LONGO DIA 25
Sha Mutshima Gudi Yehowa Tangua udi nu Gikenene
“Ngudi . . . nu gikenene giavula.”—1 SAM. 1:15, NWT.
LUNGIMBO 30 Sh’ami, Nzambi Wami nu Futa Diami
NDAGA JIDI MU LONGO EDI *
1. Mukunda natshi tudi naye gutegelela mbimbi jia Yesu?
MU PROFESI yenji yatadila masugu a gisugishilo, Yesu wazuelele egi: “Dibambenu hagula mitshima yenu inemigo nu . . . gudisagesa gua lujingu,” yakotelesa gikenene gia ima ya gujingila. (Luka 21:34) Mukunda natshi tudi naye gutegelela mbimbi eji? Handaga tuana gutagana nu malamba a luholo lumoshi nu athu agasue.
2. Malamba atshi akola aphangi etu a mala nu akhetu atagenele nawo?
2 Matangua ako, tuana gutagana nu malamba avula mu tangua dimoshi. Tutadile ifezegeselo eyi yalandula. Phangi John * nu mukaji’enji atagenesele ivo 19 mu ulo, uvi tangua John wakatele misongo ya sclérose, mukhetu wamulengele, hene, wavile gikenene giavula diago. Gungima, an’enji a akhetu mbadi abembele gukombelela Yehowa. Phangi Bob nu mukaji’enji Linda atagenele nji nu malamba, uvi akhalele a gudisha nu a John. Midimo yawo yafile, nu a azolele mu inzo akhalele mujinga. Luko, minganga yawambelele Linda egi wakhalele mukata misongo yakola ya mutshima, nu misongo iko yasendesele gubolesa ba anticorps enji.
3. Filiphi 4:6, 7 idi muzuela itshi mukunda nu Yehowa?
3 Tuajiya gusha mutshima egi Yehowa Mufugi wetu wa guzumba, wana gukotelesa luholo tuana gudivua tangua tudi nu gikenene. Luko, wana gukhala hehi ha gutukuatesa ha gulua nu malamba tuana gutagana nawo. (Tanga Filiphi 4:6, 7.) Mbimbi ya Nzambi idi nu mene jiavula jidi mumonesa malamba akombeledi a Nzambi ataganele nawo. Idi mumonesa luko luholo Yehowa waakuatesele ha gulua nu malamba ene. Tutadilenu mene jiko mukatshi dia mene jiene.
ELIYA—‘WAKHALELE MUTHU NU MATANGI GIFUA ESUE’
4. Malamba atshi Eliya wataganele nawo, nu luholo lutshi wadivile mukunda nu Yehowa?
4 Eliya wakhalele mukalegela Yehowa mudimo mu tangua dia lamba nu wataganele nu malamba akola. Mu sungi yene fumu Ahaba, wakhalele mukatshi dia mafumu a gu Isalele anyi akhalelego agujinginyina gudi Yehewa, wazudile Yezabele mukombeledi wa Bale mu ulo. Muene nu mukaji’enji azalesele gifutshi giagasue nu akombeledi a Bale nu ashiyile ba profete a Yehowa avula. Eliya walengele. Luko, gafilego gu nzala luholo washile mutshima gudi Yehowa. (1 Maf. 17:2-4, 14-16) Eliya washile nji mutshima gudi Yehowa tangua ashile giphapha nu ba profete nu akombeledi a Bale. Wawambelele enya Isalele ha gukombelela Yehowa. (1 Maf. 18:21-24, 36-38) Eliya wamonele diago luholo Yehowa wamubambele nu wa mukuatesele mu matangua ene a lamba.
Yehowa watumine muanjelo wenji ha gukuatesa Eliya hagula ahete luko ngolo (Tala paragrafe 5-6) *
5-6. Ha gutadila 1 Mafumu 19:1-4, luholo lutshi Eliya wadivile, nu luholo lutshi Yehowa wamonesele egi wakhalele gumuzumba?
