1. Itshi yana gugujila mu matangi tangua wana tangiza Yehowa?

 YAJIYA gukhala egi wadihudile gale egi: Yehowa wakhala luholo lutshi? Tangua wana gumukombelela, itshi yana gugujila mu matangi? Yehowa ganago gumonega, uvi Biblia yana zuelela ndaga jiavula jiamutadila. Yana zuela egi Yehowa udi ‘tangua nu udi tshibu,’ udi nji “tshuya tuabala tuana gushididisa.” (Ngi. 84:11; Heb. 12:29) Profete Ezekiele udi muzuela egi wamonele Yehowa mu vizio gifua seso dia safire, gifua seso diakhalele muhenya gifua kuivre ha tshuya nu kiajiji giakhalele muhenya gifua khongolo. (Ezek. 1:26-28) Tuajiya gudihula nga guvua woma mukunda nu ndaga jiko mukatshi dia ndaga eji jiatadila Yehowa.

2. Itshi yajiya gukanga athu ako njila ha gubua mafuta a Yehowa?

² Yajiya gukhala lamba ha gutshigina egi Yehowa wana gutuzumba handaga tuanago gumumona. Athu ako ana tangiza egi Yehowa gajiyilego guazumba mukunda nu ndaga jia lamba ataganele najio. Yajiya gukhala egi akhalelego nu tata wakhalele guazumba. Yehowa wana kotelesa muabonga luholo tuana gudivua, wana jiya nji malamba tuana tagana nawo. Wana gutukuatesa mu njila ya Mbimbi yenji ha gujiya makalegelo enji abonga.

3. Mukunda natshi tudi naye gukamba gujiya Yehowa muabonga?

³ Yehowa udi guzumba. Biblia yana zuela egi “Nzambi udi guzumba.” (1 Yone 4:8) Guzumba guana gumutuma ha gutshita ndaga jiagasue. Nzambi wana zumba diago athu muavula, wana zumba nji athu anago gumuzumba. (Mat. 5:44, 45) Mu longo edi tuza muzuelela muavula luholo Yehowa wana zumba athu. Gula tuajiya Nzambi muabonga, mbatumuzumba diago muavula.

YEHOWA WANA GUTUZUMBA MUAVULA

4. Wana gudivua gikuatshi mu luholo Yehowa wana guguzumba? (Tala nji gifuanesa.)

⁴ “Yehowa wana khala nu guzumba guakola.” (Yak. 5:11) Biblia  yana zuela egi Yehowa udi gifua mama wana zumba an’enji. (Yesh. 66:12, 13) Mama wagasue wana zumba mun’enji wa gitebe. Wana gumubata, wana zuela n’enji mu dijui dia tuluga nu gisemo. Gula mona wadila nga udi mukata, gin’enji wana kalagala yagasue ha gumuhenesa nga gumuhana ima adi nayo funu. Esue nji gula tuatagana nu malamba, tudi naye gusha mutshima egi Yehowa mbawutukuatesa handaga wana gutuzumba. Muyimbi wa ngimbo mumoshi wasonegele egi: ‘Tangua gikenene giangukuatele, aye wangukuatesele nu wanguhanele ngolo.’​—Ngi. 94:19.

5. Luholo lutshi wana tadila guzumba gua giamatshidia gua Yehowa?

⁵ Yehowa wana khala Nzambi wa gujinginyina. (Ngi. 103:8) Ganago gututuna mbala imoshi gula tuakalagala ndaga yabola. Enya Isalele akhalele mukalegela Yehowa ndaga jiabola mbala jiavula, uvi tangua abalumuine mutshima, waamonesele guzumba gua giamatshidia. Waawambelele egi: ‘Wabuile nu ndando yavula gu meso ami, ngaguhanele lutumbu, ngana guguzumba.’ (Yesh. 43:4, 5) Nzambi yowu genji wana zumba athu uu nu mangino. Tuajiya gumushila mutshima tangua diagasue. Yehowa ganago gutubemba ikhale tuakalagala gubola guakoma. Gula tuabalumuna mutshima nu tuavutuga gudi muene, mbatumona egi wana landula gutuzumba. Udi gutulaya egi ‘mbawututotesela gubola nu mutshima wagasue.’ (Yesh. 55:7) Biblia yana zuela egi gula Yehowa Nzambi watutotesela, idi gifua ‘muene hakhenji udi gutuhana sungi jia guhuima.’​—Makal. 3:19.

