1. Luholo lutshi athu ashigo mu monesa guzumba mangino?

BIBLIA yadiangele guzuela gamba mu masugu a gisugishilo, athu mbaakhadigo nu “guzumba.” (2 Tim. 3:1, 3) Tudi mumona gutagenesewa gua profesi eyi mangino. Ha gufezegesa, mala avula nu akaji’awo ashiyile gale ma ulo, gudivua guana khalago mukatshi diawo ngenyi yanatuma ana ha gutangiza egi ana zumbiwago. Ikhale enya fami imoshi, anago gukhala nu ufuta wakola. Muthu mumoshi wana hana malongo atadila fami udi muzuela gamba: “Fami jiavula jiana gujinga inzo imoshi uvi anago gudijiya muabonga. Handaga tata nu mama nu ana anatago maga hamoshi. Muthu nu muthu wana balegesa tangua diavula ha gukalegela ordinateur, tablette, telefone nga gutshita saga jia video.”

2-3. (a) Ha gutadila Lomo 12:10, gudi akhuatshi tudi naye gumonesa guzumba guakola? (b) Itshi tuza muzuelela mu longo edi?

² Tuana tshiginago gulandula khadilo dia gutuna gumonegesa guzumba gifua enya ha mavu awa. (Lomo 12:2) Uvi, tuana zumba enya fami yetu nu aphangi etu a mu hungu muavula. (Tanga Lomo 12:10.) Guzumba tshi adi muzuelela haha? Idi guzumba guana tuma enya fami ha gukhala nu ufuta wakola. Tudi naye gukudisa guzumba gua luholo elu mukunda nu aphangi etu a mala nu a akhetu. Gila tudi mumonesa guzumba guakola, mbayitukuatesa ha gulandula gukhala hamoshi. Gutshita ngenyi gudi nu ndando handaga idi mukatshi dia gikombelelo gia giamatshidia.—Mika 2:12.

³ Ha gujiya ndaga jiajiya gutukuatesa ha gukudisa nu gumonesa guzumba guakola, tutadilenu malongo tuajiya guzula mu ifezegeselo idi mu Biblia.

4. Itshi Yakoba 5:11 idi muzuela mukunda nu guzumba gua Yehowa?

⁴ Biblia yana monesa makalegelo awaha a Yehowa. Ha gufezegesa, yana zuela egi “Nzambi udi guzumba.” (1 Yone 4:8) Gujiya ngenyi guana gututuma ha gusuena hehi nenji. Uvi Biblia yana zuela nji egi Yehowa ‘udi wazala pha nu guzumba guakola.’ (Tanga Yakoba 5:11.) Ndaga eji jidi mumonesa egi Yehowa wana gutuzumba muavula!

5. Luholo lutshi Yehowa ana monesa khenda jienji nu luholo lutshi tuajiya gulandula gifezegeselo gienji?

⁵ Mukanda wa Yakoba 5:11 wana zuelela guzumba guakola gua Yehowa hamoshi nu khadilo diko diana gututuma ha gusuena hehi nenji, khenda jienji. (Guz. 34:6) Yehowa wana gutumonesela khenda jienji tangua ana gututotesela gubola guetu. (Ngi. 51:1) Mu Biblia, khadilo dia khenda diana kotelesa ndaga jiavula gubalega gutotesela. Khadilo dia khenda, didi mukotelesa luholo muthu ana gudivua mu mutshima tangua ana mona muthu muko nu gikenene nu yana gumutuma ha gumukuatesa. Yehowa wana monesa egi udi nu nzala yakola ya gutukuatesa, gubalega luholo mama ana gudivua mukunda nu mun’enji. (Yesh. 49:15) Tangua tuana khala nu gikenene khadilo dia khenda diana tuma Yehowa ha gutukuatesa. (Ngi. 37:39; 1 Kol. 10:13) Tuajiya gumonesela aphangi etu a mala nu a akhetu khadilo dia khenda tangua tudi guatotesela gubola. Tushigo naye guavuila khabu gula atukalegela ndaga yatusagesa. (Ef. 4:32) Luholo lua thomo lua gumonesela aphangi etu a mala nu a akhetu khadilo dia khenda idi guakuatesa tangua adi mutagana nu malamba. Gila guzumba gudi gututuma ha guvuila aphangi etu khenda, mbatulandula gifezegeselo gia Yehowa, yago wana guvuila athu khenda jiavula.—Ef. 5:1.

