1-2. Malamba atshi akombeledi a gujinginyina a Yehowa ajiya gutagana nawo?

 GULA ndaga imoshi ya lamba yatubuila, yajiya gusombegesa monyo wetu mu gisagumuisa. Ha gufezegesa, minganga yawambelele phangi Luis egi a wakhalele nu misongo ya cancer. Amuwambelele egi guasala phamba mbeji jiazonda afue genji. Phangi Monika nu mulumi’enji, akhalele nu ndaga jiavula jia gutshita mu mudimo wa Yehowa. Uvi lusugu lumoshi, Monika wavuile egi mulumi’enji wana kalagala uthambi sendese mualeha, uvi yala muene wakhalele mukulu. Phangi Olivia udi undumbu; amushinjigile ha gukatuga gu inzo yenji handaga funji yakola yakhalele naye guza. Tangua diavutugile muene, wasangele funji yamuangi gale inzo yenji. Mutangua phamba diazonda, ndaga jia monyo jia aphangi awa, jiasombegesele mu gisagumuisa. Gudi nu ndaga imoshi ya lamba yagubuidile gale mu monyo waye yasombegesele lujingu luaye mu gisagumuisa ba?

² Ikhale tudi akombeledi a Yehowa a gujinginyina, tuana landula gutagana nu malamba nu gukata gifua athu agasue. Uvi matangua ako tuajiya nji gukolesela mu malamba nu usageshi wana katuga gudi athu anyi ana tshigina ndo akombeledi a Yehowa. Yehowa ganago gukanga malamba awa agasue njila ha gutubuila uvi udi gutulaya egi mbawutukuatesa. (Yesh. 41:10) Mu ukuateshi wa Yehowa, tuajiya gukhala nu gusuanguluga, nu guzula ba desizio abonga ha gusala ya gujinginyina ikhale tudi mutagana nu malamba a luholo lutshi. Mu longo edi, tuza muzuelela maluholo nguana Yehowa wana gutukuatesa tangua tuana tagana nu malamba mu monyo wetu. Tuza mumona nji ndaga tuajiya gukalagala ha guheta gubonga gua ukuatshi wa Yehowa.

 YEHOWA MBAWUGUBAMBA

3. Gula tuatagana nu lamba diakola, ndaga itshi yajiya gukhala lamba gudi esue ha gutshita?

³ Ndaga yajiya gukhala lamba gudi esue. Gula tuatagana nu lamba diakola, yajiya gukhala lamba ha gutangiza muabonga nu guzula badesizio abonga. Mukunda natshi? Handaga tuajiya gudisagesa muavula nu guvua gikenene giakola diago. Tuajiya nji gubua tunga-tunga nu tushigo luko mujiya itshi tuajiya gutshita. Tutadilenu luholo phangi Olivia nu phangi Monika adivuile tangua ataganele nu malamba. Olivia udi muzuela egi: “Tangua funji yakola yamuangele inzo yami, ngabuile tunga-tunga nu ngavuile gikenene giakola diago.” Monika nji udi muzuela egi luholo mulumi’enji gakhalelego yagujinginyina gudi muene: “Ngavile gikenene giavula diago, ngavuile nji gifua monyo wangusuga. Yakhalele lamba ha gutshita luko ndaga ngakhalele mutshita lusugu nu lusugu. Ngatangijilego egi ndaga ya luholo elu yajiya gungubuila.” Luholo lutshi ndaga Yehowa wana gutulaya jiana gutukuatesa tangua tudi muvua gikenene?

4. Ha gutadila Filiphi 4:6, 7, ndaga itshi Yehowa watulayele?

⁴ Luholo lutshi Yehowa mbawutukuatesa? Watulayele egi, mbawutuhana “guhuima gua Nzambi.” (Tanga Filiphi 4:6, 7.) Gukhala nu ufuta wabonga nu Yehowa, guana gutukuatesa ha gutuna gudisagesa muavula. Yakotelesa egi gukhala mu guhuima gua Nzambi. Guhuima guene “guabalega ndaga jiagasue athu ajiya gukotelesa,” gudi nji nu ndando yavula gubalega ima tuajiya gutangiza. Ha gufezegesa, yajiya gukhala egi wakombelele gale Yehowa muavula mukunda nu ndaga imoshi yakhalele gugusagesa, gungima wadivile muabonga. Yakhalele diago ndaga ya gushimana mukunda nu aye. Wadivuile ngenyi handaga Yehowa waguhanele ‘guhuima guenji.’

