Ngavualewe mu 1954 gu mu dimbo dia Minnesota gu États-Unis. Tuakhalele enya Katolike, fami yetu yakhalelego nu makuta avula. Tuavalewe thano mu fami yetu, ame ngudi mona wa mbadi. Ngakhalele mungina gu mavula a enya Katolike, ngakhalele servant. Ngakhalelego mujiya ndaga jiavula jia Biblia. Ngatshima ngakhalele mutshigina egi guajiya gukhala nu Nzambi wafugile ima yagasue, uvi ngakhalelego mutshiga egi enya Katolike ajiya gungukuatesa ha gukombelela Nzambi muene.

Matemue a Yehowa ajile gungutala tangua ngakhalele mulonguga Droit mu givo giami gia thomo gu collège William Mitchell. Ngakhalele muweva milele, yala muene nu mukaji’enji azuelele egi adi naye guza gunguvutugila luko. Tangua ajile luko, ngaahudile mihu eyi mbadi: “Mukunda natshi athu abola ana binga ndaga jiagasue mu lujingu uvi athu abonga ndo?” nu “Itshi yajiya gubatela athu gusuanguluga?” Anguhanele mukanda La vérité qui conduit à la vie éternelle, gakhalele nu mukubu wa vert. Anguhanele nji Les Saintes Écritures. Traduction du monde nouveau. Ngasendesele gulonguga Biblia. Gulonguga Biblia  guangukanguile diago meso. Ngasuangulugile tangua ngajiyile egi Ufumu wa Nzambi udi guvernema mbawuhinyina ha mavu. Ngakotelesele egi utuameji wa athu mbawubingigo nga hazonda, nu wana batelela athu malamba avula.

Ngadihanele gudi Yehowa nu ngabatijiwe mu 1982 gu Asamble a masugu thathu akalegewe gu Saint Paul akhalele nu muto wa lumene egi: “La vérité du Royaume.” Mu phoso yalanduile, ngavutugile ha gukalagala examen gu Centre civique ya gu Saint Paul ha gubua avocat. Mu mbenji ya Octobre, anguwambelele egi ngabingi examen, hene ngabuile avocat.

Gu Asamble ene, ngatele maga nu phangi Mike Richardson munu wakhalele mukalagala mudimo gu Betele ya gu Brooklyn, wanguwambelele egi ahagi biro dia service juridique gu hunji dia akulu atuameji. Mutangua diene ngawungulugile mbimbi jiazuelele muenya gu Etiopia jidi mu Makalegelo 8:36 nu ngadihudile egi: ‘Itshi idi gungukanga njila ha gutoga njila ya gukalagala mudimo gu biro diene?’ Hene, ngazalesele formilere ha guya mukalagala mudimo gu Betele.

Mvuaji jiami jiakhalelego musuanguluga luholo ngabuile Temue wa Yehowa. Tata wanguhudile egi gubonga gutshi gutshita gu Betele mbagungubatela mu mudimo wami wa avocat. Ngamuwambelele egi mbangukalagala gifua volontaire. Ngamuwambelele luko egi mbeji yagasue mbaakhala gunguhana 75$, ndambo ya makuta ana hana aphangi ana gutshita gu Betele.

Luholo ngakhalele ngasendesa gale gutshita mudimo gu tribinale, ngakhalelego naye guya gu betele mbala imoshi. Ngayile gu Betele ya gu Brooklyn, gu New York mu 1984. Anguhagele gu Service Juridique. Eksperianse ngazudile gu tribinale yangukuatesele ha gudilondega muabonga mukunda nu ndaga jiavula.

Inzo idi mutamegewa egi Le Théâtre Stanley gu dimbo dia Jersey, yasumbiwe mu Novembre 1983. Aphangi azalesele ba formilere ha guya mulondega ndaga jiatadila courant nu tiyo jia meya mu inzo yene. Tangua aphangi atele maga nu mafumu, a awambelele egi adi mutshigina gubuisa Stanley fundo dia gukalegela ba asamble a Matemue a Yehowa. Ndaga yene yazolele milonga. Mikhuala ya gu dimbo dia Jersey yatadila jinzo yakhalele muzuela gamba jinzo jia gukombelela jidi naye gukhala phamba mu dimbo fundo dimoshi nu athu. Stanley yakhalele mukatshi dia ville ya khalele mukalegewa mungenda, hene mafumu atunyile ha gutuhana njila. Aphangi atogele  mafumu ha gusombegesa desizio diawo, uvi ene atunyile gawo.

