LONGO DIA 26
Kuatesa Athu adi Mulua nu Gikenene
“Mukut’enu agasue mudi naye gukhala nu matangi amoshi, mudihage ha fundo dia athu ako, mudizumbe gifua aphangi nu gisemo nu gudibulumuisa.”—1 PHET. 3:8, NWT.
LUNGIMBO 107 Tulandule Guzumba gua Nzambi
NDAGA JIDI MU LONGO EDI *
1. Luholo lutshi tuajiaya gulandula guzumba gua Yehowa?
YEHOWA wana gutuzumba muavula. (Yone 3:16) Tudi naye gulandula khadilo dia Sh’etu wa guzumba. Hene tudi naye gumonesa khadilo dia ‘gudihaga ha fundo dia athu ako, guzumba athu agasue gifua aphangi nu gisemo’, uvi tudi naye gutshita gubonga muavula gudi ‘aphangi etu a mu gutshigina.’ (1 Phet. 3:8; Gal. 6:10) Gula phangi mumoshi watagana nu lamba tudi naye gumukuatesa.
2. Itshi tuza mumona mu longo edi?
2 Athu agasue adi mutshigina gubua akombeledi a Yehowa mbatagana nu malama avula. (Mako 10:29, 30) Mu masugu awa a gisugishilo, tuajiya gutagana nu malamba avula. Luholo lutshi tuajiya gudikuatesa nu aku’etu? Lumene lua Lota, lua Yobo nu lua Naomi luajiya gutukuatesa. Tuza mutadila luko malamba aphangi ana gutagana nawo nu luholo tuajiya guakuatesa ha gulua nu malamba ene.
KHALA NU GUHUIMINYINA
3. Luholo 2 Phetelo 2:7, 8 yayimonesa, desizio ditshi diabola Lota wazudile, nu malamba atshi diamubatelele?
3 Lota wazudile desizio diabola luholo gayile mujinga mukatshi dia athu abola a gu Sodoma. (Tanga 2 Phetelo 2:7, 8.) Sodoma yakhalele mavu a umonyi, uvi Lota wamonele lamba diavula luholo gayile mujinga guene. (Gis. 13:8-13; 14:12) Yajiya gukhala egi mukaji’enji wakhalele mutshigina dimbo diene nu athu a mu dimbo diene muavula, hene gatunyile gutumagela Yehowa. Mukaji’enji wafile tangua Nzambi wanogesele tshuya nu sufele mu dimbo. Tuzuelele ana Lota mbadi. Mala akhalele naye guahaga afile gu Sodoma. Lota watotesele inzo yenji nu umonyi wenji, lamba diakola gubalega diakhalele gufua gua mukaji’enji. (Gis. 19:12-14, 17, 26) Mu tangua dia malamba, Yehowa walanduile gumonesa khadilo dia guhuiminyina gudi Lota.
Yehowa waavidile khenda, hene watumile anjelo enji ha guahuluisa Lota nu fami yenji (Tala paragrafe 4)
4. Luholo lutshi Yehowa wamonesele khadilo dia guhuiminyina gudi Lota (Tala gifuanesa holu dia gizula.)
4 Ikhale Lota watombele ha guya mujinga gu Sodoma, Yehowa waavidile khenda, hene watumile anjelo enji ha guahuluisa. Uvi, ha fundo dia guzoga mu dimbo dia Sodoma muphushi luholo anjelo a awambelele, Lota “washiphidile.” Anjelo amukuatele gu koko nu amuzolele nu fami yenji ha gulenga dimbo. (Gis. 19:15, 16) Gungima anjelo amuwambelele ha guya mukhala gu milundu. Uvi Lota gatumagelego Yehowa, watogele ha guya mujinga mu membo akhalele hehi. (Gis. 19:17-20) Yehowa wamutegelele nu guhuiminyina guagasue, hene wamuhanele njila ha guya mu dimbo diene. Gungima dia gujinga guene, wasendesele guvua woma, hene wakatugile wayile mu milundu fundo Yehowa wamudijigile thomo ha guya mujinga. (Gis. 19:30) Yehowa wamonesele diago guhuiminyina guavula! Luholo lutshi tuajiya gulandula khadilo diene?
5-6. Luholo lutshi tuajiya gukalegela 1 Tesalonike 5:14 ha gulandula Nzambi?
5 Muklisto mumoshi wajiya guzula desizio diabola diajiya gumubatela malamba gifua Lota. Gula ndaga ya luholo elu yatubuila, itshi tuajiya gutshita? Tangua diko tuajiya guzuela egi muene wagikambele hene giamubuila, ayi yajiya gukhala ngenyi. (Gal. 6:7) Uvi, gudi nu ndaga yawaha tuajiya gukalagala. Idi ndaga yabonga gula tualandula luholo Yehowa wakuatesele Lota. Luholo lutshi?