5 Tanga 1 Mafumu 19:1-4. Eliya wavile woma tangua Fumu wa mukhetu Yezabele wakambele gumushiya. Hene walengele ha guya gu Bele-sheba. Wavile gikenene nu ‘watogele egi afue genji.’ Mukunda natshi gadivile ngenyi? Eliya gakhalelego muthu watagana, uvi ‘wakhalele muthu nu matangi gifua esue.’ (Yak. 5:17) Yajiya gukhala wakhalele nu gikenene giavula nu wakhalele yaguhuila muavula. Idi mumonega gifua Eliya wakhalele mutangiza egi, ngolo jiakhalele mutshita muene mukunda nu gikombelelo gia giamatshidia jiakhalele jia gituhu, guakhalelego nga gima giabonga gu Isalele, nu phamba muene hakhenji wasalele mukombelela Yehowa. (1 Maf. 18:3, 4, 13; 19:10, 14) Tuajiyilego guyituga luholo profete wa Yehowa wadivile ngenyi. Uvi Yehowa wakotelesele matangi a Eliya.
6 Yehowa gabalelego Eliya mukunda wamuwambelele luholo wakhalele gudivua. Uvi, wamukuatesele ha guheta luko ngolo. (1 Maf. 19:5-7) Gungima, Yehowa wamudijigile ngolo jienji hagula asombegese luholo luenji lua gutangiza. Yehowa wamudijigile egi wakhalele nu akombeledi ako gu Isalele 7 000 anyi atunyile gukombelela Bale. (1 Maf. 19:11-18) Wamuhanele ifezegeselo eyi ha gumumonesa egi wakhalele gumuzumba.
LUHOLO YEHOWA MBAWUTUKUATESA
7. Longo ditshi tuajiya guheta mu luholo Yehowa wakuatesele Eliya?
7 Aye nji udi mutagana nu ndaga idi gugusagesa ba? Tuana gusuanguluga muavula ha gujiya egi Yehowa wakotelesele matangi a Eliya! Ndaga yene idi gututshiginyisa egi wana gukotelesa malamba etu. Wana gujiya ndaga tuajiya gutshita nu jinyi tuajiyilego gutshita, wana gujiya nji matangi etu nu luholo tuana gudivua. (Ngi. 103:14; 139:3, 4) Gula tudi musha mutshima gudi Yehowa gifua Eliya, mbawutukuatesa ha gulua nu malamba adi gutuhana gikenene.—Ngi. 55:22.
8. Luholo lutshi Yehowa mbawugukuatesa ha gubinga gikenene?
8 Gikenene giajiya gugutuma ha gutangiza egi malamba aye mbashigo muhua. Gula idi ngenyi, jiya egi Yehowa mbawugukuatesa ha gubinga gikenene. Mbawugukuatesa gikuatshi? Udi gugutoga ha gumuwambela malamba aye agasue. Muene mbawuvua gudila guaye. (Ngi. 5:3; 1 Phet. 5:7) Hene, kombelela Yehowa muavula mukunda nu malamba ene. Mbawushigo muvua dijui dia Yehowa mu dilu gifua muavile Eliya, uvi mbawumutegelela mu njila ya Biblia nu ya organizasio wenji. Mene udi mutanga mu Biblia jiajiya guguhana ngolo nu felela. Luko, aphangi a mala nu a akhetu ajiya guguhana ngolo.—Lomo 15:4; Heb. 10:24, 25.
9. Luholo lutshi futa wa mutshima wajiya gutukuatesa?
9 Tangua Yehowa wawambelele Eliya ha guhana midimo yenji iko gudi Elisha, wamuhanele futa diabonga wakhalele naye gumukuatesa gula wavua gikenene. Luholo lumoshi nji, gula tuawambela futa dietu wa mutshima luholo tudi gudivua, wajiya gutukuatesa ha gubinga gikenene. (2 Maf. 2:2; Ish. 17:17) Gula wamona egi ushigo nga muthu wajiya guwambela ndaga idi gugusagesa, toga Yehowa agukuatese hagula uhete phangi wa gukula mu nyuma wajiya gugukuatesa.
10. Luholo lutshi ndaga jiataganele najio Eliya jidi gutuhana felela, nu luholo lutshi felela didi mu Yeshaya 40:28, 29 diajiya gutukuatesa?