6. Zakaliya 2:8 idi gutulongesa itshi mukunda nu Yehowa?

⁶ Tanga Zakaliya 2:8. a Yehowa wana gutuzumba muavula, wana kotelesa muphushi luholo tuana gudivua, wana khala nji hehi ha gutubamba. Ganago gutshigina egi tuvue gikenene. Hene tuajiya diago gusha mutshima egi mbawuhana mvutu gu isambu yetu gula tuamukombelela egi: ‘Ngubambe gifua gana ga diso diaye.’ (Ngi. 17:8) Diso diakhala nu ndando yavula, gushigo nu muthu wana tshigina gudikenesa. Tangua Yehowa wana gutufuanesa nu gana ga diso dienji, idi gifua udi muzuela egi: ‘Muthu wagasue watshita athu gubola, idi gifua wakalegela gima giami gia ndando gubola.’

7. Mukunda natshi tudi naye gusha mutshima egi Yehowa wana gutuzumba?

⁷ Yehowa wana tshigina egi tujiye egi wana zumba muthu wagasue mukatshi dietu. Uvi wana jiya nji egi matangua ako tuajiya gudihula gula Nzambi wana gutuzumba, mukunda nu ndaga jia lamba tuataganele najio. Yajiya nji  gukhala egi tudi mutagana nu ndaga jidi mulola khadilo dietu dia gushila Yehowa mutshima. Itshi mbayitukuatesa ha gulandula gushila Yehowa mutshima? Idi gulonguga ha gujiya luholo Yehowa wana zumba Yesu nu Aklisto ambiwe maji mu nyuma nu luholo gana gutuzumba mukut’etu agasue.

LUHOLU LUTSHI YEHOWA WANA MONESA GUZUMBA GUENJI?

8. Mukunda natshi Yesu wakhalele musha mutshima egi Yehowa wana gumuzumba?

⁸ Sendese mualeha Yehowa nu Mun’enji Yesu ana khala nu ufuta wakola nu ana gudizumba muavula diago. Mu ivo yene yagasue abalegesele mu dilu, akuatele ufuta wakola, akhalele nji gudizumba muavula. Mu Matayo 17:5, Yehowa wamonesele haphelo egi wakhalele muzumba Yesu. Yehowa wakhalele naye phamba guzuela egi: ‘Muthu ngana suanguluga n’enji muene owu.’ Uvi wakhalele mutshigina egi tujiye egi wana zumba Yesu muavula, hene wamutamegele egi “Mun’ami ngana zumba muavula.” Yehowa wakhalele musuanguluga nu Yesu, handaga Yesu wakhalele hehi ha guhana monyo wenji. (Ef. 1:7) Yesu nji wakhalele mujiya muabonga egi Sh’enji wakhalele gumuzumba. Yesu wakhalele muzuela mbala jiavula nu gutshigina guagasue egi Sh’enji wana gumuzumba.​—Yone 3:35; 10:17; 17:24.

9. Mbimbi itshi yana monesa luholo Yehowa wana zumba Aklisto ambiwe maji mu nyuma? Kotelesa. (Roma 5:5)

⁹ Yehowa wamonesele nji egi wana zumba Aklisto ambiwe maji mu nyuma. (Tanga Roma 5:5.) Tujiyenu egi mu verse eyi akalegele mbimbi imoshi idi mumonesa luholo Yehowa wana guazumba. Verse yene idi muzuela egi Yehowa “wazalesele” mitshima yawo nu guzumba guenji. Mukanda umoshi wana fuanesa guzumba gua Nzambi nu gamuta. Gifezegeselo egi gidi mumonesa diago egi Yehowa wana zumba Aklisto ambiwe maji mu nyuma muavula! Aklisto ambiwe maji mu nyuma ana jiya egi ‘Nzambi wana gua zumba.’ (Yuda 1) Mupostolo Yone wamonesele luholo Aklisto ambiwe maji mu nyuma ana gudivua hasonegele muene egi: “Mudi mumona egi Tata watuzumbile diago muavula hagula tuajiya gutamegewa egi ana a Nzambi!” (1 Yone 3:1) Yehowa wana zumba phamba Aklisto ambiwe maji mu nyuma ba? Ndo sha, wana gutuzumba mukut’etu agasue.

