LONGO DIA 4
‘Nyuma Yene Hakhenji Yana Jiyisa’
‘Nyuma yene hakhenji yana jiyisa nyuma yetu egi esue tudi ana a Nzambi.’—LOMO 8:16.
LUNGIMBO 25 Aklisto Ambiwe Maji mu Nyuma adi Khapho dia Nzambi
NDAGA JIDI MU LONGO EDI *
Yehowa wamuangele nyuma yenji mu luholo lua gushimana gudi Aklisto 120 mu lusugu lua Pantekote (Tala paragrafe 1-2)
1-2. Ndaga tshi ya gushimana yakalegewe mu lusugu lua Pantekote ya givo 33 gia Tangua Dietu?
ALANDUDI 120 akhalele a gudibungisa gu Yelusalema, mu inzo imoshi gu sugu ya gosa. Yakhalele mu lubingo mu gimenegena, mu lusugu lua Pantekote ya givo 33 gia Tangua Dietu. (Makal. 1:13-15; 2:1) Masugu azonda gungima, Yesu waadijigile ha gusala gu Yelusalema, handaga akhalele naye guhanewa khapho diakoma. (Makal. 1:4, 5) Itshi yabuile gungima?
2 ‘Sagumugu, matululu akola ajile mu dilu gifua matululu a muhehe wakola.’ Matululu ene azalele inzo yagasue. Gungima, “madimi gifua madimi a tshuya” amonegele holu dia mito ya alandudi, hene alandudi ‘azalele nu nyuma yabonga.’ (Makal. 2:2-4) Yehowa wamuangele nyuma yenji yabonga holu dia athu awa, mu luholo lua gushimana. (Makal. 1:8) Akhalele Aklisto a thomo ambiwe maji mu nyuma, * nu ahanewe felela dia guhinyina nu Yesu mu dilu.
NDAGA ITSHI YANA KALEGEWA GULA MUTHU WAMBIWA MAJI MU NYUMA?
3. Mukunda natshi Aklisto ambiwe maji mu nyuma mu Pantekote akhalelego naye guhaga giphapha egi atombewe?
3 Gula nga wakhalele mukatshi dia athu awa mu sugu yene, nga mbawubuitshigo mutshima wa ndaga yene. Gima gimoshi gifua dimi dia tshuya giabua holu dia muto waye, nu wasendesa guzuela mu mbimbi jiko! (Makal. 2:5-12) Giphapha gishigo egi, udi diago mujiya egi wambiwa maji mu nyuma. Uvi Aklisto agasue ambiwe maji mu njila ya nyuma yabonga ahagewe njimbu mu luholo lua gushimana, nu mu tangua dimoshi ba? Ndo. Tuajiya gikuatshi?
4. Athu agasue ambiwe maji mu nyuma mu siekle ya thomo, atombewe mu tangua dimoshi mu lujingu luawo ba? Kotelesa.
4 Tuzuelelenu ndaga yatadila tangua. Gushigo phamba Aklisto 120 ambiwe maji mu nyuma mu Pantekote ya givo 33 gia Tangua Dietu. Mu lusugu luene, athu ako 3 000 ahetele nji nyuma yabonga yaatendelele Yesu. Ambiwe maji mu nyuma tangua abatijiwe. (Makal 2:37, 38, 41) Uvi mu ivo ya landuile, Aklisto agasue ambiwe ndo maji mu nyuma phamba mu tangua abatijiwe. Enya gu Samariya ambiwe maji mu nyuma yabonga matangua azonda gungima dia gubatijiwa. (Makal. 8:14-17) Uvi athu ako gifua Korneyi nu enya fami yenji, ambiwe maji mu nyuma gutuama egi abatijiwe.—Makal. 10:44-48.
