ENYA ndunge (ba archéologues) amonele brike jiavula jia guwetshia jiatungiwe dimbo dia Babilona; jiakhalele ha fundo diakhalele Babilona ikulu. Muenya ndunge mumoshi jina dienji Robert Koldewey, udi mumonesa egi brike jia luholo lulu jiakhalele mulondewa mu wina umoshi wa tshuya (four) wakhalele “gonze ya dimbo, fundo diakhalele nu wuma wabonga nu khunyi . . . jiavula jia guwetshiela.”

Mikanda ya mualeha yamonesele egi mafumu a gu Babilona akhalele mukalegela mawina ene a tshuya ha gutshita ndaga jiko jia khuta. Professeur mumoshi gu Université ya gu Toronto jina dienji Paul-Alain Beaulieu, wana longuga ndaga jiatadila gifutshi gia enya Asiliya, udi muzuela egi: “Mikanda nu ima iko yavula ya enya Babilona . . . yana monesa egi fumu mumoshi wa gu Babilona wahanele njila egi athu anyi amulumbugile nu ashiyile mukhuala ambiwe mu wina wa tshuya.” Isona imoshi yasonegewe mu sungi ya Fumu Nebukadenezale idi muzuela egi: “Ashiyenu, akondenu tshuya, ashididisenu, . . . mu wina dia tshuya . . . Kanduisenu mishi yawo, abishilenu mu wina dia tshuya hagula afue.”

Ndaga eyi yana wunguluisa athu ana tanga Biblia mu lumene ludi mu mukanda wa Danyele mukhapho 3. Lumene luene luana monesa egi, Fumu Nebukadenezale wamagenesele gikhokho gia wolo mu baba dia Dula​—gonze ya dimbo dia Babilona. Tangua mavuala thathu a enya Hebelu, Shadrake, Meshake, nu Abedenego atunyile gufugamela gisongo giene, Nebukadenezale wavile khabu jiabala, watumile athu ha gulonda wina wa tshuya ‘mbala sambadi gubalega luholo ana londa gale,’ ha gumba ‘mavuala ene thathu mu wina wa tshuya tuabala.’ Muanjelo mumoshi wa ngolo wahuluishile mavuala ene gu gufua.​—Dan. 3:1-6, 19-28.

Brike jiene jiamonewe gu Babilona jiana monesa nji egi Biblia yana zuela giamatshidia. Brike jiavula mukatshi dia brike jiene jiakhalele nu isona yakhalele mutumbuisa fumu. Isona yene yakhalele muzuela egi: “Nebukadenezale, Fumu wa gu Babilona . . . Inzo yami ya ufumu, fundo ngana khala, ame Fumu Wakoma ngayitungile . . . Ajigulu ami mbaahinyina mayilago.” Isona eyi idi luholo lumoshi nu isona yasonegewe mu mukanda wa Danyele 4:30, mu verse yene, Nebukadenezale udi gudisunzula egi: “Eyi Babilona Yakoma ngatunga mukunda nu inzo yami ya ufumu; ngayitunga nu ngolo jiami hakhami nu lutumbu lua ufumu wami?”