1. Mu siekle ya thomo itshi awambelele athu avula ha gutshita?

MU SIEKLE ya thomo mala nu akhetu avula ayile gu Yelusalema. Akatugile mu ifutshi ya gudisha nu akhalele muzuela mazuelelo a gudisha. Ndaga ya gushimana ya kalegewe mu lusugu luene. Enya Yuda ako asendesele guzuela mu mazuelelo a athu akatugile mu ifutshi iko! Ndaga jiakhalele guawambela enya Yuda nu ndaga jiazuelele mupostolo Phetelo jiakhalele diago jia gushimana. Aamonesele nji egi ha guhuluishiwa, adi naye gusha gutshigina gudi Yesu Klisto. Mbimbi jiene jiakuatele diago mitshima ya athu ene. Hene ahudile egi: ‘Mala, aphangi, itshi tudi naye gukalagala?’ Phetelo waahanele mvutu egi: ‘Muthu wagasue mukatshi dienu abatijiwe.’—Makal. 2:37, 38.

2. Itshi tuza mulonguga mu longo edi? (Tala gifuanesa holu dia gizula.)

² Ndaga itshi ya gushimana yakalegewe lusugu lua landuile? Athu 3 000 abatijiwe mu lusugu luene nu abuile alandudi a Klisto. Ndaga yene yakhalele gisendeselo gia mudimo wa gubuisa athu alandudi wunu Yesu wawambelele alandudi enji ha gutshita. Mudimo wene wana kalegewa uu nu mangino. Mangino, tuajiyilego guta maga a Biblia nu muthu mu matangua azonda, gungima muthu muene gabatijiwa. Yajiya guzula mbeji jiavula nga givo hagula muthu wana longuga Biblia abatijiwe. Yana khala mudimo wakola ha gukuatesa muthu wana longuga Biblia ha gubua mulandudi wa Klisto. Gila wana longuga Biblia nu muthu, udi mujiya ndaga eyi muabonga. Mu longo edi tuza mujiya itshi wajiya gutshita ha gukuatesa muthu wana longesa Biblia ha gubatijiwa.

3. Luholo Matayo 28:19, 20 idi guyimonesa, itshi muthu wana longuga Biblia udi naye gutshita ha gukula mu nyuma nu gubatijiwa?

³ Gutuama egi muthu wana longuga Biblia abatijiwe, udi naye gukalegela ndaga Biblia yana longesa. (Tanga Matayo 28:19, 20.)  Gula muthu udi mukalegela ndaga Biblia yana longesa, mbawukhala gifua ‘muthu watema’ watungile inzo yenji holu dia seso, munu Yesu wazuelele mu gifezegeselo gienji. (Mat. 7:24, 25; Luka 6:47, 48) Luholo lutshi tuajiya gukuatesa muthu wana longuga Biblia ha gukalegela ndaga jidi mulonguga muene? Tutadilenu ndaga thathu tuajiya gukalagala.

4. Luholo lutshi tuajiya gukuatesa muthu tuana longesa Biblia ha guzula desizio dia gubatijiwa? (Tala nji galuanda “ Kuatesa Muthu Wana Longesa Biblia ha Guzula ba Desizio nu ha Guatagenesa.”)

⁴ Kuatesa muthu wana longesa Biblia ha guzula ba desizio. Mukunda natshi udi naye gutshita ngenyi? Tutadilenu gifezegeselo egi: Gula udi mukalagala vuayaje imoshi yaleha, wajiya guzula desizio dia guhuluguga ha fundo dimoshi diabonga. Ngenyi muila wajiyilego guguleba ha gutangiza egi fundo udi muya didi gualeha. Luholo lumoshi nji, gula muthu udi mulonguga Biblia wadishila mafelela azonda-zonda anyi muene wajiya gutagenesa, mbawujiya egi ishigo lamba ha gutagenesa felela dienji dia gubatijiwa. Kalegela galuanda “Desizio Wazula” gadi mu mukanda Heta Monyo wa Ivo nu Ivo! ha gukuatesa muthu wana longesa Biblia ha gukula mu nyuma. Gugisugishilo dia longo diagasue, zuelelenu luholo desizio diazudi muthu wana longuga Biblia diajiya gumukuatesa ha gukalegela ndaga adi mulonguga. Gula udi mutshigina egi muthu wana longesa Biblia atagenese desizio diko, wajiya gusonega ndaga yene ha fundo dia sonegewa egi “Desizio Diko.” Khalenu muzuelela muavula ba desizio ajiya gutagenesa mutangua diazonda nu ba desizio ajiya gumuzula tangua diavula ha guatagenesa.