6 Yehowa watumine anjelo ha gutemesa Lota nu ha gumukuatesa hagula alenge gingonza giakhalele naye gubuila Sodoma. Esue nji, tudi naye gutemesa aphangi etu gula tuamona egi ndaga adi mutshita jiajiya guabatela malamba. Tuajiya nji guakuatesa. Ngatshima phangi muene gashigo mukalegela malongo a Biblia muphushi, tudi naye guhuiminyina. Tukhalenu gifua anjelo anyi mbadi akuatesele Lota. Ha fundo dia gubemba phangi’etu nga gumulenga, tudi naye gukamba maluholo a gumukuatesa. (1 Yone 3:18) Tuajiya gumukuata gu koko, yakotelesa egi guzuela nenji nu gumukuatesa ha gukalegela malongo abonga amuhanewa.—Tanga 1 Tesalonike 5:14.
7. Luholo lutshi tuajiya gutadila athu ako luholo Yehowa wakhalele mutadila Lota?
7 Yehowa gatalelego phamba makalegelo abola a Lota, uvi mu njila ya nyuma yenji, watumile mupostolo Phetelo ha gusonega egi, Lota wakhalele muthu wabonga. Tudi nu gusuanguluga guavula diago luholo Yehowa wana gututosela gubola guetu! (Ngi. 130:3) Tuajiya gutadila athu ako luholo Yehowa wakhalele mutadila Lota. Gula tudi mumona makalegelo abonga a aphangi’etu, mbatuamonesela khadilo dia guhuiminyina. Ngenyi, ene mbaatshigina ukuateshi mbatuahana.
KHALA MUVUILA ATHU AKO KHENDA
8. Khenda mukunda nu athu ako mbajigutuma ha gutshita itshi?
8 Yobo gamonelego lamba handaga, wazudile desizio diabola gifua muatshitsile Lota. Uvi, wataganele nu malamba akola, watotesele umonyi, ginemua nu sante yenji. Luko, an’awo agasue afile. Mafuta enji thathu amumbidile mambo. Mukunda natshi mafuta a Yobo thathu akhalelego gumuvuila khenda? Akambelego gukotelesa
diago ndaga yabuidile Yobo. Hene, atangijile ndaga jiabola, azuelele nji ndaga jiamuhanele gikenene. Itshi tuajiya gutshita hagula tukalagalago gubola gua luholo elu? Jiya egi phamba Yehowa wana gujiya ndaga jiagasue jia muthu. Tegelela muabonga muthu udi mumona lamba tangua gadi muzuela. Tegelela muabonga mbimbi jienji, dihage nji ha fundo dienji. Ngenyi, mbawumonesa guzumba gua giamatshidia gudi phangi wa yala nga wa mukhetu udi mumona lamba.9. Gula tudi muvila athu ako khenda, itshi tushigo naye gutshita, nu mukunda natshi?
9 Khadilo dia khenda mbaditukuatesa ha gutuna gukhala nu songi-songi ya guta mene jia malamba athu ako adi mutagana nawo. Muenya songi-songi ganago gutunga hungu uvi wana gudimuanga. (Ish. 20:19; Lomo 14:19) Gakhalago nu gisemo uvi wakhala muenya izuele-zuele, luko mbimbi jienji jiana gulezela lamba gudi muthu udi nu lamba. (Ish. 12:18; Ef. 4:31, 32) Idi diago ndaga yabonga gula tudi mutala makalegelo a bonga a athu ako nu tudi mutangiza luholo tuajiya guakuatesa ha gulua nu malamba!
Tegelela nu guhuiminina guagasue gula phangi udi muzuela “izuele-zuele,” gungima zuela mbimbi jiajiya gumukuatesa mu tangua diabonga (Tala paragrafe 10-11) *
10. Longo ditshi tuajiya guzula mu ndaga jidi mu Yobo 6:2, 3?
10 Tanga Yobo 6:2, 3. Matangua ako, Yobo wazuelele “izuele-zuele.” Gu ngima watshiginyile egi ndaga jiko jiazuelele muene jiakhalele jiabola. (Yobo 42:6) Athu adi mumona lamba mangino gifua Yobo, ajiya guzuela izuele-zuele yajiya guahana gikenene gungima. Itshi tuajiya gutshita? Ha fundo dia gukhala ndaga jiakola, tudi naye guavila khenda. Jiya egi Yehowa gatufugilego hagula tukhale mutagana nu malamba nu gikenene tudi mumona mangino. Hene tuajiyilego gudihula gula mukombeledi wa Yehowa wazuela izuele-zuele tangua adi nu gikenene. Ngatshima wazuela ndaga jiabola mukunda nu Yehowa nga mukunda nu esue, tushigo naye gumuvila khabu nga gusophesa mukunda nu mbimbi jienji.—Ish. 19:11.
