1-2. Ndaga jitshi jia lamba Aklisto ana tagana najio mangino gifua Lota?

 TANGUA tuana mona makalegelo abola a athu a ha mavu wawa, tuana gudivua gifua muadivuile Lota. Lota “wakhalele gudisagesa muavula mukunda nu ndaga jia musonyi jia athu,” handaga wakhalele mujiya egi Tata wetu wa mu dilu ganago gutshigina nga hazonda makalegelo abola. (2 Phet. 2:7, 8) Lota watunyile makalegelo a athu abola a mu tangua dienji handaga wakhalele munemesa Nzambi muavula, nu wakhalele gumuzumba. Esue nji tudi mujinga nu athu anago gunemesa Yehowa nu anago gutumagela mikhuala yenji. Ikhale ngenyi, tuajiya gukhala nu makalegelo abonga nu gunemesa Nzambi gula tuana gumuzumba.​—Ish. 14:2.

² Gishina giene, Yehowa wana gutuhana malongo adi mu mukanda wa Ishima ha gumuzumba nu ha gumunemesa. Aklisto agasue, mala nu akhetu, mavuala nu athu agukola ajiya diago guheta gubonga gula alonguga malongo a ndando adi mu mukanda wa Ishima mukhapho 9.

3. Ha gutadila Ishima 17:3, ndaga itshi yana gututuma ha gubamba mutshima wetu? (Tala nji gifuanesa.)

³ Ndaga ya ndando tudi naye gubambela mutshima wetu wa gifuanesa idi egi, Yehowa wana tanga ndaga jidi mu mitshima yetu. Yakotelesa egi wana mona ndaga jinyi athu ako ajiyilego gumona, wana gutujiya nji muabonga. (Tanga Ishima 17:3.) Mbawutuzumba gula tudi mukalegela malongo enji mu monyo wetu, ngenyi mbayitukuatesa ha gujinga mayilago. (Yone 4:14) Gula tuatshita ngenyi, mbatushigo mubolesa makalegelo etu. Satana nu athu a ha mavu enji mbaashigo gutuhuiga. (1 Yone 5:18, 19) Gula tudi nu ufuta wabonga nu Yehowa, mbatumuzumba muavula, nu mbatumunemesa nji  muavula. Gula tushigo mutshigina guhana Yehowa gikenene, tudi naye gutuna matangi agasue ajiya gututuma ha gubua mu gubola. Gula matangi a gutshita ndaga yabola atujila, tudi naye gudihula egi: ‘Yehowa wana gunguzumba muavula, na mukunda natshi ngajiya gumukalegela ndaga yabola nu mutshima umoshi?’​—1 Yone 4:9, 10.

4. Luholo lutshi guvila Yehowa woma guakuatesele phangi Marta ha gutuna gubua mu gubola?

⁴ Phangi wa mukhetu Marta wana khala gu Croatie, watshiginyile gubua mu uthambi. Udi muzuela egi: “Yakhalele lamba ha gutangiza muabonga, nu ha gubinga matangi a gukalagala ndaga yabola. Uvi guvila Yehowa woma guangukuatesele.” b Mu luholo lutshi? Marta udi muzuela egi wakhalele mutangigiza malamba ajiya gumubuila gula watshita uthambi. Esue nji tuajiya gutshita ngenyi. Lamba diakola didi egi mbatuhana Yehowa gikenene, nu mbatutotesa luendu lua gumukombelela mayilago.​—Gis. 6:5, 6.

5. Longo ditshi tuajiya guzula mu lumene lua Leo?

⁵ Gula tudi muvuila Yehowa woma, mbatutshita ngolo ha gutuna gukuata ufuta nu athu ana kalagala ndaga jiabola. Leo wana khala mu Congo, wakotelesele nji ndaga yene. Ivo nguana gungima diagubatijiwa guenji, wakuatele ufuta nu athu akhalele mukalagala ndaga jiabola. Wakhalele mutangiza egi ikhale wakuatele ufuta nu athu ene uvi muene hakhenji gakhalelego mukalagala ndaga jiene, yakhalelego ndaga yabola gumeso a Yehowa. Uvi gungima mafuta ene amutumile ha gusendesa gunua matombe avula nu gukalagala uthambi. Gungima wasendesele gutangiza ndaga jiamulongesele mvuaji jienji jia Matemue a Yehowa. Wasendesele nji gutangiza gusuanguluga gakhalele nago hakhalele muene nu ufuta wabonga nu Yehowa. Gubonga gutshi gahetele? Wasendesele luko gukalagala ndaga jiabonga. Akulu amukuatesele ha guvutuga luko gudi Yehowa. Mangino udi mukulu mu hungu, udi nji pionye spesiale.

