MUKUT’ETU agasue tuana gujiya egi Yehowa wana tuameza akombeledi enji nu wana guakuatesa ha gukhala hehi nu muene mu ‘masugu awa a gisugishilo.’ (2 Tim. 3:1) Uvi mukut’etu agasue tudi naye gumutumagela. Tuajiya gufuanesa lujingu luetu nu lua enya Isalele mu mavu a luselenga. Akhalele naye gutumagela phungi jiakhalele mudila.

Yehowa wawambelele Moize ha gufula jiphungi mbadi jia utadi wa siliva “ha guakuatesa ha gutamegena athu ha gudikutamesa nga gukatuga mu jiphundo.” (Lutang. 10:2) Nganga-nzambi jiakhalele mushiga phungi mu maluholo a gudisha ha guwambela athu ndaga akhalele naye gutshita. (Lutang. 10:3-8) Mangino nji, akombeledi a Nzambi ana heta utuameji mu maluholo a gudisha. Tutadilenu maluholo thathu ana gutukuatesa ha guheta utuameji; maluholo ene adi gifua gudila gua phungi mu tangua dia enya Isalele. Mangino, akombeledi a Nzambi ana gutamegewa gu ba asamble akoma, akulu ana tamegewa ha guhanewa formasio, nu muhiga wana gututoga ha gusombegesa ndaga jiko jia teokrasi mu hungu.

Mu tangua dia enya Isalele, gula Yehowa watshigina gubungisa “thundu yagasue” gu mufulo wa inzo ya tenta gu khanda ya mazogelo a kumbi, nganga-nzambi jiakhalele mushiga phungi jiagasue mbadi. (Lutang. 10:3) Iphuta yene yakhalele ya gukhaphumuiwa mu itshinyi nguana, gula phungi yadila, mukut’awo agasue akhalele muvua. Anyi akhalele hehi nu inzo ya tenta, akhalele mudiangela guheta. Anyi akhalele gualeha akhalele mubalegesa matangua avula nu akhalele mutshita ngolo ha guheta. Ikhale akhalele gualeha nga hehi, Yehowa wakhalele mutshigina egi mukut’awo agasue adibungise ha gulongesewa.

Mangino, tuanago gudibungisa gutuama dia inzo ya tenta, uvi tuana tamegewa ha guya gu ba asamble a Matemue a Yehowa. Yajiya gukhala asamble a masugu thathu, nga ndaga iko ya ndando, ha guheta utuameji nu malongo. Matemue a Yehowa a ha mavu agasue ana landula programe ya luholo lumoshi. Athu anyi ana tshigina emvitasio ha guya gu ba asamble ene, ana khala nu gusuanguluga. Ako ana tshita vuayaje yaleha uvi ako ndo. Uvi, athu anyi ana guya gu ba asamble ene, ana mona diago egi yakhala ndaga ya ndando.

Itshi tuajiya guzuela mukunda nu athu anyi akhala gualeha nu fundo gudibungisa gua luholo elu guana kalegewa? Aphangi ene ana landula programe yene imoshi mu njila ya téchnologie ihe-ihe, nu ana gudivua gifua adi agudibungisa nu athu adi gu asamble ene. Ha gufezegesa, tangua mumoneshi wa hunji dia akulu atuameji gayile mutala betele ya gu Bénin, aphangi atumile video ya programe yene gu dimbo dia Arlit, gu Niger, mu Desert ya Sahara. Aphangi a mala nu a akhetu 21 nu athu ana longuga Biblia adibungishile guene. Ngatshima  akhalele gualeha, uvi adivuile gifua adi a gudibungisa nu aphangi 44 131 anyi akhalele gu asamble ene. Phangi mumoshi wasonegele egi: “Tuamihana mersi avula luholo muatutumina video ya programe eyi. Idi mumonesa diago egi muana gutuzumba muavula diago.”

Gula nganga-nzambi jiashiga khuta phungi imoshi, ‘phamba mafumu nu malemba a iphuta,’ akhalele muya gudibungisa gu inzo ya tenta. (Lutang. 10:4) Moize wakhalele guahana malongo nu formasio. Yakhalele guakuatesa ha gutagenesa muabonga inemo yawo mu iphuta yawo. Gula nga wakhalele mukatshi dia mafumu ene, wakhalele naye gutshita ngolo ha guya mu gudibungisa guene; ishigo ngenyi ba?

