1-2. (a) Mu gudivua nu mukhuala wa Yesu udi mu Matayo 28:18-20, mudimo wa thomo wa hungu dia Uklisto udi itshi? (b) Mihu itshi tuza muzuelela mu longo edi?

APOSTOLO asuangulugile muavula tangua ayile gudibungisa holu dia mulundu. Tangua Yesu wafuzumugile, waatamegele ha guya gudimona nawo gu mulundu wene. (Mat. 28:16) Yajiya gukhala mu okazio owu, wene ‘Yesu wamonegele gudi aphangi gubalega 500 mbala imoshi.’ (1 Kol. 15:6) Mukunda natshi Yesu watamegele alandudi enji ha gudimona nawo? Waatamegele ha guahana mudimo owu wa ndando: ‘Ndienu genu, mubuise athu a ifutshi yagasue alandudi.’—Tanga Matayo 28:18-20.

² Alandudi anyi avile mbimbi eji jia Yesu abuile Aklisto a hungu dia thomo dia Uklisto. Mudimo wa thomo wa hungu diene wakhalele wa gubuisa athu alandudi a Klisto. * Mangino mahungu a Aklisto a giamatshidia adi avula ha mavu, luko, mudimo wa thomo wa Aklisto ene udi wa gubuisa athu alandudi. Mu longo edi, tuza muzuelela mihu eyi nguana yalandula: Mukunda natshi gubuisa athu alandudi gudi nu ndando yavula? Itshi tudi naye gutshita ha gubuisa athu alandudi? Aklisto agasue adi naye guhana mago ha gubuisa athu alandudi ba? Mukunda natshi tudi naye gumonesa guhuiminyina ha gubuisa athu alandudi?

3. Ha gutadila Yone 14:6 nu 17:3, mukunda natshi mudimo wa gubuisa athu alandudi udi nu ndando yavula?

³ Mukunda natshi mudimo wa gubuisa athu alandudi udi nu ndando yavula? Handaga phamba alandudi a Klisto ajiya  gubua mafuta a Nzambi. Luko, athu adi mulandula Klisto adi nu lujingu luabonga mangino, nu adi nu felela dia gujinga ivo nu ivo mu masugu adi muza. (Tanga Yone 14:6; 17:3.) Yadiago, Yesu watuhanele mudimo wa ndando, uvi tuanago guwutshita esue hakhetu. Mupostolo Phaula wasonegele ndaga eji jialandula mukunda nu muene nu mafuta enji ako egi: ‘Tudi mafuta a mudimo wa Nzambi.’ (1 Kol. 3:9) Yehowa nu Yesu atuhanele luendu luakoma ngatshima tushigo athu atagana!

4. Eksperianse ya phangi Ivan nu Matilde idi gutulongesa itshi?

⁴ Mudimo wa gubuisa athu alandudi wana gutusuanguluisa muavula. Tutadile gifezegeselo gia phangi Ivan nu mukaji’enji Matilde a gu Colombie. Alongesele muvuala mumoshi mu jina dia Davier, muvuala muene waawambelele egi: “Ngana gutshigina gusombegesa mu lujingu, uvi nganago gukuka.” Davier wakhalele mutshita boxe, wakhalele munua makaya nu matombe abala, nu wakhalele mujinga nu makangu enji Erika. Ivan udi muzuela egi: “Dimbo dienji diakhalele gualeha, uvi tuakhalele muya gumutala, tuakhalele mutshita matangua avula ha ma velo, njila yakhalele nu ithotho yavula. Tangua Erika wamonele egi Davier wasombegesa khadilo nu makalegelo enji, muene nji wasendesele gulonguga Biblia.” Gungima, Davier wabembele gunua makaya nu matombe abala, nu wabembele nji boxe. Wazudile nji Erika mu ulo. Matilde udi muzuela egi: “Tangua Davier nu Erika abatijiwe mu 2016, tuatangijile ndaga Davier wazuelele egi, ‘Ngana gutshigina gusombegesa mu lujingu, uvi nganago gukuka.’ Masoji atuzogele.” Yadiago, tuana gusuanguluga muavula luholo tuana gukuatesa athu ha gubua alandudi a Klisto.

