1. Muhu utshi athu ako mukatshi dietu ajiya gudihula gifua Fumu Davidi?

MUKUT’ETU agasue tuana tshigina gukhala mu guhuima. Gushigo nga muthu wana tshigina gukhala nu gikenene. Uvi, matangua ako tuajiya guvua gikenene. Akombeledi ako a Yehowa ajiya gudihula gifua luholo Fumu Davidi wahudile Yehowa egi: ‘Uu nu tangua ditshi mbangukhala nu gikenene nu lamba gumutshima wami lusugu luagasue?’—Ngi. 13:2.

2. Itshi tuza muzuelela mu longo edi?

² Mukut’etu agasue tuajiya gukhala nu gikenene, uvi gudi nu ndaga tuajiya gukalagala ha gutuna gudisagesa muavula. Mu longo edi tuza muzuelela thomo ndaga jiana tshita egi tukhale nu gikenene. Luko, tuza muzuelela ndaga samano jiajiya gutukuatesa ha gukhala tedie ngatshima tudi mutagana nu malamba.

3. Ndaga jitshi jiajiya gutubatela gikenene jinyi tuajiyilego gukanga njila egi jikalegewago?

³ Gudi nu ndaga jiavula jiajiya gutubatela gikenene. Tuajiyilego gukanga njila egi ndaga jiene jikalegewe. Ha gufezegesa, tushigo nu ndaga ya gutshita hagula mibando ya ima ya gudia, ya milele nga ya jinzo ikanduga ndo. Yajiya nji gukhala lamba ha gujiya matangua mafuta etu a mudimo nga akhalasa ajiya gutushinjiga ha gumba mambo nga ha gutshita ndaga jia musonyi. Tuajiyilego nji gukanga njila mu ndaga jiakhuta jidi  mukalegewa fundo tudi mujinga. Tuana tagana nu ndaga eji jia lamba handaga tudi mujinga ha mavu awa athu avula anago gukalegela malongo a Biblia. Satana, nzambi wa ha mavu awa, wana jiya egi athu ako mbaabemba gukombelela Yehowa mukunda nu ‘gikenene gia ndaga jia ha mavu awa.’ (Mat. 13:22; 1 Yone 5:19) Idi yadiago egi mavu awa adi azala pha nu ndaga jiana gutubatela gikenene!

4. Itshi yajiya gutubuila gula tudi gudisagesa muavula mukunda nu malamba tudi mutagana nawo?

⁴ Gila tudi gudisagesa muavula mukunda nu malamba tudi mutagana nawo, tuajiya gubuita ndaga jiko jia ndando mutshima. Ha gufezegesa, tuajiya gudisagesa egi mbatuhetshigo mbongo jia gusumba ima tudi naye funu, tuajiya gukata, mudimo wetu wajiya gufua, nga ndo tushigo nu luholo lua gukalagala mudimo. Tuajiya nji gudisagesa egi mbatusadigo ya gujinginyina gula tualolewa ha gushiya mukhuala wa Nzambi. Gualeha ndo Satana mbawukalegela athu enji ha guluisa akombeledi a Nzambi. Ngenyi tuajiya gudisagesa ha gujiya gula itshi mbatukalagala tangua mbaatuluisa. Tuajiya gudihula egi: ‘Idi ndaga yabola gula ngadisagesa mukunda nu ndaga jiene?’

5. Itshi Yesu atshiginyile guzuela tangua azuelele egi: ‘Bembenu gudisagesa’?

⁵ Yesu wawambelele alandudi enji egi: ‘Bembenu gudisagesa.’ (Mat. 6:25) Idi mukotelesa egi tuajiyilego guvua gikenene ba? Ndo! Akombeledi ako a Yehowa a mutangua dikulu ataganele nji nu ndaga jia gikenene. Uvi, Yehowa walanduile gusuanguluga nawo. * (1 Maf. 19:4; Ngi. 6:3) Yesu wazuelele ngenyi ha gutukolesa. Atshiginyilego egi tudisagese muavula mukunda nu ima ya gujingila. Handaga gula ndo yajiya gututuma ha gumona egi gukalegela Yehowa gushigo nu ndando. Itshi tuajiya gutshita gila tudi nu gikenene?—Tala galuanda “ Luholo lua Guyikalagala.”

