1-2. Mukunda natshi tuana guya mu gudibungisa gua Guwunguluga Gufua gua Yesu givo nu givo?

 SENDESE Yesu wahanele monyo wenji mukunda nu esue hagula tuajiya guheta monyo wa ivo nu ivo, ivo hehi nu 2 000 yabalega gale. Mu phipha gutuama egi Yesu afue, wawambelele alandudi enji ha gukalagala wano phamba nu mapha nu vinyo ha guwunguluga gufua guenji.​—1 Kol. 11:23-26.

² Tuana tumagela mukhuala owu wa Klisto handaga tuana gumuzumba muavula diago. (Yone 14:15) Givo nu givo mu sungi ya Guwunguluga Gufua gua Yesu, tuana tangigiza, tuana hana nji Nzambi mersi mu gisambu mukunda nu mulambu wa mun’enji Yesu. Tuana khala nji nu gusuanguluga ha gudihana muavula mu mudimo wa gulongesa ha gutamega athu ha guza mu gudibungisa guene gua ndando. Tushigo naye gubemba nga hazonda egi, gima gimoshi gitukange njila ha gutshita Guwunguluga Gufua gua Yesu.

3. Itshi tuza mumona mu longo edi?

³ Mu longo edi, tuza mumona maluholo thathu akombeledi a Yehowa ana tshita ngolo ha Guwunguluga Gufua gua Yesu: (1) Tangua ana landula gifezegeselo gienji, (2) tangua ana tamega athu ako ha guza mu gudibungisa guene nu (3) tangua ana tshita ngolo ha gukalagala gudibungisa gua Guwunguluga Gufua gua Yesu ikhale adi mutagana nu malamba.

4. Ndaga tshi tuana longuga givo nu givo mu Guwunguluga Gufua gua Yesu? Mukunda natshi tudi naye guzula ndaga jiene nu ndando? (Luka 22:19, 20)

⁴ Givo nu givo tangua tuana guya mu gudibungisa ha Guwunguluga Gufua gua Yesu, tuana tegelela diskur diana hana mvutu  gu mihu yavula. Diskur diene diana gutukuatesa ha gujiya mukunda natshi athu agasue adi nu funu ya gibawu nu luholo gufua gua muthu mumoshi guajiya gukatula gubola gua athu avula. Diana gutukuatesa nji ha gujiya gula dipha nu vinyo idi mukotelesa itshi nu akhuatshi adi naye gudia dipha nu gunua vinyo. (Tanga Luka 22:19, 20.) Tuana tangiza gubonga athu adi nu felela dia gujinga mayilago ha mavu mbaaheta mu masugu adi muza. (Yesh. 35:5, 6; 65:17, 21-23) Gujiya giamatshidia giene, gudi diago nu ndando yavula. Athu avula anago gujiya ndaga eji tuazuelela. Ana kotelesa nji ndo luholo mulambu wa Yesu wajiya guabatela gubonga. Ana tshita ndo Guwunguluga Gufua gua Yesu gifua luholo Yesu wawambelele alandudi enji ha gutshita. Mukunda natshi?

5. Luholo lutshi athu asendesele Guwunguluga Gufua gua Yesu gungima dia gufua gua apostolo avula?

⁵ Gungima dia gufua gua apostolo avula, Aklisto a mambo anginyile mu hungu. (Mat. 13:24-27, 37-39) Azuelele ndaga jia mambo “ha guhuiga alandudi hagula a alandule.” (Makal. 20:29, 30) Akhalele mulongesa egi Yesu gahanelego monyo wenji “mbala imoshi gifua mulambu mukunda nu gukatula masumu a athu avula,” gifua luholo Biblia yana guyizuela. Uvi akhalele muzuela egi Yesu wakhalele naye guhana mulambu wenji mbala jiavula. (Heb. 9:27, 28) Mangino athu avula ana tshigina longo edi dia mambo. Ana guya muwunguluga gufua gua Yesu phoso nu phoso nga lusugu nu lusugu mu ikombelelo yawo. Enya Katolika ana tamega gudibungisa guene egi, “Misa.” b Ikombelelo iko yana tshita nji Guwunguluga Gufua gua Yesu, uvi anago guyitshita muavula. Enya ikombelelo yene anago gujiya gula gufua gua Yesu gudi mukotelesa itshi. Athu ako ajiya gudihula egi: ‘Gufua gua Yesu guajiya diago gutotesa gubola guami ba?’ Mukunda natshi ana gudihula muhu wene? Handaga a alongesele egi gufua gua Yesu guajiyilego gutotesa gubola guawo. Alandudi a giamatshidia a Yesu ana kuatesa athu ha gujiya gula gufua gua Yesu gudi mukotelesa itshi mukunda nu ene. Ana guakuatesa nji ha gujiya luholo luabonga lua guwunguluga gufua guenji.