5. Ha gutadila 2 Kolinto 1:21, 22, itshi yana kalegewa gula muthu wambiwa maji mu nyuma?
5 Henyaha tutadile ndaga yana kalegewa gula muthu wambiwa maji mu nyuma. Gula athu ako atombewa, mbala ya thomo yana khala lamba hagula atshigine egi Yehowa waatombi. Ajiya gudihula egi, ‘Mukunda natshi Nzambi gangutombi phamba ame?’ Uvi ako ajiyilego gudihula ngenyi. Ikhale ngenyi nga ndo, mupostolo Phaula wakotelesele ndaga yana kalegewa gula muthu wambiwa maji mu nyuma, wasonegele egi: “Tangua muahagele gutshigina, Nzambi wa mihagele njimbu * yenji mu njila ya nyuma yabonga yatendelele muene, idi gifua gima gimoshi giana diangela guhanewa ha gukula muthu.” (Ef. 1:13, 14) Yehowa wana kalegela nyuma yenji ha gukuatesa Aklisto hagula akotelese egi muene waatombele. Ngenyi, nyuma yabonga yana khala gifua ‘gima gimoshi giana diangela guhanewa ha gukula muthu]’ giaahanewe ha guatshiginyisa egi mbaajinga mayilago mu dilu uvi ha mavu ndo.—Tanga 2 Kolinto 1:21, 22.
6. Itshi Muklisto wambiwe gale maji mu nyuma gadi naye gutshita ha guheta gishimbigo gienji gia guya mu dilu?
6 Gula Muklisto wambiwe gale maji mu nyuma, yakotelesa egi udi naye phamba guya mu dilu? Ndo. Muklisto muene wana jiya egi mbawuya mujinga mu dilu. Uvi, gashigo naye gujimbila ndaga eyi yazuelele Phetelo egi: ‘Aphangi, tshitenu ngolo ha gukotelesa enue hakhenu egi, gutamegewa nu gutombewa guenu gudi gua giamatshidia, gula mudi mulandula gutshita ndaga eji, mbamushigo mubua mu gubola.’ (2 Phet. 1:10) Ngatshima Muklisto wambiwe maji mu nyuma watombewe, nga watamegewe ha guya mu dilu, muene mbawuheta gishimbigo phamba gula wasala yagujinginyina.—Fili. 3:12-14; Heb. 3:1; Yat. 2:10.
MUTHU WANA JIYA GIKUATSHI EGI WAMBIWA MAJI MU NYUMA?
7. Luholo lutshi Aklisto ambiwe maji mu nyuma ana jiya egi atombewe ha guya mu dilu?
7 Uvi luholo lutshi muthu wana gujiya egi watombewa ha guya mu dilu? Mvutu idi mu mukanda wasonegele Phaula gudi Aklisto a gu Roma anyi ‘atamegewe ha gukhala athu a gijila.’ Waadijigile egi: ‘Muahetelego nyuma ya uhiga idi gumikuatesa luko woma, uvi muahetele nyuma idi gumikuatesa ha gutshiginyiwa gifua ana a Nzambi, idi gumihua njila ya guzuela mu dijui diakola egi: ‘Abba, Tata!’ Nyuma yene hakhenji yana jiyisa nyuma yetu egi esue tudi ana a Nzambi.’ (Lomo 1:7; 8:15, 16) Mu njila ya nyuma yenji yabonga, Nzambi wana kuatesa Aklisto ambiwe maji mu nyuma ha gujiya egi atombewe ha guya mu dilu.—1 Tes. 2:12.
8. Luholo lutshi 1 Yone 2:20, 27 Yana monesa egi Aklisto ambiwe maji mu nyuma ashigo nu funu nga ya muthu mungoshi ha guawambela egi atombewe gudi Nzambi?
8 Yehowa gana bemba ndo nga dute imoshi mu mitshima ya Aklisto anyi ana tamegewa ha guya mu dilu. (Tanga 1 Yone 2:20, 27.) Yadiago, Aklisto anyi ambiwe maji mu nyuma, adi naye gulongewa gudi Yehowa mu njila ya hungu gifua athu agasue. Uvi ashigo nu funu ya muthu mumoshi ha guadijiga egi atombewe ha guya mu dilu. Yehowa wana kalegela nyuma yenji, ngolo jiabalega gukoma, ha guakuatesa hagula ajiye egi ambiwe maji mu nyuma!