5. Luholo lutshi guhuima gua Nzambi guana bamba mitshima yetu nu matangi etu?

⁵ Mukhapho wene udi muzuela nji egi, guhuima guene mbagubamba mitshima yenu nu matangi enu. Akhalele mukalegela mbimbi ya Greke yabalumuiwe egi “gubamba,” mu mudimo wa gisuta. Akhalele nji guyikalegela ha gumonesa masuta akhalele mubamba dimbo hagula mbalagaji jinginyigo mu dimbo diene. Athu akhalele mudimbo diene akhalele gudivua mu guhuima nu mu ubambi handaga akhalele mujiya egi masuta akhalele guabamba. Esue nji tangua guhuima gua Nzambi guana bamba mitshima yetu nu matangi etu, tuanago gudisagesa muavula handaga tudi mujiya egi tudi mu ubambi. (Ngi. 4:8) Ikhale ndaga idi gutusagesa khenji ihua ndo, tuajiya gulandula gudivua mu guhuima gifua muadivile Ana. (1 Sam. 1:16-18) Gula tushigo gudisagesa muavula, tuajya gutangigiza muabonga nu guzula badesizio abonga.

6. Itshi tuajiya gutshita ha guheta guhuima gua Nzambi? (Tala nji gifuanesa.)

⁶ Itshi tudi naye gukalagala? Gula udi gudisagesa mukunda nu ndaga imoshi, toga Yehowa  ukuateshi. Luholo lutshi? Kombelela uu nu tangua mbawuheta guhuima gua Nzambi. (Luka 11:9; 1 Tes. 5:17) Phangi Luis tuazuelela guthunda, wamonesele ndaga yamukuatesele nu mukaji’enji Ana ha gukolesela, tangua minganga yamuwambelele egi guasala phamba mbeji jiazonda afue genji. Wazuelele egi: “Mu matangua a luholo elu, yana khala lamba ha guzula desizio diabonga mu luholo ajiya gugusaga nga mu ndaga iko. Uvi gisambu giakhalele nu ndando yavula handaga giakhalele gutukuatesa ha gukhala mu guhuima mu tangua diene dia lamba.” Phangi Luis nu mukaji’enji adi muzuela egi, akombelele Yehowa muavula, amutogele ha guahana guhuima ha gutuna gudisagesa muavula nu ndunge ha guzula badesizio abonga. Yehowa waakuatesele. Gula udi mutagana nu ndaga imoshi idi gugusagesa, landula gukombelela Yehowa muavula, ngenyi muene mbawuguhana guhuima guenji, guhuima guene mbagubamba mutshima nu matangi aye.​—Roma 12:12.

YEHOWA MBAWUGUKUATESA HA GUKHALA MU GUHUIMA

7. Luholo lutshi tuajiya gudivua gula tudi mutagana nu lamba diakola?

⁷ Ndaga yajiya gukhala lamba gudi esue. Gula tudi mutagana nu ndaga imoshi idi gutusagesa, matangua ako tuanago gutangiza nga gutshita ndaga gifua luholo tuana tshita lusugu nu lusugu. Gifua luholo matshipha-tshipha ana gunyigisa masuwa khanda nu khanda, esue nji gikenene giakola giajiya gutubuisa tunga-tunga. Phangi Ana, tuazuelela guthunda udi muzuela egi tangua mulumi’enji wafuile, matangi avula akhalele gumujila. Wazuelele egi: “Tangua ngakhalele muvua gikenene giakola, ngakhalele gudibela ame hakhami; ngakhalele nji muvua khabu luholo mulumi’ami wafuile.” Luholo phangi Ana wakhalele naye guzula badesizio anyi akhalele muzula mulumi’enji, matangua ako wakhalele gudivua hakhenji yakhalele nji gumuhana khabu. Matangua ako wakhalele gudivua gifua wakhalele mukatshi dia matshipha-tshipha a muta. Luholo lutshi Yehowa wana gutukuatesa gula tudi nu gikenene giakola?