6. Ha gutadila Filiphi 4:6, 7, itshi yajiya gutukuatesa ha gukhala tedie tangua tudi nu gikenene?

⁶ (1) Gusamba muavula. Gula tudi muvua gikenene mukunda nu lamba dia tubuila, tudi naye gutoga ukuateshi gudi Yehowa. (1 Phet. 5:7) Mvutu gu isambu yaye yajiya gugukuatesa ha guheta ‘guhuima gua Nzambi gudi guabalega ndunge jiagasue jia [muthu] jia gukotelesa ndaga.’ (Tanga Filiphi 4:6, 7.) Yehowa mbawutuhana guhuima gua matangi mu njila ya nyuma yenji.—Gal. 5:22.

7. Itshi tushigo naye gujimbila tangua tudi mukombelela Nzambi?

⁷ Tangua udi mukombelela Yehowa, muwambele ndaga jiagasue jidi mu mutshima waye. Udi naye gumuwambela ndaga idi gugusagesa nu luholo udi gudivua. Gula luholo lua gumanesela ndaga yene ludi guene, mutoge ndunge ha gujiya ndaga wajiya gutshita nu ngolo jia guyikalagala. Uvi, gula ushigo nu luholo lua gumanesela ndaga yene, toga Yehowa agukuatese ha gutuna gudisagesa muavula. Mu isambu yetu tudi naye gumonesa haphelo ndaga jidi gutusagesa, ngenyi mbatumona diago luholo Yehowa wana guhana mvutu gu isambu. Gula wahetelego mvutu mu tangua diene, ubembigo gukombelela. Yehowa anago gutshigina phamba umudijige ndaga jidi gugusagesa haphelo, uvi wana tshigina nji egi ufubidila mu isambu.—Luka 11:8-10.

8. Itshi tuajiya guwambela Yehowa mu isambu yetu?

⁸ Tangua udi muwambela Yehowa ndaga jidi gugusagesa mu gisambu, ujimbilago nji gumuhana mersi. Ngatshima tudi mutagana  nu malamba avula, idi ndaga yabonga ha gutangiza ishimbigo tuahetele gale mu monyo wetu. Uvi, itshi wajiya gutshita gula ushigo mumona luholo wajiya guwambela Yehowa luholo udi gudivua? Jiya egi Yehowa wana hana mvutu guyisambu, ikhale wamuwambela phamba egi: ‘Ngabuba ngukuatese!’—2 Gudi. 18:31; Lomo 8:26.

9. Itshi tudi naye gutshita ha gukhala mu ubambi?

⁹ (2) Sha mutshima mu ndunge jia Yehowa, uvi jiaye ndo. Mu tangua dia phofete Yeshaya enya Yuda avuile woma tangua avuile egi enya Asiliya aza gualuisa. Enya Yuda atshiginyilego egi enya Asiliya aambinge, hene akambele ukuateshi gudi enya Egypte. (Yesh. 30:1, 2) Yehowa waawambelele egi gusha mutshima gudi enya Egypte mbaguabatela malamba. (Yesh. 30:7, 12, 13) Mu njila ya Yesheya, Yehowa wawambelele athu luholo ajiya gukhala mu ubambi. Wazuelele egi: ‘Mbamukhala nu ngolo gila muahena tedie nu muasha mutshima’ gudi Yehowa.—Yesh. 30:15b.

10. Mu ndaga jitshi tuajiya gushila Yehowa mutshima?

¹⁰ Luholo lutshi tuajiya gumonesa egi tuana sha mutshima gudi Yehowa? Tutadile gale ifezegeselo eyi. Tangiza egi waheta mudimo wa mbongo jiavula, uvi mudimo wene udi mutoga egi ukhale mutshita matangua avula nu mbawugukanga njila ha gukalagala ndaga jia mu nyuma. Nga ndo tangiza egi gu fundo dia mudimo yala nga mukhetu mumoshi udi mukamba egi ubue mukajenji nga mulumi’enji, uvi muene gashigo mukombeledi wa Yehowa. Tangiza egi muenya fami yaye mumoshi wana zumba muavula waguwambela egi mbawugutuna gula udi mulandula gukombelela Yehowa. Mu ndaga eji jiagasue yajiya gukhala lamba ha guzula desizio, uvi Yehowa mbawugukuatesa. (Mat. 6:33; 10:37; 1 Kol. 7:39) Muhu udi egi, mbawusha diago mutshima gudi Yehowa nu mbawulandula utuameji wenji ba?