ADI NAYE ‘GUVUALEWA LUA MBADI’
9. Luholo Efeso 1:18 idi guyimonesa, usombegeshi utshi wana buila muthu gula wambiwa maji mu nyuma?
9 Akombeledi a Nzambi avula mangino ana kotelesa ndo ndaga yana kalegewa gula muthu wambiwa maji mu nyuma. Tushigo naye gudihula, handaga ene hakhawo ambiwe ndo maji mu nyuma. Nzambi wafugile athu hagula ajinge mayilago ha mavu, uvi ishigo mu dilu. (Gis. 1:28; Ngi. 37:29) Uvi, Yehowa watombele athu ako ha guya mujinga mu dilu. Hene, tangua gana guaamba maji mu nyuma, wana guasombegesa diago felela diawo nu luholo luawo lua gutangiza. Ngenyi, ana haga matangi awo gu lujingu mbaaheta mu dilu.—Tanga Efeso 1:18.
10. ‘Guvualewa lua mbadi’ guakotelesa itshi? (Tala nji note goshi’a diyiji.)
10 Tangua Muklisto gana mbiwa maji mu nyuma, wana ‘guvualewa lua mbadi,’ nga ndo wana ‘guvualewa mu dilu.’ * Yesu wamonesele nji egi, idi lamba ha gukotelesela diago muthu yonu gambiwego maji mu nyuma luholo luana gudivua muthu ‘wavualewa lua mbadi,’ nga ‘wavualewa mu nyuma.’—Yone 3:3-8.
11. Kotelesa luholo utangijilo wa Aklisto wana sombegesa gula ambiwa maji mu nyuma.
11 Luholo lutshi utangijilo wa Aklisto wana sombegesa gula ambiwa maji mu nyuma? Gutuama egi Yehowa atombe Aklisto awa ha guya mujinga mu dilu, ana khala nu felela dia gujinga mayilago ha mavu. Ana nengena nu gusuanguluga guagasue, tangua Yehowa mbagakatula gubola ha mavu nu mbagabuisa mavu phaladiso. Ana tangiza luholo mbaamona muenya fami yawo wafile nga futa diawo tangua mbagafuzumuga. Uvi gula ambiwa maji mu nyuma, ana sendesa gutangiza mu luholo luko. Mukunda natshi? Anago gutangiza egi gujinga ha mavu gushigo luko guabonga. Anago gusombegesa matangi awo mukunda nu lamba ana tagana nadio. Anago nji gutangiza egi gujinga mayilago ha mavu mbagukhala guahudisa. Yehowa wana kalegela nyuma yenji ha gusombegesa luholo luawo lua gutangiza, nu felela diawo.
12. Ha gutadila 1 Phetelo 1:3, 4, Luholo lutshi Aklisto ambiwe maji mu nyuma ana gudivua mukunda nu felela diawo?
12 Muklisto wambiwe gale maji mu nyuma wajiya gudivua gifua gashigo watagana ha guheta luendu elu. Uvi gajiyilego gukhala nu giphapha nga hazonda egi Yehowa wamutombi. Wana suanguluga nu wana hana Nzambi mersi tangua gana tangiza egi mbawujinga mu dilu mayilago.—Tanga 1 Phetelo 1:3, 4.