11. Luholo lutshi akulu adi naye gulandula gifezegeselo gia Elihu tangua adi muhana malongo?
11 Matangua ako, athu adi mutagana nu malamba adi naye guhanewa malongo nga disipline. (Gal. 6:1) Luholo lutshi akulu ajiya guakuatesa? Adi naye gulandula gifezegeselo gia Elihu, yago wategelele Yobo nu khenda jiagasue. (Yobo 33:6, 7) Elihu wakotelesele matangi a Yobo muabonga, hene wamuhanele malongo gungima. Akulu adi mulandula gifezegeselo gia Elihu, adi naye gutegelela muabonga nu gukamba gukotelesa ndaga mutu gadi mutagana najio. Tangua adi mukamba guhana malongo, ana gutshita yagasue ha gukuata mitshima ya athu adi guategelela.
ZUELA NU GISEMO
12. Gufua gua mulumi’a Naomi nu gua an’enji mbadi guamutumine ha gutshita itshi?
12 Naomi wakhalele mukombelela Yehowa nu mutshima umoshi. Uvi tangua mulumi’enji nu an’enji mbadi afile, wasombegesele jina dienji egi “Mara,” yakotelesa egi “Gikenene.” (Luta 1:3, 5, 20, 21) Giwaji gienji Luta wakhalele nenji mu tangua dia malamba enji. Luta wakhalele muhana Naomi ima gakhalele nayo funu ha gumukuatesa, nu wakhalele muzuela nenji nu gisemo giagasue. Mbimbi jienji jia giamatshidia jiamonesele diago egi wakhalele muzumba Naomi nu wakhalele hehi ha gumukuatesa.—Luta 1:16, 17.
13. Mukunda natshi tudi naye gukuatesa muthu wafishile mulumi’enji nga mukaji’enji?
13 Gula Muklisto mumoshi wafuisa mulumi’enji nga mukaji’enji, tudi naye gumukuatesa. Athu adizudile gale mu ulo adi gifua mitshi mbadi yakula hamoshi. Gungima dia ivo, miji yana gudilanga. Gula mutshi uko wavujiwa nga wamigina, uko wana gumona lamba. Luholo lumoshi nji, gula muthu wafisa mukaji’enji nga mulumi’enji, wana gudisagesa mu matangi masugu avula. Paula, * yago mulumi’enji wafile mu gisagumuisa udi muzuela egi: “Lujingu luami luasombegesele diago muavula, nu muila wangulebele. Ngatotesele futa diami wabonga. Ngakhalele muwambela mulumi’ami ndaga jiagasue ngakhalele najio. Tuakhalele musuanguluga hamoshi nu wakhalele gungukuatesa mu tangua dia lamba. Wakhalele gungutegelela tangua ngakhalele gumutela malamba ami. Ngavile gifua angubatula hakhatshi.”
Luholo lutshi tuajiya gukuatesa aphangi afishile alumi’awo nga akaji’awo? (Tala paragrafe 14-15) *
14-15. Luholo lutshi tuajiya guwalagana muthu wafuisa mulumi’enji nga mukaji’enji?
14 Luholo lutshi tuajiya guwalagana muthu wafisa mulumi’enji nga mukaji’enji? Ndaga ya ndando idi guta n’enji maga, ikhale ushigo gudivua muabonga nga ushigo mumona gima gia guzuela. Paula, yago tuazuelela guthunda udi muzuela egi: “Ngakotelesa egi gufua guana gulebesa athu muila. Ana guvua woma egi ajiya guzuela ndaga imoshi yabola. Uvi idi ndaga yabola gula ashigo muzuela nga gima.” Matangua ako, muthu udi nu gikenene ganago gukamba egi tumuwambele ndaga imoshi ya ndando. Paula udi muzuela egi: “Ngasuangulugile tangua phangi mumoshi wangudijigile egi, ‘Gufua gua mulumi’aye gua nguhana gikenene.’”
15 William, yago wafishile mukaji’enji udi muzuela egi: “Gula athu anguwambela ndaga jiabonga jiatshitshile mukaji’ami, yana gungusuanguluisa; yana gungutshiginyisa nji egi athu akhalele gumuzumba nu gumunemesa. Gutshita ngegi guakhalele
gungukuatesa muavula. Mbimbi jiawo jiakhalele gungukuatesa muavula, handaga mukaji’ami wakhalele nu ndando yavula gudi ame, nu wakhalele gifua gitshinyi gia muila wami.” Bianca wafishile yala udi muzuela egi: “Gula aphangi angutangela verse imoshi nga mbadi nu tuatshita nawo gisambu yana gungukuatesa. Tangua ana guzuelela ndaga jiatshitshile mulumi’ami, nu angutegelela, ngana gudivua muabonga.”16. (a) Luholo lutshi tuajiya gukuatesa muthu wafishile muthu wakhalele muene muzumba? (b) Mu gudivua nu Yakoba 1:27, ginemo gitshi tudi nagio?