8. Gifua luholo Yeshaya 33:6 idi guyimonesa, ndaga jitshi Yehowa udi gututshiginyisa?

⁸ Luholo lutshi Yehowa mbawutukuatesa? Udi gututshiginyisa egi mbawutukuatesa ha gukhala mu guhuima. (Tanga Yeshaya 33:6.) Gula matshipha-tshipha adi akola mu kianga, masuwa ana khala mu gingonza, ana gudinyigisa khanda nu khanda. Masuwa avula ana khala nu mitshi ya gumagana goshi sambua nu sambua. Yana guakuatesa ha gutuna gudinyigisa muavula, ngenyi athu adi mu masuwa ene ana khala mu ubambi, ana wenda nji muabonga. Uvi mitshi yene yavula yana tshita muabonga tangua masuwa adi muwenda. Luholo lumoshi nji Yehowa mbawutukuatesa ha gukhala mu guhuima gula tualandula gumukombelela nu gujinginyina guagasue ikhale tudi mutagana nu malamba.

9. Luholo lutshi ikadigilo yetu yagutshitshila ba recherche yajiya gutukuatesa ha gutuna gudisagesa muavula? (Tala nji gifuanesa.)

 ⁹ Itshi tudi naye gukalagala? Gula udi mutagana nu lamba didi guguhana gikenene giavula, tshita ngolo ha gulandula gutshita gisambu, khala muya mu gudibungisa gua mu hungu, khala nji mulongesa lukuma luabonga. Idi yadiago egi, matangua ako wajiyilego gutshita ndaga gifua luholo wakhalele mutshita thomo, uvi ubuitshigo mutshima egi Yehowa udi gugukotelesa. (Fuanesa nu Luka 21:1-4.) Khala nji muzula tangua dia gutshita gulonguga guaye hakhaye, nu dia gutangigiza ndaga udi mulonguga. Mukunda natshi? Handaga munjila ya ulondegi wenji, Yehowa wana gutuhana mikanda nu video jiabonga jiajiya gutukuatesa ha gukhala nu gikhesa tangua tudi mutagana nu malamba. Ha guheta longo nga video udi nayo funu, tshita ba recherche mu ikadigilo mudi nayo muzuelelo dienu gifua, Application JW Library^®, Index des publications Watch Tower, nu Guide de recherche pour les Témoins de Jéhovah. Phangi Monika tuazuelela guthunda wazuelele egi, tangua diakhalele muvua muene gikenene giavula diago, wakhalele mukadigila ikadigilo yene ha gutshita ba recherche. Ha gufezegesa, watshitshile ba recherche ha gukotelesa muabonga mbimbi, “khabu.” Gungima, watshitshile ba recherche ha gukotelesa mbimbi “trahison” nu “fidélité.” Gungima, wakhalele mutanga uu nu tangua diakhalele muene gudivua muabonga. Udi muzuela egi: “Tangua ngasendesele gutshita ba recherche ngakhalele muvua gikenene giakola uvi luholo ngalanduile gutanga, ngakhalele muvua egi Yehowa wakhalele gungukuatesa diago. Tangua ngakhalele mutanga, ngakotelesele egi Yehowa wakhalele mujiya muabonga lamba diami, nu wakhalele gungukuatesa.” Ukuateshi wene wa Yehowa wajiya gugutulula mutshima ha gutuna guvua gikenene giavula uu nu tangua mbawudivua muabonga.​—Ngi. 119:143, 144.

