1-2. (a) Mukunda natshi tuajiyilego gudihula gula tudi mutagana nu malamba? (b) Itshi tuza mumona mu longo edi?

 ESUE akombeledi a Yehowa, tuana jiya egi mbatutagana nu malamba, handaga Biblia yana gutulongesa egi: “Ha gungina mu Ufumu wa Nzambi tudi naye gutagana nu malamba avula.” (Makal. 14:22) Tuana jiya nji egi malamba etu ako mbaahua phamba mu mavu ahe-ahe, handaga mu mavu ene “gufua mbagukhadigo luko, nga gudila nga gutataganya, lamba nji mbadikhadigo luko.”​—Gumo. 21:4.

² Yehowa ganago gukalagala egi malamba atubuilago. Uvi wana gutuhana ngolo jia gukolesela gula malamba atubuila. Mupostolo Phaula wasonegele Aklisto a gu Roma ndaga imoshi ya ndando. Thomo, watangele malamba avula akhalele mutagana nawo Aklisto a mu tangua diene; gungima waasonegele egi: “Tuana gubinga ndaga eji jiagasue, handaga muthu yonu watuzumbile wana gutukuatesa.” (Roma 8:35-37) Yakotelesa egi Yehowa wajiya gugukuatesa ha ‘gubinga’ malamba agasue udi mutagana nawo. Henyaha tutadilenu luholo Yehowa wakuatesele Yozefe, nu luholo wajiya gutukuatesa.

3. Malamba atshi ataganele nawo Yozefe?

³ Yakoba wakhalele mumonesa haphelo egi wakhalele muzumba mun’enji Yozefe muavula. (Gis. 37:3, 4) Ndaga yene yatumine aphangi’a Yozefe ako ha gumuvuila ginjiongo. Lusugu lumoshi adigile Yozefe gudi enya Madiana. Athu ene ayile n’enji gu Ejipitu. Ejipitu yakhalele gualeha diago nu dimbo dia Yozefe. Gungima amusumbishile gudi Potifale, fumu wa masuta akhalele mubamba Farao. Yakhalele lamba diago! Yakoba wakhalele muzumba Yozefe muavula, uvi gungima wabuile muhiga gu Ejipitu!​—Gis. 39:1.

4. Malamba atshi ajiya gutubuila?

 ⁴ Biblia yana zuela egi: ‘Athu agasue ana tagana nu malamba.’ (Mulo. 9:11) Tuajiya gutagana nu malamba anyi ana “gubuila nji athu agasue.” (1 Kol. 10:13) Tuajiya nji gutagana nu malamba handaga tudi alandudi a Yesu. Ha gufezegesa, athu ajiya gutulela, gututuna nga gutusagesa mukunda nu gutshigina guetu. (2 Tim. 3:12) Uvi Yehowa wajiya gutuhana ngolo ha gukolesela mu malamba ene agasue. Tutadilenu luholo Yehowa wakuatesele Yozefe.

5. Ndaga itshi Potifale wakotelesele mukunda nu Yozefe? (Gisendeselo 39:2-6)

⁵ Tanga Gisendeselo 39:2-6. Yozefe gakhalelego gimonya, wakhalele nji watema. Potifale wakotelesele nji ndaga yene; wajiyile nji gishina Yozefe wakhalele nu ngolo nu gutema guavula. Wakotelesele egi “Yehowa wakhalele mukuatesa Yozefe mu ndaga jiagasue jiakhalele mukalagala muene.” b Gishina giene Potifale wabuishile Yozefe fumu wa enya mudimo wenji. Wamuhanele nji ufumu wa gutuameza inzo yenji. Gungima itshi yabuile? Umonyi wa Potifale wavudile luko muavula!

6. Yajiya gukhala egi Yozefe wakhalele mutshigina itshi?

⁶ Tangiza gale luholo Yozefe wadivuile mu tangua diene. Itshi yakhalele naye gumusuanguluisa diago? Mu tangua diene, Yozefe gakhalelego mukamba egi Potifale amone ndaga jiagasue jiakalegele muene hagula amuhane lufuto. Uvi yajiya gukhala egi wakhalele mutshigina diago egi Potifale amubembe hagula avutuge gumbo dia sh’enji. Ikhale Yozefe wakhalele nu ufumu wavula monzo ya Potifale, uvi walanduile gukhala muhiga wa muthu gakhalelego mukombelela Yehowa. Yehowa gatshitshilego egi Potifale abembe Yozefe. Yozefe wataganele luko nu malamba ako avula.

