1. Itshi Yehowa wakalegele mukunda nu muthu wagasue mukatshi dietu?

YEHOWA wananele muthu wagasue mukatshi dietu gudi muene. (Yone 6:44) Ndaga eyi idi mukotelesa itshi? Tangua Yehowa watalele muabonga athu avula ha mavu, wamonele ndaga imoshi ya ndando gudi aye. Ndaga yene idi mutshima wabonga, wajiya gugutuma ha gumuzumba. (1 Gudi. 28:9) Yehowa wa gujiya gale, wana gugukotelesa nu wana guguzumba. Mbimbi eji jidi muhana diago gikhesa!

2. Luholo lutshi Yesu watukuatesele ha gujiya egi Yehowa wana gudisagesa mukunda nu muthu wagasue mukatshi dietu?

² Yehowa wana gudisagesa muavula mukunda nu aye, nu mukunda nu aphangi’aye agasue Aklisto. Yesu watukuatesele ha gukotelesa ndaga eyi muabonga ha fuanesele muene Yehowa nu mubambi wa imeme. Wazuelele egi, gula muthu udi nu imeme 100 uvi gimoshi giatota, itshi mubambi wa imeme wana tshita? Muene ‘mbawubemba imeme iko 99 gu mulundu ha guya mukamba ginyi giatotshi.’ Gula wamona gimeme giene, mbagagivuilago khabu, uvi mbawusuanguluga. Mukunda natshi? Handaga gimeme giagasue gidi nu ndando gu meso a Yehowa. Yesu wazuelele egi: ‘Luholo lumoshi nji, Tata wami udi mu dilu ganago gutshigina egi mona mungoshi mukatshi dia ana awa azonda afue.’—Mat. 18:12-14.

3. Itshi tuza muzuelela mu longo edi?

³ Tuanago gutshigina nga hazonda gutshita ndaga yajiya gulebesa aphangi’etu muila. Luholo lutshi tuajiya gutuna gukhuakhuisa  athu ako? Itshi tuajiya gutshita gula muthu wakalagala ndaga yatusagesa? Tuza muheta mvutu jia mihu eyi mu longo edi. Uvi tuza muzuelela muavula ‘ana azonda’ ana zuelewa mu mukanda wa Matayo mukhapho 18.

4. ‘Ana awa azonda’ adi akhuatshi?

⁴ ‘Ana awa azonda’ adi alandudi a Yesu a indongo yagasue. Mukut’awo agasue adi gifua ‘ana zonda’ handaga ana khala hehi ha gulongesewa gudi Yesu. (Mat. 18:3) Adi athu a ifutshi ya gudisha nu kutime jia gudisha. Anakhalago nu matangi a luholo lumoshi nu makalegelo a luholo lumoshi, uvi mukut’awo agasue ana sha gutshigina gudi Klisto. Yesu wana guazumba muavula lume.—Mat. 18:6; Yone 1:12.

5. Luholo lutshi Yehowa wana gudivua gula muthu udi mu khakhuisa nga udi musagesa mukombeledi Wenji?

⁵ ‘Ana awa azonda’ adi nu ndando gu meso a Yehowa. Ha gukotelesa luholo Yehowa wana gudivua mukunda nu ana ene, tangiza gale luholo tuana tadila ana azonda. Tuana guazula nu ndando. Tuana tshigina guabamba handaga ana khalago nu ngolo nu eksperianse nga gutema gifua athu a gukula. Tuana tshiginago egi muthu muko aamonese lamba. Tuana guvua nji khabu gula muthu udi musagesa mona wazonda. Luholo lumoshi nji, Yehowa wana tshigina gutubamba. Wana guvua khabu gula muthu wa khakhuisa nga udi musagesa mukombeledi Wenji.—Yesh. 63:9; Mako 9:42.

6. Ha gutadila 1 Kolinto 1:26-29, luholo lutshi enya ha mavu awa ana tadila alandudi a Yesu?

⁶ Mu luholo lutshi luko alandudi a Yesu adi gifua ‘ana a zonda’? Akhuatshi athu a ha mavu awa ana zula nu ndando yavula? Enya umonyi, enya lutumbu nu athu adi nu ngolo jiavula. Uvi, ana mona egi alandudi a Yesu adi athu a githuhu, adi ‘ana azonda’ ashigo nu gutema. (Tanga 1 Kolinto 1:26-29.) Uvi Yehowa wana guatadila ndo ngenyi.