Muphoso yami ya thomo gu Betele, ulondegi wafundjile milonga yene gu Cour de district luholo atunyile gutuhana njila ya gulondega inzo yene. Luholo ngakhalele ngakalgala gale mudimo ivo mbadi gu tribinale ya gu Saint Paul gu Minnesota, ngakhalele ngajidila gale nu ndaga jia luholo elu. Avocat wetu mumoshi wazuelele gamba Stanley yakhalele fundo athu akhalele mukalegela ndaga jiavula gifua gutala video nu gushiga miziki. Na mukunda natshi idi mutunyishiwa ha guyikalegela ndaga jia Nzambi? Cour de district yasophesele milonga, yamonesele egi mafumu a gu dimbo dia Jersey akhalele gutukangesa ha gukombelela mu guhuima. Cour de district yawambelele dimbo dia Jersey egi adi naye gutuhana njila ya gusumba nu gulondega inzo yene. Ngasendesele gumona luholo Yehowa akuatesele ulondegi wenji hagula mudimo wenji wuye gutuama. Ngasuangulugile diago ha gukuatesa mudimo wene.

Aphangi asendesele gulondega inzo yene, ana a khalasa dia 79 dia Gileade azudile maplome gu dimbo dia Jersey gu asamble akalegewe mu 8 Septembre 1985, givo gimoshi gungima. Ngakhalele nu gusuanguluga ha gukuatesa mudimo owu wa Yehowa. Gusuanguluga ngahetele guakhalele guavula gubalega mudimo wami ngakhalele nawo gutuama dia guza gu betele. Ngakhalelego mujiya egi Yehowa wajiya gungukalegela muavula ngenyi.

Sendese mu 1980, minganga nu ba hopital akhalelego mutshigina nga hazonda egi Temue wa Yehowa wa gukula asagewe gula amumbilego mahatshi. Mukhetu mumoshi wakhalele gu vumo watagenele nu ndaga yakola, handaga manzuji akhalele muzuela gamba akhetu agasue adi gu vumo ajiyilego gutuna gumbiwa mahatshi. Manzuji azuelele egi gula mukhetu watuna gumbiwa mahatshi, wajiya gufua mun’enji gasadi shiye.

Mu 29 Décembre 1988, tangua phangi wa mukhetu Denise Nicoleau gavualele mun’enji wa yala, mahatshi amuzogele avula. Mahatshi amuhuile mu muila, hene minganga yazuelele egi adi naye gumumba mahatshi. Uvi muene watunyile. Mu gimenegena gienji, minganga yatogele nzuji mumoshi ha guahana njila ya gumba phangi muene mahatshi. Nzuji muene gahudilego phangi Nicoleau nga mulumi’enji, nu gaawambelele ndo egi wahanyi minganga njila ya gumumba mahatshi.

Mu lusugu lua thano 30 Décembre, minganga yene yambile Phangi Nicoleau mahatshi, ikhale mulum’enji nu enya fami yenji akhalele mutuna. Mu ngueze ya lusugu luene, maphulushi akuatele enya fami yenji nu akulu mbadi, handaga a afundjile egi akhalele mutuna egi Phangi Nicoleau gambiwago mahatshi. Mu lusugu lua Samano 31 Décembre mu gimegena, mazulunalu, TV nu ba radio agasue a gu New York nu a mu membo ako, azuelele ndaga yene.

 Mu lusugu lua thomo mu gimenegena, ngatele maga nu Milton Mollen yonu wakhalele nzuji yakoma ya gu tribinale yene. Ngamuwambelele ndaga jiagasue, ngamumonesele egi nzuji yonu gahudile ndo phangi uvi watumile minganga ha gumumba mahatshi. Mollen wangutogele ha guya gu biro dienji mu ngueze ya lusugu lualanduile ha guzuelela ndaga yene muabonga nu ha gutadila mikhuala idi gudivua nu ndaga yene. Mu ngueze yene, ngayile gu biro dia Nzuji Mollen nu responsable wami Philip Brumley. Nzuji muene watamegele nji ba avocat a gu hôpital ha guza. Maga ene akhalele diago akola. Mu tangua dimoshi ngenyi, Phangi Brumley wangusonegele mbimbi ha gapapie egi: “Tulumuisa dijui.” Jiakhalele diago mbimbi jiawaha handaga ngakhalele mutuna nu mutshima umoshi ndaga jiagasue jiakhalele muzuela ba avocat ene.

Gu ngima dia tangua dimoshi, Nzuji Mollen wazuelele egi, milonga eyi yene mbatudiangela guzuelela hamene mu gimenegena. Tangua tuakhalele muzoga mu biro, Nzuji Mollen watuwambelele egi ba avocat a gu hôpital “mbaakhala nu mudimo wakola hamene.” Yakotelesa egi mbayikhadigo ndaga yaleba gudi ene ha gumonegesa gishina hôpital wavutula phangi Nicoleau mahatshi gu ngolo. Ngavuile diago egi Yehowa udi gutukuatesa ha gubinga milonga yene. Yakhalele ndaga ya gushimana ha gumona luholo Yehowa watukalegele ha gutaganesa felela dienji.

