1. Luholo 1 Phetelo 5:2 idi guyimonesa, ginemo gitshi gia ndando akulu ana khala nagio?

 AKULU adi naye gubamba imeme ya Yehowa. Aphangi awa adihanele gudi Nzambi, ana zula nu ndando ginemo gia gukuatesa aphangi a mala nu a akhetu. Ana tshita ngolo ha gukhala ‘abambi anyi . . . ana tala imeme muabonga.’ (Yel. 23:4; tanga 1 Phetelo 5:2.) Tuana suanguluga muavula nu akulu ana mu mahungu!

2. Malamba atshi akulu ako ajiya gutagana nawo?

² Akulu ana tagana nu malamba avula tangua adi mutagenesa inemo yawo. Ana tshita mudimo wakola ha gukuatesa aphangi mu hungu. Phangi Tony udi mukulu gu États-Unis, wakhalele naye gumonesa khadilo dia gudibulumuisa hagula gatshiginago inemo yagasue yakhalele gumuhanewa mu hungu. Udi muzuela egi: “Gugisendeselo gia misongo ya coronavirus, ngakhalele mutshita midimo yavula ha gulondega gudibungisa nu mudimo wa gulongesa. Ikhale ngenyi guakhalele nu midimo iko yavula ya gutshita. Ngabuile nu midimo yavula. Hene ngakhalelego luko nu tangua dia gutanga Biblia, gulonguga guami hakhami nga gutshita gisambu.” Ilir mukulu mumoshi gu Kosovo, wataganele nu malamba ako a gudisha. Hakhalele muene fundo diakhalele muluiwa ita, yakhalele lamba gudi muene ha gutumagela malongo a ulondegi wa Yehowa. Udi muzuela egi: “Tangua aphangi a gu Betele anguhanele ginemo gia gukuatesa aphangi a mala nu a akhetu akhalele ha fundo diakhalele muluiwa ita, ngakhalelego luko nu gikhesa. Ngavuile woma, hene ngamonele egi ndaga angutogele ha gutshita yakhalelego yabonga.” Phangi Tim udi misionere gu Asie wamonele egi yakhalele lamba ha gutagenesa ginemo gienji lusugu nu lusugu. Udi muzuela egi: “Matangua ako ngakhalele gudivua yaguhuila diago.” Itshi yajiya gukuatesa akulu ako adi mutagana nu malamba a luholo lumoshi?

3. Gubonga gutshi mukut’etu agasue tuajiya guheta mu gifezegeselo gia Gideona?

³ Akulu ajiya guzula malongo mu gifezegeselo gia Gideona. (Heb. 6:12; 11:32)  Wakhalele mubambi wa imeme ya Nzambi (Manz. 2:16; 1 Gudi. 17:6) Gifua Gideona, Yehowa watombele gale akulu ha gubamba akombeledi enji mu tangua dia lamba diakola. (Makal. 20:28; 2 Tim. 3:1) Gideona wakhalele nu matangi abonga nu gudibulumuisa nu khadilo dia gutumaga. Tuajiya guzula malongo mu gifezegeselo gienji. Hakhalele muene mutagenesa ginemo gienji yakhalele lamba gudi muene ha gukolesela. Ikhale tudi akulu nga ndo, tuajiya gukudisa khadilo dia guhana akulu mersi. Tuajiya guakuatesa mukunda nu mudimo wakola ana kalagala.​—Heb. 13:17.

4. Luholo lutshi Gideona wamonesele khadilo dia gudibulumuisa?

⁴ Gideona wakhalele muthu wa gudibulumuisa. b Tangua muanjelo wa Yehowa wamuwambelele egi muene watombewe ha guhuluisa enya Isalele gudi enya Madiana, Gideona wamuwambelele nu gudibulumuisa guagasue egi: “Fami yami idi yazoda mukatshi dia enya giphuta gia Manase, ame nji ngudi muthu wa gituhu mukatshi dia enya inzo ya sh’ami.” (Manz. 6:15) Watangijile egi gakhalelego watagana ha gutagenesa ginemo giene, uvi Yehowa wakhalele mujiya muabonga egi Gideona mbawutagenesa ginemo giene. Gideona watagenesele muabonga ginemo giene mu ukuateshi wa Yehowa.