7. Luholo lutshi Yehowa wana tshigina egi tutadile aphangi’etu a mala nu a akhetu?

⁷ Yehowa wana zumba akombeledi’enji agasue ikhale anyi ana gumukombelela gale sendese mualeha nga adi athu ahe-ahe mu giamatshidia. Aphangi’etu agasue adi nu ndando gu meso a Yehowa. Hene esue nji tudi naye guazula nu ndando yavula. Tuana tshigina ‘guzumba aphangi’etu agasue.’ (1 Phet. 2:17) Tudi naye gutshita yagasue ha guabamba nu gudisagesa mukunda nu ene. Gila tuajiya egi tuakalagala ndaga imoshi yasagesa phangi mumoshi, tuzuedigo egi ishigo mulonga, muene wana khala genji ngenyi udi naye gungutotesela. Mukunda natshi athu ako ana gudisagesa? Yajiya gukhala egi mukunda nu fundo akudile, aphangi ako ana gudimona egi ashigo nu ndando. Ako adi athu ahe-ahe mu giamatshidia, khenji alongugile ndo luholo lua gutotesela muthu gula waakalegela gubola. Ikhale tudi gudivua gikhuatshi, tudi naye gutshita yagasue ha gukamba guhuima. Ikhale muthu munu wakalegewa gubola, udi naye gukotelesa egi gashigo naye gukhala mulaba guvua khabu mu ndaga jiagasue, udi naye gusombegesa khadilo diene. Gutshita ngenyi mbagumukuatesa ha gukhala nu gusuanguluga nu mbawukhala nu ufuta wabonga nu aphangi.

8. Matangi atshi athu a mu tangua dia Yesu akhalele nawo anyi alandudi’enji alanduile?

⁸ Itshi yatumile Yesu ha guzuelela ‘ana awa azonda’? Alandudi’enji a muhudile egi: ‘Nanyi udi wabalega gukoma mu Ufumu wa mu dilu?’ (Mat. 18:1) Enya Yuda avula akhalele mutshigina egi athu ako aamone egi adi nu ndando yavula. Muenya ndunge mumoshi udi muzuela egi: “Athu ako ana mona egi ndaga ya gubalega ndando mu monyo wawo idi gunemesewa nu gutumbuishiwa.”

9. Itshi alandudi a Yesu akhalele naye gutshita?

⁹ Yesu wajiyile egi enya Yuda avula akhalele  mumona egi adi nu ndando yavula gubalega athu ako, hene alandudi’enji akhalele naye gutshita ngolo ha gusombegesa matangi awo. Wawambelele egi: ‘Muthu udi wakoma mukatshi dienu udi naye gukhala gifua mona wazonda, muthu udi mutuameza udi naye gukhala gifua muthu udi mukuatela ako mudimo.’ (Luka 22:26) Tuana gudimona egi tudi ‘ana azonda’ tangua tuana ‘mona egi athu ako atubalega.’ (Fili. 2:3) Gula tudi mukudisa khadilo edi, mbatushigo mukalagala ndaga jiajiya gukhakhuisa athu ako.

10. Longo ditshi dia Phaula tudi naye gutumagela?

¹⁰ Aphangi’etu agasue ana khala atubalega mu ndaga jiko. Idi yaleba ha gukotelesa ndaga yene gula tudi mutala phamba makalegelo awo abonga. Tudi naye gulandula longo mupostolo Phaula wahanele enya gu Kolinto. Wawambelele egi: ‘Itshi udi nayo idi gugutuma ha gutangiza egi wabalega athu ako? Ishigo Nzambi wa guhanele ima yagasue udi nayo ba? Gula muene wa guhanele ima yagasue, mukunda natshi udi gudihala giwa gifua wayihetele mu ngolo jiaye hakhaye?’ (1 Kol. 4:7) Tushigo naye gutshigina egi athu ako atumone egi tudi nu ndando yavula nga ndo esue hakhetu tutangize egi tuabalega athu ako. Ha gufezegesa, phangi wa yala wana kalagala ba diskur abonga nga phangi wa mukhetu wana longuga Biblia nu athu avula, ashigo naye guditumbuisa, uvi adi naye gutumbuisa Yehowa.