6. Ndaga itshi alongugi a Biblia akotelesele mu 1872?

⁶ Mu 1870 alongugi a Biblia akhalele mutuamezewa gudi phangi Charles Taze Russell, asendesele gulonguga Biblia muavula. Akhalele mutshigina gujiya gula gufua gua Yesu gudi mukotelesa itshi mukunda nu ene nu luholo Guwunguluga Gufua gua Yesu gudi naye gukalegewa. Mu 1872, akotelesele egi Yesu wahanele gibawu mukunda nu athu a maluholo agasue. Uvi abambelego ndaga jiene mukunda nu ene hakhawo. Azolele mikanda nu zulunalu ha guwambela athu ako ndaga jiene. Gungima alanduile gifezegeselo gia Aklisto a mu siekle ya thomo. Asendesele gudibungisa ha Guwunguluga Gufua gua Yesu mbala imoshi mu givo.

7. Luholo lutshi tuana heta gubonga gua ndaga jia longugile alongugi a Biblia?

⁷ Mangino tuana heta gubonga gua ndaga jialongugile alongugi a Biblia ivo yavula yabalega gale. Luholo lutshi? Yehowa watukuatesele ha gujiya giamatshidia giatadila mulambu wa Yesu nu gubonga athu agasue mbaaheta mukunda nu mulambu wene. (1 Yone 2:1, 2) Tualongugile egi Biblia yana hana mafelela mbadi gudi athu ana suanguluisa Nzambi. Ako mbaaheta monyo wa mayilago mu dilu, uvi avula mbaaheta monyo wa ivo nu ivo ha mavu. Tangua tuana jiya egi Yehowa wana gutuzumba muavula nu tangua tuana jiya gubonga tuana heta mukunda nu mulambu wa Yesu yana gututuma ha gusuena n’enji hehi. (1 Phet. 3:18; 1 Yone 4:9) Esue nji tuana tshita gifua alongugi  a Biblia, tuana tamega athu ha guza gudibungisa nu esue ha Guwunguluga Gufua gua Yesu gifua luholo Yesu wawambelele alandudi enji ha guyitshita.

8. Itshi akombeledi a Yehowa akalegele ha gutamega athu ha guza mu Guwunguluga gua Gufua gua Yesu? (Tala gifuanesa.)

⁸ Sendese mualeha akombeledi a Yehowa ana tamega athu ha guza mu gudibungisa gua Guwunguluga Gufua gua Yesu. Mu 1881, aphangi a mala nu a akhetu a gu États-unis atamegewe ha gudibungisa mu inzo imoshi gu Allegheny, gu Pennsylvanie mukunda nu gudibungisa guene gua ndando. Gungima Guwunguluga Gufua gua Yesu guasendesele gukalegewa mu mahungu. Mu Mars 1940, awambelele alongeshi egi, gula enya mu terituare yawo atshigina ha guya muwunguluga gufua gua Yesu, ajiya guatamega. Mu 1960, Betele yatumidile mahungu ba emvitasio mu mbala ya thomo. Sendese mu tangua diene uu nu mangino tuakhaphele gale ba emvitasio avula a Guwunguluga Gufua gua Yesu. Mukunda natshi tuana tshita mudimo wakola ha gutamega athu?

9-10. Akhuatshi ana heta gubonga tangua tuana tamega athu ako ha guza mu gudibungisa gua Guwunguluga Gufua gua Yesu? (Yone 3:16)

⁹ Tuana tamega athu ha guza mu gudibungisa gua Guwunguluga Gufua gua Yesu, handaga tuana tshigina egi athu anyi adi muza mu mbala ya thomo, ajiye ndaga Yehowa nu Yesu akalegele mukunda nu athu agasue. (Tanga Yone 3:16.) Tuana sha mutshima egi ndaga ana mona nu anavua mu gudibungisa guene, mbajiatuma ha gulonguga ndaga jiavula nu ha gubua akombeledi a Yehowa. Uvi athu ako ana heta nji gubonga gua ndaga yene.