5. Luholo lutshi gudibulumuisa gua mukulu mumoshi guajiya gulolewa?

⁵ Akulu ana tshita ngolo ha gumonesa khadilo dia gudibulumuisa mu ndaga jiagasue. (Mika 6:8; Makal. 20:18, 19) Ana gudishimana ndo mukunda nu makalegelo awo abonga nga ndaga ana tshita; gula akalegelego ndaga imoshi muabonga, anago gutangiza nji egi ashigo nu ndando. Uvi matangua ako yajiya gukhala lamba gudi mukulu ha gumonesa khadilo dia gudibulumuisa. Ha gufezegesa mukulu wajiya gutshigina inemo yavula, uvi gungima ikhadi lamba ha guyitagenesa yagasue. Yajiya gukhala nji lamba gudi mukulu muene ha gumonesa khadilo dia gudibulumuisa, tangua athu ako adi muzuela ndaga jiabola mukunda nu luholo luenji lua gutagenesa ginemo gimoshi ngenyi nga tangua adi gumushima. Malongo atshi akulu ajiya guzula mu gifezegeselo gia Gideona ajiya guakuatesa tangua adi mutagana nu ndaga jiene?

6. Malongo atshi akulu ajiya guzula mu gifezegeselo gia gudibulumuisa gia Gideona? (Tala nji gifuanesa.)

⁶ Khala mutoga ukuateshi. Muthu udi nu khadilo dia gudibulumuisa wana jiya egi gajiyilego gutshita ndaga jiagasue. Gideona wamonesele  khadilo dia gudibulumuisa hatogele muene ukuateshi gudi athu ako. (Manz. 6:27, 35; 7:24) Akulu atema ana toga ukuateshi. Tony tuazuelela gu thunda udi muzuela egi: “Ngakhalele mutshigina midimo yavula nga inyi ngakhalelego naye gutagenesa, handaga angulongesele ngenyi tangua ngakhalele mona wazonda. Ngazudile desizio dia guzuelela khadilo dia gudibulumuisa mu gukombelela guetu gua mu fami, ngatogele matangi gudi mukaji’ami. Ngatalele nji video imoshi idi mu jw.org idi muzuela egi, Comme Jésus, formons les autres, faisons-leur confiance et rendons-les capables.” Tony wasendesele gutamega aphangi ako ha gumukuatesa mu midimo yenji. Gubonga gutshi guahetele muene? Udi muzuela egi: “Midimo ya mu hungu yana kalegewa muabonga, ngana khala nji nu tangua diavula dia gukolesa ufuta wami nu Yehowa.”

7. Luholo lutshi akulu ajiya gulandula gifezegeselo gia Gideona gula athu azuela ndaga jiabola mukunda nu ene? (Yakoba 3:13)

⁷ Uvuigo khabu gula muthu mumoshi wazuela ndaga yabola mukunda nu aye. Yajiya gukhala nji lamba gula athu azuela ndaga jiabola mukunda nu akulu. Gifezegeselo gia Gideona giajiya guakuatesa nji. Gideona wakhalele mujiya egi gakhalelego muthu watagana, hene wahanele mvutu yatuluga tangua enya Efrayime azuelele ndaga jiabola mukunda nu muene. (Manz. 8:1-3) Gideona gahanenego mvutu nu khabu. Tangua akhalele gumuwambela ndaga jiakhalele guasagesa, waategelele nu gudibulumuisa guagasue, waahanele nji mvutu nu gisemo. Ndaga yene yaakuatesele ha guhena. Akulu atema, ana landula gifezegeselo gia Gideona luholo ana tegelela muabonga nu guhana mvutu yatuluga gula athu ako azuela ndaga jiabola mukunda nu ene. (Tanga Yakoba 3:13.) Gutshita ngenyi guana guakuatesa ha gubamba guhuima mu hungu.

