1. Guzumba gua Nzambi guana gugutuma ha gudivua gikuatshi?

MUPOSTOLO Yone wasonegele egi “Nzambi udi guzumba.” (1 Yone 4:8) Mbimbi eji jidi gutuwunguluisa giamatshidia gia ndando giana zuela egi: Nzambi udi mufugi wa monyo, guzumba nji guakatugile gudi muene. Yehowa wana gutuzumba! Guzumba guenji guana gututuma ha gudivua mu umbambi nu ha gukhala mu gusuanguluga.

2. Ha gutadila Matayo 22:37-40, mikhuala itshi mbadi yabalega iko gukoma, nu mukunda natshi yajiya gukhala lamba ha gutumagela mukhuala wa mbadi?

² Aklisto ashigo naye gutomba gula adi naye gumonesa guzumba nga ndo. Handaga udi mukhuala. (Tanga Matayo 22:37-40.) Tangua tuana jiya Yehowa muabonga, yajiya gukhala yaleba mukunda nu esue ha gutumagela mukhuala owu. Yehowa udi watagana; wana gutukalegela ndaga nu gisemo giagasue. Uvi, yajiya gukhala lamba ha gutumagela mukhuala wa mbadi. Mukunda natshi? Handaga aphangi etu ashigo athu atagana. Matangua ako, ajiya guzuela nga gukalagala ndaga jiajiya gutusagesa. Yehowa wajiyile egi yajiya gukhala lamba ha gutumagela mukhuala wa mbadi. Hene, wakalegele athu ako asonegele Biblia ha gumonesa mukunda natshi tudi naye guzumba athu ako nu luholo tuajiya guyikalagala. Yone wakhalele nji mukatshi dia athu asonegele ndaga jiene.—1 Yone 3:11, 12.

3. Itshi Yone akhalele muzuelela muavula?

³ Mu mikanda yenji, Yone wamonesele egi Aklisto adi naye gudizumba. Tangua asonegele lumene lua Yesu, Yone wakalegele mbimbi “guzumba” iphungu yavula gubalega ba Evanjile  ako thathu gula ayibungisa. Yajiya gukhala egi Yone wakhalele nu ivo hehi nu 100 tangua asonegele Evanjile yenji nu mikanda yenji iko thathu. Mikanda yene ya Biblia yana monegesa egi tudi naye gukalagala ndaga jiagasue nu guzumba. (1 Yone 4:10, 11) Uvi, yatogele tangua diavula hagula Yone a longuge longo edi.

4. Yone wakhalele mumonesa guzumba tangua diagasue ba?

⁴ Tangua Yone akhalele muvuala akhalelego mumonesa guzumba tangua diagasue. Ha gufezegesa, mu okazio umoshi ngenyi Yesu nu alandudi enji abalegele gu Samaliya tangua akhalele muya gu Yelusalema. Mu dimbo dimoshi dia enya Samaliya a amoneselego khadilo dia guyamba. Itshi Yone akalegele? Muene nu phangi enji Yakoba atogele Yesu egi gula watshingina tuajiya gutamega tshuiya tua mudilu tubulumuge tukonde athu agasue a mudimbo edi! (Luka 9:52-56) Mu okazio uko, Yone amoneselego apostolo ako guzumba. Yajiya gukhala egi muene nu phangi enji Yakoba awambelele ginawo ha guatogela gudi Yesu mafundo abonga mu Ufumu wa Nzambi. Tangua apostolo ako ajiyile ndaga yene avuile khabu jiakola diago! (Mat. 20:20, 21, 24) Ikhale Yone wakalegele ndaga eji, Yesu wakhalele gumuzumba.—Yone 21:7.

5. Ndaga tshi tuza muzuelela mu longo edi?

⁵ Mu longo edi, tuza muzuelela gifezegeselo gia Yone nu ndaga jiasonegele muene mukunda nu guzumba. Tuza nji mulonguga luholo tuajiya gumonesela aphangi etu guzumba. Luko, tuza mumona luholo fumu ya fami wajiya gumonesela enya fami yenji guzumba.

