1. Mukunda natshi tuana hana Yehowa mersi mukunda nu Biblia?

 TUANA hana Yehowa Nzambi mersi yavula mukunda nu Biblia! Handaga mu njila yenji, wana gutuhana malongo ajiya gutukuatesa ha gubinga malamba tudi mutagana nawo mangino. Wana gutuhana nji felela diabonga mukunda nu masugu adi muza. Ndaga yabalega ndando idi egi, Yehowa wana monesa makalegelo enji avula mu njila ya Biblia. Tangua tuana tangigiza makalegelo ene tuana suanguluga muavula. Ndaga yene yana gututuma ha gukuata n’enji ufuta wakola.​—Ngi. 25:14.

2. Mu maluholo atshi Yehowa wakhalele muwambela athu ndaga?

² Yehowa wana tshigina egi athu amujiye. Mu tangua dikulu wawambelele akombeledi enji ndaga gu nzoji, mu vizio nu mu njila ya anjelo. (Lutang. 12:6; Makal. 10:3, 4) Uvi gula nga ndaga jiene jiasonegewego nga tushigo nu luholo lua gujilonguga. Gishina giene Yehowa watombele athu ha ‘gusonega mu mukanda’ ndaga jiakhalele muene mutshigina egi tujiye. (Yel. 30:2) Tudi mujiya egi Nzambi wa giamatshidia wana ‘kalagala ndaga mu luholo luatagana.’ Hene tudi musha mutshima egi ba metode akalegele muene ha guta maga nu esue adi abonga diago.​—Ngi. 18:30.

3. Ndaga jitshi Yehowa watshitshile ha gubamba Biblia? (Yeshaya 40:8)

³ Tanga Yeshaya 40:8. Mbimbi ya Nzambi yana hana utuameji gudi athu ana khala agujinginyina gudi Yehowa sendese mualeha. Mu luholo lutshi? Yasonegewe sendese mualeha mu rulo jiabolele gungima, gishina giene mangino rulo jiene jikulu jiana khalago guene. Uvi Yehowa watshitshile yagasue hagula athu ako asonege Mbimbi yenji ya gijila gifua luholo yasonegewe mu rulo jiene. Athu atshitshile mudimo wene akhalelego athu atagana,  uvi atshitshile mudimo wabonga diago. Ha gufezegesa, muenya ndunge mumoshi wasonegele mukunda nu Mikanda ya Biblia Yasonegewe mu Hebelu egi: “Tudi musha mutshima egi gushigo nga nu kopi imoshi ya mukanda ukulu yasonegewe gifua luholo asonegele kopi jia Mikanda ya Biblia Yasonegewe mu Hebelu.” Biblia yasonegewe sendese mualeha nu ima inyi yabolele gungima. Athu akalegele ba kopi enji akhalelego nji athu atagana. Uvi tudi diago musha mutshima egi ndaga tuana tanga mangino mu Biblia jidi jia Yehowa.

4. Itshi tuza mulonguga mu longo edi?

⁴ Yehowa wana hana “khapho diagasue diabonga nu gima giagasue giatagana.” (Yak. 1:17) Biblia idi khapho diabonga diatuhanele Yehowa. Gula muthu watuhana kado yana monesa egi muthu muene watujiya muabonga, udi nji mujiya ima tudi nayo funu. Idi luholo lumoshi nu muthu watuhanele Biblia. Tangua tuana guyilonguga tuana jiya ndaga jiavula jiatadila Yehowa. Tuana kotelesa egi wana gutujiya muabonga, wana jiya nji ima tudi nayo funu. Mu longo edi, tuza mumona ndaga tuajiya gulonguga mu Biblia mukunda nu makalegelo thathu a Yehowa: Ndunge jienji, luholo luana kalagala muene ndaga mu luholo luatagana nu guzumba guenji. Thomo tutadilenu luholo Biblia yana monesa ndunge jia Nzambi.

5. Luholo lutshi Biblia yana monesa ndunge jia Nzambi?

⁵ Yehowa wana jiya egi tuakhala nu funu ya malongo enji abonga. Biblia kado yatuhanele muene idi ya guzala nu ndunge jienji. Malongo a Biblia ana kuatesa athu muavula. Ana sombegesa nji makalegelo a athu. Tangua Moize wasonegele mikanda ya thomo ya Biblia, wawambelele enya Isalele egi: ‘Malongo awa ashigo agituhu, uvi adi monyo wenu.’ (Mikh. 32:47) Athu anyi ana tumagela malongo ene ana khala nu gusuanguluga. (Ngi. 1:2, 3) Ikhale Mbimbi ya Nzambi yasonegewe sendese mualeha, uvi uu nu mangino idi nu ngolo jia gusombegesa makalegelo a athu. Ha gufezegesa, gula wangina mu jw.org ha fundo diasonegewa egi “La Bible transforme des vies,” mbawusanga mene jia athu gubalega 50 anyi Biblia yakuatesele ha gusombegesa makalegelo awo nu luholo adi nu gusuanguluga mangino handaga ana tumagela malongo enji.​—1 Tes. 2:13.