Tuakalegele mudimo phipha yagasue ha gujiya ndaga mbatuzuela hamene. Tribinale yene yakhala hehi nu Betele ya gu Brooklyn, aphangi avula tuakhalele mukalagala nawo gu service juridique akhalele muza guene. Tangua manzuji ene nguana avuile ndaga tuazuelele, azudile desizio dia gukatula mukhuala wa gumba athu mahatshi gu ngolo. Cour suprême yabingishile Phangi Nicoleau nu yahagele mukhuala wakhalele mutunyisa guzula desizio dia gumba muthu mahatshi gula amuhudile ndo.

Masugu azonda gu ngima, cour suprême ya gu New York yabingishile Phangi Nicoleau luholo gazudile desizio dia gutuna gumbiwa mahatshi. Eyi yakhalele Tribinale ya thomo nganginyile, mukatshi dia ba Tribinale nguana a mu membo a gudisha a gu États-Unis, anyi asophesele milonga yatadila guvutula mahatshi. (Tala galuanda “ Milonga Tuabingile gu Cour Suprême.”) Akhalele gungubungisa nu ba avocat ako a gu Betele ha guzuela  milonga yatadila luholo lua gubamba ana, gushiya ulo, gusumba jinzo nu phango.

Tangua ngadimonele nu mukaji’ami Denise giphungu gia thomo, wakhalele washiyi gale ulo, nu wakhalele musasa ana’enji thathu. Wakhalele nu ndambo yenji ya makuta nu wakhalele muvundji wa njila. Wataganele nu malamba avula mu monyo wenji, uvi ndaga imoshi ya ngusuanguluishile idi luholo luenji lua gudihana mu mudimo wa Yehowa. Mu 1992, tuayile gu asamble a masugu thathu akhalele nu muto wa lumene egi “Porteurs de lumière”, gungima ngamuhudile ulo. Givo gialanduile tuadizudile mu ulo. Gukhala nu mukhetu wana guhaga Yehowa ha fundo dia thomo nu wana guvua ndo khabu mu phushi yakhalele kado ga Yehowa. Denise wana gungusuanguluisa diago nu ima yawaha masugu agasue a monyo wetu.—Ish. 31:12.

Tangua tuadizudile mu ulo, mona wa somi wakhalele nu 16, muko 13, muko 11. Ngakhalele mutshigina gukhala tata wabonga gudi ana ene, hene ngakhalele mutanga nu gukalegela malongo agasue ngakhalele mumona mu mikanda yetu atadila mvuaji. Yakhalelego ndaga yaleba, uvi gungima dia ivo ngasuangulugile ha gumona luholo tuadivuile muabonga nu ana ene nu luholo akhalele gunguzumba. Tuakhalele musuanguluga nu mafuta a an’etu tangua akhalele muza gumbo dietu, tuakhalele nji musuanguluga gujinga nu an’etu.

Mu 2013, ame nu Denise tuayile gu dimbo dia Wisconsin ha gukuatesa mvuaji jienji. Ngasuangulugile ha gujiya egi mudimo wami gu Betele wahuilego. Angutogele ha gulandula gukuatesa Service Juridique ya ulondegi wetu gifua volontere.

Mu septembre 2018, ngakhalele guvua gifua ngudi nu gima ha muminyo. Munganga wangutalele, uvi gamonelego misongo yakhalele gungusagesa. Gungima, munganga muko wanguwambelele egi ngukambe munganga wana saga ba nerf. Mu Janvier 2019, munganga muko wanguwambelele egi ngudi nu misongo yakola yajiya gubolesa muila wami wagasue mu tangua diazonda. Misongo yene yana tamegewa egi: Paralysie supranucléaire progressive (PSP).

Gungima dia masugu thathu, ngayile mudikenesa, hene ngabuile koko guangubogele. Ngakhalele mutshita saga yene muabonga monyo wami wagasue, ngakhalele gujizumba muavula. Hene, tangua ngabogele, ngakhalele mujiya egi ngushigo luko nu luholo lua gukalagala saga jiene muabonga. Ngadihudile luholo misongo yene yakhalele gudivudisa, ngakhalelego luko nu luholo lua guzuela, gudinyigisa nga guminya gima.

Ngudi nu gusuanguluga luholo ngakuatesele ulondegi wa Yehowa mu mudimo wami wa avocat. Ngudi nji lu gusuanguluga luholo ngasonegele ndaga jiavula mu ba journaux. Ndaga jiene jiana gutangewa gudi minganga, ba avocat nu manzuji. Ngakuatesele nji akombeledi a Yehowa a ha mavu agasue ha gutuna gusagewa nu mahatshi. Ngana zuela mbimbi jidi mu mukanda wa Luka 17:10 egi: ‘Ngudi gami muenya mudimo udi gashigo watagana. Ngakalegele ndaga ngakhalele naye gukalagala.’