6. Luholo lutshi Yehowa wamonesele guzumba guenji mukunda nu esue?

⁶ Tuajiya gutangiza egi ha guzumba athu ako tudi naye gukhala nu matangi abonga mukunda nu ene nu guawambela ndaga nu gisemo. Uvi, guzumba gua giamatshidia, gudi naye nji gumonega mu ndaga tudi mukalagala. (Fuanesa nu Yakoba 2:17, 26.) Ha gufezegesa, Yehowa wana gutuzumba. (1 Yone 4:19) Guzumba guenji guana monega mu mbimbi jiabonga jidi mu Biblia. (Ngi. 25:10; Lomo 8:38, 39) Uvi, tudi mujiya egi guzumba gua Nzambi guana monegago phamba mu ndaga jiana zuela muene, guana monega nji mu ndaga jiana kalagala muene. Yone wasonegele egi: ‘Gishina tudi mujiya egi guzumba gua Nzambi gua muenesewe mukatshi dietu gidi egi, Nzambi watumine Mun’enji mumoshi ha mumoshi ha mavu hagula tuhete monyo mu njila yenji.’ (1 Yone 4:9) Yehowa watshiginyile egi Mun’enji wa guzumba amone lamba nu afue mukunda nu esue. (Yone 3:16) Tudi diago nu gutshigina egi Yehowa wana gutuzumba.

7. Itshi idi mumonegesa egi Yesu wana gutuzumba?

 ⁷ Yesu wawambelele alandudi enji egi wana guazumba. (Yone 13:1; 15:15) Wamonesele diago egi wakhalele guazumba muavula nu wana gutuzumba ikhale mu mbimbi jienji nga mu ndaga jiakalegele muene. Yesu wazuelele egi: ‘Gushigo muthu udi nu guzumba gubalega gua muthu yago udi muhana monyo wenji mukunda nu mafuta enji.’ (Yone 15:13) Tangua tudi mutangiza ndaga jia tshitshile Yehowa nu Yesu, itshi tudi naye gukalagala?

8. Ndaga tshi mukanda wa 1 Yone 3:18 udi gututoga ha gutshita?

⁸ Tuana monesa egi tuana zumba Yehowa nu Yesu tangua tuana guatumagela. (Yone 14:15; 1 Yone 5:3) Yesu wazuelele egi tudi naye guzumba athu ako. (Yone 13:34, 35) Tushigo naye guzumba aphangi etu phamba mu mbimbi, uvi tudi naye nji guamonesela guzumba mu ndaga tudi mukalagala. (Tanga 1 Yone 3:18.) Itshi tudi naye gukalagala ha gumonesa egi tuana guazumba?

9. Guzumba guatumile Yone ha gutshita ndaga itshi?

⁹ Yone wakhalele naye gusala nu sh’enji ha gukalagala mudimo wagulowa jishui ha gukamba mbongo. Uvi, wakalegele monyo wenji ha gukuatesa athu ako ha gujiya giamatshidia giatadila Yehowa nu Yesu. Mudimo watombele Yone wakhalelego waleba. Wasagesewe, wambiwe mu bologo handaga wakhalele mulongesa lukuma luabonga. Wataganele nu usageshi, gu gisugishilo gia siekle ya thomo wabiwe mu bologo. Mu tangua diene wakhalele wagukola. (Makal. 3:1; 4:1-3; 5:18; Yat. 1:9) Ikhale amumbile mu bologo handaga wakhalele mulongesa ndaga yatadila Yesu, Yone wamonesele diago egi wakhalele muzumba aphangi enji. Ha gufezegesa, tangua akhalele muene gu hongo dia Phatimose, wasonegele mukanda wa Yatuwuwe nu wa wutumidile mahungu ha gula ajiye ndaga ‘jidi naye gukalegewa gualeha ndo.’ (Yat. 1:1) Yajiya gukhala egi gungima dia gukatuga gu hongo dia Phatimose, Yone wasonegele Evanjile yenji ha guzuelela monyo wa Yesu nu mudimo wenji wagulongesa. Wasonegele nji mikanda thathu ha gukolesa aphangi. Luholo lutshi wajiya gulandula khadilo dia Yone dia gudihana?

10. Luholo lutshi wajiya gumonesa egi wana zumba athu ako?

¹⁰ Wajiya gumonesa egi wana zumba athu ako tangua udi mutomba ndaga udi naye gukalagala mu monyo waye. Mavu awa a Satana ana tshigina egi ukalegele tangua diaye nu ngolo jiaye ha gukamba mbongo mukunda nu gubonga guaye hakhaye. Uvi, Aklisto ana kadigila tangua diawo diavula mu mudimo wa gulongesa lukuma luabonga lua Ufumu. Ana kuatesa athu ha gukhala nu ufuta wakola nu Yehowa. Ako ana kalegela tangua diawo diagasue ha gumuanga nu gulongesa lukuma luabonga.

