1. Usombegeshi utshi wakalegewe mu ivo yabalega?

SENDESE mualeha athu avula ana gukhala nu dingumba ana gukombelela. Uvi mu ivo eyi yabalega, ndaga jiasombegesa muavula. Athu avula ana gukombelela luko ndo. Mu ifutshi iko athu avula ana guzuela egi anago guya nga mu dingumba dimoshi ha mukombelela. *—Mat. 24:12.

2. Mukunda natshi athu avula akhalago nu dingumba dia gukombelela?

² Mukunda natshi athu avula ngegi ana gutuna gukombelela? * Yajiya gukhala egi ako ana gubemba egi gusuanguluga gua ha mavu nga malamba a awunganese. (Luka 8:14) Uvi ako ana gutuna egi Nzambi gakhalago guene. Ako ana gutshigina egi Nzambi yowu guene, uvi ana gutangiza egi malongo a mangumba akhalago luko nu ndando nu anago gudivua nu sianse nu ndaga jiko. Ajiya guvua ndaga jiana guzuela mafuta awo, mandombi nga televizio egi ima yagasue yadizogele, uvi anago guvua muavula ndaga jiajiya guatshiginyisa egi Nzambi wakhala guene. Ako ana gutuna mukunda nu khadilo diabola dia mafumu a mangumba ana gutshigina mbongo nu lukuma. Mu ifutshi iko, mafumu a leta ana gusha mikhuala; mikhuala yene yanago guhana athu njila ya gukombelela Nzambi muabonga.

3. Itshi tuza mumona mu longo edi?

³ Yesu watuhanele ginemo gia ‘gubuisa athu a ifutshi yagasue alandudi.’ (Mat. 28:19) Luholo lutshi tuajiya gukuatesa athu ana gutuna gukombelela hagula azumbe Nzambi nu  abue alandudi a Klisto? Tudi naye gujiya egi athu ana gutuna nga gutshigina lukuma luabonga ha gutadila fundo akudile. Ha gufezegesa, luholo enya gu Europe ana gutshigina lukuma luabonga luajiya gukhala lua gudisha nu lua enya gu Asie. Mukunda natshi? Gu Europe, athu avula ana gujiya ndaga jiavula jiatadila Biblia nu ana gujiya egi Nzambi wafugile ima yagasue. Uvi gu Asie, athu avula anago gujiya ndaga jiavula jiatadila Biblia, nu anago gutshigina egi Mufugi wakhala guene. Longo edi diza mumonesa luholo tuajiya gukuatesa athu agasue tudi mutagana nawo mu mudimo wa gulongesa, ikhale fundo ditshi ana gujinga.

4. Mukunda natshi tudi naye gukhala nu matangi abonga?

⁴ Khala nu Matangi Abonga. Ivo yagasue, athu anyi akhalele thomo mutuna gukombelela, ana gubua Matemue a Yehowa. Avula ana gukhala nu makalegelo abonga nu anago gutshigina makalegelo abola a enya mangumba. Ako mukatshi diawo akhala nu makalegelo abola adi naye gubemba. Tuajiya gusha mutshima egi Yehowa mbawutukuatesa ha guheta athu “a mitshima yatagana mukunda nu monyo wa ivo nu ivo.”—Makal. 13:48; 1 Tim. 2:3, 4.

5. Matangua avula, itshi yana gutuma athu ha gutshigina lukuma luabonga?

⁵ Khala nu Gisemo nu monesa gutema. Matangua avula, athu anago gutshigina lukuma luabonga phamba mukunda nu ndaga tuana guzuela, uvi ana gusuanguluga nu luholo tuana gujizuela. Ana gutshigina lukuma luene gula tudi nu gisemo nu tuamonesa gutema, nu tudi musuanguluga nawo. Tushigo naye guatuma gu ngolo ha gutegelela ndaga tudi muzuela. Uvi, tudi naye gukamba gujiya mukunda natshi anago gutshigina gukombelela. Ha gufezegesa, athu ako anago gutshigina guzuelela maga a Nzambi nu athu ashigo gudijiya nawo. Ako ana gutangiza egi ishigo yatagana ha guhula muthu ndaga idi mutangiza muene mukunda nu Nzambi. Athu ako ana guvua musonyi gula athu adi guamona mutanga Biblia nu Matemue a Yehowa. Uvi esue tudi naye gukamba gukotelesa matangi a muthu nu muthu.—2 Tim. 2:24.

6. Luholo lutshi mupostolo Phaula wakhalele musombegesa maluholo enji a gulongesa, nu luholo lutshi tuajiya gulandula gifezegeselo gienji?