YEHOWA MBAWUGUKUATESA

10. Luholo lutshi tuajiya gudivua gula ndaga imoshi ya lamba yatubuila?

¹⁰ Ndaga yajiya gukhala lamba gudi esue. Gula ndaga imoshi ya lamba yatubuila, yajiya gutulebesa muila nu gutuwunganesa matangi. Tuajiya gudivua gifua muthu wana zula phushi, wakhadi muzula phushi jiabala uvi na udi muya nu gusumbuta handaga wadinamenesa. Yajiya gukhala lamba ha gutshita ndaga jinyi tuana tshita muabonga nga ndo yajiya nji gutukanga njila ha gutshita ndaga jinyi tuana suanguluga gutshita. Yajiya gukhala lamba gudi esue ha guzuga gifua muadivile Eliya. Tuajiya gusendesa gutshigina phamba gubanda. (1 Maf. 19:5-7) Itshi Yehowa walayele ha gutukalegela tangua tudi gudivua yaguleba?

11. Mu luholo lutshi luko Yehowa wana gutukuatesa? (Ngimbo 94:18)

 ¹¹ Luholo lutshi Yehowa mbawutukuatesa? Walayele egi mbawutukuatesa. (Tanga Ngimbo 94:18.) Gula muthu wana zula phushi wadinamenesa, wana khala nu funu ya ukuateshi ha gulandula guzula phushi, esue nji tuajiya gukhala nu funu ya ukuateshi ha gulandula gutshita mudimo wa Yehowa. Gula tuatagana nu lamba Yehowa wana gutuwambela mbimbi eji jidi muhana gikhesa egi: “Ame Yehowa Nzambi waye, ngagukuata gu koko diaye dia madia, ame ngudi guguwambela egi, ‘Uvuigo woma. Mbangugukuatesa.’” (Yesh. 41:13 NWT) Fumu Davidi wahetele ukuateshi wene. Tangua malamba nu mbalagaji jiakhalele gumusagesa, Davidi wawambelele Yehowa egi: ‘Koko diaye dia madia diana gungukuatesa.’ (Ngi. 18:35) Uvi luholo lutshi Yehowa wana gutukuatesa?

12. Akuatshi Yehowa wajiya gukalegela ha gutukuatesa tangua tudi gudivua yaguleba?

¹² Yehowa wana kalegela athu ako ha gutukuatesa. Ha gufezegesa, lusugu lumoshi Davidi wakhalele gudivua yaguleba, futa dienji Yonatana wayile gumutala ha gumukuatesa nu gumuhana gikhesa. (1 Sam. 23:16, 17) Luholo lumoshi nji, Yehowa watombele Elisha ha gukuatesa Eliya. (1 Maf. 19:16, 21; 2 Maf. 2:2) Mangino wana kalegela enya fami yetu nu mafut’etu nu akulu ha gutukuatesa. Uvi tangua tudi mutagana nu malamba, tuajiya gusendesa gulenga fundo didi athu ako nu gutshigina phamba gukhala hakhetu. Ishigo ndaga yabola gula tuadivua ngenyi. Uvi itshi tuajiya gutshita ha guheta ukuateshi wa Yehowa?

13. Itshi tudi naye tutshita ha guheta ukuateshi wa Yehowa? (Tala nji gifuanesa.)

¹³ Itshi tudi naye gukalagala? Tshita ngolo ha gubemba khadilo dia gudikhalela hakhaye. Gula tudi nu khadilo dia gudikhalela esue hakhetu, tuajiya gusendesa gutangiza phamba mu ndaga jidi gutusagesa. Matangi a luholo elu ajiya gututuma ha guzula ba desizio abola. (Ish. 18:1) Idi yadiago egi gula tudi mutagana nu lamba diakola tuana khala nu funu ya gukhala esue hakhetu. Uvi gula tudi mubalegesa matangua avula esue hakhetu, tuajiya gukanga njila gudi athu anyi Yehowa udi mutuma ha gutukuatesa. Idi yadiago egi yajiya gukhala lamba ha gutshigina ukuateshi wa enya fami yetu, wa mafut’etu nga wa akulu. Uvi khala mutadila ukuateshi wene gifua udi mukatuga gudi Yehowa.​—Ish. 17:17; Yesh. 32:1, 2.