 ¹⁰ Tuana tamega nji athu anyi abembele gale gukombelela Yehowa sendese mualeha. Tuana guatamega ha guawunguluisa egi, Nzambi yowu genji wana guazumba. Avula ana tshigina emvitasio yetu. Tuana suanguluga muavula tangua tuana guamona mu gudibungisa guene. Guza mu gudibungisa gua Guwunguluga Gufua gua Yesu, guana guawunguluisa gusuanguluga akhalele nago, tangua akhalele thomo mukombelela Yehowa. Tuzuelelenu gifezegeselo gia phangi Monica. c Wasendesele luko gulongesa lukuma luabonga mu sungi ya misongo ya corona virus. Hayile muene mu Gudibungisa gua Guwunguluga Gufua gua Yesu mu 2021, wazuelele egi: “Gudibungisa guene guakhadi diago gua ndando mukunda nu ame. Ivo 20 yabalega gale, nganago gulongesa luko. Uvi henyaha ngasendesa gulongesa athu nu guatamega ha guza mu gudibungisa gua Guwunguluga Gufua gua Yesu. Ngatshitshi ngolo ha gutamega athu ako, handaga ngudi muhana Yehowa nu Yesu mersi mukunda nu ndaga akalegele mukunda nu ame.” (Ngi. 103:1-4) Ikhale athu atshigina emvitasio ya Guwunguluga Gufua gua Yesu nga ndo, tuana tshita yagasue ha guatamega handaga tuana jiya egi gutshita ngenyi guana suanguluisa Yehowa.

11. Luholo lutshi Yehowa wana gutukuatesa tangua tuana tamega athu ha guza muwunguluga gufua gua Yesu? (Hagai 2:7)

¹¹ Yehowa watukuatesele muavula tangua tuatshitshile ngolo ha gutamega athu ha guza mu gudibungisa gua Guwunguluga Gufua gua Yesu. Mu 2021, tuakhalelego mukalagala ndaga jiko mukunda nu misongo ya corona virus. Uvi athu 21 367 603 ajile mu gudibungisa gua Guwunguluga Gufua gua Yesu. Mutango wa Matemue a Yehowa a ha mavu a mudidi udi naye gungina mbala jiyadi nu ndambo mu mutango wene! Idi yadiago egi, ishigo guvula gua athu guana suanguluisa Yehowa, uvi wana suanguluga nu muthu wagasue wana guza mu gudibungisa guene. (Luka 15:7; 1 Tim. 2:3, 4) Tudi nu gutshigina egi, tangua tuana guya muhana athu emvitasio, Yehowa wana gutukuatesa ha guheta athu adi nu mitshima yabonga.​—Tanga Hagai 2:7.

12. Ndaga tshi jiajiya gutukanga njila ha gutshita Guwunguluga Gufua gua Yesu? (Tala gifuanesa.)

¹² Yesu wadiangele guzuela egi mu masugu a gisugishilo mbatutagana nu malamba a luholo nu luholo, gifua: Uluishi mu fami, usageshi, ita, misongo ya gisambugila nu malamba ako. (Mat. 10:36; Mako 13:9; Luka 21:10, 11) Matangua ako, yana khala lamba ha gutshita Guwunguluga Gufua gua Yesu gula tuatagana nu malamba a luholo elu. Ndaga tshi aphangi a mala nu a akhetu atshitshile ha gubinga malamba awa? Luholo lutshi Yehowa waakuatesele?

13. Luholo lutshi Yehowa wakuatesele phangi Artem hatshitshile muene ngolo ha Guwunguluga Gufua gua Yesu mu bologo?

¹³ Gumbiwa mu bologo. Aphangi a mala nu a akhetu adi mu mabologo mukunda nu gutshigina guawo, ana tshita yagasue ha gu gukalagala Guwunguluga Gufua gua Yesu. Tuzuelelenu gifezegeselo gia phangi Artem. Mu 2020, mu sungi ya Guwunguluga Gufua gua Yesu, amumbile mu bologo dimoshi diakama diago. Bologo diene diakhalele naye gungina athu phamba 5. Ikhale wambiwe mu bologo, uvi wakalegele ima akhalele nayo ha fundo dia mapha nu vinyo tuana kalegela ha Guwunguluga Gufua gua Yesu. Wadilondele nji ha gutshita diskur mukunda nu muene hakhenji. Uvi athu akhalele n’enji mu bologo akhalele munua makaya nu guta mikumbu. Itshi phangi Artem watshitshile? Waawambelele egi gula atshigina ajiya gale gubemba gunua makaya nu guta mikumbu mukunda nu tangua dimoshi.  Phangi Artem wadihudile luholo enya bologo abembele gunua makaya nu guta mikumbu hakhalele muene mutshita Guwunguluga Gufua gua Yesu. Udi muzuela egi: “Ngaalongesele ndaga jiatadila Guwuguluga Gufua gua Yesu.” Thomo, atunyile gawo gumutegelela. Uvi tangua avile nu amonele luholo phangi Artem wakhalele mukalagala Guwunguluga Gufua gua Yesu, amuhudile mihu yavula.