7. Malamba atshi ako Yozefe wataganele nawo? (Gisendeselo 39:14, 15)

⁷ Gifua luholo mukanda wa Gisendeselo mukhapho 39 udi guyimonesa, mukaji’a Potifale wakhalele musuanguluga nu Yozefe. Wamuwambelele nji mbala jiavula ha gubungisa n’enji muila. Uvi mu mbala jiene jiagasue, Yozefe wakhalele mutuna. Ndaga yene yahanele mukhetu muene khabu jiavula, wambidile Yozefe mambo egi wakambi gubungisa n’enji muila gu ngolo. (Tanga Gisendeselo 39:14, 15.) Potifale wambile Yozefe mu bologo;  Yozefe wabalegesele ivo yavula muene. (Gis. 39:19, 20) Bologo diene diakhalele dia luholo lutshi? Mbimbi ya Hebelu Yozefe wakalegele ha guzuelela “bologo,” yajiya nji gumonesa “wina” nga “wina dia meya.” Ndaga yene idi mumonesa egi bologo diene diakhalele diabuita. Yozefe wakhalele mumona gifua mbagashigo muzoga luko muene. (Gis. 40:15) Biblia idi mumonesa egi mu tangua dimoshi ngenyi, Yozefe wakhalele wagujitshiga malu nu malenge, shingo yenji nji yakhalele ya guhagewa mu mululu wa utadi. (Ngi. 105:17, 18) Yakhalele ndaga ya lamba diago. Yozefe wakhalele muhiga munu fumi’enji wakhalele mushila mutshima, uvi gungima wabuile muenya bologo wa gituhu!

8. Gula tudi mutagana nu malamba avula, ndaga itshi tushigo naye gujimbila?

⁸ Aye nji wataganele gale nu ndaga imoshi ya lamba yagulebesele muila ikhale wakhalele mutshita isambu yavula gudi Yehowa? Ndaga ya luholo elu yajiya gubuila muthu wagasue. Ha mavu awa a Satana tuana tagana nu malamba, Yehowa nji ganago gukanga njila gu malamba ene agasue hagula atubuilago. (1 Yone 5:19) Uvi udi naye gusha mutshima egi Yehowa wana jiya diago muabonga ndaga jiagasue udi mutagana najio. Wana gudisagesa nji mukunda nu aye. (Mat. 10:29-31; 1 Phet. 5:6, 7) Udi nji gugulaya egi: “Ame mbangugutunyigo nga hazonda nu mbangugubembigo nga hazonda.” (Heb. 13:5) Yehowa wajiya gugukuatesa ha gukolesela, ikhale udi mutangiza egi lamba diene dia gubalega ngolo, gifua luholo luakuatesele muene Yozefe. Tutadilenu ndaga yene.

9. Itshi idi mumonesa egi Yehowa wakhalele nu Yozefe tangua diakhalele muene mu bologo? (Gisendeselo 39:21-23)

⁹ Tanga Gisendeselo 39:21-23. Yehowa wakhalele nu Yozefe mu ivo yagasue ya lamba yabalegesele muene mu bologo. Luholo lutshi amukuatesele? Matangua azonda gungima, fumu wa bologo wasendesele gushila Yozefe mutshima gifua luholo Potifale wakhalele gumushila mutshima. Gungima fumu muene wahagele Yozefe fumu wa enya bologo ako. Biblia idi muzuela egi ‘fumu wa bologo gakhalelego gudisagesa mukunda nu midimo yakhalele mutuameza Yozefe.’ Yozefe wahetele mudimo wabonga wakhalele gumukuatesa ha guwunganesa matangi. Yakhalele ndaga yabonga diago! Gushigo nga nu muthu wakhalele mutangiza egi ajiya guhana mudimo wabonga wa luholo elu gudi muthu wambiwe mu bologo handaga amufundjile egi wakambele gubungisa muila gu ngolo nu mukaji’a fumi’enji. Gifua luholo mukanda wa Gisendeselo 39:23 udi guyimonesa, ‘Yehowa wakhalele mukuatesa Yozefe ha gubinga ndaga jiagasue jiakhalele muene mukalagala.’

10. Mukunda natshi yajiya gukhala egi matangua ako Yozefe wakhalele mumona gifua Yehowa gakhalelego gumukuatesa mu ndaga jiagasue jiakhalele mutshita muene? Kotelesa.