6. Luholo lutshi Yonatana nu Davidi adimonesele guzumba guakola?

⁶ Biblia idi nu mene jia athu ashigo atagana  anyi amonesele guzumba guakola. Tutadilenu gifezegeselo gia Yonatana nu Davidi. Biblia idi muzuela gamba: ‘Yonatana nu Davidi abuile mafuta akola, Yonatana wasendesele guzumba Davidi muavula gifua muakhalele mu zumba muene muila wenji.’ (1 Sam. 18:1) Davidi watombewe ha gubua fumu gungima dia fumu Saula. Hene, Saula wasendesele gumuvuila ginjiongo nu wakambele luholo lua gumushiya. Uvi, tangua Saula akhalele mukamba gushiya Davidi, Yonatana muna Saula adinginyishilego mu ndaga yene. Yonatana nu Davidi adilayele ha gulandula gukhala mafuta akola nu gudikuatesa tangua diagasue.—1 Sam. 20:42.

7. Ndaga itshi yakhalele naye gukanga Yonatana nu Davidi njila ha gubua mafuta?

⁷ Idi diago ndaga ya gushimana luholo Yonatana nu Davidi akhalele mafuta akola. Handaga gudi nu ndaga jiavula jiakhalele naye guakanga njila ha gukhala mafuta. Ha gufezegesa, yajiya gukhala egi Yonatana wakhalele mbuta ya Davidi ya ivo 30. Yonatana wakhalele naye gutangiza egi ajiyilego gubua futa dia mona wazonda yago ashigo mujiya ndaga jiavula gifua muene. Uvi, gatangijilego luholo elu. Wakhalele munemesa Davidi muavula.

8. Mukunda natshi wajiya guzuela egi Yonatana wakhalele futa diabonga dia Davidi?

⁸ Yonatana wakhalele naye guvuila Davidi ginjiongo. Luholo akhalele muna Fumu Saula, muene wakhalele naye gubua fumu gungima dia shi’enji. (1 Sam. 20:31) Uvi, Yonatana wakhalele nu gudibulumuisa, wakhalele nji ya gujinginyina gudi Yehowa. Hene, tangua Yehowa atombele Davidi ha gubua fumu gungima dia Saula, Yonatana watshiginyile desizio diene. Wakhalele ya gujinginyina gudi Davidi, ngatshima shi’enji wavuile khabu mukunda nu desizio diene.—1 Sam. 20:32-34.

9. Yonatana wakhalele mumona Davidi gifua mbalagaji wenji ba? Kotelesa.

⁹ Yonatana wakhalele muzumba Davidi muavula, akhalelego gumumona gifua mbalagaji wenji. Yonatana wakhalele muwashi wabonga wa mifula nu wakhalele suta dia ngolo. Athu akhalele mujiya egi muene nu sh’enji Saula, akhalele “abalega njila ya khuyi jiphushi” nu akhalele “abalega shitu akhoshi jingolo.” (2 Sam. 1:22, 23) Ngenyi, Yonatana wakhalele naye gudisunzula mukunda nu ndaga akhalele mutshita. Ikhale ngenyi, Yonatana akambelego gudithesa nu Davidi nu a muvuidilego ginjiongo. Wakhalele nji musuanguluga nu Davidi mukunda nu gikhesa gienji nu luholo akhalele mushila Yehowa mutshima. Ha gufezegesa, tangua Davidi ashiyile Goliyata, gungima dienji Yonatana wasendesele gumuzumba gifua muakhalele muzumba muene muila wenji. Luholo lutshi tuajiya gumonesa guzumba guakola gudi aphangi etu a mala nu a akhetu?