14. Luholo lutshi akombeledi a Yehowa atshitshile Guwunguluga Gufua gua Yesu mu sungi ya corona-virus?

¹⁴ Mu sungi ya corona-virus. Mu sungi ya misongo ya corona virus, akombeledi a Yehowa akhalelego nu luholo lua gudibungisa hamoshi ha Guwunguluga Gufua gua Yesu. Uvi misongo yene yaakangelego njila ha gutshita Guwunguluga Gufua gua Yesu. d Mahungu anyi akhalele nu luholo lua gungina mu Internet, akalegele gudibungisa guene mu Zoom. Uvi aphangi anyi akhalelego nu luholo lua gungina mu Internet akhalele mutshita gikhuatshi? Mu ifutshi iko, ba Betele alondele ndaga ha gula aphangi ajiya gulandula diskur mu televizio nga mu radio. Ba Betele atshitshile ba enregistrement a diskur dia  Guwunguluga Gufua gua Yesu mu mazuelelo gubalega 500, hagula aphangi anyi ana khala mu mafundo a gualeha ajiya gutshita Guwunguluga Gufua gua Yesu. Aphangi atshitshile nji yagasue hagula aphangi adi mu mafundo a gualeha ajiya guheta ba enregistrement ene.

15. Longo ditshi wazula mu gifezegeselo gia Sue?

¹⁵ Uluishi mu fami. Yana khala lamba gudi athu ako ha gutshita Guwunguluga Gufua gua Yesu mukunda nu uluishi mu fami. Tuzuelelenu gifezegeselo gia Sue wana longuga Biblia nu Matemue a Yehowa. Mu 2021, Sue wawambelele phangi wakhalele gumulongesa Biblia lusugu lumoshi gutuama dia gutshita Guwunguluga Gufua gua Yesu egi, mbagashigo muya mu gudibungisa guene handaga enya fami yenji adi gumusagesa. Phangi wakhalele mulonguga n’enji Biblia wamutangele mukanda wa Luka 22:44. Wamukotelesele egi, gula tuatagana nu malamba tudi naye gukombelela Yehowa nu gumushila mutshima gifua luholo Yesu watshitshile. Mu lusugu lualanduile, Sue walondele mapha nu vinyo, walanduile nji programe ya Gukombelela gua Gimenegena mu Lusugu lua Guwunguluga Gufua gua Yesu mu jw.org. Mu ngueze wanginyile gu sugu yenji, walanduile gudibungisa gua Guwunguluga Gufua gua Yesu mu telefone. Gungima Sue wasonegele phangi wakhalele gumulongesa Biblia egi: “Hamene wanguhanyi diago gikhesa giavula. Ngatshitshi ngolo ha Guwunguluga Gufua gua Yesu. Yehowa wangukuatesa diago. Ngudi diago nu gusuanguluga guavula, ngudi nji muhana Yehowa mersi avula!” Aye nji udi mutangiza egi Yehowa wajiya gugukuatesa gula watagana nu ndaga ya luholo elu?

16. Mukunda natshi tudi naye gusha mutshima egi Yehowa mbawutukuatesa gula tuatshita ngolo ha Guwunguluga Gufua gua Yesu? (Roma 8:31, 32)

¹⁶ Yehowa wana suanguluga diago luholo tuana tshita ngolo ha Guwunguluga Gufua gua Yesu. Tudi naye gusha mutshima egi, mbawutukuatesa gula tudi muhana mersi mu ndaga jiakalegele muene mukunda nu esue. (Tanga Roma 8:31, 32.) Mukut’etu agasue tutshitenu ngolo ha guya mu gudibungisa gua Guwunguluga Gufua gua Yesu gua givo egi nu gudihana muavula mu mudimo wa gulongesa mu sungi yene.