⁶ Itshi tuajiya gutshita gula muthu udi muvua musonyi tangua tudi mukalegela mbimbi gifua “Biblia,” “mufugi,” “Nzambi,” nga “gikombelelo”? Tuajiya gulandula gifezegeselo gia mupostolo Phaula, nu gusombegesa nji luholo luetu lua guta nenji maga. Hakhalele Phaula muta maga nu enya Yuda, wakhalele mukalegela mukanda wa Nzambi ha gutangigiza nawo. Uvi hakhalele muene muzuela nu ba filozofe a enya Greki gu Areopaje, gakhalelego mumonesa egi ndaga adi muzuela jidi mukatuga mu mukanda wa Nzambi. (Makal. 17:2, 3, 22-31) Luholo lutshi tuajiya gulandula gifezegeselo gia Phaula? Gula watagana nu muthu gashigo mutshigina Biblia, ishigo yabonga ha gumonesa mbala imoshi egi ndaga udi muzuela jidi mukatuga mu Biblia. Gula wajiya egi muthu muene gashigo mutshigina egi athu ako amimone nenji mutanga Biblia, wajiya gumutangesa naye mu gisuegi nga mu telefone.

7. Itshi tudi naye gutshita ha gulandula gifezegeselo gia Phaula gidi mu 1 Kolinto 9:20-23?

⁷ Khala Mukotelesa Athu nu Guategelela Muabonga. Tudi naye gukamba gukotelesa ndaga jidi mutangiza athu tudi mutagana nawo. (Ish. 20:5) Tutadile luko gifezegeselo gia Phaula. Wakudile mukatshi dia enya Yuda. Uvi hakhalele muene mulongesa athu akhalelego enya Yuda, anyi akhalelego mujiya Yehowa nu Mbimbi yenji muabonga, wakhalele musombegesa luholo luenji lua gulongesa. Tudi naye gutshita ba recherche nu guhula alongeshi a gukula mu nyuma a mu hungu dietu ha gukotelesa  muabonga athu a mu terituare yetu.—Tanga 1 Kolinto 9:20-23.

8. Luholo lutshi tuajiya gusendesa guta maga a Biblia nu athu?

⁸ Felela dietu diakhala dia gukamba athu a mitshima ‘yatagana.’ (Mat. 10:11) Ha gutagenesa felela diene, tudi naye guhula athu ndaga adi mutangiza nu guategelela muabonga. Phangi mumoshi gu Angleterre wana guhula athu ndaga adi mutangiza hagula fami yawo ikhale mu gusuanguluga, luholo lua gusansa ana, nga luholo lua gulua nu malamba. Gula phangi muene wategelela mvutu jiawo, wana guzuela egi, “Itshi mudi mutangiza gu longo edi diasonegewe ivo hehi nu 2 000 yabalega gale?” Gungima, wana guatangela verse mu telefone yenji, uvi ganago gutumbula jina dia “Biblia.”

9. Luholo lutshi tuajiya gukuatesa athu ana gutuna guzuelela Nzambi?

⁹ Tuajiya gukuatesa athu ana gutuna guta maga atadila Nzambi, gula tudi muzuelela nawo ndaga imoshi yana guayitugisa. Athu avula ana guyituga tangua ana gutala ima yafugiwe. Hene, tuajiya guzuela egi: “Mudi mujiya egi ima yavula enya sianse ana gulonda, ana gulandula ima yakhala ha mavu. Ha gufezegesa, ana gulandula matshui ha gulonda mikro, nu meso ha gulonda caméra. Itshi wana gutangiza tangua wana gumona ima idi ha mavu? Udi mutangiza egi yadizogele hakhayo, yafugiwe, nga yajile gui?” Tegelela muabonga, gungima wajiya guzuela egi: “Gula enya sianse adi mulonguga matshui nu meso ha gulondega ima, tuajiya gudihula egi gudi nanyi ana guyilonguga. Ngasuangulugile nu ndaga yasonegele muenya ndunge mumoshi egi: ‘Muthu wafugile kutshi, muene gajiyilego guvua ba? Muthu wafugile iso, muene gajiyilego gumona ba? . . . Muene wana guhana ndunge gudi athu!’ Enya sianse ako nji ana gutshigina mbimbi eji nu ana gutshigina egi ima yagasue yafugiwe.” (Ngi. 94:9, 10) Gungima tuajiya gutelesa video ya jw.org^® idi ha fundo diasonegewa egi “Interviews et témoignages” mu gitshinyi gidi muzuela egi “Points de vue sur l’origine de la vie.” (Ngina ha PUBLICATIONS > VIDÉOS.) Nga ndo tuajiya guahana gamukanda La vie a-t-elle été créée? nga gamukanda Cinq questions à se poser sur l’origine de la vie.

