Mvuaji jiami jiakatugile gu Estonie mu tangua dia Ita ya Mbadi ya ha Mavu Agasue, ayile gu Allemagne, guene ngavualewe. Gungima asendesele gudilondega ha guya gu Canada. Inzo yetu ya thomo gu Canada yakhalele hehi nu Ottawa; yakhalele yazonda diago. Tuakhalele mujinga hamoshi nu susua. Tuakhalele diago phutu, uvi tuakhalele nu mayi ha gulonda ima ya gudia mu gimenegena.

Lusugu lumoshi Matemue a Yehowa akhalele muta maga nu mama, amutangele mukanda wa Gumonesa 21:3, 4. Ndaga amuwambelele jiakuatele diago mutshima wenji, wasendesele gudila. Tata nu mama asendesele gulonguga giamatshidia, gungima dia tangua diazonda abatijiwe.

Mvuaji jiami jiakhalelego mujiya guzuela Anglais muabonga, uvi akhalele mukombelela Yehowa nu gikhesa giagasue. Phipha yagasue tata wakhalele mutshita mudimo wa gulondega utadi wa nickel mu dimbo dia Sudbury gu provense ya Ontario, uvi mu lusugu lua phoso wakhalele gutubata mu mudimo wa gulongesa nu phangi’ami wa mukhetu Sylvia. Phoso yagasue tuakhalele mulonguga Inzo Yaleha ya Mutaledi mu fami. Tata nu mama angukuatesele ha guzumba Nzambi. Ngabatijiwe mu 1956, tangua ngakhalele nu ivo kumi. Luholo tata nu mama akhalele muzumba Yehowa muavula yangukuatesele ha gulandula gumukombelela.

Tangua ngazudile diplome, ngakhalelego gudihana luko muavula mu ndaga jia Yehowa. Ngatangijile egi gula ngabua muvundji wa njila, mbangushigo muheta makuta ha gutagenesa ndaga ngakhalele gudifelela mu ulenge ha guwenda mu avion ha guya nu gumona ifutshi iko. Ngahetele mudimo gu radio imoshi ya mu dimbo dietu, mudimo wami wakhalele gumba miziki nu ngimbo gu radio yene. Ngakhalele muzumba mudimo wene muavula. Uvi luholo ngakhalele mutshita mudimo wene mu ngueze, ngakhalelego muya luko muavula mu gudibungisa gua mu hungu; ngasendesele gubalegesa tangua diavula nu athu anyi anago guzumba Nzambi. Gungima ngawungulugile ndaga ngalongugile mu Biblia, jiangukuatesele ha gusombegesa.

Ngayile mu dimbo dia Oshawa gu Ontario. Ngadimonele nu phangi Ray Norman nu phangi’enji wa mukhetu Lesli nu avundji a njila ako guene. Anguyambele muabonga diago. Tangua ngamonele luholo akhalele nu gusuanguluga, yangutumile ha gutadila luko ndaga mbangukalagala mu monyo wami. Anguwambelele ha gusendesa gutshita mudimo wa muvundji wa njila. Ngasendesele gutshita mudimo wene mu Septembre 1966. Ngakhalele nu gusuanguluga guavula mu mu monyo wami. Uvi ndaga jiko jiakalegewe gungima, jiasombegesele diago monyo wami.

Tangua ngakhalele mungina khalasa, ngazalesele formilere ha guya mutshita gu Betele ya gu Toronto gu Canada. Gungima tangua ngabuile muvundji wa njila, angutamegele ha guya mutshita mudimo ivo nguana gu Betele. Uvi ngakhalele muzumba Lesli muavula, ngakhalele muvua woma egi gula ngaya gu Betele mbangushigo gumumona luko. Gungima dia gutshita isambu yavula, ngatshiginyile ha guya gu Betele, uvi ngavile gikenene giavula ha gudikhapha nu Lesli.

Gu Betele ngakhalele mutshita mudimo wa guweva milele (lingerie), gungima ngabuile sekretere. Mu tangua diene, Lesli wabuile pionye spesiale mu dimbo dia Gatineau gu Québec. Ngakhalele gudihula gula itshi Lesli wakhalele mutshita guene; ngakhalele nji gudihula gula ngazudile desizio diabonga. Gungima, ndaga imoshi ya gusuanguluga yakalegewe mu monyo wami. Ray phangi’a Lesli watamegewe gu Betele. Atuhagele n’enji sugu imoshi! Ndaga yene yangukuatesele diago ha gukolesa ufuta nu Lesli. Tuadizudile mu ulo mu lusugu lua 27 Fevrier 1971, tangua ngatagenesele ivo nguana gu Betele.