10. Mbimbi eji ‘dizumbienu muavula nu mutshima wagasue’ jidi mukotelesa itshi?

¹⁰ Biblia yana zuele gamba ‘dizumbienu muavula nu mutshima wagasue.’ (1 Phet. 1:22) Yehowa wana gutuhana gifezegeselo giawaha. Guzumba guenji guakhala guakola, hene gula tudi musala yagujinginyina gudi muene, mbawulandula gutuzumba. (Lomo 8:38, 39) Mbimbi ya Greki ya balumuiwe egi “muavula” idi muhana matangi a muthu wana kalagala ngolo ha gumonesa guzumba. Matangua ako, yana khalago yaleba ha gumonesela aphangi a mala nu a akhetu guzumba guakola. Gula athu ako akalagala ndaga yatusagesa, tudi naye ‘gukanga mutshima mu ndaga jia athu ako nu guzumba guagasue, gutshita  ngolo ha gubamba gukhala hamoshi guana hana nyuma yabonga mu guhuima guana gutubungisa hamoshi.’ (Ef. 4:1-3) Gula tudi mutshita yagasue ha gubamba “guhuima,” tushigo naye gutala gubola gua aphangi etu. Tudi naye gutadila aphangi etu gifua luholo Yehowa ana guatadila.—1 Sam. 16:7; Ngi. 130:3.

11. Mukunda natshi matangua ako yajiya gukhala lamba ha guzumba aphangi etu muavula?

¹¹ Yana khalago yaleba tangua diagasue ha gumonesela aphangi etu guzumba guavula, gila atukalegela ndaga imoshi yabola. Yakhalele nji lamba mukunda nu Aklisto ako a mu siekle ya thomo. Ha gufezegesa, yajiya gukhala egi Evodi nu Sentishe akhalelego nu mulonga tangua akhalele mukalagala ‘hamoshi nu [Phaula] ha gulongesa lukuma luabonga.’ Uvi, gudi nu ndaga jiko jiakhalele mutshita egi matululu azoge mukatshi diawo. Gishina giene Phaula waawambelele ‘ha gukhala nu matangi a luholo moshi mu Fumu.’—Fili. 4:2, 3.

12. Luholo lutshi tuajiya gukudisa guzumba guakola mukunda nu aphangi a mala nu a akhetu?

¹² Luholo lutshi tuajiya gumonesela aphangi etu a mala nu a akhetu guzumba guavula mangino? Gila tudi mutshita yagasue ha gujiya aphangi Aklisto muabonga, mbayikhala yaleba ha guakotelesa nu guazumba muavula. Tuajiya gukuata nawo ufuta ikhale adi mambuta, mavuala, adi enya gifutshi giko nga adi enya zuelelo diko. Tuamonyi egi, Yonatana wakhalele mbuta ya Davidi ya ivo hehi nu 30; uvi akhalele mafuta akola. Wajiya gukamba gujiya ndaga jiavula gudi muthu udi mbuta nga galenge gaye. Gula watshita ngenyi, mbawumonesa egi ‘wana zumba aphangi agasue.’—1 Phet. 2:17.

13. Gila tudi nu ufuta wakola nu aphangi ako mu hungu uvi ako ndo idi mulonga ba?

¹³ Tangua adi muzuela egi tudi naye gumonesela aphangi etu Aklisto guzumba guakola, idi mukotelesa egi tudi naye gukuata ufuta nu aphangi agasue mu hungu ba? Ndo, ishigo ngenyi. Gila phangi mumoshi wakuata ufuta nu phangi muko handaga ana gutshigina ndaga jia luholo lumoshi ishigo mulonga. Yesu wakhalele mutadila apostolo enji agasue  gifua “mafuta” enji, uvi wakhalele muzumba Yone muavula. (Yone 13:23; 15:15; 20:2) Ikhale ngenyi, Yesu akhalelego mukalegela Yone ndaga jiabonga gubalega apostolo ako. Ha gufezegesa, tangua Yone nu phangi enji Yakoba atogele ha guheta fundo dia ndando mu Ufumu wa Nzambi, Yesu waawambelele gamba: ‘Ishigo ame ngudi naye guzula desizio dia gutomba muthu udi naye gukhala gukoko diami dia madia nga gukoko diami dia mahidi.’ (Mako 10:35-40) Ha gulandula gifezegeselo gia Yesu, tudi naye gukalegela aphangi etu agasue ndaga luholo lumoshi. (Yak. 2:3, 4) Gila tuatshita ngenyi mbatushigo mubata ukhaphumunyi mukatshi dia hungu.—Yuda 17-19.

