1-2. (a) Luholo lutshi tuana gudivua tangua tuana tangigiza gifezegeselo gia Yesu? (b) Itshi tuza mumona mu longo edi?

 WAFUISHILE gale muthu wakhalele muzumba muavula ba? Yajiya gukhala egi udi muvua uhote wa muthu muene muavula. Yajiya nji gukhala egi hafuile muthu muene, wavuile gikenene giavula tangua wakhalele mutangiza masugu muabalegesele n’enji gutuama egi afue. Gikenene giene giajiya gukhala giavula gila muthu muene wamonele lamba diavula gutuama dia gufua. Uvi gungima, yajiya gukhala egi wana suanguluga muavula tangua wana tangiza ndaga imoshi yagulongesele nga yakalegele muthu muene ha guguhana gikhesa nga ha gugulelesa.

² Luholo lumoshi nji, tangua tuana tanga mene jiana zuelela malamba amonele Yesu nu luholo luafuile muene, yana gutuhana gikenene. Tuana zula tangua dia gutangigiza ndando ya mulambu wahanele Yesu, tuana guyitshita muavula gubalega mu sungi ya Guwunguluga Gufua gua Yesu. (1 Kol. 11:24, 25) Uvi tuana suanguluga muavuala, tangua tuana tangigiza ndaga jiatshitshile Yesu nu jiazuelele muene ha mavu. Gutangigiza ndaga jiana gutukalegela muene mangino nu jinyi mbaatukalegela mu masugu adi muza, guana gutuhana gikhesa. Mu longo edi tuza mumona egi gula tudi muzula tangua dia gutangigiza ndaga eji jiagasue nu luholo Yesu wana gutuzumba, mbayitutuma ha gumuhana mersi mu maluholo avula.

3. Mukunda natshi tudi naye guhana Yehowa nu Yesu mersi mukunda nu gibawu?

³ Tuana suanguluga tangua tuana tangigiza gufua gua Yesu nu ndaga jiakalegele muene. Hakhalele Yesu ha mavu, walongesele  athu egi Ufumu wa Nzambi mbawubata gubonga guavula. Tuana suanguluga muavula nu ndaga jiana zuela Biblia mukunda nu Ufumu wene. Tuana hana Yehowa nu Yesu mersi yavula mukunda nu gibawu, handaga giana gutukuatesa ha gukhala nu ufuta wakola nawo. Luholo tuana sha gutshigina gudi Yesu, tudi nu felela dia guheta monyo wa ivo nu ivo nu dia gumona athu tuakhalele muzumba anyi afuile gale. (Yone 5:28, 29; Roma 6:23) Ndaga jiagasue jiatukalegele Yehowa nu Yesu, jidi luendu luakoma. Tushigo nji nga nu gima tuajiya guafuta mukunda nu ndaga jiene. (Roma 5:8, 20, 21) Uvi tuajiya gumonesa egi tuana suanguluga nu ndaga atukalegele. Luholo lutshi?

