1. Ndaga itshi Yesu wawambelele alandudi enji mukunda nu gisugishilo gia mavu awa? Waatemesele nji egi itshi?

 MASUGU azonda gutuama dia gufua gua Yesu, alandudi enji nguana amuhudile egi: “Gijiyishilo gitshi mbagimonesa . . . gisugishilo gia mavu awa?” (Mat. 24:3) Idi naye gukhala egi alandudi ahudile muhu wene ha gujiya tangua mbadishiyiwa Yelusama nu tempelo yenji. Ha guahana mvutu, Yesu waawambelele ndaga jiakhalele naye gumonesa egi gushiyiwa gua Yelusalema nu tempelo guasuena hehi “nu ndaga mbajimonesa egi tuaheta gu gisugishilo gia mavu awa.” Uvi Yesu waawambelele mukunda nu gisugishilo gia mavu awa egi: “Mukunda nu lusugu luene nu tangua diene, gushigo nga nu muthu mumoshi udi mujiya, ikhale anjelo mu dilu nga Mona, uvi phamba Tata udi mujiya.” Gungima watemesele alandudi enji agasue egi “khalenu gikolekole.”​—Mako 13:32-37.

2. Mukunda natshi yakhalele nu ndando egi Aklisto a mu siekle ya thomo akhale gikolekole?

² Aklisto a mu siekle ya thomo anyi akhalele enya Yuda akhalele naye gumonesa gutema ha guhuluisa monyo wawo. Yesu wawambelele alandudi enji ndaga mbajiakuatesa ha gujiya tangua diakhalele naye gushiyiwa Yelusalema nu tempelo. Wazuelele egi: “Tangua mbamumona masuta mujieta dimbo dia Yelusalema, jiyenu egi gushiyiwa guenji guasuena hehi.” Mu tangua diene, alandudi akhalele naye gutumagela ndaga jiaawambelele Yesu egi adi naye ‘gulenga ha guya gu milundu.’ (Luka 21:20, 21) Athu anyi atumagele ndaga jiazuelele Yesu, ahulugile tangua enya Roma ashiyile Yelusalema.

3. Itshi tuza mumona mu longo edi?

 ³ Mangino tudi mujinga mu masugu a gisugishilo a mavu awa. Esue nji tudi naye gumonesa gutema nu gukangula meso. Mu longo edi tuza mumona luholo tuajiya gumonesa gutema tangua tudi mumona ndaga jidi mukalegewa ha mavu, luholo tuajiya gumonesa gutema mu ndaga tudi mutshita nu luholo tuajiya gukalegela tangua dietu muabonga.

4. Mukunda natshi tudi naye gusuanguluga ha gumona luholo ndaga jidi mubua ha mavu jidi mutagenesa profesi jia Biblia?

⁴ Tangua tuana mona luholo ndaga jidi mukalegewa ha mavu awa jidi mutagenesa profesi jia Biblia, yana gutusuanguluisa diago. Ha gufezegesa, Yesu watangele ndaga mbajitukuatesa ha gujiya egi gisugishilo gia mavu awa a Satana giasuena hehi. (Mat. 24:3-14) Mupostolo Phetelo wamonesele egi gula tudi mulandula muabonga luholo profesi jia Biblia jidi mutagenesewa, gutshigina guetu mbagukola. (2 Phet. 1:19-21) Mukanda wa gisugishilo wa Biblia udi musendesa nu mbimbi eji: “Jiji ndaga jiamonesele Yesu Klisto; Nzambi wamuwambelele najio ha gumonesa ahiga enji ndaga jidi hehi ha gutagana.” (Gumo. 1:1) Gishina giene tuana kamba gujiya ndaga jidi mukalegewa ha mavu awa nu luholo ndaga jiene jiajiya gutagenesa profesi jia Biblia. Yajiya gukhala egi tuana khala nu gusuanguluga guavula ha guwambela athu ako ndaga jiene.