5. Ndaga itshi tudi naye gutshita thomo ha gubuisa athu alandudi?

⁵ Ndaga ya thomo tudi naye gutshita idi ‘gukamba’ athu adi mutshigina gulonguga giamatshidia. (Mat. 10:11) Tuana gumonesa egi tudi diago Matemue a Yehowa gula tudi mulongesa athu agasue tudi mutagana nawo. Gula tudi mutumagela mukhuala wa Klisto, ngenyi tudi mumonesa egi tudi diago Aklisto a giamatshidia.

6. Itshi yajiya gutukuatesa ha gutshita mudimo wetu muabonga?

⁶ Athu ako ana gusuanguluga gulonguga giamatshidia gia Biblia, uvi avula tuana gutagana nawo mu hugo dia thomo ana gumonega gifua ashigo musuanguluga. Tudi naye guahana gikhesa hagula atshigine gulonguga. Ha gutshita mudimo wa gulongesa muabonga, tudi naye gudilondega muabonga. Tomba malongo abonga ajiya gusuanguluisa athu mbawutagana nawo. Londega nji luholo wajiya gusendesa guta maga ene.

7. Luholo lutshi wajiya gusendesa guta maga nu muthu, nu mukunda natshi idi nu ndando ha gutegelela nu gunemesa athu?

⁷ Ha gufezegesa, wajiya guhula muthu udi muta nenji maga egi: “Ngumutshigina gujiya matangi aye gu muhu owu, wamona gikuatshi? Malamba avula tudi mutagana nawo ana gusagesa nji athu agasue ha mavu. Udi mutangiza egi gudi nu guvernema umoshi wajiya gukatula malamba agasue a athu ha mavu ba?” Gungima wajiya gutanga Danyele 2:44. Nga ndo wajiya guhula muthu egi: “Udi mutangiza egi luholo lutshi wajiya gulongesa an’aye ha gukhala nu makalegelo abonga? Ngumutshigina gujiya matangi aye.” Gungima tanga Mikhuala 6:6, 7. Longo diagasue watomba ha guzuelela, tangiza gutuama athu  mbaagutegelela. Tangiza gubonga mbaguheta athu tangua mbaalonguga ndaga Biblia yana gulongesa. Tangua udi muta maga nu athu ene, udi naye guategelela nu gunemesa matangi awo. Ngenyi, mbawakotelesa muabonga, ene nji mbaagutegelela muabonga.

8. Mukunda natshi tudi naye gulandula guvutugila athu?

⁸ Hagula egi muthu atshigine gulonguga Biblia, yajiya gutoga egi ubalegese nenji matangua avula nu gumuvutugila mbala jiavula. Mukunda natshi? Handaga matangua avula, athu tuana guvutugila anago gukhala gumbo diawo. Luko, wajiya guvutugila muthu mbala jiavula hagula muthu muene ajidile nu aye nu atshigine gulonguga Biblia. Jiya egi, hagula mutshi ukule muabonga, udi naye guwumbila meya mbala jiavula. Luholo lumoshi nji, guzumba mukunda nu Yehowa nu Yesu mbagukula mu mutshima wa muthu gula tudi muta nenji maga a Biblia mbala jiavula.

9-10. Mukunda natshi tudi naye guzuela egi Muklisto wagasue udi naye guhana mago ha gukamba athu adi nu mitshima yabonga?

⁹ Muklisto wagasue udi nu ginemo gia gukamba athu adi nu mitshima yabonga. Tuajiya gufuanesa mudimo wetu nu athu adi mukamba mona watotshi. Mu luholo lutshi? Tangiza gale mona mumoshi udi nu ivo thathu wajimbidile njila ya gumbo diawo. Athu hehi nu 500 ayile gumukamba. Muthu mumoshi wamonele mona muene mu temu, gungima dia matangua 20. Atshiginyile gumufuta makuta luholo wamonele mona muene, uvi watunyile genji. Wazuelele egi: “Mona muene wamonega handaga athu avula adihanyi ha gumukamba.”