5. Luholo Mako 10:17-22 idi guyimonesa, itshi Yesu wawambelele muenya umonyi mumoshi? Mukunda natshi?

⁵ Kuatesa muthu wana longesa Biblia ha gutshita usombegeshi mu monyo wenji. (Tanga Mako 10:17-22.) Yesu wajiyile egi mbayikhala lamba gudi muenya umonyi ha gusumbisa ima yenji yagasue. (Mako 10:23) Uvi, wawambelele  yala mumoshi ha gudiga ima yenji yagasue ha gumulandula. Mukunda natshi? Handaga Yesu wakhalele gumuzumba. Matangua ako, yajiya gukhala lamba mukunda nu esue ha guwambela muthu tuana longesa Biblia ha gukalegela ndaga adi mulonguga. Handaga yajiya gukhala tudi mumona egi muthu muene gashigo hehi ha gusombegesa. Yajiya guzula matangua avula hagula muthu wana longuga Biblia akatule umuthu ukulu nu makalegelo enji ha gusudiga umuthu uhe-uhe. (Kol. 3:9, 10) Uvi gula wasendesa guta nenji maga atadila gusombegesa mu gisendeselo gia gulonguga guenu, wajiya gusombegesa muphushi. Gutshita ngenyi mbagumonesa egi wana gudisagesa mukunda nu muene.—Ngi. 141:5; Ish. 27:17.

6. Mukunda natshi tudi naye gukalegela mihu idi mutuma muthu tudi mulongesa Biblia ha guhana matangi’enji?

⁶ Tuana hula muthu tuana longesa Biblia muhu udi gumutuma ha gutangigiza nu ha gujiya matangi enji. Guhula mihu ya luholo elu, yana gutukuatesa ha gujiya gula muthu tudi mulongesa Biblia udi mukotelesa nu udi mutshigina ndaga tudi gumulongesa. Gula udi gumuhula mihu ya luholo elu muavula, mbayikhala yaleba gudi aye ha guzuelela nenji ndaga jiakola mu masugu adi muza. Mukanda Heta Monyo wa Ivo nu Ivo! udi nu mihu yavula luholo elu. Ha gufezegesa, longo 04 didi nu muhu owu: “Udi mutangiza egi Yehowa wana gudivua luholo lutshi tangua wana kalegela jina dienji?” Longo 09 didi nu muhu owu: “Ndaga jitshi tudi naye gumutoga mu gisambu?” Thomo, yajiya guzula tangua gudi muthu wana longesa Biblia ha gutangiza ha guhana mvutu gu mihu eyi. Wajiya gumukuatesa ha gutangigiza mu ndaga jidi mu Biblia nu mu ifuanesa idi mu mukanda mudi mulonguga.

7. Luholo lutshi tuajiya gukalegela ba eksperianse a athu ako tangua tudi mulongesa muthu Biblia?

⁷ Gula muthu wana longesa Biblia wakotelesa ndaga adi naye gutshita, kalegela ba eksperianse a aphangi a mu masugu etu ha gumuhana gikhesa gia guyikalagala. Ha gufezegesa, gula yana khala lamba gudi muthu wana longesa Biblia ha guza mu gudibungisa, wajiya gumutalesa video idi muzuela egi Yehowa Wana Gudisagesa Mukunda nu Ame. Video yene idi mu longo 14 mu gitshinyi “Tala Ndaga Eji.” Malongo avula adi mu mukanda Heta Monyo wa Ivo nu Ivo! mu gitshinyi “Ndaga Jiko jia Ndando” nga mu gitshinyi “Tala Ndaga Eji,” * mbaagukuatesa ha gumona ba eksperianse ako. Ushigo naye gufuanesa muthu wana longesa Biblia nu muthu muko. Ushigo naye guzuela egi: “Aye nji udi naye gukalagala gifua muatshitshi mukuenu.” Udi naye gubemba egi muthu wana longesa Biblia muene hakhenji azule desizio. Uvi, kalegela matangi a ndando akuatesele aphangi muamonyi mu video ha gukalegela ndaga Biblia yana longesa. Wajiya guzuelela verse imoshi ya ndando nga ndaga imoshi yakalegewe. Gula luholo ludi guene, zuelela luholo Yehowa wakuatesele muthu muene.

