1. Luholo lutshi diskur dimoshi dia kalegewe gu asamble a givo 1935 dia kuatesele muvuala mumoshi wa yala?

MUVUALA mumoshi wa yala wabatijiwe mu givo 1926, mu tangua diene wakhalele nu ivo 18. Mvuaji jienji jiakhalele Alongogi a Biblia, gifua luholo akhalele mutamega Matemue a Yehowa mu tangua diene. Mu fami yawo akhalele nu ana mala thathu, ana a akhetu mbadi. Mvuaji jiawo jiaalongesele ha gukombelela Nzambi nu gulandula makalegelo a Yesu Klisto. Gifua luholo Alongogi a Biblia agasue akhalele mukalagala, givo nu givo muvuala yowu wa yala wabatijiwe nu ivo 18 wakhalele mudia dipha nu gunua vinyo mu lusugu lua Gudia gua Fumu gua mu Ngueze. Uvi, felela dienji mukunda nu masugu adi muza dia sombegesele tangua avile diskur dimoshi dia ndando diakhalele nu muto walumene egi: “Thundu Yakoma ya Athu.” Diskur diene diakalegewe mu givo 1935 gudi phangi Rutherford gu asamble akalegewe gu Washington gu États-Unis. Ndaga itshi ya ndando alongugile gu asamble ene?

2. Giamatshidia gitshi gia ndando Phangi Rutherford amonesele mu diskur dienji?

² Mu diskur dienji, Phangi Rutherford wahanele ukoteleshi wa “thundu yakoma ya athu” yana zuelewa mu Yatuwuwe 7:9. Mu tangua diene Alongogi a Biblia akhalele mutangiza egi thundu yakoma ya athu idi athu mbaaya mu dilu anyi akhalele nu gutshingina guazonda. Phangi Rutherford wakalegele Biblia ha gumonesa egi thundu yakoma ya athu yatombewego haguya  mujinga mu dilu. Uvi idi imeme iko ya Klisto * mbayihuluishiwa “mu lamba diakola” nu mbaajinga mayilago ha mavu. (Yat. 7:14) Yesu walayele gamba: ‘Ngudi nu imeme iko idi ishigo ya mu dinda edi. Ngudi naye guyinginyisa nji mu dinda, yene mbayivua dijui diami, ngenyi mbayibua thundu imoshi, nu mubambi mumoshi.’ (Yone 10:16) Imeme eyi iko idi Matemue a Yehowa a gujinginyina anyi adi nu felela dia gujinga mayilego ha mavu mu phaladiso. (Mat. 25:31-33, 46) Tutalenu luholo ukoteleshi owu uhe-uhe wakuatesele akombeledi avula a Yehowa ha gusombegesa matangi awo, gifua muvuala yonu wa yala wakhalele nu ivo 18.—Ngi. 97:11; Ish. 4:18.

3-4. Gu asamble akalegewe mu givo 1935, itshi athu avula akotelesele mukunda nu felela diawo nu mukunda natshi?

³ Yakhalele diago ndaga yawaha tangua muzuedi ahudile athu akhalele gu asamble ene egi: “Athu agasue adi nu felela dia gujinga mayilago ha mavu muajiya guzuga mu molu ba?” Ha gutadila ukoteleshi uhe-uhe wahanewe, athu avula mukatshi dia athu 20 000 akhalele gu asamble azugile mu molu. Phangi Rutherford wazuelele egi: “Talenu, thundu yakoma ya athu!” Gungima, athu agasue akhalele gu asamble asuangulugile muavula diago. Athu azugile mu molu akotelesele egi atombewego ha guya mujinga mu dilu. Ajiyile egi ashigo mukatshi dia athu anyi atombewe mu njila ya nyuma ya Nzambi. Mu lusugu lua landuile lua asamble, athu 840 abatijiwe, athu ene akhalele mukatshi dia imeme iko.