10. Ndaga itshi Yehowa wakalegele ha gumonesa egi wana gutuzumba?

¹⁰ Ndaga itshi Yehowa wakalegele ha gumonesa egi wana gutuzumba? Wahanele gibawu; ngenyi wamonesele egi wana gutuzumba muavula gubalega! (Yone 3:16; Roma 5:8) Yehowa watshiginyile egi Mun’enji afue mukunda nu athu agasue, hagula gubola guetu guajiya gutotesewa nu tuajiya gubua mafuta enji. (1 Yone 4:10) Gula tudi mutangigiza ndaga Yehowa nu Yesu akalegele mukunda nu esue, mbayitukuatesa ha gukotelesa egi ana gutuzumba muavula. (Gal. 2:20) Yehowa gafutshilego gibawu handaga yakhalele mutoga egi atshite ngenyi. Uvi guzumba guamutumine ha gutshita ngenyi. Yehowa wahanele Mun’enji wana zumba muene muavula ha gumonesa egi wana gutuzumba diago. Yehowa watshiginyile egi Mun’enji amone lamba nu afue mukunda nu esue.

11. Malongo atshi tuajiya guzula mu Yelemiya 31:3?

¹¹ Gifua luholo tuayimona, Yehowa wana gutuzumba uvi wana guyimonesa nji haphelo. (Tanga Yelemiya 31:3.) Yehowa watunanele gudi muene handaga wana gutuzumba. (Tala nji Mikhuala 7:7, 8.) Gushigo nga muthu nga gima giajiya gutukaphumuna mu guzumba guene. (Roma 8:38, 39) Gujiya egi Yehowa wana guguzumba gudi gugutuma ha gudivua luholo lutshi? Tanga Ngimbo 23 ha gumona luholo Davidi wadivuile hajiyile muene egi Yehowa wana gumuzumba nu luholo aye nji wajiya gudivua.

LUHOLO LUTSHI WANA GUDIVUA TANGUA WANA JIYA EGI YEHOWA WANA GUGUZUMBA?

12. Mukanda wa Ngimbo 23 wana zuelela itshi?

¹² Tanga Ngimbo 23:1-6. Mu Ngimbo 23, Davidi wamonesele egi wakhalele musha mutshima egi Yehowa wana gumuzumba nu wana gudisagesa mukunda nu muene. Wakhalele muzuelela ufuta  wakola wakhalele nawo muene nu Yehowa, wakhalele gumutamega egi mubambi wenji. Davidi watshiginyile utuameji wa Yehowa nu mutshima wagasue, wakhalele nji gumushila mutshima. Wakhalele mujiya egi Yehowa mbawumuzumba monyo wenji wagasue. Itshi yamukuatesele ha gumushila mutshima?

13. Mukunda natshi Davidi wakhalele musha mutshima egi Yehowa mbawumukuatesa?

¹³ ‘Mbangushigo mumona lamba nga dia gima gimoshi.’ Davidi wadivuile muabonga handaga sendese mualeha, Yehowa wakhalele gumuhana ima yagasue yakhalele naye muene funu. Wakhalele nji mujiya egi Yehowa udi futa dienji nu wana suanguluga n’enji. Gishina giene washile mutshima egi ikhale ndaga itshi yamubuila, Yehowa mbawumukuatesa. Davidi wakhalele musha mutshima egi Yehowa wana gumuzumba nu wana gudisagesa mukunda nu muene, ndaga yene yamukuatesele ha gukhala nu gusuanguluga nu ha gutuna guvua woma.​—Ngi. 16:11.