Atutumile nu Lesli mu hungu dia Français gu Québec. Ngungima dia ivo yazonda, ngadihudile diago tangua angutombele ha gubua mutadi muwendji, handaga mu tangua diene ngakhalele nu ivo 28. Ngakhalele mutangiza egi ngudi muvuala, ngushigo mujiya ndaga jiavula ha gukhala mutadi muwendji. Uvi mbimbi jidi mu Yelemiya 1:7, 8 jianguhanele gikhesa. Lesli watshitshile aksida mbala jiyadi mu gamiyo, gakhalelego nji mubanda. Tuatangijile egi idi lamba ha gutshita mudimo wa mutadi muwendji. Uvi Lesli wazuelele egi: “Gula Yehowa watutoga ha gutshita ndaga imoshi, tudi naye guyitshita.” Tuatshiginyile ginemo giene, tuatshitshile ivo 17 mu mudimo wene.

Ngakhalele nu ndaga jiavula jia gutshita tangua ngakhalele mutadi muwendji, hene ngakhalelego mubalegesa tangua diavula nu Lesli. Uvi ngakhalele naye gusombegesa. Lusugu lumoshi mu gimenegena, ngavile alarme mudila ha mufulo, yakhalele mu lusugu lua thomo lua phoso. Tangua ngazogele ngamonelego nga muthu mumoshi, uvi ngasangele ima ya gutela basket nu mulele wa ha mesa nu mabundu nu ima ya gudia nu mapha nu mulangi wa matombe nu makhopho nu mukanda umoshi wakhalele wa gusongega egi: “Zula mukaji’aye muye mubalegese n’enji tangua.” Ngakhalelego mujiya muthu wasonegele mukanda wene. Yakhalele lusugu luabonga diago, handaga muanya wakhalele wazogi gale. Uvi ngawambelele Lesli egi ngushigo muya, handaga ngudi naye gulondega ba diskur. Wakotelesele, uvi wavile ndambo ya gikenene. Tangua ngakhalele gu mesa, ngamonele egi ngatshitshi muabola. Ngatangijile ndaga jidi mu Efeso 5:25, 28. Ngamonele egi Yehowa wakhalele gunguwunguluisa ha gutagenesa nzala jia mukaji’ami. Gungima dia gutshita gisambu, ngawambelele Lesli egi: “Tuye,” wasuangulugile muavula. Tuayile gu khulo ya muta, tuabambele mulele hashi, tuabalegesele diago tangua diabonga hamoshi. Gungima ngayile giwa mulondega ba diskur.

Mudimo wa mutadi muwendji wakhalele gutubatela gusuanguluga guavula. Tuakhalele nu gusuanguluga guavula gubalega tangua tuakatugile gu Colombie ha  guya gu Terre-Neuve. Ngatagenesele felela diami dia guya nu guwenda mu ifutshi iko. Ngakhalele mutangiza ha gungina khalasa dia Gileade uvi ngakhalelego mutshigina guya mu gifutshi giko. Ngakhalele mumona egi gukhala misionere gudi ginemo gimoshi gia ndando yavula, ngushigo yatagana ha gutagenesa ginemo giene. Ngakhalele muvua woma egi ajiya gungutuma gu Afrique, handaga misongo ya gisambugila nu ita yakhalele guene. Ngakhalele gami muabonga gu Canada.

Mu 1992 tangua ahanele luko Matemue a Yehowa njila ya gulongesa lukuma luabonga mu ifutshi yakhalele mu Union Sovietique, atutogele ha guya mutshita mudimo wa gimisionere gu Estonie. Tuadihudile diago muavula, uvi tuatshitshile gisambu mukunda nu ndaga yene. Tuatangijile luko egi: ‘Gula Yehowa watutoga ha gutshita ndaga imoshi, tudi naye guyitshita.’ Tuatshiginyile ha guya gu Estonie, ngatangijile egi, ‘mbatushigo muya gu Afrique.’

Tuasendesele mbala imoshi gulonguga guzuela Estonie. Tuakalegele mbeji mbadi mu gifutshi giene, gungima atutogele ha gutshita luko mudimo wa mutadi muwendji. Tuakhalele naye guya mutala mahungu 46 nu mahunji akhalele mu ifutshi thathu, Estonie, Latvie, Lithuanie nu mu dimbo dia Kaliningrad gu Russie. Tuakhalele naye gulonguga mazuelelo awa: Letton, Lituanien, nu Russe. Yakhalelego yaleba. Uvi aphangi asuangulugile diago muavula luholo tuakhalele mutshita ngolo ha gulonguga mazuelelo awo; atukuatesele nji muavula. Mu 1999, ahagele Betele gu Estonie, ngasendesele gutshita gu komite ya Filiale nu phangi Toomas Edur, Lembit Reile nu Tommi Kauko.