16 Tudi naye gulandula gukuatesa aphangi afishile athu akhalele ene muzumba, luholo Luta wakuatesele Naomi. Paula, tuazuelela gutunda wazuelele egi: “Tangua mulumi’ami wafile, aphangi angukuatesele muavula. Gungima dia masugu, avutugile luko midimo yawo ana gutshita masugu agasue. Uvi lujingu luami luasombegesele diago muavula. Yana gukhala ndaga yabonga gula athu ajiya egi muthu udi nu gikenene udi naye gukuatesewa mbeji jiavula nga ivo yavula gungima dia mafua.” Athu akhalago luholo lumushi. Athu ako ana gudivua muabonga gungima dia matangua azonda. Uvi gudi ako, tangua diagasue ana gutshita ndaga akhalele mutshita nu muthu akhalele muzumba yonu wafile, yana guatuma ha gumuwunguluga. Athu agasue anago guvua gikenene luholo lumoshi. Tudi naye gujiya egi Yehowa watuhanele luendu nu ginemo gia gukuatesa athu afishile alumi’awo nga akaji’awo.—Tanga Yakoba 1:27.
17. Mukunda natshi tudi naye gukuatesa athu anyi alumi’awo a abembele?
17 Akhetu ako ana gumona lamba diavula nu ana guvua gikenene giakola gula alumi’awo a atuna. Joyce, yago mulumi’enji wamutunyile udi muzuela egi: “Lamba mukhetu wana guvua gula ulo wafua diakhala diakola gubalega dinyi ana guvua gula yala wafua. Gula wafile mu aksida nga gu misongo, ishigo muene watshiginyile egi ndaga yene ibue ngenyi. Uvi ame, mulumi’ami wazudile desizio dia gungubemba. Yana gunguhana musonyi wavula.”
18. Itshi tuajiya gutshita ha gukuatesa athu afishile alumi’awo nga akaji’awo?
18 Gukalegela aphangi afishile alumi’awo nga akaji’awo ndaga nu gisemo, guana gumonesa egi tuana guazumba diago. Akhala nu funu ya mafuta abonga handaga ana gujinga hakhawo. (Ish. 17:17) Luholo lutshi wajiya gumonesa egi udi futa diawo diabonga? Wajiya guatamega gumbo diaye ha gudia nawo. Wajiya nji gubalegesa nawo tangua ha gudikenesa nga mu mudimo wa gulongesa. Luko, wajiya guatamega ha gutshita nawo hamoshi gukombelela gua mu fami. Gula watshita ngenyi, Yehowa mbawusuanguluga handaga muene udi ‘hehi nu athu adi nu gikenene’ nu udi ‘mubambi wa akhetu a gafunda.’—Ngi. 34:18; 68:5.
19. Mu mukanda wa 1 Phetelo 3:8 idi gutoga ha gutshita itshi?
19 Tangua Ufumu wa Nzambi mbawuhinyina ha mavu, ‘malamba agasue a mualeha mbaabuitshiwa mutshima.’ Tuana gunengena tangua “milonga ya mualeha mbayijimbidiwa diago, mbayiwungulugiwago luko.” (Yesh. 65:16, 17, NTW) Sendese mangimo, tudikuatesenu nu tumonesenu mu mbimbi nu mu makelegelo etu egi, tuana guzumba aphangi etu agasue a mu fami ya Uklisto.—Tanga 1 Phetelo 3:8.
LUNGIMBO 111 Nzambi wana Gutusuanguluisa
^ par. 5 Lota, Yobo, nu Naomi akhalele mukombelela Yehowa nu mutshima umoshi, uvi ataganele nu malamba avula mu lujingu luawo. Longo edi, diza mumonesa malongo tuajiya guzula mu ndaga ataganele najio. Diza luko muzuelela mukunda natshi idi nu ndando ha gumonesa khadilo dia guhuiminyina nu khenda, nu ha guzuela nu gisemo gudi aphangi adi mutagana nu malamba.
^ par. 13 Mu longo edi, majina ako asombegesewa.
^ par. 57 UKOTELESHI WA IFUANESA: Mukulu mumoshi udi mutegelela phangi mumoshi udi muvua khabu nu udi muzuela “izuele-zuele.” Gungima ha tulumuga phangi muene, na mukulu wasendesa giwa gumuhana malongo atagana.
^ par. 59 UKOTELESHI WA IFUANESA: Phangi mumoshi nu mukaji’enji adi mubalegesa tangua nu phangi wa yala mumoshi wakatuga gufuisa mukaji’enji. Adi muzuelela ndaga jiabonga jiatshitshile mukaji’enji.