10 Yehowa wakuatesele Eliya ha gubinga gikenene nu ha gumukalegela mudimo nu gujinginyina guagasue mu ivo yavula. Ndaga jiataganele najio Eliya jiana gutuhana felela. Matangua ako tuajiya gukhala nu gikenene giavula giajiya gutulebesa muila nu gutusagesa mu matangi. Uvi, gula tuasha mutshima gudi Yehowa, mbawutuhana ngolo tudi najio funu ha gulandula gumukombelela.—Tanga Yeshaya 40:28, 29.
ANA, DAVIDI, NU “ASAFE” ASHILE MUTSHIMA GUDI YEHOWA
11-13. Gikenene giatumine akombeledi a Yehowa thathu a mu tangua dikulu ha gutshita itshi?
11 Mu Biblia mudi nu athu ako ataganele nji nu malamba akola. Ha gufezegesa, mufagaji (mbanda) wa Ana wakhalele gumulela muavula handaga wakhalele gikunya (kisula), ndaga yene yakhalele gumuhana musonyi. (1 Sam. 1:2, 6) Luholo Ana wakhalele nu gikenene giavula, muila wamulebele, wakhelele mudila muavula nu gakhalelego luko muvua nzala.—1 Sam. 1:7, 10.
12 Matangua ako, Fumu Davidi wakhalele muvua gikenene giavula. Wakhalele muvua gikenene giene mukunda nu gubola guavula guatshitshile muene. (Ngi. 40:12) Mun’enji Abasaloma wamubalumugile, ndaga yene yabatele Abasaloma gu gufua. (2 Sam. 15:13, 14; 18:33) Luko, futa dia Davidi wa mutshima wamuhilugile. (2 Sam. 16:23–17:2; Ngi. 55:12-14) Ngimbo jiavula jiasonegele Davidi jiana gumonesa luholo galebele muila nu luholo washile mutshima wenji wagasue gudi Yehowa.—Ngi. 38:5-10; 94:17-19.
Itshi yakuatesele muyimbi wa ngimbo ha gukombelela luko Yehowa nu gusuanguluga? (Tala paragrafe 13-15) *
13 Muyimbi wa ngimbo mumoshi wasendesele gusuangulugila lujingu lua athu abola. Yajiya gukhala ngimba muene wakhalele mujigulu wa Asafe, nu wakhalele mukalagala mudimo mu ‘inzo ya Nzambi’. Ngimba muene wakhalele nu gikenene giavula, gakhalelego nu gusuanguluga. Wasendesele guhaga ba dute mu ishimbigo tuana guheta gula tudi mukombelela Nzambi.—Ngi. 73:2-5, 7, 12-14, 16, 17, 21.
14-15. Ifezegeselo thathu ya Biblia yatadila gutoga ukuateshi gudi Yehowa idi gutulongesa itshi?
14 Akombeledi awa thathu a Yehowa atangewa haha akhalele musha mutshima mu ukuateshi wa Yehowa. Akhalele gumuwambela malamba awo mu gisambu. Akhalelego gumusuegela gishina akhalele muvila gikenene. Alandudile nji guya gu inzo ya gukombelela ya Yehowa.—1 Sam. 1:9, 10; Ngi. 55:22; 73:17; 122:1.
15 Yehowa wahanele muthu wagasue mukatshi diawo mvutu nu guzumba guagasue. Ana wahetele guhuima mu matangi. (1 Sam. 1:18) Davidi wasonegele egi: ‘Muthu wabonga udi mumona malamba avula, uvi Yehowa udi gumuhuluisa gu malamba ene agasue.’ (Ngi. 34:19) Gungima muyimbi wa ngimbo wavile gifua Yehowa ‘wakuatele koko dienji dia madia,’ wamutuamezele nu malongo awaha. Wayimbile egi: ‘Uvi ame, gukhala hehi nu Nzambi gudi gusuanguluga guami. Yehowa Fumu wami udi fundo ngana gulengela.’ (Ngi. 73:23, 24, 28) Ifezegeselo eyi idi gutulongesa itshi? Matangua ako, tuajiya gutagana nu ndaga jiajiya gutuhana gikenene giavula. Uvi tuajiya gubinga gikenene giene, gula tudi mutangigiza luholo Yehowa wakuatesele athu ako, tuamushila mutshima mu gisambu nu tuatshita ndaga jidi muene gututoga.—Ngi. 143:1, 4-8.