Tuadijiyile nu aphangi avula akhalele mu bologo gu Sibérie. Aphangi ene ataganele nu ndaga jia lamba mu bologo nu akhalelego gudimona luko nu enya fami jiawo, uvi atoteselego gusuanguluga guawo. Akhalele mulongesa nu gusuanguluga nu gikhesa giagasue. Ndaga yene yatukuatesele ha gumona egi esue nji tuajiya gukolesela tangua tudi mutagana nu malamba nu gukhala nu gusuanguluga.

Tuakhalele mutshita mudimo wavula guhululuga ndo, hene Lesli wasendesele guvua guhuila guavula. Uvi tuakhalelego mujiya egi, wakhalele muvua guhuila guavula handaga wakhalele nu misongo yana tamegewa egi fibromyalgie. Hene tuazudile desizio dia gubemba mudimo wetu ha guvutuga gu Canada. Tangua atutamegele ha gungina khalasa dia aphangi a gu komite ya filiale nu akaji’awo gu Patterson, New York gu U.S.A., ngatangijile egi tuajiyilego gungina mu khalasa diene. Uvi gungima dia gutshita isambu yavula, tuatshiginyile. Yehowa watukuatesele diago. Tangua tuakhalele mu khalasa, minganga yasagele Lesli muabonga diago. Tuasendesele luko gutshita midimo gifua luholo tuakhalele mutshita thomo.

Tuavutugile gu Estonie, lusugu lumoshi mu ngueze mu 2008, aphangi a gu biro diakoma dia Matemue a Yehowa angutamegele gu telefone ha guhula gula tuajiya guya mu Congo. Ngadihudile diago muavula; ngaawambelele egi, ‘mbangumihana mvutu hamene.’ Thomo ngawambelego Lesli ndaga yene, handaga ngajiyile egi gula ngamuwambela umubanda gikolekole. Uvi ame ngabandele gikolekole, handaga ngakhalele muwambela Yehowa mu gisambu ndaga jiakhalele gungusagesa mukunda nu Afrique.

 Lusugu lualanduile, ngawambelele Lesli ndaga yene. Tuatangijile egi: “Yehowa udi gututuma gu Afrique. Luholo lutshi tuajiya gujiya egi tuajiyilego gutshita mudimo wene nga gukhala nu gusuanguluga gula tuaphagele ndo?” Gungima dia gutshita ivo 16 gu Estonie, tuayile gu Kinshasa mu Congo. Betele ya mu Congo yakhalele yabonga diago, aphangi akhalele mujinga mu guhuima. Gima gia thomo Lesli wahagele gu sugu yetu, yakhalele Karte tuakatugile nadio gu Canada. Karte diene diakhalele dia gusonega egi: “Khala nu gusuanguluga ha fundo diagasue udi.” Tuamonele diago egi mudimo wa gimisionere wana bata gusuanguluga guavula, tangua tuadimonele nu aphangi nu tangua tuasendesele gulonguga nu athu Biblia. Tuakhalele diago nu gusuanguluga. Gungima tuahetele luendu lua guya mutala ifutshi iko 13 ya mu Afrique. Ndaga yene yatukuatesele ha gumona gudisha guana khala mukatshi dia athu nu ima iko yabonga. Ngakhalelego gudisagesa luko, uvi tuahanele Yehowa mersi avula luholo atutumile mu Afrique.

Mu Congo, tuasendesele gudia ima yavula ya gudisha, Iko ngatanjilego egi ngajiya guyidia. Uvi tangua tuakhalele mumona aphangi mudia ima yene, esue nji tuakhalele muphaga, gungima tuakhalele musuanguluga nayo.

Tuayile gu Est ya Congo ha guhana aphangi gikhesa nu guabatela ima akhalele nayo funu. Mbundudi jiakhalele muluisa membo a gu Est nu gusagesa akhetu nu ana. Aphangi avula akhalelego nu ima yavula ya gujingila. Uvi akhalele nu felela diakola dia gufuzumuga, akhalele muzumba Yehowa, akhalele nji ya gujinginyina mu ulondegi wenji. Ndaga yene yatuhanele diago gikhesa. Gifezegeselo giawo giatutumile ha gutangiza luko ndaga jiana gututuma ha gukombelela nu gukolesa gutshigina guetu. Jinzo jia aphangi ako jiamuangewe, mbuto jiawo nji jiabolesewe mu mahia. Ngamonele egi tuajiya gutotesa ima yetu ya gujingila muphushi, hene ufuta wetu nu Yehowa udi nu ndando yavula. Ikhale aphangi akhalele mutagana nu malamba akola, uvi akhalelego gudisagesa muavula. Gifezegeselo giawo giatukuatesele ha gumona egi, tudi naye gukolesela mu malamba tudi mutagana nawo nu gikhesa giagasue.