4. Luholo lutshi Madiya wa gu Magadala wamonesele egi wasuangulugile nu ndaga jiamukalegele Yesu? (Tala gifuanesa.)

⁴ Tuzuelelenu gifezegeselo gia mukhetu mumoshi wa muenya Yuda, jina dienji Madiya wa gu Magadala. Bademo sambadi akhalele gumusagesa, wamonele lamba diavula. Yajiya gukhala egi watangijile egi gushigo nu muthu wajiya gumukuatesa. Hene, wasuangulugile muavula tangua Yesu wamuzolele bademo ene! Ndaga yene yamutumine ha gubua mulandudi wa Yesu. Wakalegele tangua dienji nu ngolo jienji nu ima yenji ha gumukuatesa mu mudimo wa gulongesa. (Luka 8:1-3) Madiya wasuangulugile muavula nu ndaga yamukalegele Yesu, uvi gakhalelego mujiya egi mbawumutshitshila ndaga jiko jiabonga mu masugu adi muza. Yesu wakhalele naye guhana monyo wenji mukunda nu athu agasue, “hagula muthu wagasue washa gutshigina gudi muene,” gafuigo uvi ahete monyo wa ivo nu ivo. (Yone 3:16) Madiya gakoteleselego diago ndaga yene, uvi wasalele wagujingiyina gudi Yesu ha gumonesa egi wasuangulugile nu ndaga jiamukalegele muene. Hakhalele Yesu ha mutshi wa lamba, Madiya wakhalele hene. Wahanele Yesu nu athu ako gikhesa. (Yone 19:25) Hafuile Yesu, Madiya nu akhetu ako mbadi ayile gu malumba nu ima ya vumba diawaha ha gumba kimbi gia Yesu. (Mako 16:1, 2) Yehowa wasuanguluishile Madiya handaga wasalele wa gujinginyina gudi Yesu. Wamuhanele luendu lua  gumona Yesu gungima dia gufuzumuga guenji nu ha guta n’enji maga. Uvi alandudi ako ahetelego luendu luene.​—Yone 20:11-18.

5. Luholo lutshi tuajiya guhana Yehowa nu Yesu mersi mukunda nu ndaga jiagasue atukalegele?

⁵ Esue nji tudi naye guhana Yehowa nu Yesu mersi mukunda nu ndaga jiagasue atukalegele. Tuajiya gukalegela tangua dietu, ngolo jietu nu ima yetu ha gukuatesa midimo ya Ufumu. Ha gufezegesa, tuajiya gudihana mu midimo ya gutunga nu gulondega Jinzo jia Ufumu.

6. Mukunda natshi tuajiya guzuela egi gibawu gidi kado gahanele Yehowa gudi muthu wagasue mukatshi dietu?

⁶ Tangua tuana tangigiza luholo Yehowa nu Yesu ana gutuzumba, yana gututuma nji ha guazumba. (1 Yone 4:10, 19) Gujiya egi Yesu wafuile mukunda nu muthu wagasue mukatshi dietu, guana gututuma ha guazumba muavula gubalega. Mupostolo Phaula wakotelesele muabonga ndaga yene. Wamonesele egi wakhalele musuanguluga nu ndaga yene hasonegele muene Aklisto a gu Galatiya egi: “Mun’a Nzambi . . . wanguzumbile nu wadihanele mukunda nu ame.” (Gal. 2:20) Yehowa wagunanele gudi muene mu njila ya gibawu, ndaga yene yagukuatesele ha gubua futa dienji. (Yone 6:44) Idi yadiago egi wana suanguluga muavula luholo wana jiya egi Yehowa wamonele ndaga imoshi yabonga gudi aye, hene wahanele mun’enji hagula ubue futa dienji. Ndaga yene yana gugutuma nji ha guzumba Yehowa nu Yesu muavula. Henyaha muhu wajiya gudihula wene owu: ‘Guzumba guene guana gungutuma ha gutshita itshi?’

7. Gifua luholo gifuanesa gidi guyimonesa, lutshi mukut’etu agasue tuajiya gumonesa egi tuana zumba Yehowa nu Yesu? (2 Kolinto 5:14, 15; 6:1, 2)

⁷ Guzumba guetu mukunda nu Yehowa nu Yesu guana gututuma ha guzumba athu ako. (Tanga 2 Kolinto 5:14, 15; 6:1, 2.) Tuana monesa guzumba guene, tangua tuana gudihana muavula mu mudimo wa gulongesa. Tuana longesa  athu agasue tuana tagana nawo, ikhale anginyile makhalasa akoma nga ndo, adi enya umonyi nga phutu. Ikhale athu a ilema ya muila ya gudisha, nga ndo ashigo giphuta gimoshi nga zuelelo dimoshi nu esue. Ngenyi tuana tagenesa felela dia Yehowa, handaga “udi mutshigina egi athu a maluholo agasue ahuluge nu ahete ujiyi wa diago wa giamatshidia.”​—1 Tim. 2:4.