6. Mukunda natshi tudi muzuela egi Biblia idi yagudisha nu mikanda iko?

⁶ Gushigo nu mukanda uko udi gifua Biblia. Mukunda natshi tuazuela ngenyi? Handaga Yehowa Nzambi Fumi’a Biblia udi Nzambi wa ngolo jiagasue, wana khala ivo nu ivo, udi nji nu ndunge gubalega athu agasue. Mikanda yavula yana landula guzuelela athu ayisonegele ikhale athu ene afuile gale. Uvi mbala jiavula malongo a mikanda yene anago gukhala luko nu ndando gula ivo yabalega yavula. Uvi malongo a Biblia ana khala nu ndando tangua diagasue. Ana gukuatesa athu sendese mualeha. Tangua tuana tanga mukanda owu wa gijila nu tuana tangigiza ndaga tudi mutanga, Yehowa Fumi’a nayo wana gutuhana nyuma yenji ha gujiya luholo tuajiya gukalegela malongo ene. (Ngi. 119:27; Mal. 3:16; Heb. 4:12) Yehowa Fumi’a Biblia wana tshigina diago gutukuatesa. Ndaga yene idi naye gututuma ha gutanga Biblia lusugu nu lusugu!

7. Luholo lutshi Mbimbi ya Nzambi yakuatesele athu ha gukhala hamoshi mu tangua dikulu?

⁷ Ndaga iko yana monesa egi Biblia idi nu ndunge jia Nzambi, idi luholo yana kuatesa akombeledi a Yehowa ha gukhala hamoshi. Tangua enya Isalele anginyine mu Mavu a Gutendelela, mukut’awo agasue akhalelego mujinga fundo dimoshi. Ako akhalele alowi a jishui, ako akhalele mufuga shitu, ako akhalele mudima mahia. Luholo akhalele mujinga mu mafundo a gudisha, yakhalelego lamba ha gubuita enya Isalele akhalele mujinga mu mafundo ako  mutshima. Uvi Yehowa walondele ndaga hagula enya Isalele akhale gudibungisa hamoshi mu ba okazio avula, hagula a atangele Mbimbi yenji nu guakotelesela nayo. (Mikh. 31:10-13; Neh. 8:2, 8, 18) Tangiza luholo muenya Isalele wagujinginyina wakhalele gudivua gula waheta gu Yelusalema wamona akombeledi ako a Yehowa avula akatuga mu mafundo ako mu gifutshi, ha guza mu kombelela Yehowa hamoshi! Yehowa wakuatesele diago akombeledi enji ha gukhala hamoshi. Gungima tangua hungu dia Uklisto diasendesele, diakhalele nu mala nu akhetu akhalele muzuela mazuelelo avula. Ako akhalele enya lukuma, ako ndo, ako akhalele nu umonyi uvi ako phutu. Uvi akhalele mukombelela Nzambi wa giamatshidia hamoshi handaga akhalele muzumba Mbimbi yenji. Athu anyi abuile alandudi akhalele naye gukotelesa Mbimbi ya Nzambi phamba gula aphangi awo Aklisto a akotelesela nayo, gula adibungisa nji hamoshi nawo.​—Makal. 2:42; 8:30, 31.

8. Luholo lutshi Biblia yana kuatesa akombeledi a Yehowa ha gukhala hamoshi mangino?

⁸ Nzambi wetu wa ndunge wana landula gulongesa nu gukuatesa akombeledi enji ha gukhala hamoshi mu njila ya Biblia. Ima ya gudia yagasue ya mu nyuma tuana suanguluga nawo yana katuga mu Biblia. Tuana guya mu gudibungisa gua mu hungu mbala jiavula, nu gu ba asamble ha gutegelela Mbimbi ya Nzambi nu ukoteleshi wenji nu ha guyizuelela. Biblia idi gikadigilo gia ndando Yehowa wana kalegela ha gukuatesa akombeledi enji ha ‘gumukombelela hamoshi.’​—Sef. 3:9.

9. Khadilo ditshi tudi naye gukhala nadio ha gukotelesa muabonga Biblia? (Luka 10:21)

 ⁹ Tutadilenu ndaga iko idi mumonesa ndunge jia Yehowa. Wasonegesele itshinyi ya Biblia yavula mu luholo egi phamba athu a gudibulumuisa ajiya guyikotelesa. (Tanga Luka 10:21.) Athu a mu mafundo agasue ana tanga Biblia. Muenya ndunge mumoshi wazuelele egi: “Athu avula mangino ana tanga Biblia gubalega mikanda iko, ana guyitanga diago muabonga gubalega mikanda iko.” Uvi phamba athu a gudibulumuisa ana kotelesa diago Biblia nu ana kalegela malongo enji.​—2 Kol. 3:15, 16.