14. Ha gutadila Filiphi 2:3, itshi yajiya gutukuatesa ha gutuna gudithesa nu aphangi ako?

¹⁴ Gila tudi mumonesa guzumba guavula mukatshi dietu, mbatushigo mukamba gudithesa nu aphangi ako mu hungu. Tuamonyi egi Yonatana avuidilego Davidi ginjiongo, akhalelego nji gumutadila gifua mbalagaji wenji. Mukut’etu agasue tuajiya gulandula gifezegeselo gia Yonatana. Tushigo naye guvuila aphangi etu Aklisto ginjiongo mukunda nu ndaga jiawaha ana kalagala. ‘Uvi nu gudibulumuisa guagasue khalenu mumona egi athu ako amibalega.’ (Tanga Filiphi 2:3.) Tudi naye gujiya egi muthu wagasue mukatshi dietu udi nu ndando mu hungu. Gila tudi nu khadilo dia gudibulumuisa, mbatumona makalegelo abonga a aphangi etu nu mbatuheta gubonga mu ifezegeselo wawo yawaha.—1 Kol. 12:21-25.

15. Longo ditshi tuazula mu eksperianse ya phangi Tanya nu fami yenji?

¹⁵ Tangua tuana tagana nu ndaga jia lamba, Yehowa wana monegesa guzumba  guenji luholo ana gutukolesa nu ana kalegela aphangi etu ha gutukuatesa. Tutadilenu ndaga yabuidile fami imoshi gungima dia programe ya Lusugu lua Samano gu assemblée internationale a givo 2019 anyi akalegewe gu États-Unis. Asamble ene akhalele nu muto walumene egi ‘Guzumba Guana Guhua Ndo!’ Phangi mumoshi wa mukhetu mu jina dia Tanya udi nu ana thathu udi muzuela gamba: “Tangua tuakhalele mu vutuga gu hotel fundo tukhalele mu banda, gamiyo gamoshi gakumile gamiyo tuakhalele, hene tuatshitshile aksida. Gushigo nga muthu wanamenele, uvi woma watukuatele hene tuatulugile hashi tuamagana mu njila. Muthu mumoshi watutamegele ha guya mungina mugamiyo genji. Yakhalele phangi wetu wakatugile nji gua asamble ene. Ishigo phamba muene wamagenele. Aphangi ako thano akatugile gu Suède ajile gua asamble amagenele nji. Aphangi a akhetu atuyambele nu munami wa mukhetu, gutshita ngenyi guatukuatesele ha gudivua muabonga! Gungima, ngawambelele egi tudi muabonga muajiya guya, uvi atshiginyilego gutubemba. Tuakhalele nawo uu nu tangua minganga yajile ha gukuatesa athu. Aphangi ene atshitshile yagasue ha gutukuatesa. Mu tangua diene dia lamba tuamonele diago guzumba gua Yehowa. Ndaga eji jiakolesele diago guzumba guetu mukunda nu aphangi. Yatutumile nji ha guhana Yehowa mersi nu gumuzumba muavula.” Wajiya gutangiza luko tangua wakhalele mu lamba nu luholo aphangi a mala nu a akhetu a gumonesele guzumba guakola?

16. Ndaga jitshi jiana gututuma ha mumonesa guzumba guakola mukatshi dietu?

¹⁶ Tutadilenu gubonga tuajiya guheta gula tudi mumonesa guzumba guavula mukatshi dietu. Tuana kolesa aphangi etu a mala nu a akhetu tangua ana tagana nu malamba. Tuana tshita ngolo ha gukhala hamoshi nu aphangi’etu. Tuana monesa diago egi tudi alandudi a Yesu. Ngenyi yana tuma athu adi nu mitshima yabonga ha gujiya giamatshidia. Ndaga yabalega ndando idi egi, tuana tumbuisa Yehowa ‘Tata wazala pha nu khenda, Nzambi wana hana athu agasue ngolo.’ (2 Kol. 1:3) Mukut’etu agasue tulandulenu gukudisa nu gumonesa guzumba guakola!