10. Luholo lutshi tuajiya gusendesa guta maga nu muthu yonu wana gutuna guzuelela ndaga jia Nzambi?

¹⁰ Athu avula ana gutshigina gukhala nu lujingu luabonga mu masugu adi muza. Uvi, ako ana guvua woma egi mavu ajiya gushiyiwa nga gusala agithuhu. Mutadi muwendji mumoshi gu Norvège udi muzuela egi athu anyi ana gutuna guzuela ndaga jiatadila  Nzambi, matangua avula ana gutshigina guzuelela ndaga jidi mubua ha mavu. Gula phangi wamenega athu, gungima wana guzuela egi: “Mudi mutangiza egi lujingu mbalukhala luholo lutshi mu masugu adi muza? Tuajiya gusha felela gudi enya politiki, enya sianse nga gudi muthu muko?” Gungima dia guategelela muabonga, phangi muene wana gutanga nga guzuelela verse idi mumonesa gubonga mbatuheta mu masugu adi muza. Athu avula ana gusuanguluga nu laji Biblia yana guhana egi mavu mbajinga ivo nu ivo, nu athu abonga mbajinga ivo nu ivo.—Ngi. 37:29; Mulo. 1:4.

11. Mukunda natshi tudi naye gukalegela ba metode a gudisha ha gusendesa guta maga nu athu, nu luholo lutshi tuajiya gulandula gifezegeselo gia Phaula gidi mu Lomo 1:14-16?

¹¹ Tudi naye gukalegela ba metode a gudisha gudi athu tudi mutagana nawo. Mukunda natshi? Handaga athu akhala agudisha. Ndaga idi musuanguluisa muthu muko, muthu muko wajiya guyituna. Athu ako ana gutshigina guzuelela ndaga jia Nzambi nga Biblia, uvi ako ana gutshigina guzuelela thomo ndaga jiko. Ba okazio agasue tuatagana nawo, tuakalegele ha gulongesa athu a maluholo agasue. (Tanga Lomo 1:14-16.) Hene, tudi naye gujiya egi phamba Yehowa wana gukuatesa athu ana guzumba ndaga jiabonga ha gukudisa giamatshidia mu mitshima yawo.—1 Kol. 3:6, 7.

12. Itshi tuajiya gutshita ha gulongesa enya gu Asie adi khenji ajiyego egi Mufugi wakhala guene?

¹² Ha mavu agasue, alongeshi ana gutagana nu athu a mu ifutshi ya gu Asie, nu anyi ana gukatuga mu ifutshi mafumu a leta ana gusha mikhuala yana gukanga athu njila ha gukombelela mu guhuima. Mu ifutshi yavula ya gu Asie, athu avula anago gudihana lamba ha gujiya gula Mufugi wakhala guene nga ndo. Ako ana gukamba gujiya ndaga jiavula nu ana gutshigina gulonguga Biblia, uvi ako anago gusuanguluga ha gulonguga. Itshi tudi naye gutshita ha guakuatesa? Alongeshi ako adi nu eksperianse azuelele egi luholo luabonga lua gualongesa ludi gusendesa guta nawo maga, guamonesela gisemo, gungima gula luholo ludi guene guawambela luholo malongo a Biblia ana gutukuatesa ha gukhala nu lujingu luabonga.

13. Itshi yajiya gutuma athu ha gusuanguluga nu Biblia? (Tala gifuanesa holu dia gizula.)

¹³ Athu avula ana gusuanguluga nu ndunge jiatagana jia mu Biblia. (Mulo. 7:12) Gu New York, phangi mumoshi wa mukhetu wayile mutala athu ana guzuela Chinois mandarin udi muzuela egi: “Ngana gumonesela athu gisemo nu guategelela. Gula ngajiya egi akatugile gu gifutshi giko, ngajiya guahula egi: ‘Muajidila gale nu dimbo ba? Muahetshi gale mudimo ba? Athu adi gumizula muabonga ba?’” Matangua ako, gumonesa gisemo luholo elu, guana gukuatesa ha gusendesa gulongesa Bilbia. Gula luholo ludi guene, phangi muene wana guzuela luko egi: “Ndaga itshi ya ndando tudi naye gutshita ha gukhala nu ufuta wabonga nu athu ako? Ngajiya gugutela gishima gimoshi gia mu Biblia? Gidi muzuela egi: ‘Gisendeselo gia gumana gidi gifua gubudiga gua muta, hadi nguma khenji jikolago, muabonga ukatuge gaye.’ Udi mutangiza egi longo edi diajiya gutukuatesa ha gukhala nu ufuta wabonga nu athu ba?” (Ish. 17:14) Maga a luholo elu ajiya gutukuatesa ha gujiya athu adi nu funu ya gulonguga ndaga jiavula.

