1. Luholo lutshi mupostolo Phaula watemesele Aklisto ambiwe maji mu nyuma?

MUPOSTOLO Phaula watemesele Aklisto egi “bembienu gulandula ndaga jia ha mavu awa.” (Lomo 12:2, NWT) Phaula wasonegele mbimbi eji gudi Aklisto a mu siekle ya thomo. Mukunda natshi Phaula wakalegele mbimbi jia luholo elu ha gutemesa mala nu akhetu adihanele gale gudi Nzambi nu ambiwe maji mu nyuma?—Lomo 1:7.

2-3. Luholo lutshi Satana wana gubolesa ufuta wetu nu Yehowa, uvi luholo lutshi tuajiya gukatula ndaga jidi jia gujinginyina mu matangi etu?

² Yajiya gukhala egi Phaula wakhalele gudisagesa handaga Aklisto akhalele mulandula matangi abola nu ndaga jia mambo jia enya ha mavu a Satana. (Ef. 4:17-19) Esue nji tuajiya gutagana nu ndaga ya luholo elu. Luholo Satana udi fumu wa mavu awa, wana gukalegela bametode agudisha ha gubolesa ufuta wetu nu Yehowa. Ha gufezegesa, gula tudi gudizula nu ndando nga gukamba gujiyiwa, Satana mbawukalegela khadilo diene ha gubolesa ufuta wetu nu Yehowa. Wana gukalegela nji ndaga atulongesele mu fami, gu khalasa nga gudi athu tudi mujinga nawo hehi ha gututuma tutangize gifua muana tshigina muene.

³ Tuajiya gukatula ndaga jidi mu matangi etu jidi gifua ‘phango jiakola jia seso’ ba? (2 Kol. 10:4) Phaula wazuelele egi: ‘Esue tudi mumuanga matangi agasue nu gima giagasue gishigo gudivua nu ndaga Nzambi wana gutulongesa, esue tuana kuata matangi agasue a athu hagula atumagele Klisto.’  (2 Kol. 10:5) Yadiago, Yehowa wajiya gutukuatesa ha gusombegesa makalegelo abola. Luholo gihemba giajiya gulebesa ngolo jia puazo mu muila wa muthu, Mbimbi ya Nzambi yajiya nji gutukuatesa hagula matangi abola a ha mavu a Satana abolesago makalegelo etu.

4. Ndaga tshi athu avula mukatshi dietu asombegesele tangua atshiginyile giamatshidia?

⁴ Tangiza usombegeshi wakalegele tangua watshiginyile giamatshidia gia Mbimbi ya Nzambi, nu desizio wazudile dia gukombelela Yehowa. Athu avula mukatshi dietu, abembele ndaga jiabola ha gukombelela Yehowa. (1 Kol. 6:9-11) Tudi muhana diago Yehowa mersi luholo wana gutukuatesa ha gubinga makalegelo awa abola!

5. Ndaga tshi mbadi mukanda wa Lomo 12:2 udi gututoga ha gutshita?

⁵ Uvi, tushigo naye guzuela egi tuajiyilego gusombegesa. Ngatshima tuabembele gale gutshita gubola tuakhalele mutshita gutuama dia gubatijiwa, tudi naye gulandula gutshita ngolo ha gutuna ndaga yagasue yajiya gutulola ha guvutugila ndaga jikulu tuabembele gale. Luholo lutshi tuajiya guyikalagala? Phaula udi muhana mvutu egi: “Bembienu gulandula ndaga jia ha mavu awa, uvi balumugienu athu ahe-ahe nu matangi ahe-ahe.” (Lomo 12:2, NWT) Hene, tudi naye gutshita ndaga mbadi. Thomo, tudi naye ‘gubemba gulandula ndaga jia ha mavu’ awa. Ndaga ya mbadi, tudi naye ‘gubalumuga athu ahe-ahe’ nu gusombegesa luholo tuana gutangiza.