11. Mene jitshi jia Biblia jiajiya gutukuatesa ha gulandula gukhala tedie gila tuatagana nu umbalagaji?

¹¹ (3) Zula malongo mu ifezegeselo yabonga nu yabola. Biblia idi nu mene jiavula jidi mumonesa ndando ya gulandula gukhala tedie nu gushila Yehowa mutshima. Tangua udi mulonguga mene jiene, tala ndaga jia kuatesele akombeledi a Nzambi ha gukhala tedie tangua akhalele mutagana nu umbalagaji wakola. Ha gufezegesa, tangua tribinale yakoma ya enya Yuda atunyishile apostolo ha gulongesa lukuma luabonga, apostolo avuilego woma. Uvi, azuelele egi: ‘Tudi naye ya gutumagela Nzambi, uvi athu ndo.’ (Makal. 5:29) Ikhale tangua abetewe fimbo, apostolo avuilego woma. Mukunda natshi? Handaga akhalele mujiya egi Yehowa udi nawo. Wakhalele musuanguluga nayo. Hene, alanduile gulongesa lukuma luabonga. (Makal. 5:40-42) Luholo lumoshi, tangua mulandudi Etiene ataganele nu gufua, walanduile gukhala tedie hene phala yenji ‘yabuile gifua ya muanjelo.’ (Makal. 6:12-15) Mukunda natshi? Handaga wakhalele mujiya egi Yehowa udi musuaguluga nenji.

12. Ha gutadila 1 Phetelo 3:14 nu 4:14, mukunda natshi tudi naye gukhala nu gusuanguluga tangua tudi mutagana nu usageshi?

¹² Apostolo amonesele diago egi Yehowa wakhalele nawo. Waahanele ngolo jia gutshita ndaga jia gushimana. (Makal. 5:12-16; 6:8) Mangino, Yehowa anago gutuhana ngolo jia gukalagala ndaga jia gushimana. Uvi, mu njila ya Mbimbi yenji, wana gutuwambela nu guzumba guagasue egi; ngatshima tudi mutagana nu usageshi handaga tudi mukalagala ndaga jiabonga, tuajiya gukhala nu gusuanguluga. Handaga Yehowa wana suanguluga nu esue, nyuma yenji yana khala nu esue. (Tanga 1 Phetelo 3:14; 4:14.) Hene,  tuajiyilego gudisagesa ha gujiya ndaga mbatukalagala gula tuasagesewa mu masugu adi muza. Uvi, tudi naye gukolesa gutshigina guetu nu gujiya egi Yehowa mbawutukuatesa nu mbawutuhuluisa. Gifua luholo alandudi a mutangua dikulu akalegele, esue nji tudi naye gusha mutshima mu ndaga jialayele Yesu egi: ‘Ame mbangumihana mbimbi nu ndunge jidi nga mbalagaji wenu mumoshi gajiyigo gutuna nga gushila giphapha.’ Yesu wazuelele egi: ‘Mukunda nu gukolesela guenu, mbamubamba monyo wenu.’ (Luka 21:12-19) Tushigo naye gujimbila egi Yehowa wana landula gujiya ndaga jiazonda-zonda jiatadila akombeledi enji agujinginyina anyi afuile gale. Idi yadiago egi muene mbawafuzumuna.

13. Longo ditshi tuajiya guzula mu ifezegeselo ya athu anyi alanduilego gukhala tedie nu atunyile gushila Yehowa mutshima?

¹³ Tuajiya nji guzula malongo mu ifezegeselo ya athu anyi alanduilego gukhala tedie, nu ashilego mutshima gudi Yehowa. Gulonguga ifezegeselo eyi yabola, mbayitukuatesa ha gutuna gukalagala gubola gifua muatshitshile ene. Ha gufesegesa, tangua Asa abuile Fumu ya gu Yuda washile mutshima gudi Yehowa tangua masuta avula ajile gualuisa. Hene Yehowa waakuatesele ha gubinga. (2 Gudi. 14:9-12) Gungima, Fumu Basha ya gu Isalele wajile nu masuta azonda ha guluisa Asa. Uvi mu giphungu egi ha fundo dia gutoga ukuateshi gudi Yehowa, Asa wahanele mbongo gudi enya Siliya hagula masuta awo amukuatese. (2 Gudi. 16:1-3) Ikhale tangua Asa akatele ukhashi wakola, akambelego ukuateshi wa Yehowa.—2 Gudi. 16:12.