8. Luholo lutshi tuajiya gumonesa egi tuana zumba aphangi’etu a Aklisto?

⁸ Tuana monesa nji egi tuana zumba Yehowa nu Yesu, tangua tuana zumba aphangi’etu a Aklisto. (1 Yone 4:21) Tuana gudisagesa muavula mukunda nu ene; tuana guakuatesa nji tangua ana tagana nu malamba. Tuana guahana gikhesa gula afuisa, tuanaya guatala gula adi mukata, tuana tshita yagasue ha guahana gikhesa gula aleba muila. (2 Kol. 1:3-7; 1 Tes. 5:11, 14) Tuana kombelela nji mukunda nu ene, handaga tudi mujiya egi “gisambu gia muthu wabonga giana khala nu ngolo jiavula.”​—Yak. 5:16.

9. Ndaga itshi iko tuajiya gutshita ha gumonesa egi tuana zumba aphangi’etu?

⁹ Tuana monesa nji egi tuana zumba aphangi’etu a Aklisto, tangua tuana tshita yagasue ha gukhala nawo mu guhuima. Tuana kalagala nji yagasue ha gulandula gifezegeselo gia Yehowa, tangua tuana guatotesela. Yehowa wahanele mun’enji ha gututotesela gubola, esue nji tudi naye gutotesela aphangi’etu gula atukalegela gubola. Tuana tshigina ndo gukhala gifua muenya mudimo wa mutshima wabola wa mu gifezegeselo gia Yesu. Wakhalele nu mukudi wakoma wa fumi’enji, uvi fumi’enji wamutotesele mukudi wenji wagasue. Uvi muene watunyile gutotesela muenya mudimo n’a muko wakhalele nu mukudi wenji wazonda. (Mat. 18:23-35) Gula udi nu mulonga nu phangi mumoshi wa mu hungu, wajiya gutshita yagasue ha gulondega mulonga wene gutuama dia Guwunguluga Gufua gua Yesu. (Mat. 5:23, 24) Gula wakalagala ngenyi, mbawumonesa egi wana zumba Yehowa nu Yesu muavula.

10-11. Luholo lutshi akulu ajiya gumonesa egi ana zumba Yehowa nu Yesu? (1 Phetelo 5:1, 2)

¹⁰ Luholo lutshi akulu ajiya gumonesa egi ana zumba Yehowa nu Yesu? Akulu ana monesa guzumba guene tangua ana tagenesa muabonga ginemo giawo gia gubamba imeme ya Fumu Yesu. (Tanga 1 Phetelo 5:1, 2.) Yesu wakotelesele mupostolo Phetelo ndaga yene muabonga. Gungima dia gutuna Fumi’enji mbala thathu, Phetelo wakambele nu mutshima wagasue okazio ha gumonesa Yesu egi wana gumuzumba. Hafuzumugile Yesu, wamuhudile egi: “Simona mun’a Yone, wana gunguzumba ba?” Tudi mujiya egi Phetelo wakhalele hehi ha gutshita yagasue ha gumonesa Fumi’enji egi wana gumuzamba. Hene Yesu wamuwambelele egi: “Bamba imeme yami yazonda.” (Yone 21:15-17) Phetelo wabambele muabonga imeme ya fumu Yesu uu nu gu gufua guenji. Ngenyi wamonesele egi wakhalele diago gumuzumba.

¹¹ Akulu, mu sungi ya Guwunguluga Gufua gua Yesu, luholo lutshi muajiya gumonesa egi muana kotelesa muabonga mbimbi Yesu wawambelele Phetelo? Muajiya gumonesa egi muana zumba Yehowa nu Yesu, gula mudi muzula tangua dia guya mutala imeme ya Fumu nu mudi mutshita ngolo ha gukuatesa aphangi anyi alebele gale mu nyuma ha guvutuga gudi Yehowa. (Ezek. 34:11, 12) Muajiya nji guhana gikhesa gudi athu ana longuga Biblia nu anyi anaza mu gudibungisa gua Guwunguluga Gufua gua Yesu. Tshitenu yagasue ha guamonesela gisemo handaga ene enji ajiya gubua alandudi a Yesu.