13. Muklisto wambiwe maji mu nyuma wana gudivua gikuatshi mukunda nu lujingu ha mavu?
13 Na ndaga eyi idi mukotelesa egi Muklisto wambiwe maji mu nyuma wana kamba egi nga wafua gale ba? Mupostolo Phaula udi muhana mvutu gu muhu owu. Wafuanesele muila wa muthu nu inzo ya tenta, hene gazuelele egi: ‘Ayi, esue tudi mu inzo eyi ya tenta, tudi mumba isugu nu gudisagesa, handaga tushigo mutshigina gukatula inzo eyi ya tenta, uvi tudi mudifuelela gusudiga inzo ya tenta iko, hagula muila wa gufua uminyiwe gudi muila wa mu dilu.’ (2 Kol. 5:4) Aklisto awa ana tangiza ndo egi gujinga ha mavu guahudisa, ana kamba nji ndo egi nga afua gale. Uvi, ana suanguluga nu lujingu nu ana kalegela Yehowa lusugu nu lusugu nu enya fami jiawo nu mafuta awo. Hene, ikhale ndaga ya luholo tshi adi mutshita, ana jiya egi adi nu felela diabonga mukunda nu masugu adi muza.—1 Kol. 15:53; 2 Phet. 1:4; 1 Yone 3:2, 3; Yat. 20:6.
YEHOWA WAGUMBILE GALE MAJI MU NYUMA BA?
14. Ndaga tshi jiatangewa jianago gumonesa egi muthu wambiwa maji mu nyuma?
14 Yajiya gukhala egi, wana gudihula gula aye nji wambiwe gale maji mu nyuma. Gula idi ngenyi, tangigiza gu mihu eyi ya ndando: Wana khala nu nzala yakola ya gukalagala gutshigina gua Yehowa ba? Wana khala nu gikhesa giavula mu mudimo wa gulongesa ba? Wana suanguluga gulonguga Biblia ha guzumba ‘ndaga jiakola jiatadila Nzambi’? (1 Kol. 2:10) Wana gumona diago egi Yehowa wana gugukuatesa ha guzola mbuto yabonga mu mudimo wa gulongesa ba? Wana tangiza egi udi nu ginemo giakoma gia gukuatesa athu ako ha gujiya Yehowa ba? Gudi nu ndaga jidi mumonesa egi Yehowa wana gugukuatesa mu lujingu luaye? Gula wahana mvutu egi ‘ayi’ gu mihu eyi yagasue, idi mumonesa egi wambiwa maji mu nyuma ba? Ndo, ishigo ngenyi. Mukunda natshi? Handaga akombeledi a Nzambi agasue ajiya gudivua ngenyi, nga gutagana nu ndaga eji, ngatshima ambiwego maji mu nyuma. Yehowa wajiya gugukuatesa ha gukalagala ndaga eji tuatanga, mu njila ya nyuma yenji, ngatshima wakhala nu felela dia gujinga ha mavu nga mu dilu. Hene, gula udi nu ba dute, nga udi gudihula egi ngambiwa maji mu nyuma nga ndo, idi mumonesa egi wambiwe gaye ndo maji mu nyuma. Aklisto ambiwe maji mu nyuma ana khala ndo nu ba dute gu mulonga wene! Ana jiya muabonga!
Yehowa wakalegele nyuma yenji ha guhana Abalahama, Sarah, Davidi, nu Yone Mubatiji ngolo jia gutshita ndaga jia gushimana, uvi gayikalegele ndo ha guahana felela dia gujinga mu dilu (Tala paragrafe 15-16) *
15. Luholo lutshi tudi mujiya egi athu agasue ahetele nyuma yabonga atombewe ndo ha guya mu dilu?
15 Mu Biblia mudi nu ifezegeselo ya athu a gutshigina ahetele nyuma yabonga; uvi akhalele ndo nu felela dia guya mujinga gosa. Davidi wakhalele mutuamezewa gudi nyuma yabonga. (1 Sam. 16:13) Nyuma yabonga yamukuatesele ha gukotelesa ndaga jiakola jia Yehowa, yamutuamezele nji ha gusonega mikanda iko ya Biblia. (Mako 12:36) Ngatshima idi ngenyi, uvi mupostolo Phetelo wazuelele egi nga muene Davidi “gakandugilego mu dilu.” (Makal. 2:34) Yone mubatiji wakhalele ‘waguzala nu nyuma yabonga.’ (Luka 1:13-16) Yesu wazuelele egi guakhalelego nga muthu mungoshi wabalega Yone gukoma, nu wazuelele luko egi Yone gakhalelego mukatshi dia athu a Ufumu wa mu dilu. (Mat. 11:10, 11) Yehowa wakalegele nyuma yenji ha guhana athu awa ngolo jia gukalagala ndaga jia gushimana, uvi gakalegelego nyuma yene ha guatomba ha gujinga mu dilu. Idi mukotelesa egi athu ene akhalelego nu gutshigina guakola gifua gua athu anyi atombewe ha guya mu dilu? Ndo. Idi mukotelesa egi Yehowa mbawafuzumuna ha gujinga mu Phaladiso ha mavu.—Yone 5:28, 29; Makal. 24:15.