14. Longo ditshi tuajiya guzula mu gubola guakalegele Asa?

¹⁴ Thomo, Asa wakambele Yehowa tangua ataganele nu malamba. Uvi gungima akambelego ukuateshi wa Nzambi, wakambela gumanesela malamba muene hakhenji. Yajiya gumonega gifua yakhalelego mulonga luholo Asa ayile mukamba ukuateshi gudi enya Siliya ha guluisa enya Isalele. Uvi, gubinga guenji guakhalele guatangua diazonda. Yehowa wamuwambelele mu njila ya profete egi: ‘Handaga washi mutshima gudi fumu ya enya Siliya ha fundo dia gusha mutshi gudi Yehowa Nzambi waye, masuta a fumu ya enya Siliya alenga a hamago aye.’ (2 Gudi. 16:7) Tushigo naye gutangiza egi esue hakhetu tuajiya gubinga malamba tudi mutagana nawo ha fundo dia gutoga utuameji wa Yehowa mu njila ya Mbimbi yenji. Ikhale tuatagana nu ndaga idi mutoga guzula desizio mu phushi, tudi naye gusha mutshima gudi Yehowa. Handaga muene mbawutukuatesa ha gubinga.

15. Itshi tuajiya gukalagala tangua tudi mu tanga Biblia?

¹⁵ (4) Gukuata verse jia Biblia mu muto. Tangua udi mutanga Biblia gula wamona verse idi mumonesa egi idi nu ndando ha gukhala tedie nu gusha mutshima gudi Yehowa, khala mutshita yagasue ha gukuata verse jiene mu muto. Ha guyikalagala khala mutanga verse jiene mu dijui diakola nga gujisonega hagula wajiya guza gujitala luko. Yehowa wawambelele Yoshua ha gutanga mukanda wa Mikhuala phipha nu muanya ha gukalagala ndaga nu gutema guagasue. Ndaga Yoshua akhalele mutanga jiakhalele naye gumukuatesa ha gutuna guvua woma nu gukhala nu gikhesa ha gutuameza athu a Nzambi. (Yosh. 1:8, 9) Ndaga jiavula jidi mu Biblia jiajiya gutukuatesa ha gukhala nu guhuima gua matangi gula tuatagana nu ndaga idi gutuhana gikenene nga woma.—Ngi. 27:1-3; Ish. 3:25, 26.

16. Luholo lutshi Yehowa wana kalegela aphangi hagula atukuatese ha gukhala tedie nu gusha mutshima gudi muene?

¹⁶ (5) Gubalegesa tangua nu akombeledi a Nzambi. Yehowa wana kalegela aphangi etu a  mala nu a akhetu hagula atukuatese tulandule gukhala tedie nu gusha mutshima gudi muene. Mu gudibungisa guetu gua mu hungu tuana heta malongo gudi phangi wana tshita diskur, mu komatere jia aphangi nu tuana heta nji gikhesa tangua tuana guta nawo maga. (Heb. 10:24, 25) Tuajiya nji guheta gikhesa gula tudi mutela mafuta etu a mu hungu ndaga jidi gutusagesa. “Mbimbi yabonga” idi mukatuga gudi futa diaye yajiya gugukuatesa ha gutuna gudisagesa muavula.—Ish. 12:25.

17. Ha gutadila Hebelu 6:19, luholo lutshi felela diatadila Ufumu wa Nzambi diajiya gutuhana ngolo jia gukolesela ngatshima tudi mutagana nu malamba?

¹⁷ (6) Gukolesa felela diaye. Felela diatadila Ufumu wa Nzambi didi gifua ‘ngowa idi mujigamesa monyo,’ ha gutuhana ngolo ngatshima tudi mutagana nu malamba nga gula tudi nu gikenene. (Tanga Hebelu 6:19.) Khala mutangigiza mafelela a Yehowa atadila masugu adi muza, handaga mutangua diene mbagukhadigo nga ndaga yajiya gutuhana gikenene. (Yesh. 65:17) Tangiza guhuima mbatukhala nago mu mavu ahe-ahe, fundo ndaga jia lamba mbajikhadigo luko. (Mika 4:4) Wajiya nji gukolesa felela diaye tangua udi muwambela athu ako lukuma luabonga. Tshita yagasue ha gulongesa nu gubuisa athu alandudi. Gula watshita ngenyi, wajiya ‘gukhala nu felela diakola uu nu gugisugishilo.’—Heb. 6:11.

18. Ndaga jitshi jiajiya gutubuila mu masugu adi muza nu itshi tudi naye gutshita?

¹⁸ Luholo mavu awa a Satana aheta gugisugishilo, mbatutagana nu ndaga jiavula mbajituhana gikenene. Mukhapho wetu wa givo 2021 wajiya gutukuatesa ha gukolesela mu malamba, gulandula gukhala tedie, gushila Yehowa mutshima, uvi gu ngolo jietu ndo. Mu givo egi, tudi naye gumonegesa mu makalegelo etu egi tudi nu gutshigina mu felela dia Yehowa didi muzuela egi: ‘Mbamukhala nu ngolo gila muahena tedie nu muasha mutshima gudi Nzambi.’—Yesh. 30:15.