11. Luholo lutshi aphangi avula agujinginyina ana monegesa egi ana zumba Yehowa nu aphangi ako?

¹¹ Aklisto avula agujinginyina ana kalagala nji midimo ha gutagenesa nzala jiawo nu gukuatesa enya fami jiawo. Ikhale ngenyi, Aklisto awa ana gukuatesa ulondegi wa Nzambi mu maluholo avula. Ha gufezegesa, ako ana khala hehi ha gukuatesa aphangi ana buila malamba. Ako anahana mago mu mudimo wagutunga Jinzo jia Ufumu. Aphangi agasue ana khala nu luendu lua guhana misomonyi ha gukuatesa mudimo wana kalegewa ha mavu agasue. Ana kalagala ndaga eji handaga ana zumba Nzambi nu athu ako. Phoso nu phoso, tuana monesa egi tuana zumba aphangi etu tangua tuanaya mu gudibungisa gua mu hungu nu tangua tuana hana ba  komantere. Ikhale tangua tuana khala yaguhuila, tuana tshita ngolo haguya mu gudibungisa. Ngatshima tudi nu ndaga idi gutusagesa, tuana hana komantere. Idi yadiago egi mukut’etu agasue tuana tagana nu ndaga jia lamba, uvi tuana hana aphangi ako gikhesa gungima nga gutuama dia gudibungisa. (Heb. 10:24, 25) Tumuhana mersi avula mukunda nu mudimo aphangi etu ana kalagala!

12. Ndaga itshi iko idi mumonesa egi Yone wakhalele mu zumba aphangi enji?

¹² Yone amoneselego guzumba guenji gudi aphangi phamba ha guashimana uvi wakhalele nji guahana malongo. Ha gufezegesa, Yone washimanele aphangi a mala nu a akhetu mukunda nu gutshigina guawo nu mudimo wabonga akalegele. Uvi waahanele nji malongo mundaga yatadila gukalagala gubola. (1 Yone 1:8–2:1, 13, 14) Luholo lumoshi nji, tudi naye gushimana aphangi adi mukalagala ndaga jiabonga. Ikhale ngenyi, gila muthu mumoshi udi mukudisa khadilo diabola, udi naye gumuwambela nu gisemo giagasue ha gubemba khadilo diene. Yana toga gikhesa ha guhana muthu malongo, uvi Biblia idi muzuela egi mafuta awaha ana gudihana malongo.—Ish. 27:17.

13. Itshi tushigo naye gutshita?

¹³ Matangua ako, tuana monesa guzumba guetu gudi aphangi etu mu ndaga tuana tuna gutshita. Ha gufezegesa, tuanago gulaba guvua khabu mu ndaga ana zuela. Tutadilenu ndaga yabuile gu gisugishilo gia monyo wa Yesu tangua akhalele ha mavu. Wawambelele alandudi enji egi ha guheta monyo adi naye gudia muila wenji nu gunua mahatshi enji. (Yone 6:53-57) Mbimbi eji jia sagesele alandudi enji ako hene abembele gumulandula. Uvi, mafuta enji awaha, gifua Yone amubembelego. Alandudi akoteleselego ndaga Yesu akhalele muzuela, adihudile mukunda ndaga yene. Mafuta enji awaha amonelego egi ndaga Yesu azuelele yakhalele yabola. Uvi, amushile mutshima, handaga akhalele mujiya egi wakhalele muzuela giamatshidia. (Yone 6:60, 66-69) Idi diago ndaga yabonga ha gutuna gulaba guvua khabu mu ndaga mafuta etu adi muzuela! Uvi, tudi naye guabembela tangua ha gutukotelesela ndaga azuedi inyi tuakoteleselego.—Ish. 18:13; Mulo. 7:9.

14. Mukunda natshi tushigo naye guhagela aphangi etu umbalagaji mu mutshima?

¹⁴ Yone wazuelele nji egi tushigo naye guhagela aphangi etu umbalagaji. Gula tuatuna  gutumagela longo edi, mbatuhana Satana njila ha gututuameza. (1 Yone 2:11; 3:15) Ndaga eyi yabuidile aphangi ako gu gisugishilo gia siekle ya thomo ya tangua dietu. Satana watshitshile yagasue hagula akombeledi a Nzambi akhale nu umbalagaji mukatshi diawo. Tangua Yone asonegele mikanda yenji, athu ako mu hungu asendesele gukalagala ndaga gifua Satana. Ha gufezegesa, Diotrefese wabatele ukhaphumunyi wakola mu hungu dimoshi. (3 Yone 9, 10) Akhelelego munemesa atadi awendi anyi hunji dia akulu atuameji akhalele mutuma. Wakhalele muzola aphangi ako mu hungu handaga akhalele mu monesa khadilo dia guyamba gudi athu anyi muene akhalelego mutshigina. Idi diago ndaga yabola! Mangino, Satana yowu genji mulandula gukamba gukhaphumuna nu gubinga akombeledi a Nzambi. Tushigo naye guhagela aphangi etu umbalagaji nga gubemba guakuatesa.