8. Luholo lutshi wajiya gukuatesa muthu tuana longesa Biblia ha guzumba Yehowa?

⁸ Kuatesa muthu wana longesa Biblia ha guzumba Yehowa. Luholo lutshi? Kamba luholo lua gumukuatesa ha gujiya makalegelo a Yehowa. Mukuatese ha gumona egi Yehowa udi Nzambi wa gusuanguluga nu wana kuatesa athu ana gumuzumba. (1 Tim. 1:11; Heb. 11:6) Monesa muthu wana longesa Biblia gubonga mbaaheta gula udi mukalegela ndaga adi mulonguga. Mukotelesele egi Yehowa wana gumuzumba. (Yesh. 48:17, 18) Gila muthu wana longuga Biblia wakolesa guzumba guenji gudi Yehowa mbayimukuatesa ha gukalagala usombegeshi mu monyo wenji.—1 Yone 5:3.

9. Ha gutadila Mako 10:29, 30, itshi yajiya gukuatesa muthu ha gubemba ima iko ha gubatijiwa?

⁹ Muthu tuana longesa Biblia udi naye gukalagala ngolo ha gukula mu nyuma nu hagula abatijiwe. Gifua muenya umonyi munu tuazuelela guthunda, athu ako ana longuga Biblia ajiya gubemba ima yawo iko ha gubatijiwa. Gula mudimo wawo ushigo gudivua nu mikhuala ya Biblia, ajiya gubemba mudimo wene ha gukamba uko. Avula ana bemba mafuta awo anyi ana guzumba ndo Yehowa. Ako ana tunyiwa gudi enya fami jiawo anyi anago guzumba Matemue a Yehowa. Yesu wazuelele egi mbayikhala lamba gudi athu ako ha gubemba ndaga eji. Uvi wazuelele luko egi mbagabembigo nga hazonda athu anyi ana gumulandula. Yehowa mbawahana fami yakoma ya mu nyuma ya akombeledi enji. (Tanga Mako 10:29, 30.) Luholo lutshi wajiya gukuatesa muthu wana longesa Biblia ha guheta gubonga gua luholo elu?

10. Longo ditshi wazula mu eskperianse ya phangi Manuel?

¹⁰ Kolesa ufuta waye nu muthu wana longesa Biblia. Idi nu ndando ha gumonesa muthu wana longesa Biblia egi wana gumuzumba. Mukunda natshi? Phangi Manuel wana jinga gu Mexique udi muwunguluga tangua gakhalele mulonguga Biblia. Udi muzuela egi: “Gutuama dia gulonguga guagasue, mulongeshi wami wakhalele gunguhula gula ngudi muabonga. Wakhalele gungukuatesa ha gudivua muabonga nu ha gumuwambela ndaga yagasue idi gungusagesa. Ngamonele diago egi wana gunguzumba muavula.”

