LONGO DIA 23
‘Temienu Hagula Muthu Gamibuishigo Gifua Ahiga’!
‘Temienu hagula muthu gamibuishigo gifua ahiga nu ndunge jia ha mavu nu mbimbi jia mambo jidi gudivua nu malongo a athu.’—KOL. 2:8.
LUNGIMBO 96 Mukanda wa Nzambi
NDAGA JIDI MU LONGO EDI *
1. Ha gutadila Kolosai 2:4, 8, luholo lutshi Satana wana guwunganesa matangi etu?
SATANA wana gutshigina egi tubembe guzumba Yehowa. Ha gutagenesa felela dienji, wana gukamba gusombegesa matangi etu, wana guawunganesa hagula tukhale gumutumagela muene. Wana gukalegela nzala jietu ha gututshiginyisa nu gutuhuiga hagula tumulandule.—Tanga Kolosai 2:4, 8.
2-3. (a) Mukunda natshi tudi naye gutadila muabonga ndaga jidi mu Kolosai 2:8? (b) Itshi tuza muzuelela mu longo edi?
2 Tudi diago mu gingonza gia guhuigiwa gudi Satana ba? Ayi idi ngenyi! Jiya egi Phaula gasonegelego mbimbi jidi mu Kolosai 2:8 mukunda nu aphagano. Uvi wajisonegele mukunda nu Aklisto ambiwe maji mu nyuma. (Kol. 1:2, 5) Aklisto ene akhalele mu gingonza gia guhuigiwa mu tangua diene, esue nji tudi mu gingonza giakoma mangino. (1 Kol. 10:12) Mukunda natshi? Satana wabishidiwe ha mavu, nu wana gukamba gudimba akombeledi a gujinginyina a Yehowa. (Yat. 12:9, 12, 17) Luko, tudi mujinga mu sungi athu abola nu enya mambo ‘gubola guawo gudi gudivudisa.’—2 Tim. 3:1, 13.
3 Mu longo edi, tuza muzuelela luholo Satana wana gukalegela ‘mbimbi jia mambo’ ha guwunganesa matangi etu. Tuza mujiya ‘bametode’ thathu mukatshi dia ndaga Satana wana gukalegela. (Ef. 6:11) Gungima, mu longo dialandula mbatumona luholo tuajiya gukanga bametode a Satana njila hagula abolesago matangi etu. Uvi, tuzuelelenu thomo malongo tuajiya guzula mu luholo Satana wahuigile enya Isalele tangua anginyile mu Mavu a Gutendelela.
SATANA WALOLELE ENYA ISALELE HA GUKOMBELELA NZAMBI JIA ISONGO
4-6. Ha gutadila Mikhuala 11:10-15, usombegeshi utshi watadila bametode a gudima mahia enya Isalele akhalele naye gutshita tangua anginyine mu Mavu a Gutendelela?
4 Satana walolele enya Isalele ha gukombelela Nzambi jia isongo. Luholo lutshi? Wakhalele mujiya egi akhalele nu funu ya ima ya gudia, hene wakalegele nzala jiawo ha guatuma hagula atshite gutshigina guenji. Hanginyine enya Isalele mu Mavu a Gutendelela, akhalele naye gusombegesa maluholo awo a gukuna mbuto. Tangua akhalele gu Egypte, akhalele mukalegela meya a muta wa Nile ha gumbila mbuto jia mu ilanga yawo. Uvi, luholo gu Mavu a Gutendelela guakhalelego mita yakoma, ha gukuna mbuto akhalele nu funu ya meya a mvula nu mawume. (Tanga Mikhuala 11:10-15; Yesh. 18:4, 5) Hene, enya Isalele akhalele naye gulonguga bametode ahe-ahe a gudima. Yakhalelego ndaga yaleba, handaga athu avula mukatshi diawo akhalele mujiya luholo lua gudima mahia, afile mu mavu a luselenga.
Luholo lutshi Satana wabingile ha gusombegesa matangi a adimi a mahia a enya Isalele? (Tala paragrafe 4-6) *
5 Yehowa wakotelesele athu enji egi lujingu luawo luakhalele naye gusombegesa. Gungima waawambelele ndaga eji jialandula jiakhalele mumonega gifua jishigo gudivua nga hazonda nu gudima mbuto, wazuelele egi: ‘Temienu, mudidimbigo mu mitshima yenu, nu mujimbilago njila ha gutshitshila nzambi jiko mudimo nu gujikombelela.’ (Mikh. 11:16, 17) Mukunda natshi Yehowa watemesele akombeledi enji ha gutuna gukombelela nzambi jia isongo tangua akhalele muzuelela bametode ahe-ahe a gudima mahia?