5. Itshi tudi naye gutuna? Uvi itshi tudi naye gutshita? (Tala nji ifuanesa.)

⁵ Uvi tangua tudi muzuelela profesi jia Biblia tushigo naye gutangiza luholo ndaga mbajikalegewa gungima. Mukunda natshi? Handaga tushigo mutshigina guzuela ndaga imoshi yajiya gutukaphumuna nu aphangi mu hungu. Ha gufezegesa, tuajiya guvua mafumu a ha mavu awa muzuela egi ajiya gumanesela ita nu gubatela athu guhuima nu ubambi. Ha fundo dia gutangiza egi ndaga eji jidi diago mutagenesa profesi idi mu 1 Tesalonike 5:3, tudi naye gukamba ndaga ulondegi wa Yehowa wakatuga guzuela mukunda nu profesi yene. Gula ndaga tudi muzuela jidi gudivua nu ndaga jidi muzuela ulondegi wa Yehowa, mbayitukuatesa ha gukhala mu guhuima mu hungu nu ha gukhala ‘matangi amoshi.’​—1 Kol. 1:10; 4:6.

6. 2 Phetelo 3:11-13 idi gutulongesa itshi?

⁶ Tanga 2 Phetelo 3:11-13. Mupostolo Phetelo udi gutukuatesa ha gumonesa gutema tangua tudi muzuelela profesi jia Biblia. Udi gututoga ha ‘gunengenena nu gutangigiza tangua diagasue lusugu lua Yehowa.’ Mukunda natshi? Handaga tuanago gukamba gujiya ‘lusugu nu tangua’ Alemagedona mbayiza. Uvi tuana tshigina gukalegela tangua tuasala nadio ha gukhala nu ‘makalegelo a gijila nu midimo idi mumonesa egi tudi ya gujinginyina gudi Nzambi.’ (Mat. 24:36; Luka 12:40) Mu guzuela guko, tudi naye gumonesa makalegelo abonga nu gujiya egi ndaga jiagasue tuana tshita mu mudimo wa Yehowa jidi naye gumonesa egi tuana gumuzumba muavula. Ha gutshita ngenyi, tudi naye gumonesa gutema mu ndaga tudi mutshita.

7. Luholo lutshi tuajiya gumonesa gutema mu ndaga tudi mutshita? (Luka 21:34)

⁷ Yesu wawambelele alandudi enji ha gukamba gujiya ndaga jidi mukalegewa ha mavu awa nu ha gumonesa gutema mu ndaga adi mutshita. Luka 21:34 idi mumonesa ndaga yene haphelo. (Tanga.) Yesu wazuelele egi: “Temienu.” Muthu udi mumonesa gutema mu ndaga jidi muene mutshita, wana gukamba gujiya ndaga yagasue yajiya gubolesa ufuta wenji nu Yehowa, gungima wana tshita ngolo ha guyilenga.  Gutshita ngenyi guana gumukuatesa ha gusala mu guzumba gua Nzambi.​—Ish. 22:3; Yuda 20, 21.

8. Longo ditshi mupostolo Phaula wahanele Aklisto?

⁸ Mupostolo Phaula wawambelele Aklisto ha gumonesa gutema mu ndaga adi mutshita. Ha gufezegesa, wawambelele Aklisto a gu Efeso egi: “Temienu hagula muwendjigo gifua athu aheya, uvi wendenu gifua athu atema.” (Ef. 5:15, 16) Satana wana kamba gubolesa ufuta wetu nu Yehowa, hene Biblia idi gutuwambela egi ‘tulandule gukamba ha gujiya gula gutshigina gua Yehowa gudi itshi.’ Gula tuatshita ngenyi mbatudibamba gu miheto yenji.​—Ef. 5:17.