⁴ Gungima dia diskur diene, muvuala wa yala tuazuelela guthunda nu athu ako avula abembele gudia dipha nu gunua vinyo mu Gudia gua Fumu gua mu Ngueze. Athu avula adivuile gifua luholo phangi yowu wagudibulumuisa wazuelele egi: “Ngabembele gudia dipha nu gunua vinyo mu givo 1935. Ngakotelesele egi ishigo nyuma ya Yehowa yanguhanele felela dia guya mujinga mu dilu. Uvi ngakhalele nu felela dia gujinga ha mavu nu gukuatesa ha gubuisa mavu ene phaladiso.” (Lomo 8:16, 17; 2 Kol. 1:21, 22) Sendese mu tangua diene, thundu yakoma ya athu yana gudivudisa muavula diago nu ana kalagala mudimo hamoshi nu Aklisto ambiwe maji mu nyuma adi luko ha mavu.

5. Luholo lutshi Yehowa wana tadila athu abembele gale gudia dipha nu gunua vinyo mu Guwunguluga Gufua gua Yesu?

⁵ Luholo lutshi Yehowa atadile athu abembele gudia dipha nu gunua vinyo mu Guwunguluga (guyabuluga) Gufua gua Yesu gungima dia givo 1935? Itshi tuajiya guzuela gila Temue mumoshi wa Yehowa wana dia dipha nu gunua vinyo mu Gudia gua Fumu gua mu Ngueze, uvi gungima wakotelesa egi gashigo mukatshi dia athu atombewe? (1 Kol. 11:28) Athu ako akhalele mudia dipha nu gunua vinyo handaga akhalelego mukotelesa muabonga felela diawo. Uvi gila gungima akotelesa muabonga ndaga yene, abemba gudia dipha nu gunua vinyo nu alandula gukalegela Yehowa nu gujinginyina guagasue, idi yadiago egi mbaatangewa mukatshi dia imeme iko. Ikhale anago gudia luko dipha nu gunua vinyo, ana landula guya mu gudibungisa gua Guwunguluga Gufua gua Yesu handaga ana tshigina guhana mersi gudi Yehowa nu Yesu mukunda nu ndaga jiagasue a akalegele.

6. Ndaga itshi Yesu awambelele anjelo ha gukalagala?

⁶ Luholo lamba diakola didi gutunengenena gutuama, idi nu ndando ha gutadila luko ndaga  Yatuwuwe mukhapho 7 wana zuela mukunda nu Aklisto ambiwe maji mu nyuma nu thundu yakoma ya athu. Yesu waawambelele anjelo ha gulandula gukuata funji nguana jiana bolesa. Ashigo naye gubemba funji jiene ha mavu uu nu tangua Aklisto agasue ambiwe maji mu nyuma mbaambiwa njimbu, yakotelesa tangua mbaatshiginyiwa diago gudi Yehowa. (Yat. 7:1-4) Mukunda nu gutshigina guawo, Aklisto ambiwe maji mu nyuma mbaakhala mafumu nu nganga-nzambi mu dilu hamoshi nu Yesu. (Yat. 20:6) Yehowa, Yesu nu anjelo mbaakhala nu gusuanguluga guavula tangua Aklisto 144 000 ambiwe maji mu nyuma mbaaheta gishimbigo giawo gia guya mu dilu.

7. Luholo Yatuwuwe 7:9, 10 idi guyimonesa, akhuatshi Yone amonele mu vizio nu itshi athu ene adi mukalagala? (Tala gifuanesa holu dia gizula.)

⁷ Gungima dia guzuelela mafumu nu nganga-nzambi 144 000, Yone wamonele ndaga imoshi ya gushimana, “thundu yakoma ya athu” mbaahuluishiwa mu Armaguédon. Ha gudisha nu mutango wa Aklisto ambiwe maji mu nyuma, mutango wa thundu yakoma ya athu udi wavula lume, muthu gajiyilego guwutanga. (Tanga Yatuwuwe 7:9, 10.) Adi yagusudiga ‘milele ilaphe,’ idi mumonesa egi atshitshile yagasue ha “gudikatula” mu ndaga jia ha mavu awa a Satana nu asalele ya gujinginyina gudi Nzambi nu Klisto. (Yak. 1:27) Adi muzuela mu dijui diakola egi ahuluishiwa mukunda nu ndaga Yehowa nu Yesu, Mon’a Gimeme gia Nzambi, akalegele. Luko, adi nu mandalala ha mango, idi mumonesa egi adi nu gusuanguluga ha gutshigina Yesu yago Yehowa atombele ha gukhala Fumu.—Fuanesa nu Yone 12:12, 13.