8. Mvutu itshi akulu ajiya guhana gula adi guashimana? Hana gifezegeselo.

⁸ Khala muhana lutumbu luagasue gudi Yehowa. Tangua athu akhalele mutumbuisa Gideona habingile muene enya Madiana, wahanele lutumbu luagasue gudi Yehowa. (Manz. 8:22, 23) Luholo lutshi athu adi inemo ajiya gulandula gifezegeselo gia Gideona? Adi naye guhana Yehowa lutumbu mukunda nu ndaga adi mutagenesa. (1 Kol. 4:6, 7) Ha gufezegesa, gula ashimana mukulu mumoshi mukunda nu diskur diabonga diatshitshi muene, wajiya guzuela egi ndaga jialongesa muene jiakatuga mu Mbimbi ya Nzambi, nga ndo mu ndaga tuana longuga mu ulondegi wa Yehowa. Akulu ajiya gutangiza gula ana longesa ha gutumbuisa Yehowa nga hagula athu a ashimane. Tuzuelelenu gifezegeselo gia mukulu mumoshi mu jina dia Timote. Habuile muene mukulu wakhalele muzumba gutshita ba diskur. Udi muzuela egi: “Mbimbi jiami jia gisendeselo nu ifezegeselo yami yakhalele yakola ha gukotelesa. Athu ako akhalele gungushimana mukunda nu ndaga yene. Ndaga ya lamba idi egi akhalele muhaga matangi muavula gudi ame ha fundo dia guhaga matangi awo mu Biblia nga gudi Yehowa.” Gungima phangi Timote wamonele egi udi naye gusombegesa luholo luenji lua gulongesa hagula athu ahagigo matangi muavula gudi muene. (Ish. 27:21) Gubonga gutshi guahetele muene? Udi muzuela egi: “Mangino aphangi ako ana gunguwambela luholo diskur ngatshitshile diaakuatesele ha gukolesela mu malamba nga ha gukolesa ufuta wawo nu Yehowa. Ndaga yene yana gungusuanguluisa muavula gubalega tangua akhalele gungushimana ivo yavula yabalega gale.”

9. Ndaga itshi yatshitshile egi ikhale lamba gudi Gideona ha gutumagela Yehowa nu ha gukhala nu gikhesa? (Tala gifuanesa holu dia gizula.)

⁹ Hatombewe Gideona ha gukhala nzuji, yakhalele mutoga egi akhale nu khadilo dia gutumaga nu gumonesa gikhesa. Nzambi wamuhanele ginemo giakola gia gumuanga giwotshielo gia Bale gialondele sh’enji. (Manz. 6:25, 26) Gungima dia gubungisa masuta, Yehowa wamuwambelele  mbala jiyadi ha guzondesa mutango wa masuta. (Manz. 7:2-7) Gugisugishilo Yehowa wamuwambelele ha guya muluisa mbalagaji jienji jiakhelele mukatshi dia phundo mu phipha.​—Manz. 7:9-11.

10. Ndaga jitshi jiajiya gutshita egi ikhale lamba gudi mukulu ha gutumaga?

¹⁰ Akulu adi naye gukhala “hehi ha gutumaga.” (Yak. 3:17) Mukulu udi nu khadilo dia gutumaga udi naye gukhala hehi ha gukalegela ndaga Biblia yana zuela nu gutumagela ulondegi wa Nzambi. Udi naye guhana gifezegeselo giabonga gudi athu ako. Khadilo dienji dia gutumaga diajiya gulolewa. Yajiya gukhala lamba gudi muene ha gulandula utuameji adi gumuhana. Matangua ako wajiya gutangiza egi utuameji wene ushigo diago wabonga. Nga ndo ajiya gumuhana ginemo gimoshi giajiya gutshita egi ambiwe mu bologo. Luholo lutshi akulu ajiya gulandula gifezegeselo gia Gideona gia gutumaga mu ndaga eji?

11. Itshi yajiya gukuatesa akulu ha gutumaga?

¹¹ Khala mulandula muabonga utuameji udi muheta nu gutumagela ndaga jiene. Nzambi wawambelele Gideona luholo lua gumuanga giwotshielo gia sh’enji, nu fundo akhalele naye gutunga giwotshielo gihe-gihe gia Yehowa nu shitu akhalele naye guhana mulambu. Gideona gahudilego mihu uvi watshitshile gifua luholo Yehowa wamuwambelele ha gutshita. Mangino ulondegi wa Yehowa wana hana akulu utuameji mu njila ya mikanda, ba kominike nu malongo ako ana gutukuatesa ha gusala yagujinginyina gudi Yehowa. Tuana zumba diago akulu luholo ana landula nu gutshigina guagasue malongo ana heta mu ulondegi wa Yehowa. Gutshita ngenyi guana kuatesa aphangi agasue a mu hungu.​—Ngi. 119:112.