12. Mukunda natshi gutangigiza ndaga Yesu wawambelele alandudi enji guana gutuhana gikhesa? (Yone 16:32, 33)

¹² Mu phipha ya gisugishilo gutuama egi Yesu afue, wawambelele alandudi enji egi: “Ha mavu mbamutagana nu malamba, uvi khalenu  nu ngolo! Ame ngabinga mavu.” (Tanga Yone 16:32, 33.) Itshi yakuatesele Yesu ha gukolesela mu malamba nu ha gusala yagujinginyina gudi Yehowa uu nu gu gufua guenji? Wakhalele musha mutshima gudi Yehowa. Watogele Sh’enji ha gubamba alandudi enji handaga wakhalele mujiya egi ene nji mbaatagana nu malamba. (Yone 17:11) Mukunda natshi ndaga yene yana gutuhana gikhesa? Handaga Yehowa udi nu ngolo jiavula gubalega mbalagaji jietu jiagasue. (1 Yone 4:4) Wana mona ndaga jiagasue. Tudi mujiya egi gula tuashila Yehowa mutshima, muene mbawutukuatesa ha gukhala nu gikhesa nu ha gutuna guvua woma.

13. Luholo lutshi Yozefe wa gu Alimataya wamonesele gikhesa?

¹³ Tutadilenu gifezegeselo gia Yozefe wa gu Alimataya. Enya Yuda akhalele gumunemesa muavula. Wakhalele muenya Sanedrene, tribinale yakoma ya enya Yuda. Uvi hakhalele Yesu ha mavu, gakhalelego nu gikhesa ha gumonesa egi udi mulandudi wa Yesu. Mupostolo Yone udi muzuela egi Yozefe muene, “wakhalele mulandudi wa Yesu mu gisuegi handaga wakhalele muvua woma wa enya Yuda.” (Yone 19:38) Wakhalele genji musuanguluga nu lukuma luabonga lua Ufumu, wakhalele nji musha gutshigina gudi Yesu, uvi gakhalelego guyimonesa gudi athu ako. Yajiya gukhala egi wakhalele muvua woma egi enya Yuda mbaashigo gumunemesa luko gula ajiya egi udi mulandudi wa Yesu. Uvi Biblia idi mumonesa egi, hafuile Yesu, Yozefe “wayile mumona Philato nu gikhesa giagasue ha gumutoga kimbi gia Yesu.” (Mako 15:42, 43) Ngenyi wamonesele diago haphelo egi wakhalele musha gutshigina gudi Yesu.

14. Itshi wajiya gutshita gula udi muvuila athu ako woma?

¹⁴ Aye nji wana vuila athu ako woma gifua Yozefe ba? Wana vua musonyi ha guwambela athu ako egi udi Temue wa Yehowa mu khalasa nga gu mudimo? Wana guvua woma wa gubua mulongeshi udi khenji abatijiwa galego nga ha gubatijiwa mukunda nu ndaga athu mbaatangiza ba? Ubembigo egi matangi a luholo elu agukange njila ha gutshita ndaga jiabonga. Khala mukombelela Yehowa muavula. Khala nji gumutoga gikhesa ha gukalagala gutshigina guenji. Tangua mbawumona egi Yehowa udi muhana mvutu gu isambu yaye, mbawuheta gikhesa giavula.​—Yesh. 41:10, 13.