Atutogele ha guya gu Betele ya gu Hong Kong. Tuatangijilego egi gudi nu lusugu tuajiya guya mujinga gu Asie! Tuatshiginyile ha guya, handaga tuamonele luholo Yehowa wakhalele gutukuatesa mu midimo yagasue  akhalele gutuhana. Mu 2013, tuakhalele nu gikenene giavula ha gubemba mafuta etu nu ndaga jiabonga mu Afrique; tuakhalelego mujiya ndaga jiakhalele gutunenga gutuama.

Yakhalele usombegeshi wakoma diago ha gujinga gu Hong Kong. Fundo diene diakhalele nu athu avula a mu mafundo agudisha ha mavu. Yakhalelego yaleba ha gulonguga Gishinua. Aphangi atuyambele muabonga diago, tuakhalele musuanguluga nji nu ima yawo ya gudia. Midimo yakhalele gudivudisa muavula gu Betele, tuakhalele nu funu ya jinzo jiko ha gulandula gutshita midimo yene, uvi jinzo jiakhalele ndando yakola ha gufutshila. Hene, Hunji dia Akulu Atuameji diazudile desizio dia gudiga jinzo jiko jiavula gu Betele. Gungima mu 2015, atutumile gu Corée du Sud, guene tudi uu nu mangino. Haha gu Corée du Sud tuana longuga zuelelo diko diakola, khenji tusendesa gale ndo guzuela muabonga zuelelo diene, uvi aphangi a mala nu akhetu adi gutuwambela egi tudi gale mujiya guzuela ndambo muabonga zuelelo dia Coréen.

Tuamonele egi yana khalago yaleba ha gukuata mafuta, uvi gula tudi mutamega aphangi gumbo dietu ha gubalegesa nawo tangua, mbatuajiya muabonga. Tuakotelesele egi aphangi’etu ana khala nu ndaga jiavula jidi gudivua gubalega ndaga jia gudisha. Tuakotelesele nji egi Yehowa watufugile mu luholo lua gushimana hagula tuajiya guwambela athu ako ndaga jidi mu mitshima yetu nu ha gukuata mafuta avula.​—2 Kol. 6:11.

Tuamonele egi tudi naye gutadila akombeledi a Yehowa gifua luholo muene wana guatadila nu gukamba ndaga jidi mumonesa egi Yehowa wana gutuzumba nu wana gututuameza. Tangua tuana gudihula gula aphangi adi musuanguluga nu esue, tuana tanga mikanda yatusonegele mafut’etu. Luholo Yehowa wana hana mvutu gu isambu yetu, yana gututshiginyisa egi wana gutuzumba nu wana gutuhana ngolo.

Gungima dia ivo yavula, ame nu Lesli tuakotelesele egi idi nu ndando ha gubalegesa tangua hamoshi ikhale tudi nu ndaga jiavula jia gutshita. Tuamonele nji egi idi nu ndando ha gudilela gula tuajimbila ndaga imoshi tangua tudi mulonguga zuelelo dihe-dihe. Phipha yagasue tuana hana Yehowa mersi mukunda nu ndaga yatusuanguluisa.

Mu guzuela guabonga, ngakhalele mutangiza egi ngajiyilego gubua misionere nga guya mujinga mu ifutshi giko. Uvi ngudi nu gusuanguluga ha gumona egi Yehowa wajiya gutukuatesa ha gutshita ndaga jiagasue. Ame muwunguluga luko ndaga jiazuelele profete Yelemiya: ‘O Yehowa, wanguhuigile.’ (Yel. 20:7) Yehowa watuhanele ima yavula diago inyi tuakhalelego mutangiza; watukuatesele nji mu luholo lunu tuatangijilego nga hazonda. Watagenesele nji felela diami dia guwenda mu avion. Tuayile mu mafundo avula anyi ngatangijilego egi ngajiya guheta guene tangua ngakhalele mona wazonda. Tuayile mutala ba Betele mu ba continent thano. Ngudi muhana Lesli mersi avula luholo ana gungukuatesa ha gutagenesa inemo eyi yagasue.

Esue mujiya egi tuana tshita ndaga eji jiagasue handaga tuana zumba Yehowa. Ndaga jiabonga tudi muheta mangino jidi gutuwunguluisa gusuanguluga mbatukhala nago tangua Yehowa ‘mbawukangula koko dienji ha gutagenesa nzala ya ima yagasue idi nu monyo.’​—Ngi. 145:16.