¹⁰ Tutadilenu luko luholo Yozefe akhalele gudivua. Udi mutangiza egi tangua ambidile Yozefe mambo nu tangua amumbile mu bologo, wakhalele mutangiza egi Yehowa wakhalele gumukuatesa mu ndaga jiagasue ba? Ndaga itshi Yozefe wakhalele mutshigina egi amutshitshile mu tangua diene? Wakhalele mukamba egi fumu wa bologo asuanguluge n’enji ba? Ndo sha. Idi mumonega haphelo egi wakhalele mutshigina diago egi amuzole mu bologo. Yozefe watogele nji muthu mumoshi wakhalele hehi ha guzolewa mu bologo egi awambele Farao mulonga wenji hagula muene nji wajiya guzolewa mu bologo. Wakhalele musha mutshima egi Farao wajiya gumuzola mu bologo. (Gis. 40:14) Uvi hazogele muthu muene mu bogolo, gawambelelego Farao mulonga wa Yozefe mbala imoshi. Ndaga yene yatshitshile egi Yozefe abalegese ivo iko mbadi mu bologo. (Gis. 40:23; 41:1, 14) Uvi Yehowa walanduile gumukuatesa  mu ndaga jiagasue jiakhalele mukalagala muene. Luholo lutshi?

11. Luholo lutshi Yehowa wakuatesele Yozefe? Luholo lutshi ndaga yene yakuatesele ha gutaganesa felela dia Yehowa?

¹¹ Hakhalele Yozefe mu bologo, Yehowa watshitshile egi fumu wa gu Ejipitu alote nzoji mbadi jinyi jiamubuishile tunga-tunga. Hajiyile Farao egi Yozefe wana hana ukoteleshi wa nzoji, watumine athu ha guya gumukamba handaga wakhalele mutshigina diago gujiya ukoteleshi wa nzoji jienji. Yehowa wakuatesele Yozefe ha guhana ukoteleshi wa nzoji jiene. Farao wasuangulugile nji nu malongo abonga amuhanele Yozefe. Hakotelesele muene egi Yehowa wakhalele nu Yozefe, wamutombele ha gukhala mutuameji wa mafundo agasue akhalele mubamba ima ya gudia gu Ejipitu. (Gis. 41:38, 41-44) Gungima nzala yakola yanginyine gu Ejipitu nu mu gifutshi gia Kanana, fundo fami ya Yozefe yakhalele. Yozefe wakhalele nu luendu lua guhuluisa enya fami yenji gu nzala. Ndaga yene yatshitshile egi giphuta mbagivuala Masiya gisale nu monyo.

12. Mukunda natshi tuajiya guzuela egi Yehowa wakuatesele Yozefe mu ndaga jiagasue jiakhalele mutshita muene?

¹² Tangiza ndaga jiagasue jia gushimana jiabuidile Yozefe. Hakhalele muene muhiga wa gituhu, nanyi watumine Potifale ha gumumona? Nanyi watumine fumu wa bologo ha guhana ufumu gudi Yozefe wakhalele genji muenya bologo wa gituhu? Nanyi walotesele Farao nzoji jinyi jiamubuishile tunga-tunga? Nanyi nji wakuatesele Yozefe ha gujikotelesa? Nanyi watumile Farao ha gubuisa Yozefe mutuameji wa mafundo agasue akhalele mubamba ima ya gudia gu Ejipitu? (Gis. 45:5) Idi yadiago egi Yehowa wakhalele mukuatesa Yozefe mu ndaga jiagasue jiakhalele mukalagala muene. Aphangi a Yozefe ayile giphungi ha gumushiya, uvi Yehowa wasombegesele ndaga yene ha gutaganesa felela dienji.

13. Yehowa wana kanga njila gu malamba agasue ajiya gutubuila ba? Kotelesa.

¹³ Malongo atshi tuazula mu lumene lua Yozefe? Yehowa wana kanga njila gu malamba agasue ajiya gutubuila ba? Wana londa ndaga yagasue ya mu monyo wetu ha gutomba gula malamba a luholo lutshi adi naye gutubuila ba? Biblia yana longesa ndo ngenyi. (Mulo. 8:9; 9:11) Uvi tudi mujiya egi Yehowa wana  jiya muabonga malamba tuana tagana nawo, wana tegelela nji isambu yetu tangua tuana gumutoga ukuateshi. (Ngi. 34:15; 55:22; Yesh. 59:1) Wana tshita nji ndaga iko ya ndando: Wana gutukuatesa ha gukolesela mu malamba ene. Luholo lutshi?