11. Luholo lutshi athu tuana longesa Biblia ajiya guheta gubonga gula tudi mubalegesa nawo tangua hamoshi?

¹¹ Khala mubalegesa tangua nu athu wana longesa Biblia gifua luholo Yesu akhalele mubalegesa tangua nu alandudi enji. (Yone 3:22) Gula muthu wana longesa Biblia udi mukula mu nyuma, wajiya gumutamega ha gudia nenji hamoshi nga ha gutala nenji JW Télédiffusion. Muthu wana longesa Biblia mbawusuanguluga muavula gila watshita ngenyi nu mbaadivuigo hakhenji  tangua enya fami yenji nga mafuta enji adi mukalagala mawano awo. Phangi Kazibwe wana jinga gu Ouganda udi muzuela egi: “Ngakhalele mulonguga ndaga jiavula jiatadila Yehowa ha ngakhalele mubalegesa tangua hamoshi nu mulongeshi wami, gifua tangua tuakhalele mulonguga. Ngakotelesele egi Yehowa wana zumba akombeledi enji muavula nu ana khala nu gusuanguluga. Yene ndaga ngakhalele mutshigina mu monyo wami.”

12. Mukunda natshi tudi naye guya nu aphangi a gudisha tangua tudi mulonguga Biblia nu muthu?

¹² Khala muya nu aphangi a gudisha tangua mudi mulonguga Biblia nu muthu. Matangua ako, tuajiya gumona egi ishigo mulonga gula tudi muya mutala muthu tuana longesa Biblia hakhetu nga tudi muya nu phangi tuana longesa nenji muavula. Ngatshima ishigo mulonga gula tuatshita ngenyi, uvi muthu tuana longesa Biblia mbawuheta gubonga gula tudi muya gumutala nu aphangi a gudisha. Phangi Dmitrii wana jinga gu Moldavie udi muzuela egi: “Mulongeshi wagasue wakhalele muza nu phangi ngakhalele mulonguga nenji Biblia, wakhalele gungukotelesela ndaga mu luholo luko. Yangukuatesele ha gutadila ndaga mu luholo lua gudisha. Ngavuilego musonyi tangua ngayile mu gudibungisa mbala ya thomo handaga ngakhalele ngadimonyi gale nu aphangi avula a mala nu a akhetu gumbodietu.”

13. Mukunda natshi tudi naye gukuatesa muthu tuana longesa Biblia ha guya mu gudibungisa?

¹³ Kuatesa muthu wana longesa Biblia ha guya mu gudibungisa gua mu hungu. Mukunda natshi? Handaga Yehowa wawambelele akombeledi enji ha gudibungisa hamoshi. Idi nji mukatshi dia gukombelela guetu. (Heb. 10:24, 25) Aphangi’etu a mala nu a akhetu a mu hungu ana gubua fami yetu ya mu nyuma. Tangua tuanaya nawo mu gudibungisa, yana khala gifua tudi mudia nawo hamoshi ima yawaha. Gula udi mukuatesa muthu wana longesa Biblia ha guya mu gudibungisa gua mu hungu, udi gumukuatesa ha guzula desizio dia ndando dia gubatijiwa. Uvi yajiya gukhala lamba gudi muene ha gusendesa guya mu gudibungisa gua mu hungu. Luholo lutshi mukanda Heta Monyo wa Ivo nu Ivo! wajiya gukuatesa muthu wana longesa Biblia ha gubinga lamba diagasue ajiya gutagana nadio?

14. Luholo lutshi tuajiya gukolesa muthu tuana longesa Biblia ha guza mu gudibungisa gua mu hungu?

¹⁴ Kalegela longo 10 dia mukanda Heta Monyo wa Ivo nu Ivo! ha gukolesa muthu wana longesa Biblia. Gutuama egi mukanda wene uzoge, atogele alongeshi ako ha gukalegela longo 10 nu athu ana longesa Biblia. Aphangi ene azuelele egi longo diene didi diawaha handaga didi mukuatesa athu ha guya mu gudibungisa. Ushigo naye gunengena egi ha gutamega muthu mu gudibungisa, udi naye guheta nenji mu longo 10. Gula luholo ludi guene, mutamege ha guza mu gudibungisa nu landula gukalagala ngenyi. Athu ana longuga Biblia ana tagana ndo nu malamba a luholo lumoshi. Hene, khala mukamba gujiya ndaga athu ene adi najio funu. Akuatese gula luholo ludi guene. Ulebigo muila gula idi muzula matangua avula hagula asendese guza mu gudibungisa. Khala nu guhuiminyina uvi ubembigo gumutamega ha guza mu gudibungisa.