¹⁰ Athu avula adi gifua mona watotele.  Akhalago nga nu felela dimoshi, uvi ana gutshigina ukuateshi. (Ef. 2:12) Athu gubalega 8 millions adi mutshita mudimo owu wa gukamba athu ene agutota. Yajiya gukhala egi aye hakhaye wahetelego muthu wa gulonguga nenji Biblia. Uvi, alongeshi ako adi mulongesa mu terituare yene, ajiya gutagana nu muthu udi mutshigina gujiya giamatshidia giatadila Mbimbi ya Nzambi. Gula phangi mumoshi walonguga nu muthu, gungima muthu muene wabua mulandudi wa Klisto, muthu wagasue wahanele mago ha guheta mulandudi muene, wana gusuanguluga.

11. Ikhale ushigo nu muthu wa gulonguga nenji Biblia, mu maluholo atshi wajiya guhana mago mu mudimo wa gubuisa athu alandudi?

¹¹ Ikhale mangino ushigo nu muthu wa gulongesa Biblia, uvi wajiya guhana mago gu mudimo wa gubuisa athu alandudi mu luholo luko. Ha gufezegesa, gula wamona athu ahe-ahe gu Inzo ya Ufumu wajiya guayamba nu guakuatesa. Gutshita ngenyi, guajiya guakuatesa ha gukotelesa egi, guzumba guana gumonesa egi tudi Aklisto a giamatshidia. (Yone 13:34, 35) Mvutu jia hihia udi muhana mu gudibungisa, jiajiya guakuatesa ha guzuelela gutshigina guawo mu luholo luatagana nu ginemua. Wajiya nji guya nu mulongeshi muhe-muhe mu mudimo wa gulongesa nu gumukuatesa ha gukalegela Biblia hagula atangigize nu athu. Gula watshita ngenyi, mbawumulongesa ha gulandula gifezegeselo gia Klisto.—Luka 10:25-28.

12. Tudi naye gukhala nu ndunge jiavula ha gubuisa athu alandudi ba? Kotelesa.

¹² Tushigo naye gutangiza egi ha gubuisa athu alandudi a Yesu, tudi naye gukhala nu ndunge jiavula gubalega. Mukunda natshi tuazuela ngenyi? Tuzuelele gifezegeselo gia Faustina, wana gujinga gu Bolivie. Gakhalelego mujiya gutanga tangua asendesele gulonguga Biblia nu Matemue a Yehowa. Uvi gungima walongugile gutanga hazonda. Wabatijiwe gale, nu wana gutshigina gulongesa athu ako. Phoso yagasue, wana gulongesa Biblia gudi athu mutano. Ikhale athu avula ana gulonguga Biblia nu Faustina ana gutanga muabonga gubalega muene, uvi wakuatesele gale athu 6 ha gubatijiwa.—Luka 10:21.

13. Ngatshima tudi nu ndaga jiavula jia gutshita, gubonga gutshi tuajiya guheta gula tudi mutshita mudimo wa gubuisa athu alandudi?

¹³ Luholo Aklisto avula akhala nu ndaga jiavula jia ndando jia gutshita, akhalago nu tangua diavula. Uvi ana gutshita ngolo ha gulongesa athu Biblia, gutshita ngenyi guana guasuanguluisa. Tuzuelelenu phangi Melanie wa gu Alaska. Gakhalelego nu yala, muene hakhenji wakhalele musansa munenji wa mukhetu wa ivo 8. Wakhalele nji mutshita mudimo tangua diavula  nu wakhalele nji mukuatesa shenji yago wakhalele mukata cancer. Phamba muene wakhalele Temue wa Yehowa mu dimbo diawo. Wakhalele musamba muavula ha gukolesela mu mudimo wa gulongesa ikhale guma guakhalele guahuma, handaga wakhalele nu funu ya guheta muthu udi nu funu ya gulonguga Biblia. Gungima adimonele nu Sara, wasuangulugile ha gujiya egi Nzambi wakhala nu jina. Sara watshiginyile ha gulonguga Biblia. Melanie udi muzuela egi: “Ngakhalele muhuila mu ngueze yagasue ya lusugu lua thano, uvi ame nu mun’ami wa mukhetu tuakhalele muya mulonguga Biblia nu athu. Tuakhalele musuanguluga ha gukamba mvutu gu mihu ya Sara, tuasuangulugile nji luholo gabuile futa dia Yehowa.” Sara waluile nu umbalagaji nu gikhesa giagasue, wazogele mu dingumba diawo nu wabatijiwe.