10. Mu luholo lutshi luko Biblia yana monesa ndunge jia Yehowa?

¹⁰ Tuana mona nji ndunge jia Yehowa mu Biblia mu luholo luko. Yehowa wana kalegela Mbimbi yenji ha gutulongesa hamoshi. Wana guyikalegela nji ha gulongesa muthu wagasue mukatshi dietu nu gumuhana gikhesa. Gula tudi mutanga Biblia tuajiya gumona egi Yehowa wana gudisagesa mukunda nu muthu wagasue mukatshi dietu. (Yesh. 30:21) Yajiya gukhala egi tangua wana tagana nu ndaga ya lamba, mbala jiavula gula wakangula Biblia wana heta verse inyi wana mona gifua yasonegewe mukunda nu aye. Uvi mu guzuela guabonga Biblia yana suanguluisa athu avula. Luholo lutshi Biblia yana zuela ndaga jidi gudivua nu mulonga udi mutagana nawo? Handaga Fumi’a nayo udi watema gubalega athu agasue.​—2 Tim. 3:16, 17.

11. Luholo lutshi Nzambi wamonesele egi wana tomba tomba ndo tangua Biblia yasonegewe?

¹¹ Gukalagala ndaga mu luholo luatagana gudi nji khadilo dia Yehowa. (Mikh. 32:4) Muthu wana kalagala ndaga mu luholo luatagana ganago gukhala nu khadilo dia gutomba tomba. Yehowa ganago gukhala nu khadilo dia gutomba tomba. (Makal. 10:34, 35; Roma 2:11) Tuana mona ndaga yene mu luholo luahanele muene njila egi Biblia isonegewe mu mazuelelo anyi athu akhalele mujiya. Mukatshi dia mikanda 39 ya thomo ya Biblia, yavula yasonegewe mu Hebelu. Handaga mu sungi yene akombeledi a Nzambi akhalele mukotelesa muabonga zuelelo diene. Uvi mu siekle ya thomo athu avula akhalele muzuela Greke. Gishina giene mikanda 27 ya gisugishilo ya Biblia yasonegewe mu Greke. Yehowa gazuelelego egi Mbimbi yenji idi naye gusonegewa phamba mu zuelelo dimoshi. Mangino athu hehi nu 8 milliards a ha mavu agasue ana zuela mazuelelo avula. Luholo lutshi athu ene agasue ajiya gujiya Yehowa?

12. Mu luholo lutshi ndaga jidi mu Danyele 12:4 jidi mutagenesewa mu masugu awa a gisugishilo?

¹² Yehowa walayele mu njila ya profete Danyele egi, mu masugu a gisugishilo ‘ujiyi wa giamatshidia’ udi mu Biblia ‘mbawuvula.’ Athu avula mbaakotelesa Biblia muabonga. (Tanga Danyele 12:4.) Ujiyi wene udi wavula mangino, handaga ana balumuna Biblia nu mikanda iko mu mazuelelo avula. Ana guyizola nu ana guyikaphela nji athu ako. Biblia yana balumuiwa nu yana khaphewa muavula ha mavu agasue gubalega mikanda iko. Athu ana balumuna Biblia ha gudiga ana guyidiga diago mu ndando yakola. Akombeledi a Yehowa abalumuine gale Biblia ya gitshinyi nga ya mudidi mu mazuelelo gubalega 240. Athu agasue ajiya guyiheta ya ofele. Ndaga yene yana kuatesa athu a mu ifutshi yagasue ha gutegelela “lukuma luabonga lua Ufumu” gutuama egi gisugishilo gize. (Mat. 24:14) Nzambi wetu wana tshita ndaga mu luholo luatagana udi mutshigina egi athu avula atange Mbimbi yenji ha gumujiya. Wana tshita ngenyi handaga wana gutuzumba muavula mukut’etu agasue.

13. Mukunda natshi tuajiya guzuela egi Biblia yana monesa guzumba gua Nzambi? (Yone 21:25)

¹³ Biblia yana gutukuatesa ha gukotelesa egi guzumba gudi khadilo diabalega ndando dia  Yehowa. (1 Yone 4:8) Tutadilenu ndaga Yehowa wazuelele egi jisonegewe mu Biblia nu jinyi jiasonegewego. Wawambelele athu ha gusonega ndaga jinyi jiajiya gutukuatesa ha gukhala nu ufuta wakola n’enji, ha gukhala nu gusuanguluga mangino nu ha guheta monyo wa ivo nu ivo. Uvi luholo Yehowa wana gutuzumba gawambelelego athu ha gusonega ndaga jiavula jinyi tushigo najio funu ha gumukombelela.​—Tanga Yone 21:25.