16. Gishimbigo tshi akombeledi avula a Nzambi a mangino mbaaheta?
16 Akombeledi avula a Nzambi ha mavu ashigo nu felela dia gujinga mu dilu. Athu gifua Abalahama, Sara, Davidi, Yone mubatiji, nu mala nu akhetu ako a mu tangua dikulu, ana nengena tangua mbaajinga ha mavu mu uhinyinyi wa Ufumu wa Nzambi.—Heb. 11:10.
17. Mihu itshi mbatutadila mu longo dialandula?
17 Mangino, tuajiya gudihula mihu yavula handaga tudi mujinga hamoshi nu Aklisto ambiwe gale maji mu nyuma. (Yat. 12:17) Luholo lutshi athu ambiwe gale maji mu nyuma ana gutadila? Gula phangi mumoshi mu hungu dienu wasendesa gudia mapha, luholo lutshi wajiya gumukalegela ndaga? Itshi wajiya gutshita gula mutango wa athu adi mudia mapha udi muya nu guvula? Ndaga yene yajiya gugusagesa ba? Mbatuheta mvutu jia mihu eyi mu longo dialandula.
^ par. 5 Sendese mu Pantekote ya givo 33 gia Tangua Dietu uu nu mangino, Yehowa wana hana Aklisto ako felela diakoma, dia guya muhinyina nu Yesu mu dilu. Luholo lutshi Aklisto awa ana jiya egi atombewe ha guya mu dilu? Ndaga tshi yana kalegewa gula muthu watombewa ha guya mu dilu? Longo edi diazudiwa mu longo dinyi diazogele mu Inzo Yaleha ya Mutaledi ya Janvier 2016. Diza muhana mvutu gu mihu eyi.
^ par. 2 UKOTELESHI WA MBIMBI: Gumbiwa maji mu nyuma: Yehowa wana kalegela nyuma yenji yabonga ha gutomba Aklisto adi naye guhinyina nu Yesu mu dilu. Mu njila ya nyuma yenji, Nzambi wahanele Aklisto ene laji mukunda nu masugu adi muza. Laji diene didi gifua ‘gima gimoshi giana diangela guhanewa ha gukula muthu.’ (Ef. 1:13, 14) Aklisto ene ajiya guzuela egi nyuma yabonga ‘yana jiyisa,’ nga ndo yana guamonegesa haphelo egi adi nu felela dia guya mu dilu.—Lomo 8:16.
^ par. 5 UKOTELESHI WA MBIMBI: Njimbu. Muklisto wambiwe gale maji mu nyuma, wana guhagewa njimbu mayilago gula wasala wagujinginyina gudi Nzambi uu nu gu gufua guenji, nga ndo gutuama egi lamba diakola disendese.—Ef. 4:30; Yat. 7:2-4; tala “Mihu yana Guhula Athu ana Gutanga Mikanda Yetu” mu Inzo Yaleha ya Mutaledi ya Avril 2016, ya Français.
^ par. 10 Ha gujiya ndaga jiavula jiatadila ukoteleshi wa “guvualewa lua mbadi,” tala Inzo Yaleha ya Mutaledi, ya 1 Avril 2009 diyiji 3-12, ya Français.
LUNGIMBO 27 Gumonega gua Ana a Nzambi
^ par. 57 UKOTELESHI WA IFUANESA: Ngatshima tudi mu bologo mukunda nu giamatshidia, nga tudi mumuanga nu gulongesa lukuma muabonga, tuajiya gunengena tangua mbatujinga ha mavu mu Ufumu wa Nzambi.