14. Luholo lutshi Yehowa wana monesa egi wana gudisagesa mukunda nu esue?

¹⁴ Yehowa wana gudisagesa mukunda nu esue, muavula gubalega gula malamba atubuila. Phangi Claire b wakalegele ivo 20 gu Betele. Tangua enya fami yenji atagenele nu malamba avula, gamonelego luholo lua guakuatesa. Sh’enji wakatele AVC, phangi’enji wa mukhetu wazolewe mu hungu, enya fami yenji akhalelego luko nu mudimo nga nu fundo dia gukhala. Luholo lutshi Yehowa wamonesele egi wakhalele gudisagesa mukunda nu ene? Claire udi muzuela egi: “Yehowa wakuatesele enya fami yetu nu ima yagasue akhalele nayo funu lusugu nu lusugu. Matangua avula Yehowa wakhalele gutuhana ima yavula gubalega ima inyi tuakhalele nayo funu! Ngana tangigiza tangua diagasue luholo Yehowa watukuatesele, ngajiyilego guyibuita mutshima nga hazonda. Gutangigiza ndaga yene guangukuatesele ha gulandula  gukombelela Yehowa nu gusuanguluga tangua malamba ako angubuidile.”

15. Luholo lutshi Davidi wahetele ngolo? (Tala nji gifuanesa.)

¹⁵ ‘Wana gunguhana ngolo.’ Matangua ako Davidi wakhalele muleba muila mukunda nu malamba gakhalele mutagana nawo. (Ngi. 18:4-6) Uvi gujiya egi Yehowa wakhalele gumuzumba nu gudisagesa mukunda nu muene guakhalele gumuhana ngolo. Yehowa watuamezele futa dienji Davidi wakhalele wa guhuila mu ‘muangu ula lembe-lembe,’ nu gu ‘muta udi nu meya ala-tulu.’ Ndaga yene yakuatesele Davidi ha guheta luko ngolo nu ha gukombelela Yehowa nu gusuanguluga.​—Ngi. 18:28-32.

16. Luholo lutshi gujiya egi Yehowa wana guguzumba guaguhanele ngolo?

¹⁶ Luholo lumoshi nji nu esue mangino, ‘tudi nu monyo handaga Yehowa wana gutumonesela guzumba gua giamatshidia’ tangua tuana tagana nu malamba. (Is. 3:22; Kol. 1:11) Tutadilenu ndaga jiataganele najio phangi Rachel. Mu sungi ya coronavirus, mulumi’enji wamutunyile, watunyile nji Yehowa; ndaga yene yamusagesele diago muavula. Luholo lutshi Yehowa wamukuatesele? Rachel udi muzuela egi: “Yehowa wamonesele diago egi wana gunguzumba. Watumine mafuta ami ha gubalegesa tangua nu ame, akhalele gungubatela ima ya gudia nu gungutumina bamesaje akhalele gunguhana gikhesa nu verse jia Biblia. Tuakhalele mulela n’awo, akhalele nji gunguwunguluisa egi Yehowa wana gudisagesa mukunda nu ame. Ngana hana Yehowa mersi luholo luanguhanele muene aphangi avula ana gunguzumba.”

17. Mukunda natshi Davidi gakhalelego muvua woma?

¹⁷ ‘Mbangushigo muvua woma handaga udi nu ame.’ Davidi watagenele nu ndaga jiavula jia lamba, wakhalele nji nu mbalagaji jiavula jia ngolo. Uvi gujiya egi Yehowa wana gumuzumba guamukuatesele ha gudivua mu ubambi. Davidi wakhalele mujiya egi Yehowa wakhalele n’enji tangua diagasue, ndaga yene yamuhanele gikhesa. Hene wayimbile egi: ‘[Yehowa] wanguhuluishile mu ndaga jiagasue jiakhalele gunguhana woma.’ (Ngi. 34:4) Matangua ako Davidi wakhalele muvua woma, uvi luholo luakhalele muene mujiya egi Yehowa wakhalele gumuzumba yamukuatesele ha gutuna guvua luko woma.