Mangino, akulu a mu hungu ashigo “mafumu”; nu ana gutuameza ndo gu ngolo imeme yaahuile Nzambi ha gubamba. (1 Phet. 5:1-3) Uvi ana kalagala yagasue ha gubamba imeme yene. Gula a ahana emvitasio mukunda nu formasio, ana guyitshigina, gifua guya gu École du ministère du Royaume (EMR). Gu khalasa diene, akulu ana longuga luholo luabonga lua gutagenesa inemo yawo mu hungu. Ndaga eyi yana kuatesa akulu nu aphangi a mu hungu ha gukhala nu ufuta wabonga nu Yehowa. Ngatshima khenji wanginyilego khalasa diene, wana heta gubonga gudi aphangi anyi anginyile gale tangua ana kalegela ndaga alongugile guene.

Matangua ako, nganga-nzambi jia gu Isalele jiakhalele mushiga phungi inyi yakhalele musombegesa dijui. Phungi eyi yakhalele mumonesa egi Yehowa udi mutshigina egi athu agasue azuge ha guya. (Lutang. 10:5, 6) Tangua athu agasue akhalele mukatuga, yakhalele mutoga ulondegi wabonga, nu mudimo wakola. Matangua ako, enya Isalele ako akhalelego musuanguluga gula idi mutoga egi akatuge fundo akhadi. Mukunda natshi?

Yajiya gukhala egi ako akhalele mutangiza egi phungi ya gukatuga yakhalele mudila muavula nga ndo mu gisagumuisa. Biblia idi muzuela egi: ‘Mahugo ako tuta diakhalele mumagana mu fundo diko khuta mu ngueze uu nu mu gimenegena.’ Uvi matangua ako, diakhalele mumagana ‘masugu mbadi, nga ndo mbeji imoshi, nga mbeji jiavula’ gutuama egi aye fundo diko. (Lutang. 9:21, 22) Mafundo guvula gutshi enya Isalele amagenele? Lutango mukhapho 33 ludi mutanga mafundo 40 anyi enya Isalele amagenele.

Matangua ako, enya Isalele akhalele mumagana mu mafundo ala tuluu. Gukhala mu mafundo a luholo elu guakhalele guasuanguluisa muavula mu ‘mavu a luselenga akoma nu a lamba.’ (Mikh. 1:19) Hene, tangua akhalele mukatuga, akhalele gudisagesa ha gutangiza egi ajiya guya fundo dia gubalega gubola.

Gula giphuta gimoshi giakatuga, iko yakhalele naye gunengena uu nu haza mutagana tangua diawo. Mukut’awo agasue akhalele muvua phungi idi musombegesa dijui, uvi akhalelego muya mu tangua dimoshi ene agasue. Phungi yene yakhalele mumonesa egi iphuta ya Yuda, ya Isakale, nu ya Zabulona, inyi yakhalele gukhanda ya mazogelo akumbi, ikatuge. (Lutang. 2:3-7; 10:5, 6) Gula aya, Nganga-nzambi jiakhalele mushiga phungi iko hagula iphuta thathu inyi yakhalele gu sud ilandule. Akhalele mulandula gushiga phungi uu nu tangua iphuta yagasue ikatuga.

Yajiya gukhala lamba gudi aye ha gutshigina usombegeshi umoshi wazolewa mu organizasio. Wajiya guzuela egi usombegeshi wene nji wabalegela. Nga ndo yajiya gukhala egi wana gutshigina muavula ndaga jikulu, nu ushigo mutshigina gujisombegesa. Yajiya gukhala lamba gudi aye ha guhuiminyina tangua usombegeshi wazoga, nu yajiya guzula tangua diavula ha gujidila nu usombegeshi wene. Uvi gula tuakalagala ngolo ha gutshita ndaga adi gututoga, mbatumona diago egi usombegeshi wene udi wabonga, nu Yehowa Nzambi udi musuanguluga nu esue.

Mu tangua dia Moize, Yehowa watuamezele ba milio a mala, nu akhetu, nu ana mu mavu a luselenga. Nga utuameji wa Yehowa ndo, nga ahuile nu gufua. Mangino, tudi nu ufuta wabonga nu Yehowa handaga mune wana gututuameza. Hene tuana binga! Mukut’etu agasue, tuzulenu desizio dia gutumaga nu mutshima umoshi gifua muakalegele enya Isalele tangua phungi jia gudisha jiakhalele mudila!