6. Longo ditshi tuajiya guzula mu mbimbi jia Yesu jidi mu Matayo 12:43-45?

⁶ Gubalumuga guakhalele muzuelela Phaula gushigo phamba mukotelesa usombegeshi wa gu meso. Uvi guakhalele mukotelesa gubalumuna ndaga jiagasue jia mu lujingu luetu. (Tala galuanda “ Ngasombegesele Diago Umuthu Wami, nga Ngasombegesele Phamba gu Meso?”) Tudi naye  diago gusombegesa matangi etu—makalegelo tuavualewe nawo, luholo tuana gudivua, nu nzala jietu. Hene, mukut’etu agasue tudi naye gudihula egi, ‘Usombegeshi ngakalegele ha gubua Muklisto wakhala wa gu meso, nga ngabuile diago Muklisto wa giamatshidia?’ Mvutu ya muhu owu idi nu ndando. Mu Matayo 12:43-45, Yesu wamonesele ndaga tudi naye gukalagala. (Tanga.) Mbimbi eji jidi gutuhana longo edi dia ndando: Tushigo naye gusuga phamba ha gukatula matangi abola, uvi tudi naye guahinganesa nu matangi Nzambi wana gutshigina.

7. Luholo lutshi tuajiya gusombesa umuthu wetu wa mukatshi?

⁷ Tuajiya gusombegesa makalegelo etu nga umuthu wetu wa mukatshi ba? Mbimbi ya Nzambi idi muhana mvutu egi: ‘Mudi naye gubalumuga athu ahe-ahe mu ngolo jidi mutuameza matangi enu, sudigenu umuthu uhe-uhe wafugiwe mu gudivua nu gutshigina gua Nzambi mu nduedi nu mu gujinginyina.’ (Ef. 4:23, 24) Hene tuajiya gusombegesa makalegelo etu, uvi yanago gukhala tangua diagasue yaleba ha guasombegesa. Tushigo naye phamba gukatula nzala jiabola nu makalegelo abola. Uvi tudi naye gusombegesa “ngolo jidi mutuameza matangi etu.” Yakotelesa gusombegesa nzala jietu, makalegelo etu nu matangi ana gututuma ha gutshita ndaga. Yana gutoga gutshita ngolo tangua diagasue.

8-9. Luholo lutshi eksperianse yataganele nayo phangi mumoshi idi mumonesa funu ya gusombegesa umuthu wetu?

⁸ Tutadilenu gifezegeselo gia phangi mumoshi wakhalele thomo muenya khuta. Wakhalele munua matombe avula nu guluisa athu, uvi wabembele makalegelo ene nu wabatijiwe. Athu a mu dimbo diawo asendesele gusuanguluga nu khadilo dienji. Uvi, masugu azonda gungima dia gubatijiwa guenji, watagenele nu ndaga yalolele gutshigina guenji mu ngueze imoshi ngenyi. Muthu mumoshi wakuatewe matombe wajile gumbo dienji ha gumuluisa. Thomo phangi muene wadikandele genji, watunyile gumuluisa. Uvi tangua muthu muene washingile jina dia Yehowa, phangi muene wavile khavu jiabala nu gadikandelego luko. Wakuatele muthu muene wamubetele. Mukunda natshi phangi watshitshile ngenyi? Ikhale gulonguga gua Biblia guamukuatesele ha gukatula khadilo dia khuta, uvi wakhalele khenji gasombegesago ngolo jiakhalele mutuameza matangi enji. Mu guzuela guko, wakhalele khenji gasombegesago umuthu wenji wa mukatshi.

⁹ Uvi, phangi muene gabembelego gusombegesa makalegelo enji. (Ish. 24:16) Akulu amukuatesele ha gulandula gukudisa makalegelo abonga. Gungima dienji wabuile mukulu. Lusugu lumoshi mu ngueze, tangua akhalele gutuama dia Inzo ya Ufumu, wataganele luko nu ndaga ya luholo lumoshi gifua inyi yalolele gutshigina guenji mu ivo yabalega. Muthu mumoshi wakolewe matombe wakhalele mutshigina gubeta mukulu mumoshi. Itshi phangi muene watshitshile? Wamuzonzele nu gudibulumuisa guagasue, wamutuluile mutshima nu wayile gumutuala gumbo dienji. Mukunda natshi mbala eyi phangi etu wakalegele ndaga mu luholo lua gudisha? Handaga wasombegesele ngolo jidi mutuameza matangi enji. Wabuile muthu wahuiminyina nu wagudibulumuisa. Khadilo diene diasuanguluishile Yehowa!