8. Itshi Yatuwuwe 7:11, 12 idi muzuela mukunda nu fami ya Yehowa ya mu dilu?

⁸ Tanga Yatuwuwe 7:11, 12. Ndaga itshi yakalegewe mu dilu? Yone wamonele egi anjelo agasue akhalele nu gusuanguluga guavula nu atumbuishile Nzambi tangua amonele thundu yakoma ya athu. Fami ya Yehowa ya mu dilu mbayikhala nu gusuanguluga guavula ha gumona gutagenesewa gua vizio eyi tangua thundu yakoma ya athu mbayihuluishiwa mu lamba diakola.

9. Ha gutadila Yatuwuwe 7:13-15, itshi thundu yakoma ya athu idi mukalagala mangino?

⁹ Tanga Yatuwuwe 7:13-15. Yone wasonegele egi thundu yakoma ya athu ‘yawevele milele yawo nu ayiphelegetesele mu mahatshi a Mon’a Gimeme.’ Idi mukotelesa egi adi nu mutshima wa phelegeta nu adi atagana ha gumagana gutuama dia Yehowa. (Yesh. 1:18) Adi Aklisto adihanele, abatijiwe gale nu ana sha gutshigina guakola gu mulambu wa Yesu. Ana khala nji nu ufuta wakola nu Yehowa. (Yone 3:36; 1 Phet. 3:21) Hene, adi atagana ha gumagana gutuama dia nguasa ya ufumu ya Nzambi ha ‘gumukalegela mudimo wa gijila phipha nu muanya’ ha mavu. Mangino, adi mukalagala mudimo wa gulongesa nu wagubuisa athu alandudi nu gikhesa giagasue. Ana sha nji gutshingina gu Ufumu wa Nzambi ha fundo dia thomo mu monyo wawo.—Mat. 6:33; 24:14; 28:19, 20.

10. Mu ndaga tshi thundu yakoma ya athu yana sha mutshima nu felela ditshi adi munengenena?

¹⁰ Thundu yakoma ya athu anyi mbaahuluishiwa mu lamba diakola, adi nu gutshigina egi Nzambi mbawulandula guakuatesa handaga ‘muthu udi waguditumbiga ha nguasa ya ufumu mbawusununa tenta yenji holu diawo.’ Felela edi diana nengenena imeme iko mbaditagenesewa: ‘[Nzambi] mbawukungula masoji agasue gu meso awo, gufua mbagukhadigo luko. Madilo mbaakhadigo luko nga mitataganyi nga gubala, ndaga jikulu jiatota.’—Yat. 21:3, 4.

11-12. (a) Luholo Yatuwuwe 7:16, 17 idi guyimonesa, ishimbigo itshi thundu yakoma ya athu mbaaheta? (b) Itshi imeme iko yajiya gutshita mu Guwunguluga Gufua gua Yesu nu mukunda natshi?

¹¹ Tanga Yatuwuwe 7:16, 17. Mangino, akombeledi  ako a Yehowa adi mutagana nu malamba, gifua nzala handaga ashigo nu falanga jia gusumba ima ya gudia nga mukunda nu ita. Ako adi mumbiwa mu mabologo mukunda nu gutshigina guawo. Uvi, athu adi mukatshi dia thundu yakoma ya athu adi nu gusuanguluga hagujiya egi mbaahuluishiwa tangua mavu awa a Satana mbashiyiwa. Ngenyi mbaakhala nu ima yavula ya gudia nu malongo ana katuga gudi Yehowa. Tangua mavu awa a Satana mbaashiyiwa, Yehowa mbawutshita yagasue ha gubamba thundu yakoma ya athu gu khabu jienji jidi gifua ‘tshuiya tuakola.’ Gugisugishilo gia lamba diakola, Yesu mbawutuameza athu mbaahuluishiwa ha mavu gu ‘meya a [monyo] wa ivo nu ivo.’ Tangiza felela thundu yakoma ya athu adi nadio. Athu avula anyi ajingile ha mavu, mbaafuigo luko nga hazonda!—Yone 11:26.