12. Luholo lutshi akulu ajiya gukalegela Hebelu 13:17 gula ulondegi wa Yehowa wasombegesa luholo lua gukalagala ndaga?

¹² Khalenu hehi ha gusombegesa. Yehowa watogele Gideona ha guvutula masuta avula gumbo diawo. (Manz. 7:8) Yajiya gukhala egi Gideona wadihudile egi: ‘Ndaga idi gungutoga Yehowa ha gutshita idi diago yabonga? Mbangubinga diago ita gula ngakalagala ndaga yene ba?’ Uvi Gideona watumagele Yehowa. Mangino akulu ana landula gifezegeselo gia Gideona tangua ana tumagela utuameji wana guahana ulondegi wa Yehowa. (Tanga Hebelu 13:17.) Ha gufezegesa mu 2014 Hunji dia Akulu Atuameji diazudile desizio mu ndaga yatadila mbongo akhalele mukalegela ha gutunga jinzo jia Ufumu nu ba Salle d’Assemblée. (2 Kol. 8:12-14) Thomo ulondegi wa Yehowa wakhalele musomba mahungu mbongo hagula a atungile jinzo jia Ufumu. Gungima mahungu akhalele muvutula mbongo jiene. Uvi mangino ulondegi wa Yehowa wana kalegela misomonyi yana hana mahungu agasue a ha mavu a mudidi ha gutunga jinzo jia Ufumu nu ba Salle d’Assemblée mu mafundo agasue ana khala najio funu. Ikhale mu mahungu anyi ashigo nu luholo lua guhana misomonyi yavula. Tangua phangi José wavuile ndaga yene watangijile egi: ‘Nga Inzo imoshi ya Ufumu yajiyilego gutungiwa. Ha mavu awa ndaga jiana kalegewa ndo ngenyi.’ Itshi yakuatesele José ha gutumagela ndaga yene? Udi muzuela egi: “Mukanda wa Ishima 3:5, 6 wangukuatesele ha gushila Yehowa mutshima. Ndaga jiabalegele diago  muabonga! Tuana tunga Jinzo jia Ufumu jiavula diago, yana gutukuatesa nji ha guhana mago mu maluholo avula hagula mukut’etu agasue tukhale luholo lumoshi.”

13. (a) Gideona wakhalele musha mutshima mu ndaga itshi? (b) Luholo lutshi akulu ajiya gulandula gifezegeselo gienji? (Tala nji gifuanesa.)

¹³ Khalenu mutumagela Yehowa nu gikhesa giagasue. Ikhale Gideona wakhalele muvua woma handaga ginemo giamuhanele Yehowa giakahelele giakola, uvi wamutumagele. (Manz. 9:17) Yehowa wawambelele Gideona egi mbawukhala n’enji. Ndaga yene yamukuatesele ha gusha mutshima egi Yehowa mbawumukuatesa ha gubamba akombeledi enji. Akulu ana jinga mu ifutshi inyi mudimo wetu watunyishiwe ana landula gifezegeselo gia Gideona. Ana tuameza nu gikhesa giagasue gudibungisa gua mu hungu, mudimo wa gulongesa ikhale ajiya guakuata, ajiya gusophesa, ajiya gutotesa midimo yawo nga ajiya guakalegela ndaga nu khuta. c Mu tangua dia lamba diakola, akulu mbaakhala nu funu ya gumonesa gikhesa ha gutumagela malongo mbaaheta, ikhale malongo ene ajiya guamba mu gingonza. Malongo ene ajiya gukhala gulongesa lukuma lua usopheshi nu ndaga tudi naye gutshita ha guhuluga gu ita ya Goga wa gu Magoga.​—Ezek. 38:18; Gumo. 16:21.