14. (a) Luholo lutshi mudimo wa gubuisa athu alandudi udi gifua mudimo wa gulowa jishui? (b) Mbimbi jia Phaula jidi mu 2 Timote 4:1, 2 jidi naye gugutuma ha gutshita itshi?

¹⁴ Ngatshima khenji uhetago muthu udi mutshigina gubua mulandudi, landula gukamba ubembigo. Jiya egi Yesu wafuanesele mudimo wa gubuisa athu alandudi nu mudimo wa alowi a jishui. Mulowi wa jishui wajiya gubalegesa matangua avula gutuama egi akuate ishui imoshi. Matangua avula, ana gulowa uu nu mu phipha nga ndo uu nu mu gimenegena, nu ana guya uu nu mu mafundo a gualeha. (Luka 5:5) Alongeshi nji ana gubalegesa matangua avula ha “gulowa” mu matangua a gudisha nu mu mafundo avula. Mukunda natshi?  Hagula ahete athu avula. Matangua avula athu ana gutshita ngolo jia luholo elu ana guheta gubonga handaga ana guheta athu ana gusuanguluga nu lukuma luabonga. Wajiya gudilondega mu lusugu ha gulongesa mu matangua anyi wajiya gutagana nu athu avula, nga mu mafundo anyi wajiya guasanga ba?—Tanga 2 Timote 4:1, 2.

15. Mukunda natshi tudi naye gumonesa guhuiminyina tangua tudi mulongesa athu Biblia?

¹⁵ Mukunda natshi tudi naye gumonesa guhuiminyina tangua tudi mulongesa athu Biblia? Handaga tuana gutshigina gukuatesa muthu ha gujiya nu ha guzumba ndaga Biblia yana gulongesa. Tudi naye nji gumukuatesa ha gujiya nu ha guzumba Yehowa Fumi’a Biblia. Tushigo naye phamba gulongesa muthu ndaga Yesu watogele alandudi enji ha gutshita, uvi tudi naye gumulongesa luholo lua gutumagela malongo ene. Tangua tudi gumukuatesa ha gukalegela malongo a Biblia, tudi naye gumonesa khadilo dia guhuiminyina. Athu avula ana gusombegesa matangi nu makalegelo awo gu ngima dia mbeji jiazonda, uvi gudi ako yana gutoga tangua diavula.

16. Longo ditshi wazula mu eksperianse ya Raúl?

¹⁶ Phangi mumoshi wa Misionere gu Pérou wahetele mbuto yabonga luholo gamonesele guhuiminyina. Udi muzuela egi: “Ngalongugile mikanda mbadi nu Raúl. Uvi wakhalele nu milonga yakola mu lujingu luenji. Wakhalele nu milonga yavula mu ulo wenji, wakhalele muzuela mbimbi jiabola, an’enji akhalelego gumunemesa. Uvi wakhalele muza mu gudibungisa masugu agasue, hene ngalandudile guya gumutala ha gumukuatesa nu fami yenji. Sendese tangua tuataganele nenji, ivo itatu nu ndambo yabalegele hagula abatijiwe.”

17. Itshi mbatutadila mu longo dialandula?

¹⁷ Yesu wazuelele egi: ‘Ndienu . . . mubuise athu a ifutshi yagasue alandudi.’ Ha gutshita mudimo wene, matangua avula tuana guta maga nu athu adi nu gutshigina gua gudisha nu guetu, nu anyi anago guya nga mu dingumba dimoshi nga anyi ana gutangiza egi Nzambi gakhalago guene. Longo dialandula mbadimonesa luholo tuajiya gulongesa lukuma luabonga gudi athu a maluholo awa.