¹² Imeme iko idi nu felela diawaha, hene ana hana Yehowa nu Yesu mersi avula! Atombewego ha guya mujinga mu dilu, uvi adi nu ndando yavula gumeso a Yehowa. Aklisto ambiwe maji mu nyuma nu imeme iko ajiya gutumbuisa Nzambi nu Klisto. Luholo lumoshi lua guyikalagala idi guya mu gudibungisa gua Gudia gua Fumu gua mu Ngueze.

13-14. Mukunda natshi athu agasue anaya mu gudibungisa gua Guwunguluga Gufua gua Yesu?

¹³ Mu ivo eyi, yajiya gukhala egi mukatshi dia athu 1 000 anaya mu gudibungisa gua Guwunguluga Gufua gua Yesu phamba muthu mumoshi wana dia dipha nu gunua vinyo. Mu mahungu avula guana khalago nga muthu wana dia dipha nga gunua vinyo. Athu avula anaya mu Guwunguluga Gufua gua Yesu ana khala nu felela dia gujinga ha mavu. Na mukunda natshi anaya mu gudibungisa guene? Anaya ha gutagenesa felela dia luholo lumoshi nu athu anaya gu wano wa ulo wa futa diawo. Mafuta awo anaya gu wano ha gumonesa guzumba guawo nu gukuatesa yala nu mukhetu adi gudizula mu ulo. Luholo lumoshi nji, imeme iko yanaya mu gudibungisa gua Guwunguluga Gufua gua Yesu handaga ana tshigina gumonesa guzumba nu gukuatesa Klisto nu Aklisto ambiwe maji mu nyuma. Anaya nji ha gumonesa egi adi muhana mersi mukunda nu mulambu wa Yesu, waahanele felela dia gujinga mayilago ha mavu.

¹⁴ Ndaga iko ya ndando idi egi; Imeme iko yanaya mu gudibungisa gua Guwunguluga  Gufua gua Yesu ha gutumagela mukhuala wenji. Tangua Yesu akalegele Gudia gua Fumu gua mu Ngueze nu apostolo enji a gujinginyina, waawambelele egi: ‘Landulenu gukalagala ngenyi ha gunguwunguluga ame.’ (1 Kol. 11:23-26) Gishina giene, imeme iko yana landula gukalagala Gudia gua Fumu gua mu Ngueze hamoshi nu Aklisto ambiwe maji mu nyuma anyi adi luko ha mavu. Ana tamega nji athu ako haguza Muwunguluga Gufua gua Yesu, hamoshi nawo.

15. Luholo lutshi tuajiya gutumbuisa Nzambi nu Klisto mu gudibungisa gua Guwunguluga Gufua gua Yesu?

¹⁵ Mu gudibungisa gua Guwunguluga Gufua gua Yesu, tuana khala nu luendu lua gutumbuisa Nzambi nu Klisto tangua tuana yimba nu tuana kombelele hamoshi. Diskur dia givo egi didi nu muto walume egi “Hana Mersi Gudi Nzambi nu Klisto Mukunda nu Ndaga Agukalegele!” Mbayitutuma ha guhana Yehowa nu Klisto mersi avula. Tangua mbakhala mubalegesa dipha nu vinyo, mbatuwunguluga ndaga yana monesa, yakotelesa muila nu mahatshi a Yesu. Mbatumona nji egi Yehowa wahanele Mun’enji ha gufua mukunda nu esue, hagula tuajiya guheta monyo. (Mat. 20:28) Athu agasue ana zumba Sh’etu wa mu dilu nu Mun’enji mbaakhala hehi ha guya mu gudibungisa gua Guwunguluga Gufua gua Yesu.

