“Tangua gisonyi giami gajile gunguluisa, ngamukamele ha muminyo. Ngatshiginyile gumushiya.”—Paul.

“Gumbo dietu, ngakhalele mulaba guvua khabu muavula ngatshima ndaga yene ishigo yabola. Ngakhalele mubishila ima yagasue ngakhalele naye ha mago.”—Marco.

Athu avula mukatshi dietu ajiyilego gutshita gifua athu awa mbadi tuazuelela. Mukut’etu agasue, matangua ako yakhala lamba ha gumonesa khadilo dia gudikanda. Yakhala ngenyi handaga tuana vualewa nu gubola mukunda nu khakha wetu wa thomo, Adama. (Lomo 5:12) Athu ako ana gumonesa ndo khadilo dia gudikanda, gifua Paul nu Marco anyi tuazuelela guthunda. Ako ajiya gumona egi idi lamba ha gudikanda mu matangi. Ana landula gutangiza ndaga jidi guahana woma nga jinyi jiana gualebesa muila. Gudi athu ako, yakhala lamba ha gudikanda gu ndaga yatadila nzala ya gubungisa muila, ya gunua matombe abala, nga ima iko yabala.

Athu anyi ana tuna gukanda matangi awo, nzala jiawo jiabola nga makalegelo awo, ana bolesa lujingu luawo. Uvi tuajiya gutuna gubolesa lujingu luetu. Luholo lutshi? Gula tuakudisa khadilo dia gudikanda. Tutadilenu mihu eyi thahtu yajiya gutukuatesa ha gukudisa khadilo diene: (1) Gudikanda gudi itshi? (2) Mukunda natshi gudikanda gudi nu ndando? (3) Luholo lutshi tuajiya gukudisa khadilo edi dia gudikanda didi mukatshi dia ‘bundu dia nyuma yabonga’? (Gal. 5:22, 23) Gungima tuza mumona ndaga tuajiya gutshita gula tushigo luko nu khadilo dia gudikanda.

Muthu wakhala nu khadilo dia gudikanda gana tshita ndo ndaga mu khabu. Uvi wana huiminyina ha guzuela, nu ganago gutshita ndaga jinyi jishigo musuanguluisa Nzambi.

Yesu watumonesele gula gudikanda gudi itshi. Biblia idi muzuela egi: ‘Hashingiwe muene, gavutuilego mashingo. Hamuenene muene malamba, gakambelego guluisa athu, uvi wazegemene gudi yago wana zuelesa athu nu nduedi.’ (1 Phet. 2:23) Yesu wamonesele khadilo dia gudikanda tangua mbalagaji jienji jiamuseguluile hamushiyile ene holu dia mutshi wa lamba. (Mat. 27:39-44) Thomo, wamonesele gudikanda tangua mafumu abola a mangumba akhalele gumutuma ha guzuela ndaga yabola. (Mat. 22:15-22) Wamonesele luko gudikanda tangua enya Yuda ako akhalele gumusona maseso! Ha fundo dia gutshita gubola, ‘Yesu wadisuegele, nu wazogele hanze ya tempelo.’—Yone 8:57-59.

Esue nji tuajiya gulandula gifezegeselo gienji ba? Ayi. Mupostolo Phetelo wasonegele egi: ‘Klisto wamuenene lamba mukunda nu enue, wamibembele gifezegeselo hagula mulandule njila jienji muabonga.’ (1 Phet. 2:21) Ngatshima tushigo athu atagana, tuajiya gulandula muabonga gifezegeselo gia Yesu giatadila gudikanda. Mukunda natshi gutshita ngenyi gudi nu ndando?

Tudi naye gukhala nu khadilo dia gudikanda, hagula Yehowa asuanguluge nu esue. Ikhale tuakombelele gale Yehowa masugu avula nga ndo, tuajiya gutotesa ufuta wetu n’enji gula tushigo gudikanda mu guzuela nga mu makalegelo etu.

Tutadile gifezegeselo gia Moize yonu wakhalele muthu ‘wabalega gudibulumuisa ha mavu agasue’ mu tangua dienji. (Lutang. 12:3) Wakolesele gu ndaga jiagasue jiabola jiakhalele muzuela enya Isalele ivo yavula, uvi lusugu lumoshi watotesele khadilo dia gudikanda. Wavuile khabu jiakola tangua enya Isalele asendesele luko guboguta mukunda nu meya. Wazuelele ndaga jiabola mukunda nu athu egi: ‘Tegelelenu, enue alumbugi! Tuajiya gumizolela meya mu seso eyi ba?’—Lutang. 20:2-11.

Moize gadikandele ndo. Gahanele ndo lutumbu gudi Yehowa yago wakalegele ndaga ya gushimana ha guzola meya. (Ngi. 106:32, 33) Hene, Yehowa gamutunyishile ha gungina mu Mavu a Gutendelela. (Lutang. 20:12) Idi naye gukhala egi mu lusugu luenji lua gufua, Moize wadibelele luholo gatotesele khadilo dia gudikanda.—Mikh. 3:23-27.