18. Luholo lutshi gujiya egi Yehowa wana guguzumba guajiya guguhana ngolo tangua udi mutagana nu malamba?

¹⁸ Luholo lutshi gujiya egi Yehowa wana gutuzumba guajiya gutuhana ngolo tangua tudi mutagana  nu malamba? Phangi Susi udi muvundji wa njila, udi mumonesa luholo muene nu mulumi’enji adivuile tangua mun’awo wa yala wadishiyile. Udi muzuela egi: “Gula ndaga ya lamba yagubuila, yajiya gugusagesa muavula, yajiya gugutuma ha gusendesa gutangiza egi ndaga iko ya lamba iza gugubuila. Uvi gujiya egi Yehowa wana gutuzumba guatukuatesele ha gudivua muabonga nu mu ubambi.” Phangi Rachel tuazuelela gu thunda udi muzuela egi: “Lusugu lumoshi mu phipha, ngavuile woma wavula, mutshima wasendesele gungubudiga; mu tangua diene ngakombelele Yehowa nu gudila. Yehowa wangukuatesele ha gudivua muabonga gifua luholo mama wana henesa mun’enji, ngavuile gu mutshima tulu, gungima ngabandele tulo. Ngajiyilego gubuita ndaga yene mutshima.” Phangi Tasos udi mukulu, wabalegesele ivo nguana mu bologo handaga watunyile mudimo wa gisuta. Luholo lutshi Yehowa wamonesele egi wana gumuzumba nu wana gudisagesa mukunda nu muene? Phangi Tasos udi muzuela egi: “Yehowa wangukuatesele nu ima yavula gubalega inyi ngakhalele nayo funu. Ndaga yene yangukuatesele diago ha gumushila mutshima. Nyuma ya Yehowa yangukuatesele nji ha gukhala nu gusuanguluga ikhale ngakhalele mu bologo, fundo dia gikenene. Ngakotelesele nji egi gula ngashila diago Yehowa mutshima, muene mbawulandula gunguzumba muavula. Hene ngabuile muvundji wa njila wa tangua diagasue mu bologo.”

KUATA UFUTA WAKOLA NU NZAMBI WAYE WANA GUGUZUMBA

19. (a) Luholo tudi mujiya egi Yehowa wana gutuzumba luholo lutshi tudi naye gumukombelela? (b) Ndaga itshi Yehowa wagukalegele gale yana gugusuanguluisa muavula? (Tala galuanda “ Verse Jiajiya Gutukuatesa ha Gujiya egi Yehowa Wana Gutuzumba.”)

¹⁹ Mene jiagasue tuazuelela mu longo edi, jidi mumonesa egi Yehowa, “Nzambi wa guzumba,” udi nu esue! (2 Kol. 13:11) Wana gudisagesa mukunda nu muthu wagasue mukatshi dietu. Tuana gusha mutshima egi ‘guzumba guenji gua giamatshidia’ guana gutubamba. (Ngi. 32:10) Gula tudi mutangigiza luholo Yehowa wana gutumonesela guzumba guenji, mbatumona egi wana gudisagesa mukunda nu esue nu mbatukuata ufuta wakola n’enji. Tudi naye gutshita gisambu nu mutshima umoshi, nu gumonesa egi tuana khala nu funu ya guzumba guenji. Tudi naye gumuwambela ndaga jiagasue jidi gutusagesa nu gusha mutshima egi muene wana gutukotelesa nu udi hehi ha gutukuatesa.​—Ngi. 145:18, 19.

20. Tuajiya gufuanesa guzumba gua Yehowa nu itshi?

²⁰ Gifua luholo tshuya tuana gutukuatesa ha gudivua muabonga mu sungi ya guhuma, gujiya egi Yehowa wana gutuzumba mbagutukuatesa mu tangua dia lamba. Gula udi mutshita yagasue ha gutshigina egi Yehowa wana guguzumba, mbayiguhana gikhesa nu mbayigukuatesa ha gukhala mu guhuima. Hene muthu wagasue mukatshi dietu udi naye guzuela egi: ‘Ngana zumba Yehowa’!​—Ngi. 116:1.