10. Itshi tudi naye gutshita ha gusombesa umuthu wetu?

¹⁰ Usombegeshi wene wanago guza lusugu lumoshi; nga gudijila hakhawo. Tudi naye gutshita “ngolo jiavula” mu ivo yavula. (2 Phet. 1:5) Usombegeshi wene wanago guza phamba handaga tuana gukombelela Yehowa sendese mualeha. Uvi tudi  naye gutshita ngolo ha gusombegesa umuthu wetu. Gudi nu ndaga tuajiya gutshita ha gusombegesa umuthu wetu. Tuzuelele ndaga jiko mukatshi dia ndaga jiene.

11. Luholo lutshi gisambu giajiya gutukuatesa ha gusombegesa ngolo jidi mutuameza matangi etu?

¹¹ Ndaga ya thomo ya ndando tudi naye gutshita idi gisambu. Tudi naye gutshita gisambu gifua muazuelele muyimbi wa ngimbo egi: ‘Nguhane mutshima wa phelegeta, O Nzambi, nguhane matangi ahe-ahe nu waakolese.’ (Ngi. 51:10) Tudi naye gujiya egi tudi nu funu ya gusombegesa ngolo jidi mutuameza matangi etu nu gutoga Yehowa ukuateshi. Mukunda natshi tuajiya gutshigina egi Yehowa mbawutukuatesa ha gusombegesa? Tuajiya guheta gikhesa mu laji diahanele muene enya Isalele a mitshima yakola a mu sungi ya profete Ezekiele egi: “Mbanguahua mutshima uhe-uhe, nu matangi ahe-ahe . . . nu mbanguahua mutshima wa tumaga.” (Ezek. 11:19) Yehowa wakuatesele enya Isalele nu mutshima umoshi hagula asombegese matangi awo, mangino nji wana gutukuatesa.

12-13. (a) Ha gutadila Ngimbo 119:59 mu ndaga tshi tudi naye gutangigiza? (b) Mihu itshi udi naye gudihula?

¹² Ndaga ya mbadi tudi naye gutshita idi gutangigiza. Gula tudi mutanga Mbimbi ya Nzambi muabonga lusugu nu lusugu, tudi naye guzula tangua ha gutangigiza, nga ndo gutangiza muavula ndaga tudi mutanga hagula tujiye makalegelo tudi naye gusombegesa. (Tanga Ngimbo 119:59; Heb. 4:12; Yak. 1:25) Tudi naye gujiya makalegelo agasue tudi nawo ana gudivua nu ndunge jia athu. Tudi naye gutshigina egi tudi athu aleba, nu gukalagala ngolo ha gukatula guleba guene.

¹³ Ha gufezegesa, dihule egi: ‘Ndaga ngana gutshita jiana gumonesa egi ngakhala nu ginjiongo nga giphi mu mutshima wami ba?’ (1 Phet. 2:1) ‘Ngana gudizula nu ndando gubalega athu ako mukunda nu fundo ngana gujinga, makhalasa ngalongugile nga mukunda nu umonyi ngudi nawo ba?’ (Ish. 16:5) ‘Ngana gumona athu anyi ashigo nu ima yavula gifua ame, nga athu a gilema giko gifua adi athu a githuhu ba?’ (Yak. 2:2-4) ‘Ngana guzumba ima mavu a Satana ana gunguhana ba?’ (1 Yone 2:15-17) ‘Ngana gusuanguluga nu saga jidi mumonesa ndaga jia musonyi nu jia khuta ba?’ (Ngi. 97:10; 101:3; Am. 5:15) Gula wahana mvutu jia mihu eyi, wajiya gukotelesa ndaga udi naye gusombegesa. Gula tuabinga matangi adi mumonega gifua ‘phango jiakola jia seso’ mu mitshima yetu, mbatusuanguluisa Sh’etu wa mu dilu.—Ngi. 19:14.