Longo ditshi tuajiya guzula? Ikhale tudi Matemue sendese mualeha, tuajiyilego guzuela mu luholo luabola gudi athu adi gutuhana khabu, nga gudi anyi tudi naye guhana malongo. (Ef. 4:32; Kol. 3:12) Yadiago, gula tuakola, matangua ako yakhala lamba ha gumonesa khadilo dia guhuiminyina. Uvi ungulugenu Moize. Tuajiyilego gubolesa lukuma luetu luabonga tuakhala nalo sendese mualeha handaga tushigo luko nu khadilo dia gudikanda. Itshi tuajiya gutshita ha gukudisa khadilo edi dia ndando?

Toga nyuma yabonga mu gisambu. Mukunda natshi? Handaga gudikanda gudi gitshinyi gia bundu dia nyuma ya Nzambi; Yehowa wana hana nyuma yenji gudi athu ana guyitoga. (Luka 11:13) Yehowa wajiya gutuhana ngolo tudi najio funu mu njila ya nyuma yenji, ha gumonesa gudikanda. (Fili. 4:13) Wajiya gutukuatesa ha gukudisa itshinyi iko ya bundu dia nyuma yabonga, gifua guzumba, gunu guana gutukuatesa ha gukolesa khadilo dia gudikanda.—1 Kol. 13:5.

Tuna ndaga yagasue yajiya gulebesa khadilo diaye dia gudikanda. Ha gufezegesa, tuna site jia Internet jiagasue nga saga jiagasue jidi mumonesa ndaga jiabola. (Ef. 5:3, 4) Tudi naye nji gutuna gima giagasue giajiya gututuma ha gutshita ndaga yabola. (Ish. 22:3; 1 Kol. 6:12) Ha gufezegesa,  muthu udi mulua nu nzala ya gubungisa muila, gashigo naye gutanga mikanda ya roman jiabola nga gutala video jia musonyi.

Yajiya gukhala lamba ha gukalegela longo edi. Uvi, gula tuakalagala ngolo, Yehowa mbawutukuatesa ha gumonesa khadilo dia gudikanda. (2 Phet. 1:5-8) Mbawutukuatesa ha gukanda matangi etu, mbimbi jietu nu makalegelo etu. Phangi Paul nu Marco anyi tuazuelela guthunda, abingile khadilo diawo diabola dia khabu. Tutadilenu gifezegeselo gia phangi mumoshi wa yala yonu wakhalele muvua khabu nu gumana nu ba chauffeur ako hakhalele muene muwendesa gamiyo. Itshi phangi muene gakalegele? Udi muzuela egi: “Ngakhalele musamba muavula masugu agasue. Ngatangele malongo adi mu mikanda yetu adi muzuelela gudikanda, ngakuatele nji verse jia Biblia jia ndando mu muto. Ngatshima ngakhalele mutshita ngolo ivo yavula ha gukudisa khadilo edi, uvi ngamonele egi idi nu ndando ha gumonesa guhuiminyina lusugu nu lusugu. Hene ngakhalele muya nu gimenegena gu mudimo hagula ngutaganago nu ba chauffeur ako ajiya gunguhana khabu.”

Matangua ako, yajiya gukhala lamba ha gudikanda. Gula idi ngenyi, wajiya guvua musonyi ha gusamba Yehowa. Uvi mu tangua dia luholo elu, udi naye gusamba Yehowa muavula hagula agukuatese. Samba diago Yehowa mu tangua diene. Mutoge agutotesele gubola, kamba ukuateshi wenji, zula desizio dia gutuna gukalagala luko gubola. (Ngi. 51:9-11) Utangizago egi Yehowa gashigo mutegelela isambu yaye ya giamatshidia. (Ngi. 102:17) Mupostolo Yone udi gutuwambela egi mahatshi a Mun’a Nzambi adi ‘muwevua gubola guagasue.’ (1 Yone 1:7; 2:1; Ngi. 86:5) Jiya egi Yehowa wana gutoga akombeledi enji ha gutotesela athu ako gubola guawo muavula. Hene, tuajiya guhaga mutshima egi muene nji mbawututotesela.—Mat. 18:21, 22; Kol. 3:13.

Yehowa gasuangulugilego tangua Moize gatotesele khadilo dienji dia gudikanda mu tangua dimoshi ngenyi mu mavu a luselenga. Uvi wamutotesele. Biblia idi muzuela egi Moize wakhalele muenya gutshigina guakola yonu tuajiya gulandula. (Mikh. 34:10; Heb. 11:24-28) Yehowa gahanelego Moize njila ya gungina mu Mavu a Gutendelela, uvi mbawumuhana njila ya gujinga mu phaladiso ha mavu ivo nu ivo. Tuajiya gukhala nu felela edi gula tudi mukalagala ngolo ha gukudisa khadilo dia gudikanda.—1 Kol. 9:25.