14. Luholo lutshi Yehowa wana gutukuatesa tangua tuana tagana nu malamba?

¹⁴ Yehowa wana gutukuatesa mu maluholo avula. Wana gutuwalagana, wana gutuhana nji gikhesa mu tangua diabonga. (2 Kol. 1:3, 4) Yene ndaga yakalagele muene gudi phangi wa yala Eziz. Phangi muene wabalegesele ivo mbadi mu bologo mukunda nu gutshigina guenji. Udi muzuela egi: “Mu gimenegena gia lusugu ngakhalele naye gusophesewa, phangi mumoshi wa yala wangutangele verse ya Yeshaya 30:15, yana zuela egi: ‘Mbamukhala nu ngolo gula muahena tedie nu muangushila mutshima.’ Verse yene yangukuatesele ha gutuna gudisagesa nu gushila Yehowa mutshima mu ndaga jiagasue. Masugu agasue ngabalegesele mu bogolo, ngakhalele mutangigiza verse yene. Yangukuatesele nji muavula.” Aye muwunguluga luko lusugu Yehowa wagukuatesele mu ndaga imoshi ngenyi mu tangua dinyi wakhalele diago nu funu ya ukuateshi wenji ba?

15-16. Malongo atshi wajiya guzula mu ndaga jiabuidile phangi Tori?

¹⁵ Matangua avula, tuana kotelesa egi Yehowa watukuatesele ha gukolesela mu lamba dimoshi ngenyi phamba gula lamba diene diahui gale. Phangi wa mukhetu Tori wakotelesele ndaga yene. Mun’enji wa yala Mason wakatele misongo ya cancer ivo 6, gungima wafuile. Idi yadiago egi, ndaga yene yasagesele phangi Tori muavula. Udi muzuela egi: “Gushigo nu ndaga yajiya guhana mama lamba diavula gubalega gufuisa mun’enji.” Udi muzuela luko egi: “Gula mun’ami udi mukata, ngana guvua gikenene giavula gubalega tangua ngana kata. Ame mujiya egi mvuaji jiko jiana tangiza nji ngenyi.”

 ¹⁶ Ndaga yene yasagesele muavula phangi Tori, uvi gungima wazudile tangua dia gutangigiza maluholo Yehowa wamukuatesele. Udi muzuela egi: “Gula ngatangiza ndaga yene, ngana kotelesa diago egi Yehowa watukuatesele tangua mun’ami wakhalele mukata. Ha gufezegesa, tangua Mason wakhalele mukata muavula nu gakhalelego nu luholo lua gumona athu, aphangi akhalele muwenda matangua mbadi ha guza gututala gu hôpital. Akhalele gutunengena mu salle d’attente ha gutukuatesa nu gutuhana gikhesa. Akhalele nji mutshita yagasue ha gutuhana ima tuakhalele nawo funu. Tuakhalele muheta ima yagasue tuakhalele nawo funu nga mu tangua malamba akhalele muvula.” Yehowa wakuatesele phangi Tori nu mun’enji Mason ha gukolesela.​—Tala galuanda “ Yehowa Watukuatesele mu Luholo Luatagana Diago.”

17-18. Itshi yajiya gutukuatesa ha gukotelesa ndaga jiana kalagala Yehowa ha gutukuatesa mu malamba nu gumuhana mersi? (Ngimbo 40:5)

¹⁷ Tanga Ngimbo 40:5. Felela dia muthu udi mukanduga mulundu diana khala guheta ha songi ya mulundu wene. Tangua didi mukanduga muene, wajiya gumagana mu mafundo avula ha gutala ima yabonga idi mu mafundo ene. Aye nji khala muzula tangua dia gutangigiza luholo Yehowa wana gugukuatesa tangua udi mutagana nu malamba. Mu ngueze ya lusugu luagasue, khala gudihula egi: ‘Luholo lutshi Yehowa wangukuatesa mangino? Luholo lutshi Yehowa wangukuatesa ha gukolesela ikhale lamba diene diahuilego?’ Khala mutshita yagasue ha guwunguluga nga ndaga imoshi ya gukalegela Yehowa ha gugukuatesa ha gukolesa.

¹⁸ Yajiya gukhala egi wana toga Yehowa hagula wajiya gumane sela lamba diaye. Gutshita ngenyi gushigo ndaga yabola. (Fili. 4:6) Uvi khala nji mutangigiza ndaga jiagasue jiabonga jiagukalegela Yehowa mu tangua diene dia lamba. Ubuitshigo mutshima egi Yehowa udi gugulaya egi, mbawuguhana ngolo nu mbawugukuatesa ha gukolesela. Hene, khala muhana mersi mukunda nu ukuateshi wana guguhana muene. Ngenyi mbawukotelesa egi Yehowa wana gugukuatesa ha gukolesela mu tangua udi mulua nu lamba gifua muakuatesele muene Yozefe.​—Gis. 41:51, 52.