6 Yehowa wajiyile egi, enya Isalele ajiya gulonguga bametode a gudima gudi aphagano akhalele mujinga nawo hehi. Yadiago, aphagano akhalele mujiya muabonga gudima mahia gubalega enya Isalele, Lutang. 25:3, 5; Manz. 2:13; 1 Maf. 18:18) Uvi tala luholo Satana wabuishile enya Isalele ahiga enji.
hene enya Isalele akhalele naye gulonguga ndaga jiko gudi athu ene, uvi akhelele mu gingonza. Adimi a mahia a gu Kanana akhalele mukombelela Bale nu akhalele muhaga mutshima gu gikombelelo giene. Akhalele mutangiza egi, Bale muene fumi’a dilu, nu muene wakhelele munogesa mvula. Yehowa gatshiginyilego egi athu enji adimbiwe gu gikombelelo gia mambo. Uvi, matangua avula, enya Isalele akhalele gawo mukombelela Bale. (BAMETODE THATHU SATANA WAKALEGELE HA GUBUISA ENYA ISALELE AHIGA
7. Ndaga itshi yalolele gutshigina gua enya Isalele tangua anginyine mu Mavu a Gutendelela?
7 Metode a thomo Satana wakalegele akhalele nzala enya Isalele akhalele nayo ya gumona mvula mutebesa mavu. Mu Mavu a Gutendelela, gishiyo giakhelele musendesa gusuga ya mbeji ya Avril uu nu mu Septembre. Ha guzola mbuto jiavula nu gujinga muabonga enya Isalele akhalele nu funu ya mvula yakhelele musendesa mu mbeji ya Octobre. Satana waahuigile ha gutshigina egi, ha guheta mbuto jiavula akhalele naye gulandula kutime jia aphagano anyi akhalele mujinga nawo hehi. Ifutshi inyi akhalele mujinga naye hehi, yakhalele mutangiza egi adi naye gutshitshila nzambi jiawo ndaga imoshi ngenyi hagula jinogese mvula. Athu anyi akhalelego nu gutshigina gudi Yehowa akhalele mutangiza egi, adi naye gutshita ndaga jia aphagano ha gutumbuisa nzambi ya mambo Bale hagula gishiyo gishiphigo.
8. Metode a mbadi Satana wakalegele akhalele itshi? Kotelesa.
8 Metode a mbadi Satana wakalegele ha gubuisa enya Isalele ahiga akhalele ngina jia muila jiabola. Ifutshi ya aphagano yakhalele mutshita ndaga jia musonyi ha gukombelela nzambi jiawo. Mukatshi dia ndaga jiene, tudi mutanga tempelo akhetu nu mala akhalele mukalegela uthambi. Ifutshi yene yakhalelego phamba mubemba egi mala abungise muila nu mala nga gutshigina ndaga jiko jia musonyi, uvi yakhalele mumona egi ndaga jiene jidi diago jiabonga! (Mikh. 23:17, 18; 1 Maf. 14:24) Aphagano akhalele mutshigina egi gutshita ndaga jiene, guakhalele mutuma nzambi jiawo jishimbige mavu hagula azole mbuto jiavula. Enya Isalele avula asendesele gutshita ndaga jia musonyi jia aphagano nu gukombelela nzambi jia isongo. Yadiago, abuile ahiga a Satana.
9. Ha gutadila Hosheya 2:16, 17, luholo lutshi Satana watshitshile egi enya Isalele ajimbile Yehowa?
9 Metode a thathu Satana wakalegele enyawa: wa unganesele matangi a enya Isalele hagula ajimbile Yehowa. Mu masugu a profete Yelemiya, Yehowa wazuelele egi ba profete a mambo atumile athu Enji ha gujimbila jina Dienji “mukunda nu Bale.” (Yel. 23:27) Yajiya gukhala egi akombeledi a Nzambi abembele gukalegela jina dia Yehowa, asendesele gukalegela jina dia Bale, yakotelesa egi “Fumi’a naye” nga ndo “Fumu.” Hene yakhalele lamba gudi enya Isalele ha gukhaphumuna gudisha guakhalele mukatshi dia Yehowa nu Bale; ngenyi, yakhalelego lamba gudi ene ha gubungisa ndaga jia gikombelelo gia Bale nu gia Yehowa.—Tanga Hosheya 2:16, 17.