9. Luholo lutshi tuajiya gujiya matangi a Yehowa mukunda nu esue?

⁹ Biblia yanago guzuelela ndaga jiagasue jiajiya gubolesa ufuta wetu nu Yehowa. Uvi matangua avula yana toga egi tuzule desizio mu ndaga jinyi mikhuala ya Biblia yanago guzuelela haphelo. Hene ha guzula ba desizio abonga tudi naye gukamba gujiya ‘gutshigina gua Yehowa.’ Ha gujiya gutshigina gua Yehowa, tudi naye gutanga Mbimbi yenji lusugu nu lusugu nu gutangigiza ndaga tudi mutanga. Gula tuakotelesa gutshigina guenji nu tuatshita ngolo ha gukhala nu “matangi a Klisto,” mbatukhala “gifua athu atema,” ikhale Biblia ishigo mumonesa haphelo ndaga tuajiya gutshita gu mulonga umoshi ngenyi. (1 Kol. 2:14-16) Matangua ako yanago gukhala lamba ha gujiya ndaga jiabola tudi naye gutuna; uvi matangua ako yakhala lamba.

10. Ndaga jitshi jiabola tudi naye gutuna?

¹⁰ Ndaga jiko tudi naye gutuna jidi gutshita ndaga ha gumonesa muthu muko gifua tudi gumuzumba ha gudizula n’enji mu ulo uvi mu guzuela guabonga ishigo ngenyi. Gunua matombe avula, gudia muavula, guzuela ndaga jiajiya gusagesa athu ako, gutala saga jia khuta, pornografi, nu ndaga jiko jia luholo lumoshi. (Ngi. 101:3) Mbalagaji wetu diabulu wana kamba tangua diagasue ba okazio a gubolesa ufuta wetu nu Yehowa. (1 Phet. 5:8) Gula tuatemelego Satana wajiya gukuna mu mutshima wetu makalegelo abola gifua: Giphi, mambo, nzala ya ima yangane, umbalagaji wakola, lulendo nu khadilo dia gubambela athu khabu. (Gal. 5:19-21) Thomo tuajiya gumona gifua, gukhala nu makalegelo awa gushigo diago ndaga yabola. Uvi gula tuatshitshilego ngolo ha guabemba, mbaalandula gukula gifua mutshi wa puazo mu mitshima yetu, mbaatubatela diago malamba.​—Yak. 1:14, 15.

11. Ndaga jitshi jianago gumonega haphelo jiajiya gutubatela malamba tudi naye gutuna? Mukunda natshi?

¹¹ Ndaga iko yanago gumonega haphelo yajiya gutubatela malamba idi ufuta wabola. Tutadilenu gale gifezegeselo egi. Tangiza egi wana tshita mudimo nu muthu mumoshi gashigo Temue wa Yehowa. Udi mumonesela muthu muene gisemo nu gumukuatesa ha gumumonesa egi Matemue a Yehowa akhala athu abonga. Wajiya nji gutshigina gudia hamoshi nu muthu muene mu tangua dia guhululuga mu midi. Gungima muasendesa gudia n’enji hamoshi mbala jiavula. Lusugu lumoshi muthu muene wasendesa guzuela ndaga jia musonyi, uvi aye ushigo musuanguluga nu ndaga jiene. Gungima dia masugu wasendesa gusuanguluga nu maga anyi wakhalelego mutshigina thomo. Lusugu lumoshi gungima dia mudimo, muthu muene wa gutamega ha guya munua n’enji matombe, aye nji watshigina. Mage-mage aye nji wasendesa gusuanguluga nu ndaga jidi mutshita muthu muene. Mbayishigo luko mukhala lamba mukunda nu aye ha gusendesa gutshita ndaga gifua muthu muene. Ishigo ndaga yabola ha gumonesela athu agasue gisemo nu guanemesa. Uvi tudi naye gujiya egi athu tudi mutomba ha gubalegesa nawo tangua mbaatutuma ha gukalagala ndaga jiabonga nga  jiabola. (1 Kol. 15:33) Gula tuamonesa gutema mu ndaga tudi mutshita gifua luholo Yesu wazuelele, mbatushigo mukuata ufuta nu athu anyi anago gutumagela mikhuala ya Yehowa. (2 Kol. 6:15) Gula tuatshita ngenyi mbayitukuatesa ha gumona malamba ajiya gutubuila nu gualenga.