11. Longo ditshi tuajiya guzula mu gifezegeselo gia Yesu giatadila fumu nu muhiga wenji?

¹¹ Tangua Yesu watemesele alandudi’enji ha gutuna gukhakhuisa athu ako, wahanele gifezegeselo gia fumu nu muhiga wenji. Muhiga wakhalele nu mukudi wakoma wa fumu wenji, uvi fumu wamuwambelele egi gafutshigo mukudi wene. Gungima muhiga muene watunyile gutotesela muhiga n’amuko wakhalele nu mukudi wenji wazonda. Tangua fumu wajiyile ndaga yene, wambile muhiga owu wa mutshima wabola mu bologo. Longo ditshi tuajiya guzula? Yesu wazuelele egi: ‘Tata wami wa mu dilu mbawumikalegela nji ndaga luholo elu, gula mushigo mutotesela phangi’enu nu mutshima umoshi.’—Mat. 18:21-35.

12. Gula tuatuna gutotesela athu ako, luholo lutshi aphangi ako mu hungu ajiya gudivua?

¹² Ndaga jiakalegele muhiga owu jiasagesele nji athu ako. Thomo muhiga muene wahanele muhiga n’amuko lamba, handaga ‘wamumbile mu bologo uu nu tangua muene mbagafuta mukudi wenji.’ Ya mbadi, ndaga yene yasagesele nji ahiga ako anyi amonele ndaga yene. Tangua ‘ahiga ako amonele ndaga yene, avuile gikenene giavula.’ Luholo lumoshi nji, ndaga tuana tshita jiajiya gusagesa athu ako. Gula muthu watukalegela gubola uvi esue tuatuna gumutotesela, itshi yajiya gubua? Thomo, tuana hana muthu muene lamba handaga tuatunyi gumutotesela, tushigo gudisagesa mukunda nu muene nu tuanago gumuzumba. Ya mbadi, tuana sagesa aphangi ako mu hungu, tangua ana mona egi tushigo gudivua nu muthu muene.

13. Longo ditshi wazula mu eksperianse ya phangi Crystal?

¹³ Tangua tuana totesela aphangi’etu yana gutukuatesa ha gudivua muabonga, yana kuatesa nji athu ako ha gudivua muabonga. Muvundji wa njila mumoshi mu jina dia Crystal watagenele nji nu ndaga eyi. Phangi mumoshi wa mukhetu wa mu hungu diawo wamukalegele gubola. Crystal udi muzuela egi: “Mbimbi jia phangi muene jia nguhuile lamba gu mutshima gifua adi gungubatula nu gaphogo. Tangua tuakhalele muya mu mudimo wa gulongesa, ngakhalelego mutshigina gungina gamiyo gamoshi nenji. Ngakhalelego luko nu gikhesa nu gusuangula mu mudimo wa gulongesa.” Phangi Crystal watangijile  egi udi naye guvua khabu. Uvi walanduilego guvuila phangi muene khabu nu gashilego matangi phamba mu luholo gakhalele gudivua. Wakalegele nu gudibulumuisa guagasue longo dia Biblia didi mu Inzo Yaleha ya Mutaledi, ya 15 Octobre 1999 ya Français mu longo didi muzuela egi: “Pardonnez de tout votre cœur.” Phangi Crystal watotesele phangi muene. Udi muzuela egi: “Ngakotelesa egi mukut’etu agasue tuana kalagala ngolo ha gusombegesa makalegelo etu abola nu Yehowa wana khala hehi ha gututotesela. Ngavua diago muila huwa. Ngavutugila gusuanguluga guami.”

14. Ha gutadila Matayo 18:21, 22, itshi yakhalele musagesa mupostolo Phetelo? Longo disthi tuazula mu mvutu ya muhanele Yesu?