15. Itshi fumu wa fami ashigo naye gujimbila?

¹⁵ Hagula fumu wa fami amonese egi udi muzumba enya fami yenji udi naye gutagenesa nzala jiawo. (1 Tim. 5:8) Uvi, gashigo naye gujimbila egi, ndaga yabalega ndando idi guakuatesa ha gukhala nu ufuta wabonga nu Yehowa. (Mat. 5:3) Yesu wabembele gifezegeselo giawaha mukunda nu mafumu a fami. Evanjile ya Yone yana zuela egi, tangua Yesu akhelele ha mutshi wa lamba, watangijile enya fami yenji. Yone wakhalele ya gumagana nu Mariya mama wa Yesu hehi nu fundo dia khokhewe Yesu ha mutshi wa lamba. Ikhale wakhalele nu lamba diakola, Yesu watogele Yone ha gubamba Mariya. (Yone 19:26, 27) Yesu wakhalele nu aphangi enji a mala nu a akhetu anyi akhalele naye gukuatesa ginawo. Uvi, idi mumonega egi gushigo nga mumoshi mukatshi diawo wakhalele mulandudi wa Yesu mu tangua diene. Hene, Yesu wakambele muthu wajiya gulandula gukuatesa Mariya nu ima ya gujingila nu ha gumukolesa ha gulandula gukombelela Yehowa.

16. Inemo itshi Yone akhalele naye?

¹⁶ Yone wakhalele nu inemo yavula ya gutagenesa. Luholo akhalele mupostolo, wakhelele nu ginemo gia gutuameza mudimo wa gulongesa. Yajiya nji gukhala egi wakhalele nu mukhetu, ngenyi wakhalele naye gutagenesa nzala jia enya fami yenji nu guakuatesa ha gukhala nu ufuta wabonga nu Nzambi.  (1 Kol. 9:5) Longo ditshi mafumu a fami adi naye guzula mangino?

17. Mukunda natshi idi nu ndando egi fumu wa fami akuatese enya fami yenji ha gukhala nu nyuma yabonga?

¹⁷ Phangi udi fumu wa fami udi nu inemo yavula ya gutagenesa. Ha gufezegesa, udi naye gutshita ngolo gu mudimo wenji, gutshita ngenyi mbagusuanguluisa Yehowa. (Ef. 6:5, 6; Tito 2:9, 10) Wajiya nji gukhala nu inemo mu hungu, gifua gukhala mukulu nga mutuameji wa mudimo wa gulongesa. Idi nji nu ndando egi akhale mulonguga Biblia phoso nu phoso nu mukaj’enji nu anenji. Enya fami yenji mbaamuhana diago merci avula luholo ana tshita ngolo hagula akhale nu sante yabonga, akhale nu gusuanguluga nu luholo ana guakuatesa ha gulandula gukhala nu nyuma yabonga.—Ef. 5:28, 29; 6:4.

18. Mu ndaga itshi Yone ashile mutshima?

¹⁸ Yone wajingile muavula, wakalegele nji ndaga jiavula jiabonga. Watagenele nu ndaga jiavula jia lamba jinyi jiakhalele naye gulebesa gutshigina guenji. Uvi, tangua diagasue wakhalele mutshita yagasue ha gutumagela mikhuala ya Yesu, gifua mukhuala watadila guzumba aphangi etu. Idi yadiago egi, Yone washile mutshima egi Yehowa nu Yesu akhalele gumuzumba nu amuhanele ngolo jia gukolesela mu malamba enji. (Yone 14:15-17; 15:10; 1 Yone 4:16) Gushigo nga gima gimoshi Satana nu mavu enji akalegele giakangele Yone njila ya gumonesa guzumba.

19. Itshi 1 Yone 4:7 idi gututuma ha gutshita nu mukundaga natshi?

¹⁹ Gifua Yone, esue nji tudi mujinga ha mavu awa ashigo nu guzumba, handaga adi mutuamezewa gudi Satana. (1 Yone 3:1, 10) Satana wana tshigina egi tubembe guzumba aphangi etu, uvi mbagashigo mubinga nga hazonda gula tuamuhanelego njila ya guyikalagala. Tulandulenu gumonesela aphangi etu guzumba mu mbimbi nu mu makalegelo etu. Ngenyi mbatukhala nu gusuanguluga ha gukhala mukatshi dia fami ya Yehowa, mbatukhala nji nu gusuanguluga mu monyo wetu.—Tanga 1 Yone 4:7.