16. Mukunda natshi tuajiya guzuela egi Aklisto ambiwe maji mu nyuma nu imeme iko ashigo a gudisha?

¹⁶ Nzambi wana zumba Aklisto ambiwe maji mu nyuma nu imeme iko luholo lumoshi. Mukut’awo agasue ana khala nu ndando gumeso enji. Tudi muzuela ngenyi, handaga Yehowa wasumbile Aklisto ambiwe maji mu nyuma nu imeme iko mu ndando ya luholo lumoshi, yakotelesa monyo wa Mun’enji. Gudisha gudi mukatshi dia Aklisto ambiwe maji mu nyuma nu imeme iko gudi egi ashigo nu felela dia luholo lumoshi. Uvi, mukut’awo agasue adi naye gulandula gusala ya gujinginyina gudi Nzambi nu Klisto. (Ngi. 31:23) Jiya egi nyuma ya Nzambi yana kuatesa muthu wagasue ha gutadila ndaga adi naye funu, ikhale Aklisto ambiwe maji mu nyuma nga imeme iko.

17. Itshi Aklisto ambiwe maji mu nyuma adi luko ha mavu ana nengenena nu nzala yagasue?

¹⁷ Aklisto ambiwe maji mu nyuma avualewego nu felela dia guya mujinga mu dilu. Nzambi waahanele felela diene. Ana tangiza felela diawo, ana kombelela nji mukunda nu felela diene nu ana nengenena guheta gishimbigo giawo gia guya mu dilu. Anago gujiya luholo muila wawo mbawukhala tangua mbaaya mu dilu. (Fili. 3:20, 21; 1 Yone 3:2) Ikhale ngenyi, ana nengenena nu nzala yagasue haguya mukhala nu Yehowa, Yesu, anjelo nu Aklisto ako ambiwe maji mu  nyuma nu gukalagala nawo hamoshi mu Ufumu wa mu dilu.

18. Itshi imeme iko ana nengenena nu nzala yagasue?

¹⁸ Imeme iko yana nengenena nu nzala yagasue ha gujinga ha mavu ivo nu ivo. Athu agasue ana vualewa nu nzala yene. (Mulo. 3:11) Ana nengenena nu nzala yagasue lusugu mbaakuatesa ha gubuisa mavu agasue phaladiso. Luko, ana nengenena lusugu mbaatunga jinzo jiawo, mbaakuna ima yawo ya gudia, mvuaji mbaasansa anawo mu luholo lua tagana. (Yesh. 65:21-23) Adi nji mu nengenena ha guya nu guwenda mu mafundo avula a ha mavu, guya nu gutala milundu, ishitu, mita nu ha gujiya ima yavula ya fugile Yehowa. Uvi, ana khala nji nu gusuanguluga ha gujiya egi ufuta wawo nu Yehowa mbawukhala wakola lume.

19. (a) Luendu lutshi gudibungisa gua Guwunguluga Gufua gua Yesu guana gutuhana? (b) Mu givo egi mbagukalegewa mu lusugu lutshi?

¹⁹ Yehowa wahanele akombeledi enji agasue felela diawaha mukunda nu masugu adi muza. (Yel. 29:11) Mu lusugu lua Guwunguluga Gufua gua Yesu, mukut’etu agasue tuana khala nu luendu lua gutumbuisa Nzambi nu Klisto mukunda nu ndaga akalegele hagula tuajiya guheta monyo wa ivo nu ivo. Guwunguluga Gufua gua Yesu idi gudibungisa gumoshi gua ndando mukunda nu Aklisto a giamatshidia. Mbagukalegewa gungima dia gushiwuga gua kumbi mu lusugu lua Samano 27 Mars 2021. Mu givo egi athu avula anyi ana jinga mu mafundo anago gutunyishiwa mudimo wetu mbaakhala nu luendu lua guya mu gudibungisa guene gua ndando. Aphangi ako mbakalagala nji gudibungisa guene ngatshima adi mutagana nu usageshi. Ako mbakalagala gudibungisa guene mu bologo. Yehowa, Yesu, anjelo nu Aklisto ambiwe maji mu nyuma anyi afuzumugile gale, ana tala tangua ma hungu agasue, ba groupe, nga muthu udi ha khenji tangua ana kalagala Guwunguluga Gufua gua Yesu!