¹⁴ Tudi mujiya egi tudi naye gutotesela athu ako, idi diago ndaga yabonga tudi naye gukalagala. Uvi yajiya gukhala lamba ha gutshita ngenyi. Yajiya gukhala egi matangua ako mupostolo Phetelo wadivuile nji ngenyi. (Tanga Matayo 18:21, 22.) Itshi yajiya gutukuatesa? Thomo tudi naye gutangigiza luholo Yehowa wana gututotesela. (Mat. 18:32, 33) Tushigo atagana hagula Yehowa atutotesele, uvi muene wana khala hehi ha gututotesela. (Ngi. 103:8-10) Hene ‘esue nji tudi naye gudizumba nu akuetu.’ Tushigo naye gutomba gula tudi naye guzumba athu ako nga ndo. Tudi naye guzumba aphangi’etu nu guatotesela. (1 Yone 4:11) Ya mbadi, tudi naye gutangigiza ndaga yana gukalegewa tangua tuana totesela athu ako. Gula tuatshita ngenyi, tuajiya gukuatesa muthu watukalegela gubola nu gukuatesa hungu ha gujinga hamoshi. Mbatubamba ufuta wetu nu Yehowa nu mbatudivua muabonga diago. (2 Kol. 2:7; Kol. 3:14) Gu gisugishilo, samba Yehowa handaga muene wana gututoga ha gutotesela athu ako. Mubembigo egi Satana abolese ufuta wabonga muana khala nawo nu aphangi a mala nu a akhetu. (Ef. 4:26, 27) Tudi nu funu ya ukuateshi wa Yehowa ha gutuna gubua mu muheto wa Satana.

15. Ha gutadila Kolosai 3:13, itshi tuajiya gutshita gula phangi mumoshi wakalagala ndaga yatuhana lamba?

¹⁵ Itshi wajiya gutshita gula phangi mumoshi wa gukalegela ndaga imoshi ya gusagesa? Tshita yagasue ha gubamba guhuima. Wambela Yehowa luholo udi gudivua. Mutoge ha gukuatesa muthu wa gukalegela gubola nu agukuatese nji aye ha gumona makalegelo abonga a muthu muene. Makalegelo abonga ana tshita egi Yehowa amuzumbe. (Luka 6:28) Gula ushigo mujimbila gubola gua gukalegela phangi, tutadilenu luholo luabonga wajiya guzuela nenji. Tudi naye gutangiza tangua diagasue egi phangi’etu gakhalelego nu matangi a gutuhana lamba. (Mat. 5:23, 24; 1 Kol. 13:7) Tangua udi muzuela nenji mumonese egi yajiya gukhala egi gakhalelego nu matangi abola. Itshi wajiya gutshita gula phangi muene gashigo mutshigina gukamba guhuima? ‘Khala mukanga mutshima mu ndaga’ jienji. Landula gukhala nu guhuiminyina. (Tanga Kolosai 3:13.) Ndaga yabalega ndando idi egi, ushigo naye gumubambela khabu handaga gutshita ngenyi guajiya gubolesa ufuta waye nu Yehowa. Ubembigo egi nga gima gimoshi gigukhakuise. Gutshita ngenyi, mbagumonesa egi wana zumba Yehowa gubalega ima iko.—Ngi. 119:165.

16. Muthu wagasue mukatshi dietu udi nu ginemo giagutshita itshi?

¹⁶ Tuana suanguluga muavula luholo tuana kombelela Yehowa hamoshi nu aphangi’etu, tudi ‘hunji dimoshi,’ nu ‘mubambi mumoshi.’ (Yone 10:16) Mukanda Organisés pour faire la volonté de Jéhovah diyiji 165 udi muzuela egi: “Luholo tuana suanguluga gujinga hamoshi, esue nji tudi nu ginemo gia gukuatesa hungu ha gulandula gujinga hamoshi.” Tudi naye nji gutshita yagasue “ha gutadila aphangi’etu gifua luholo Yehowa wana guatadila.” Gu meso a Yehowa mukut’etu agasue tudi ‘ana azonda’ adi nu ndando. Wana gutadila nji aphangi’etu luholo elu ba? Yehowa wana mona nu wana zula nu ndando gima giagasue wana tshita ha gukuatesa aphangi’etu nu gudisagesa mukunda nu ene.—Mat. 10:42.

17. Desizio ditshi tudi naye guzula?

¹⁷ Tuana zumba aphangi’etu Aklisto. Hene, tudi naye guzula desizio dia gutuna ‘gukalagala ndaga yajiya gulebesa gutshigina gua phangi’etu nga gumubuisa mu gubola.’ (Lomo 14:13) Tuana mona egi aphangi’etu atubalega nu tuana tshigina guatotesela nu mutshima umoshi. Tuhanyigo njila egi ndaga jidi mutshita athu ako jitukhakhuise. Uvi, ‘tukalagalenu ndaga jidi gutukuatesa ha gukhala mu guhuima nu athu ako nu ha gudikolesa.’—Lomo 14:19.