15. Woma wa luholo lutshi muthu wana longesa Biblia wajiya gukhala nawo?

¹⁵ Wavuile woma ha gubua Temue wa Yehowa ba? Yajiya gukhala wakhalele mutangiza egi mbawushigo mukhala watagana ha gulongesa inzo nu inzo. Yajiya nji gukhala wavuile woma egi enya fami yaye nga mafuta aye mbaagusagesa. Gula idi ngenyi, wajiya gudisha ha fundo dia muthu wana longesa Biblia. Yesu wazuelele egi athu ako ajiya guvua woma wa luholo elu. Uvi wawambelele alandudi’enji egi mubembigo egi woma umikange njila ha gukombelela Yehowa. (Mat. 10:16, 17, 27, 28) Luholo lutshi Yesu wakuatesele alandudi’enji  ha gutuna guvua woma? Luholo lutshi wajiya gulandula gifezegeselo gienji?

16. Luholo lutshi tudi naye gukuatesa muthu tuana longesa Biblia ha guzuelela gutshigina guenji?

¹⁶ Khala mukuatesa muthu wana longesa Biblia ha guzuelela gutshigina guenji. Yajiya gukhala egi alandudi a Yesu adisagesele tangua Yesu waatumile ha guya mulongesa. Uvi Yesu waakuatesele tangua waadijigile fundo dia gulongesa nu lukuma adi naye gulongesa. (Mat. 10:5-7) Luholo lutshi wajiya gulandula gifezegeselo gia Yesu? Kuatesa muthu wana longesa Biblia ha gujiya fundo gajiya gulongesa. Ha gufezegesa, muhule gula udi mujiya muthu udi nu funu ya gulonguga Biblia. Gungima, mukuatese ha gulondega ndaga ajiya guzuela. Mumonese luholo lualeba lua gulongesa giamatshidia. Gula luholo ludi guene, kalegela ndaga jidi ha fundo dia sonegewa egi “Athu Ako Ana Zuela Egi” nu “Athu Ako Ajiya Gudihula Egi,” mu mukanda Heta Monyo wa Ivo nu Ivo! Tangua udi mukalagala ngenyi, kuatesa muthu wana longesa Biblia ha gukalegela Biblia ha guhana athu mvutu jialeba jiajiya gukuata mitshima yawo.

17. Luholo lutshi tuajiya gukalegela Matayo 10:19, 20, 29-31 tangua tudi mukuatesa muthu tuana longesa Biblia ha gushila Yehowa mutshima?

¹⁷ Kuatesa muthu wana longesa Biblia ha gushila Yehowa mutshima. Yesu wawambelele alandudi’enji egi Yehowa mbawumikuatesa handaga wana gumizumba. (Tanga Matayo 10:19, 20, 29-31.) Wambela muthu wana longesa Biblia egi Yehowa mbawumukuatesa nji. Wajiya gumukuatesa ha gushila Yehowa mutshima tangua udi musamba nenji mukunda nu ba desizio enji. Phangi Franciszek wana jinga gu Pologne udi muzuela egi: “Mulongeshi wami wakhalele muzuelela ba desizio ami mu isambu yenji. Tangua ngamonele egi Yehowa wakhalele muhana mvutu gu isambu yenji, ame nji ngasendesele gusamba. Ngamonele diago ukuateshi wa Yehowa tangua ngakhalele mutoga fumu wami wa mudimo ha gunguhana njila ya guya mu gudibugisa gua mu hungu nu gu ba asamble.”

18. Luholo lutshi Yehowa wana gudivua mukunda nu mudimo wa gulongesa Aklisto ana kalagala?

¹⁸ Yehowa wana gudisagesa muavula mukunda nu athu tuana longesa Biblia. Wana suanguluga muavula luholo Aklisto ana tshita ngolo ha kuatesa athu ha gusuena hehi nenji nu wana guazumba. (Yesh. 52:7) Gula ushigo nu muthu wa gulongesa Biblia, wajiya gukuatesa athu ana gulonguga Biblia nu aphangi ako ha gukula mu nyuma nu ha gubatijiwa tangua mudi mulonguga nawo.