselego makalegelo awo tangua akhalele mutanga Mbimbi ya Nzambi? Handaga akhalele guyitanga ha gumona gubola gua athu ako, akhalele nji nu lulendo luavula. Khadilo diawo diaakangele njila ha gukotelesa ndaga akhalele mutanga.​—Mat. 23:23; Yone 5:39, 40.

13. Khadilo ditshi tudi naye gukhala nadio tangua tudi mutanga Biblia? Mukunda Natshi?

¹³ Mbimbi jia Yesu jidi gutulongesa egi tudi naye gukhala nu matangi abonga tangua tudi mutanga Biblia. Tushigo naye gukhala gifua Afalese, uvi tudi naye gukhala nu khadilo dia gudibulumuisa nu gubemba egi Biblia itulongese. Tudi naye ‘gutshigina mbimbi idi mukuna Nzambi mu mitshima yetu nu gudibulumuisa guagasue.’ (Yak. 1:21) Gula tudi nu khadilo dia gudibulumuisa, mbatubemba egi Mbimbi ya Nzambi isombegese makalegelo etu. Gula tushigo mutanga Biblia ha gumona gubola gua athu ako nu tuabemba khadilo dia lulendo, malongo a Biblia atadila gutotesela athu ako, guavuila khenda nu guazumba mbaatukuatesa diago ha gusombegesa makalegelo etu.

14. Itshi yajiya gutukuatesa ha gujiya gula tuana bemba egi Biblia yana isombegese makalegelo etu? (Tala nji gifuanesa.)

¹⁴ Luholo tuana kalegela athu ako ndaga guana monesa gula tuana bemba egi Mbimbi ya Nzambi isombegese makalegelo etu nga ndo. Afalese akhalelego mubemba egi Mbimbi ya Nzambi isombegese makalegelo awo, gishina giene akhalele ‘mufisa athu anyi atshitshilego gubola milonga.’  (Mat. 12:7) Luholo lumoshi nji, ndaga tuana tangiza mukunda nu athu ako nu ndaga tuana guakalegela jiana monesa gula tuana bemba egi Mbimbi ya Nzambi isombegese makalegelo etu nga ndo. Ha gufezegesa, tuana zuelela muavula ndaga jiabonga tuana mona gudi athu ako nga tuana zuelela muavula ndaga jiabola tuana mona gudi ene? Tuana vuila athu ako khenda nu guatotesela nga tuana zuela ndaga jiabola mukunda nu ene nu guvua khabu gula atukalegela gubola? Mvutu jia mihu eyi jiajiya gutukuatesa ha gumona gula tuana bemba egi ndaga tudi mutanga jisombegese matangi nu makalegelo etu.​—1 Tim. 4:12, 15; Heb. 4:12.

15. Luholo lutshi Yesu wakhalele mutadila Mbimbi ya Nzambi?

¹⁵ Yesu wakhalele muzumba Mbimbi ya Nzambi. Profesi idi mu mukanda wa Ngimbo 40:8 yadiangele guzuelela ndaga yene. Idi muzuela egi: ‘Ngana khala nu gusuanguluga ha gutshita gutshigina guaye Nzambi wami, mikhuala yaye idi mu mutshima wami.’ Luholo Yesu wakhalele muzumba Mbimbi ya Nzambi, wakhalele nu gusuanguluga. Ndaga yene yamukuatesele ha gukombelela Yehowa. Esue nji tuajiya gukhala nu gusuanguluga gula tudi mutanga Mbimbi ya Nzambi nu guyizumba.​—Ngi. 1:1-3.

16. Ndaga jitshi wajiya gutshita ha guheta gubonga guavula mu ndaga udi mutanga mu Mbimbi ya Nzambi? (Tala galuanda “ Mbimbi jia Yesu Jiajiya Gugukuatesa ha Gukotelesa Ndaga udi Mutanga.”)

¹⁶ Tuzulenu desizio dia gutanga Biblia muabonga diago, ha gulandula gifezegeselo gia Yesu nu ha gutumagela ndaga jiazuelele muene. Hagula egi tukotelese ndaga tudi mutanga mu Biblia, tudi naye gutshita gisambu, gutanga mage-mage, gudihula mihu nu gusonega matangi a ndando. Tuajiya gumonesa egi tudi mukamba gujiya muabonga ndaga tudi mutanga, gula tudi mutanga nji mikanda yetu yana kotelesa Biblia. Tuajiya gumonesa egi tudi mukalegela Biblia muabonga gula tangua tudi mutanga lumene lumoshi ngenyi, tudi mukamba malongo tuajiya guzula ikhale mu mikanda ya Biblia yinyi tuanago gutanga muavula. Gula tudi mutanga Mbimbi ya Nzambi nu matangi abonga, mbayitukuatesa ha gusombegesa makalegelo etu. Gula tudi mutshita ngenyi, mbatuheta gubonga mu lutango luetu lua Biblia nu mbatusuena hehi nu Yehowa.​—Ngi. 119:17, 18; Yak. 4:8.