14. Mukunda natshi idi nu ndando ha gutomba mafuta abonga?

¹⁴ Ndaga ya thathu ya ndando tudi naye gutshita idi gutomba mafuta abonga. Tudi naye gujiya egi, tangua tudi mujinga hamoshi nu mafuta etu, tuana sendesa gulandula makalegelo awo. (Ish. 13:20) Yajiya gukhala egi athu tuana gukhala nawo gu khalasa nga gu mudimo, anago gutukuatesa ha gutangigiza luholo Nzambi wana gutshigina. Uvi, tuajiya guheta mafuta abonga tangua tudi mu gudibungisa gua mu hungu. Guene tuana guheta gikhesa, nu guana gututuma ha “gutema gudizumba muabonga nu ha gutshita ndaga jiabonga.”—Heb. 10:24, 25.

15-16. Luholo lutshi Satana wana gulola gusombegesa matangi etu?

¹⁵ Jiya egi Satana wana gutshita yagasue ha gusombegesa matangi etu. Wana gukalegela malongo avula abola ha gubolesa matangi etu hagula tulandulago Mbimbi ya Nzambi.

 ¹⁶ Satana wana gulandula guhula muhu wa luholo lumoshi gifua muhu wahudile muene Eva mu gilanga gia Edene egi: “Idi yadiago egi Nzambi wamiwambelele egi . . . ?” (Gis. 3:1) Ha mavu awa adi mutuamezewa gudi Satana, athu ana gutuhula muavula mihu idi muhana ba dute egi: ‘Idi yadiago egi Nzambi wanago gutshigina ulo wa mala nu mala nga akhetu nu akhetu ba? Idi yadiago egi Nzambi wanago gutshigina egi utshite fete ya Nowele nu ya lusugu lua guvualewa ba? Idi yadiago egi Nzambi wanago gutshigina egi umbiwe mahatshi mu muila ba? Idi yadiago egi Nzambi wa guzumba guagasue ganago gutshigina egi ukuate ufuta nu athu azolewe mu hungu ba?’

17. Itshi tudi naye gutshita gula muthu watuhula muhu watadila gutshigina guetu ha gutuhana ba dute, nu ndaga jitshi Kolosai 2:6, 7 idi muzuelela jiajiya gutukuatesa?

¹⁷ Tudi naye gujiya egi ndaga tuana gutshigina jidi jia giamatshidia. Uvi gula tuahetelego mvutu gu mihu ya funu tuana gudihula, tuajiya gusendesa guhaga ba dute mu ndaga jiene. Dute jiene jiajiya gutusagesa mu matangi nga gubolesa gutshigina guetu. Itshi tudi naye gutshita giwa? Mbimbi ya Nzambi idi gututoga ha gubalumuna matangi etu, hagula tutshigine esue hakhetu ‘ndaga jiabonga, jinyi jiajiya gutshiginyiwa nu jiatagana jidi gudivua nu matangi a Nzambi.’ (Lomo 12:2) Gula tudi mulonguga muavula, mbatukotelesa diago egi ndaga tualongugile mu Biblia jidi jia giamatshidia. Tuajiya gutshigina diago egi mikhuala ya Yehowa idi yatagana. Mbatukhala yagumagana gifua mutshi udi nu miji yakola, mbatukhala nji “agudindamana mu gutshigina.”—Tanga Kolosai 2:6, 7.

18. Itshi yajiya gutukuatesa ha gudibamba gu ndaga jiabola jia ha mavu awa a Satana?

¹⁸ Gushigo nga muthu muko wajiya gukolesa gutshigina guaye ha fundo diaye. Hene tulandule gubuisa ngolo jidi mutuameza matangi etu jihe-jihe. Tukhale mutshita gisambu tangua diagasue; tutogenu ukuateshi wa nyuma ya Yehowa. Tutangigizenu muavula; tulandulenu gutadila muabonga matangi etu nu makalegelo etu. Tutombenu mafuta abonga; tukhalenu nu athu mbaatukuatesa ha gusombegesa matangi etu. Gula tudi mutshita ngenyi, mbatukatula nu mbatudibamba gu makalegelo abola a Satana nu mbatubinga ‘matangi agasue nu gima giagasue gishigo gudivua nu ndaga Nzambi wana gutulongesa.’—2 Kol. 10:5.