14. Luholo lutshi phangi mumoshi wa gu Extrême-Orient wana gukuatesa athu ana guzuela egi Nzambi gakhalago guene?

¹⁴ Itshi tuajiya guzuela mukunda nu athu anyi ana guzuela egi Nzambi gakhalago guene? Phangi mumoshi walongesele muavula gu Extrême-Orient fundo athu avula anago gukombelela, udi muzuela egi: “Gula muthu wazuela egi: ‘Nganago gusha gutshigina gudi Nzambi,’ yakotelesa egi muthu muene ganago gusha gutshigina gudi nzambi athu avula a mu gifutshi giawo ana gukombelela.  Matangua avula ngana gutshigina ndaga ana guzuela nu ngana guawambela egi nzambi jiavula jiatshitshiwe gudi athu nu jiakhala jia mambo. Ngana gutanga Yelemiya 16:20: ‘Muthu wajiya gudilondela jinzambi jienji hakhenji ba?’ Gungima ngana guhula egi: ‘Luholo lutshi tuajiya gujiya nzambi yatshitshiwe gudi athu?’ Ngana gutegelela mvutu gungima ngana gutanga Yeshaya 41:23 idi muzuela egi: ‘Tuwambele ndaga mbajibua mu masugu adi muza hagula tujiye egi mudi jinzambi.’ Gungima ngana guawambela profesi imoshi yalayele Yehowa mukunda nu masugu adi muza.”

15. Gifezegeselo gia phangi wa gu Asie orientale gidi gutulongesa itshi?

¹⁵ Phangi mumoshi gu Asie orientale wana gukalegela metode awa alandula tangua ana guvutugila athu. Udi muzuela egi: “Ngana guamonesa ifezegeselo ya ndunge jia Biblia, profesi jia Biblia jiataganele gale, nu ndaga jia gushimana jia ha mavu nu jia mu dilu. Gungima ngana guawambela egi ima eyi yagasue idi mumonesa egi Mufugi wakhala guene. Gula muthu watshigina egi Nzambi wakhala guene, ngana gumumonesa ndaga Biblia yana guzuela mukunda nu Nzambi.”

16. Ha gutadila Hebelu 11:6 mukunda natshi athu ana mulonguga Biblia adi naye gukhala nu gutshigina gudi Nzambi nu gu Biblia, luholo lutshi tuajiya guakuatesa ha gukudisa gutshigina guene?

¹⁶ Tangua tudi mulonguga Biblia nu athu anago gukombelela, tudi naye gulandula guakuatesa ha gukudisa gutshigina guawo egi Nzambi wakhala guene. (Tanga Hebelu 11:6.) Tudi naye guakuatesa ha gukolesa gutshigina guawo mu ndaga Biblia yana gulongesa. Yajiya gutoga egi tuvutugile ndaga jiko mbala jiavula. Tangua diagasue tudi mulonguga nawo, tudi naye guzuelela ndaga jidi mumonesa egi Biblia idi Mbimbi ya Nzambi. Muajiya guzuelela profesi jia Biblia jiataganele gale; nu luholo malongo a Biblia ana gudivua nu ndaga jia sianse nu ndaga jia mualeha, nu luholo Biblia yajiya gutukuatesa lusugu nu lusugu.

17. Gula tudi muzumba athu, mbaayatuma ha gutshita itshi?

¹⁷ Tuana gukuatesa athu ha gubua alandudi a Klisto, tangua tuana guamonesela guzumba ikhale ana gukombelela nga ndo. (1 Kol. 13:1) Tuana gualongesa hagula ajiye egi Nzambi wana gutuzumba nu wana gutshigina egi tumuzumbe. Ivo yagasue, athu avula ana gutuna gukombelela, ana gubatijiwa handaga ana gulonguga ha guzumba Nzambi. Hene, khala nu matangi abonga nu monesa gisemo gudi athu a maluholo agasue. Khala guategelela. Kamba gukotelesa matangi awo. Alongese mu njila ya gifezegeselo giaye ha gukhala alandudi a Klisto.