14. Itshi idi mumonesa egi yakhalele lamba gudi Gideona ha gukolesela?

¹⁴ Tangua Gideona wabuile nzuji wakhalele naye gukalagala mudimo wakola diago ha gutagenesa ginemo gienji. Tangua enya Madiana alengele mu phipha ha fundo dia ita, Gideona waalanduile sendese mu baba dia Izelele uu nu gu Muta wa Yordane. Idi naye gukhala egi njila yene yakhalele nu mitshi yavula diago. (Manz. 7:22) Gideona wasugile phamba gu Yordane ba? Ndo! Ikhale Gideona nu masuta enji 300 akhalele yaguhuila uvi azawugile muta wa Yordane alanduile guahata. Gungima akuatele enya Madiana a abingile.​—Manz. 8:4-12.

15. Mukunda natshi matangua ako yajiya gukhala lamba ha gukolesela?

¹⁵ Matangua ako mukulu wajiya gudivua diago yaguhuila ha gutagenesa ginemo gienji mu hungu nu mu fami. Luholo lutshi akulu ajiya gulandula gifezegeselo gia Gideona mu ndaga jia luholo elu?

16-17. Itshi yakuatesele Gideona ha gukolesela? Mu ndaga itshi akulu adi naye gusha mutshima? (Yeshaya 40:28-31) (Tala nji gifuanesa.)

 ¹⁶ Khalenu musha mutshima egi Yehowa mbawumihana ngolo. Gideona wakhelele musha mutshima egi Yehowa mbawumuhana diago ngolo; ndaga jiakalegewe diago ngenyi. Yehowa wamukuatesele diago. (Manz. 6:14, 34) Tangua Gideona nu masuta enji akhalele muhata mafumu mbadi a enya Madiana ha malu, yajiya gukhala egi mafumu ene akhalele mulenga holu dia shamo. (Manz. 8:12, 21) Nzambi wakuatesele diago enya Isalele ha gubinga mbalagaji jiawo. Akulu adi naye nji gushila Yehowa mutshima handaga ‘muene ganago guhuila nga guleba.’ Mbawahana ngolo tangua mbaakhala najio funu.​—Tanga Yeshaya 40:28-31.

¹⁷ Tutadilenu ndaga yakuatesele phangi Matthew wana tshita gu comité de liaison hospitalier. Itshi yamukuatesele ha gukolesela? Udi muzuela egi: “Yehowa wanguhanele ngolo gifua luholo mukanda wa Filiphi 4:13 wana zuela. Matangua avula ha ngakhalele yaguhuila, ngakhalele muvua egi ngajiyilego gutshita nga ndaga imoshi, uvi ngakhalele mutshita gisambu muavula, ngakhalele mutoga Yehowa ha gunguhana ngolo hagula ngajiya gukuatesa aphangi. Mu tangua diene ngakotelesele egi nyuma ya Yehowa yanguhanele ngolo yangukuatesele nji ha gukolesela.” Gifua Gideona, akulu ana tshita mudimo wakola wa gubamba akombeledi a Yehowa ngatshima yana khalago yaleba tangua diagasue. Hene adi naye gukhala nu gudibulumuisa adi naye nji gujiya egi tangua diagasue ajiyilego gutshita ndaga jiagasue gifua luholo adi mutshigina. Uvi adi naye gusha mutshima egi Yehowa mbawutegelela isambu idi mutshita ene ha gumutoga ukuateshi nu mbawahana ngolo ha gukolesela.​—Ngi. 116:1; Fili. 2:13.

18. Gifua luholo tuayimonyi, luholo lutshi akulu ajiya gulandula gifezegeselo gia Gideona?

¹⁸ Akulu ajiya guzula malongo avula mu gifezegeselo gia Gideona. Akulu adi naye gumonesa khadilo dia gudibulumuisa mu guvula gua midimo adi naye gutshigina ha gutshita tangua athu ako adi muzuela ndaga jiabola mukunda nu ene nga tangua adi guashimana. Luholo gisugishilo gia mavu awa giasuena hehi, akulu adi naye gukhala nu khadilo dia gutumaga nu gumonesa gikhesa. Adi naye gusha mutshima egi Yehowa mbawuahana ngolo ngatshima atagana nu malamba a luholo lutshi. Tuana suanguluga diago muavula nu mudimo wakola wana tshita akulu ha gubamba imeme, ‘tudi naye nji guzumba athu a luholo elu.’​—Fili. 2:29.