15. Luholo lutshi alandudi a Yesu asuangulugile hafuzumugile muene? Gusuanguluga guene guaatumine ha gutshita itshi? (Luka 24:52, 53)

¹⁵ Tangiza gale luholo alandudi a Yesu avuile hafuile Yesu. Avuile gikenene giavula handaga afuishile muthu akhalele muzumba muavula,  akhalele nji mutangiza egi ashigo luko nu felela. (Luka 24:17-21) Uvi hafuzumugile Yesu, wamonegele gudi alandudi enji. Wazudile nji tangua dia guakotelesela luholo lua tagenesele muene profesi jia Biblia. Waahanele nji mudimo wa ndando yavula. (Luka 24:26, 27, 45-48) Gungima dia masugu 40, Yesu wayile mu dilu. Alandudi enji akhalelego luko nu gikenene, uvi akhalele nu gusuanguluga guavula handaga akhalele mujiya egi fumi’awo udi nu monyo nu mbawakuatesa ha gutagenesa muabonga mudimo wawo. Gusuaguluga guene guaatumile ha gulandula gutumbuisa Yehowa.​—Tanga Luka 24:52, 53; Makal. 5:42.

16. Luholo lutshi tuajiya gulandula gifezefeselo gia alandudi a Yesu?

¹⁶ Luholo lutshi tuajiya gulandula gifezefeselo gia alandudi a Yesu? Tushigo naye gunengena ha gukombelela Yehowa nu gusuanguluga guagasue phamba mu sungi ya Guwunguluga Gufua gua Yesu, uvi tudi naye guyitshita masugu agasue. Gishina giene, tudi naye guhaga Ufumu wa Nzambi ha fundo dia thomo. Ha gufezegesa, aphangi avula asombegesele gale programe yawo ya mudimo ha guheta tangua dia guya mu mudimo wa gulongesa, guya mu gudibungisa gua mu hungu nu gukalagala gukombelela gua mu fami phoso nu phoso. Ako nji azudile gale desizio dia gutuna gukamba ima inyi athu ako ana mona egi idi nu ndando yavula, ha gudihana muavula mu midimo ya mu hungu nga ha guya muhana mago ha fundo didi nu funu ya alongeshi a Ufumu. Idi yadiago egi tudi nu funu ya gikhesa ha gulandula gukombelela Yehowa; uvi muene udi gutulaya egi mbagashigo gutubemba gula tudi muhaga Ufumu wenji ha fundo dia thomo.​—Ish. 10:22; Mat. 6:32, 33.

17. Ndaga jitshi wajiya gutshita mu sungi ya Guwunguluga Gufua gua Yesu? (Tala gifuanesa.)

¹⁷ Tudi munengena nu gusuanguluga guagasue ha gukalagala Guwunguluga Gufua gua Yesu, mbagukalegewa mu lusugu lua mbadi 4 Avril. Ushigo naye gunengena lusugu luene ha guzula tangua dia gutangigiza gufua gua Yesu, ndaga jiakalegele muene nu luholo muene nu Yehowa atuzumbile. Uvi khala mukalegela ba okazio agasue ha gutangigiza ndaga jiene ikhale gutuama nga gungima dia Guwunguluga Gufua gua Yesu. Ha gufezegesa, zula tangua dia gulonguga muabonga ndaga jidi mu tablo “La dernière semaine de Jésus sur la terre” idi mu appendice B12 mu Traduction du monde nouveau. Tanga verse jidi mu tablo yene, zula nji tangua dia gutangigiza ndaga jiene. Tangua udi mutanga, tala muabonga verse jiajiya gugukuatesa ha gukudisa khadilo dia guhana mersi nu dia guzumba nu jinyi jiajiya guguhana gikhesa nu gusuanguluga guavula. Gungima kamba maluholo wajiya gumonesa khadilo dia guhana mersi. Ngenyi wajiya gusha mutshima egi Yesu mbawusuanguluga nu ndaga jiagasue mbawutshita ha gutangigiza gifezefeselo gienji mu sungi ya Guwunguluga Gufua gua Yesu.​—Gumo. 2:19.