12. Mudimo utshi alandudi a Yesu akhalele naye gutshita tangua akhalele munengenena gushiyiwa gua Yelusalema nu tempelo?

¹² Yesu wakhalele mutshigina egi alandudi enji akhale nu mudimo wavula wa gutshita tangua akhalele munenga gisugishilo gia mavu awa. Waahanele mudimo wa gutshita. Waawambelele ha gulongesa lukuma luabonga “gu Yelusalema nu gu Yudea yagasue nu gu Samaliya, uu nu mu mafundo a gualeha a ha mavu.” (Makal. 1:6-8) Yesu waahuile diago mudimo wavula wa gutshita! Alandudi akalegele tangua diawo mu luholo luabonga handaga adihanele diago mu mudimo wene.

13. Mukunda natshi tudi naye gukalegela tangua dietu mu luholo luabonga? (Kolosai 4:5)

¹³ Tanga Kolosai 4:5. Ha gumonesa gutema mu ndaga tuana tshita, tudi naye gutadila luholo tuana kalegela tangua dietu, handaga ‘ndaga jinyi tuatangijilego’ jiajiya gubuila muthu wagasue mukatshi dietu. (Mulo. 9:11) Tuajiya gufua mu gisagumuisa.

14-15. Luholo lutshi tuajiya gukalegela tangua dietu muabonga? (Hebelu 6:11, 12) (Tala nji gifuanesa.)

 ¹⁴ Tuajiya gukalegela tangua dietu mu luholo luabonga gula tudi mutshita gutshigina gua Yehowa nu tudi mukolesa ufuta wetu n’enji. (Yone 14:21) Tudi naye ‘gudijigamesa, nu gukhala tangua diagasue nu ndaga jiavula jia gutshita mu mudimo wa Fumu.’ (1 Kol. 15:58) Gula tuatshita ngenyi ikhale tuafua nga tuaheta gu gisugishilo gia mavu awa mbatushigo gudibela.​—Mat. 24:13; Roma 14:8.

¹⁵ Mangino, Yesu yowu mulandula gutuameza alandudi enji tangua adi mulongesa lukuma luabonga lua Ufumu ha mavu a mudidi. Udi mutagenesa diago ndaga jiatulayele muene. Wana gutuhana formasio mu njila ya ulondegi wa Yehowa, wana gutukuatesa ha gulongesa muabonga nu ikadigilo tudi nayo funu ha gumuanga lukuma luabonga. (Mat. 28:18-20) Tuana tshita ndaga jiatuwambelele Yesu, tangua tuana tshita ngolo ha gumuanga lukuma luabonga nu gulongesa athu. Tuana guyitshita nji luholo tuana khala gikolekole ha gunengenena lusugu Yehowa mbawushiya mavu awa. Gula tuakalegela longo didi mu Hebelu 6:11, 12, felela dietu mbadikhala diakola “uu nu gugisugishilo.”​—Tanga.

16. Desizio ditshi tudi naye guzula?

¹⁶ Yehowa watombele gale lusugu nu tangua mbadishiya muene mavu awa a Satana. Mu lusugu luene Yehowa mbawutagenesa profesi jidi mu Mbimbi yenji. Matangua ako tuajiya gutangiza egi, gisugishilo gia mavu awa gidi mushipha. Uvi lusugu lua Yehowa ‘mbalushigo mulalega!’ (Hab. 2:3) Tuzulenu desizio dia ‘gunengenena Yehowa.’ Tumonesenu egi ‘tudi munengenena Nzambi wetu mbawutuhuluisa nu guhuiminyina guagasue.’​—Mika 7:7.