SHILA YEHOWA MUTSHIMA HAGULA UBINGE
Thomo, phangi wa mukhetu wazudile desizio dia gudikhadila, uvi ndaga jiabongele tangua gakambele luholo lua gukuatesa athu ako (Tala paragrafe 16-17)
16-17. (a) Mukunda natshi tushigo naye gutuna Yehowa nu akombeledi enji? (b) Luholo lutshi tuajiya guheta luko ngolo?
16 Ifezegeselo eyi thathu yatulongesa longo diko dia ndando, tushigo naye gutuna Yehowa nu akombeledi enji. (Ish. 18:1) Nancy, wakhalele muvua gikenene giavula tangua mulumi’enji wamubembele, udi muzuela egi: “Ngabalegesele masugu avula, ngakhalelego mutshigina gumona nga guzuelesa muthu mumoshi. Uvi, luholo ngakhalele gudikhalela hakhami, ngakhalele muvua luko gikenene giavula.” Luholo Nancy wazudile desizio dia gukuatesa athu ako akhalele mutagana nu malamba, yamukuatesele ha gusombegesa khadilo dienji. Udi muzuela egi: “Ngakhalele mutegelela tangua athu ako akhalele muzuelela malamba awo. Ngakotelesele egi gudisha ha fundo diawo, guangukuatesele ha gutuna gutangiza malamba ami.”
17 Tuajiya guheta luko ngolo gula tudi muya mu gudibungisa gua mu hungu. Tangua tudi mu gudibungisa gua mu hungu, tuana guhana Yehowa njila ha gukhala ‘mukuateshi nu muwalaganyi’ wetu. (Ngi. 86:17) Mu gudibungisa, Yehowa wana gutuhana ngolo mu njila ya nyuma yenji, mu njila ya Biblia nu mu njila ya akombeledi enji. Gudibungisa guana gutuhana luendu lua gusuanguluga ha “gudihana gikhesa (ngolo).” (Lomo 1:11, 12) Phangi Sophia wazuelele egi: “Yehowa nu aphangi angukuatesele ha gukolesela. Ndaga ya gubalega ndando mukunda nu ame idi guya mu gudibungisa gua mu hungu. Ngakotelesele egi, gula ngudi mutshita mudimo wa gulongesa muavula nu wa mu hungu, ngana gukatula gikenene nu nganago gudisagesa luko.”
18. Itshi Yehowa wajiya gutuhana gula tualeba muila?
18 Gula muila watuleba, tudi naye gujiya egi Yehowa gashigo phamba gutulaya ha gukatula gikenene mayilago mu masugu adi muza, uvi wana gutukuatesa ha gubinga malamba tudi mutagana nawo. Wana gutuhana ‘ngolo nu nzala’ ya gubinga guleba gua matangi nu ha gukhala nu felela.—Fili. 2:13.
19. Mukanda wa Lomo 8:37-39 udi gutuhana laji ditshi?
19 Tanga Lomo 8:37-39. Mupostolo Phaula udi gututshiginyisa egi gushigo nga gima giajiya gutukhaphumuna nu guzumba gua Nzambi. Luholo lutshi tuajiya gukuatesa aphangi a mala nu a akhetu ha gubinga gikenene? Longo dialandula mbaditumonesa luholo tuajiya gulandula gifezegeselo gia Yehowa ha gudisha ha fundo dia athu ako nu guakuatesa tangua adi nu gikenene.
LUNGIMBO 44 Gisambu gia Enya Gudibulumuisa
^ par. 5 Gula tudi nu gikenene giavula, nu giatshita masugu avula, giajiya gutuhana lamba mu muila nu mu matangi. Luholo lutshi Yehowa wajiya gutukuatesa? Tuza mumona luholo Yehowa wakuatesele Eliya ha gulua nu gikenene. Ifezegeselo iko idi mu Biblia iza gutumonesa luholo tuajiya gukamba ukuateshi gudi Yehowa tangua tudi nu gikenene.
^ par. 2 Mu longo edi, majina ako asombegesewa.