14. Mu luholo lutshi luko ndaga jidi mu Biblia jiana monesa egi Nzambi wana gutuzumba?

¹⁴ Yehowa wana monesa nji egi wana gutuzumba luholo wawambelele athu ha gusonega Biblia mu luholo ludi mumonesa egi wana gutunemesa. Yehowa gahagelego mikhuala mu Biblia idi mumonesa ndaga jiagasue tudi naye gukalagala nu jinyi tushigo naye gukalagala. Uvi wawambelele athu ha gusonega mene jia athu nu profesi jidi muhana gikhesa nu malongo ana gutukuatesa ha guzula ba desizio abonga. Ngenyi Biblia yana gutukuatesa ha guzumba Nzambi nu gumutumagela nu mutshima wetu wagasue.

15. (a) Luholo lutshi Yehowa wana monesa egi wana gudisagesa mukunda nu athu anyi ana tanga Biblia? (b) Mu gifuanesa, mene jitshi jia Biblia mona mukhetu, muvuala wa yala nu phangi wa mukhetu wa gukola adi mutangigiza? (Gis. 39:1, 10-12; 2 Maf. 5:1-3; Luka 2:25-38)

¹⁵ Biblia yana monesa egi Yehowa wana gudisagesa muavula mukunda nu esue. Mu luholo lutshi? Mbimbi yenji idi nu mene jiavula jidi mumonesa luholo athu akhalele gudivua. Tuajiya gukotelesa luholo athu Biblia yana zuelela akhalele gudivua handaga akhalele nji ‘athu gifua esue.’ (Yak. 5:17) Ndaga ya gubalega ndando idi egi tangua tuana jiya luholo Yehowa wakhalele mukalegela athu akhalele gifua esue ndaga, tuana kotelesa muabonga egi “Yehowa wana khala nu guzumba guakola nu khenda jiavula.”​—Yak. 5:11.

16. Ndaga jitshi tuana longuga mukunda nu Yehowa tangua tuana tanga mene jia athu akalegele gubola jidi mu Biblia? (Yeshaya 55:7)

 ¹⁶ Biblia yana monesa nji guzumba gua Yehowa mu luholo luko. Idi gututshiginyisa egi Nzambi wetu mbagashigo gutubemba gula tuatshita gubola. Enya Isalele akhalele mukalagala gubola mbala jiavula, uvi tangua akhalele mubalumuna mutshima nu giamatshidia giagasue Nzambi wakhalele guatotesela. (Tanga Yeshaya 55:7.) Aklisto a mu siekle ya thomo akhalele nji mujiya egi Nzambi wana guazumba muavula. Nyuma ya Nzambi yakuatesele mupostolo Phaula ha gusonegela Aklisto egi, gula muthu wakhalele mutshita gubola guakoma, wabalumuna mutshima adi naye ‘gumutotesela nu gumukuatesa.’ (2 Kol. 2:6, 7; 1 Kol. 5:1-5) Ndaga yene idi mumonesa egi Yehowa ganago gutuna akombeledi enji ngatshima akalagala gubola! Uvi wana guakuatesa nu guzumba guagasue, wana guahana ndola nu wana guatamega ha gubua luko mafuta enji. Udi mulaya egi mbawutshita nji luholo lumoshi gudi athu agasue ana balumuna mutshima mangino.​—Yak. 4:8-10.

17. Mukunda natshi tudi muzuela egi Biblia idi kado ya ndando?

¹⁷ Yehowa watuhanele kado imoshi ya ndando. Luholo lutshi Biblia idi mumonesa ndaga yene? Tuamonyi egi Biblia yana monesa ndunge jia Nzambi, yana monesa nji egi wana kalagala ndaga mu luholo luatagana nu wana gutuzumba muavula. Yana monesa nji egi Yehowa wana tshigina egi tumujiye. Wana tshigina nji egi tubue mafut’enji.

18. Mu luholo lutshi tuajiya gumonesa egi tudi muhana Yehowa mersi mu luholo atuhanele “Biblia idi khapho diabonga”?

¹⁸ Tushigo naye gujimbila egi Mbimbi ya Nzambi idi “khapho diabonga.” (Yak. 1:17) Tulandulenu guhana Nzambi mersi mukunda nu Biblia. Luholo lutshi? Gula tudi mutanga Mbimbi yenji ya gijila nu gutangigiza ndaga tudi mutanga. Gula tuatshita ngenyi tuajiya diago gusha mutshima egi Yehowa fumi’a nayo ‘mbawutukuatesa nu mbatuheta ujiyi wa Nzambi.’​—Ish. 2:5.