BAMETODE SATANA WANA GUKALEGELA MANGINO
10. Ba metode atshi Satana wana gukalegela mangino?
10 Mangino, Satana wana gukalegela bametode akhalele mukalegela muene mu tangua dikulu. Ha gubuisa athu ahiga, wana gukalegela nzala jia muila, ndaga jia
musonyi, nu wana guwunganesa matangi a athu hagula ajimbile Yehowa. Tuzuelelenu thomo luholo Satana gadi muwunganesa matangi a athu hagula ajiyigo Yehowa.11. Luholo lutshi Satana wawunganesele matangi a athu hagula ajimbile Yehowa?
11 Satana wana guwunganesa matangi a athu hagula ajimbile Yehowa. Tangua apostolo a Yesu agasue afile, athu anyi akhalele guditamega egi Aklisto asendesele gulongesa athu ndaga jia mambo. (Makal. 20:29, 30; 2 Tes. 2:3) Apostolo a mambo asendesele gutotesa jina dia Nzambi wa giamatshidia. Ha gufezegesa, akatudile jina dia Nzambi wa giamatshidia mu Bilblia jiawo, nu ambile majina gifua “Fumu.” Luholo akatudile jina dia Nzambi ha gumba jina dia “Fumu,” yakhalele lamba gudi athu ana gutanga Biblia ha gumona gudisha gudi mukatshi dia Yehowa nu “mafumu” ako ana gutangewa mu Biblia. (1 Kol. 8:5) Ana gutamega Yehowa nu Yesu egi, “Fumu,” ngenyi yakhala lamba gudi athu ha gukotelesa egi Yehowa nu Mun’enji Yesu adi a gudisha. (Yone 17:3) Gutunganesa ndaga luholo elu guakudishile longo dia Uthathu—longo edi dishigo mu Biblia. Hene, athu avula ana gumona gifua ajiyilego gujiya Nzambi nga hazonda. Uvi ndaga yene idi diago mambo akoma!—Makal. 17:27.
Luholo lutshi Satana wakalegele gikombelelo gia mambo ha gusunzula ndaga jia musonyi? (Tala paragrafe 12) *
12. Gikombelelo giabola giakhalele mutuma athu ha gutshita itshi? Ha gutadila Lomo 1:28-31 mbuto itshi yazolele?
12 Satana wana gukalegela ndaga jia musonyi. Satana wakalegele gikombelelo gia mambo ha gutuma enya Isalele ha gutshita ndaga jia musonyi. Mangino nji wana gutshita ngenyi. Gikombelelo gia mambo gianago gutunyisa ndaga jia musonyi, nu giana gujimonesa gifua jidi jiabonga. Hene, athu avula ana guditamega egi akombeledi a Nzambi anago gunemesa mikhuala yenji. Tangua mupostolo Phaula wasonegele Aklisto a gu Roma mukanda, waamonesele mbuto yabola ndaga yene yazolele. (Tanga Lomo 1:28-31.) Mukatshi dia ‘ndaga jiabola,’ tuajiya gutanga: Ndaga jia musonyi jia maluholo agasue nu gubungisa muila yala nu yala. (Lomo 1:24-27, 32; Yat. 2:20) Gutumagela malongo a Biblia gudi nu ndando!
13. Metode tshi ako Satana wana gukalegela ha gubuisa athu ahiga?
13 Satana wana gukalegela nzala jia muila. Tuana guvualewa nu nzala ya gulonguga ndaga jiavula jiajiya gutukuatesa ha gukamba ima ya gujingila mukunda esue 1 Tim. 5:8) Tuajiya gujiya ndaga jiene jiavula gula tuangina khalasa nu tualonguga muabonga. Uvi tudi naye gumonesa gutema. Makhalasa a mu ifutshi iko anago gulongesa ana ha gukalegela ndunge jiabonga uvi ana gualongesa ha gukalegela ndunge jia athu. Makhalasa ako ana gulongesa ana a khalasa egi Nzambi gakhalago guene, ana gualongesa nji ha gutuna gunemesa Biblia. Ana gulongesa ana egi ima yagasue yafugiwego uvi yadizogelele. (Lomo 1:21-23) Malongo awa anago gudivua nga hazonda nu ‘ndunge jia Nzambi.’—1 Kol. 1:19-21; 3:18-20.
nu mukunda nu fami yetu. (14. Ndunge jia athu a ha mavu jiana gusunzula athu ha gutshita itshi?