YEHOWA MBAWUGUHANA GIKHESA

14. Ndaga jitshi jiajiya gutuhana woma nu gikenene?

¹⁴ Ndaga yajiya gukhala lamba gudi esue. Matangua ako tuajiya guvua gikenene nu woma. Mu Biblia, mudi nu mene jia akombeledi a Nzambi, ana zuelela matangua akhalele muvua gikenene nu woma mukunda nu mbalagaji jiawo nu ndaga  jiko jiakhalele guasagesa. (Ngi. 18:4; 55:1, 5) Esue nji, tuajiya gutagana nu usageshi gu khalasa, gu mudimo, gudi enya fami yetu nga gudi mafumu a leta. Matangua ako tuajiya guvua woma egi mbatufua getu, handaga tuatunyi luholo lumoshi ngenyi lua gusagewa. Mu tangua diene, tuajiya gudivua gifua mona wazonda gashigo nu muthu wa gumukuatesa. Luholo lutshi Yehowa wajiya gutukuatesa mu matangua a luholo elu?

15. Hagutadila Ngimbo 94:19, ndaga jitshi Yehowa mbawutukalegela?

¹⁵ Luholo lutshi Yehowa mbawutukuatesa? Wana gutukuatesa nu wana gutulula mitshima yetu. (Tanga Ngimbo 94:19.) Verse eyi ya Ngimbo idi gututuma ha gutangigiza mona wa mukhetu wa zonda udi muvua woma nu gashigo nu luholo lua gubanda, mukunda nu funji yakola. Tuajiya gutangiza luholo sh’enji udi muza, wamubata ha mago uu nu tangua mona muene uza mubanda tulo. Ikhale funji yene idi mulandula gubunda, uvi mona muene udi gudivua mu ubambi handaga udi ha mago a sh’enji. Tangua tudi mutagana nu malamba akola, tuajiya gusha mutshima egi Tata wetu wa dilu atukuatese uu nu tangua gikenene giene giakola mbagihua. Luholo lutshi tuajiya guheta ukuateshi wene wa Yehowa?

16. Itshi tuajiya gutshita ha guheta ukuateshi wa Yehowa? (Tala nji gifuanesa.)

¹⁶ Itshi tudi naye gukalagala? Khala mutshita gisambu muavula nu gutanga Biblia lusugu nu lusugu ha gubalegesa tangua hamoshi nu Yehowa. (Ngi. 77:1, 12-14) Gula udi nu khadilo dia gutshita gisambu nu gutanga Biblia, mbayishigo mukhala lamba gudi aye ha gutoga ukuateshi gudi Sh’aye wa mu dilu. Wambela Yehowa ndaga jidi gugusagesa nu jidi guguhana woma. Gungima tanga Biblia ha gutegelela ndaga jidi guguwambela muene, ngenyi mbawuheta gikhesa. (Ngi. 119:28) Gula watanga mikanda iko ya Biblia, yajiya gugukuatesa tangua udi muvua woma. Ha gufezegesa, mukanda wa Yobo, wa Ngimbo nu wa Ishima nu ndaga jiazuelele Yesu mu Matayo mukhapho 6 jiajiya gugukuatesa. Gula udi mu tshita gisambu nu gutanga Mbimbi yenji muene mbawugukuatesa.

17. Mu ndaga jitshi tuajiya gusha mutshima?

¹⁷ Tuajiya gusha mutshima egi, gula malamba atubuila Yehowa mbawutukuatesa. Mbatushigo mukhala esue hakhetu. (Ngi. 23:4; 94:14) Yehowa walayele egi mbawutubamba, mbawutukuatesa nu mbawutuhana ngolo. Mukanda wa Yeshaya 26:3 udi muzuela mukunda nu Yehowa egi: ‘Mbawubamba athu ana zegemena diago gudi aye; mbawulandula guahana guhuima, handaga ana sha mutshima gudi aye.’ Khala mushila Yehowa mutshima, tshita ngolo hagula wajiya guheta ukuateshi wenji mu maluholo agudisha. Gula watshita ngenyi mbawuheta ngolo ikhale mu tangua udi mutagana nu ndaga imoshi ya lamba.