14 Ndunge jia athu jiana gutuna mikhuala ya Yehowa nu jianago guyitumagela. Jianago gutuma athu ha gumonesa bundu dia nyuma ya Nzambi, uvi jiana guatuma ha gutagenesa ‘midimo yabola ya muila.’ (Gal. 5:19-23) Jiana gusunzula khadilo dia lulendo, hene athu ana ‘gudizumba ene hakhawo.’ (2 Tim. 3:2-4) Makalegelo awa abola anago gudivua nu khadilo dia guhuiminyina nu dia gudibulumuisa akombeledi a Nzambi adi naye gukhala nadio. (2 Sam. 22:28) Aklisto ako ana gulandula makhalasa aleha ana gusendesa gutangiza gifua enya ha mavu, uvi anago gutangiza gifua luholo Nzambi wana gutangiza. Tutadile ndaga yajiya gibua gula tushigo mujiya gingonza gia gulenga.
Luholo lutshi ndunge jia athu jiajiya gubolesa matangi etu? (Tala paragrafe 14-16) *
15-16. Longo ditshi wazula mu eksperianse ya phangi mukhetu owu?
15 Phangi mumoshi wa mukhetu watshitshile gale ivo 15 mu mudimo wa tangua diagasue udi muzuela egi: “Luholo ngudi
Temue wa Yehowa, ngakhalele muvua nu gutanga ingoza yatadila gulandula makhalasa a leha, uvi ngakhalelego guyimoma gifua gingonza. Ngakhalele mutangiza egi malongo ene akhalelego gungutadila ame.” Uvi malamba tshi gataganele nawo gungima? Udi muzuela egi: “Luholo ngakhalele mubalegesa tangua diavula gu khalasa, ngakhalelego luko nu tangua dia gusamba Yehowa gifua hathomo, ngakhalelego luko mulongesa athu Biblia nu gulondega gudibungisa gua mu hungu mukunda nu guhuila. Uvi, tangua ngakotelesele egi gulandula makhalasa a leha guajiya gubolesa ufuta wami nu Yehowa, ngazudile desizio dia gubemba. Hene ngabembele diago.”16 Luholo lutshi makhalasa aleha asombegesele utangijilo wa phangi wa mukhetu? Phangi muene udi muzuela egi: “Idi ndaga ya musonyi ha guzuela egi khalasa ngakhalele mulandula dia ngulongesele ha gutala phamba gubola gua aphangi mu hungu, nu ngakhalele muenya ndaga jiakola gudi aphangi, ngakhalelego mukhala nawo fundo dimoshi. Yatogele tangua diavula ha gusombegesa matangi ami. Eksperianse yene yangukuatesele ha gukotelesa egi gutuna guvua malongo Yehowa wana gutuhana mu njila ya organizasio wenji gudi gingonza. Yehowa wana gungujiya muabonga gubalega ame hakhami. Nga ngajiyile, nga ngavuile gami!”
17. (a) Tudi naye guzula desizio dia gutshita ndaga tshi? (b) Itshi mbatuzuelela mu longo dialandula?
17 Zula desizio dia gutuna gubua muhiga wa ‘mbimbi jia mambo nu ndunge’ jia ha mavu awa a Satana. Uhanyigo nga hazonda njila gudi Satana ha guguhuiga. (1 Kol. 3:18; 2 Kol. 2:11) Ubembembigo egi awunganese matangi aye hagula ujimbile Yehowa. Tumagela mikhuala ya Yehowa. Ubembimbigo egi Satana aguhuige hagula ujimbile malongo a Yehowa. Uvi itshi wajiya gutshita gula wajiya egi wana gutangiza gale gifua athu a ha mavu awa? Longo dialandula mbaditumonesa luholo Mbimbi ya Nzambi yajiya gutukuatesa ha gubinga makalegelo nu matangi adi gifua ‘phango jiakola jia seso.’—2 Kol. 10:4, 5.
LUNGIMBO 49 Suanguluisa Yehowa
^ par. 5 Satana udi muhuigi wakoma wa athu. Wana gudimba athu avula ha gutshigina egi adi mu diphanda, uvi waabuishile gale ahiga enji. Longo edi diza gutumonesa bametode Satana wana gukalegela ha guhuiga athu.
^ par. 48 UKOTELESHI WA IFUANESA: Enya Isalele adibungisa nu enya gu Kana, adi mulolewa ha gukombelela Bale nu gutshita ndaga jia musonyi.
^ par. 51 UKOTELESHI WA IFUANESA: Pankarte idi nu mbimbi jia enya dingumba idi musunzula ulo wa mala nu mala.
^ par. 53 UKOTELESHI WA IFUANESA: Ndombi udi mulongesa phangi wa mukhetu wayile mulonguga makhalasa a leha nu ana a khalasa ako egi, science nu téchnologie yajiya gumanesela malamba agasue a athu. Tangua adi mu Inzo ya Ufumu, gashigo luko musuanguluga nu aphangi nu udi nu ndaga jiakola.