6. Ifezegeselo itshi ya akhetu mbadi tuza mutadila?

 ⁶ Tutadilenu mukanda wa Ishima mukhapho 9, udi muzuelela akhetu mbadi. Muko udi mumonesa ndunge, uvi muko guheya. (Fuanesa nu Roma 5:14; Galatiya 4:24.) Tangua tudi mulonguga mukhapho wene, tujimbilago egi mavu awa a Satana adi azala pha nu athu ana tshigina gutshita uthambi nu gutala pornografi. (Ef. 4:19) Hene idi nu ndando egi tulandule gutshita ngolo ha guvuila Nzambi woma nu gutuna ndaga jiabola. (Ish. 16:6) Idi yadiago egi mukut’etu agasue ikhale mala nga akhetu, tuajiya guheta gubonga gua ndaga jidi mu mukhapho wene. Akhetu ene mbadi adi mumonesewa gifua adi mutamega athu ashigo nu eksperianse yakotelesa egi ‘athu aheya.’ Mukut’awo agasue adi uzuela egi: ‘Iza udie mu inzo yami.’ (Ish. 9:1, 5, 6, 13, 16, 17) Uvi ndaga mbajibuila athu anatshigina emvitasio ya akhetu ene, jidi jia gudisha.

7. Hagutadila Ishima 9:13-18, ndaga itshi yana buila athu ana tshigina emvitasio ya mukhetu wa heya? (Tala nji gifuanesa.)

⁷ Tutadilenu luholo ‘mukhetu wa heya’ udi mutamega. (Tanga Ishima 9:13-18.) Udi mutamega nu gikhesa giagasue athu aheya ha gungina mu inzo yenji ha gukalagala n’enji wano. Itshi yana gubuila athu ene? ‘Athu ana guya mu inzo yenji ana gufua.’ Ungulugenu gifezegeselo gia luholo elu tuamonyi gu gisendeselo gia mukanda wa Ishima. Biblia yatutemesa mukunda nu mukhetu wa ‘lumbuga nu mukhetu wa thambi’ egi: ‘Inzo yenji idi gifua njila idi mubata gu gufua.’ (Ish. 2:11-19) Mukanda wa Ishima mukhapho 5:3-10 udi nu malongo adi gututemesa mukunda nu ‘mukhetu muko wa lumbuga’ munu ‘malu enji adi mubata gu gufua.’

8. Desizio ditshi tudi naye guzula?

⁸ Athu anyi ana tegelela ‘mukhetu waheya’ adi naye gutomba gula mbaatshigina emvitasio yenji nga ndo. Esue nji tuajiya gutagana nu ndaga ya luholo elu. Itshi tuajiya gutshita gula muthu mumoshi watutuma ha gukalagala uthambi nga ndo tuamona gifuanesa nga video ya pornografi mu telefone, gu televizio nga mu Internet?

9-10. Ndaga jitshi jidi gututuma ha gutuna uthambi nu ndaga jiko jia musonyi?

⁹ Tudi nu ndaga jiavula jidi gututuma ha gutuna uthambi nu ndaga jiko jia musonyi. Mukanda wa Ishima udi muzuela egi ‘mukhetu muene waheya’ udi muzuela egi: ‘Meya a gukuya ana khala atuluga.’ ‘Meya ene a gukuya’ adi itshi? Biblia yana fuanesa gubungisa muila mukatshi dia yala nu mukhetu adizudile gale mu ulo nu meya atuluga. (Ish. 5:15-18) Phamba yala nu mukhetu adizudile gale mu ulo adi naye gubungisa muila. Gudisha gutshi gudi mukatshi dia ‘meya atuluga’ nu “meya a gukuya”? Meya a gukuya ajiya gumonesa gubungisa muila mukatshi dia athu khenji adizudile galego mu ulo. Matangua avula ndaga jiene jiana  kalegewa mu gisuegi, gifua luholo nzangi yana gukuya ima mu gisuegi. “Meya a gukuya” ajiya gumonega gifua adi atuluga gula athu adi mutshita ndaga yene adi mutangiza egi nga muthu mumoshi gajiyilego gumona ndaga adi mutshita. Idi ndaga ya gikenene diago handaga Yehowa wana mona ndaga jiagasue! Ufuta wetu nu Yehowa udi ndaga yabalega ndando. Hene gushigo nga gima gimoshi gia “tuluga” gubalega gikenene tuajiya guvua gula tuatotesa ufuta wene. (1 Kol. 6:9, 10) Uvi gudi nu ndaga jiko jiavula.

¹⁰ Gukalagala uthambi guajiya gutuma muthu ha guvua musonyi, gudivua gifua ushigo nu ndando, gumita vumo dia undumbu nga gubolesa ufuta mu fami. Idi diago nu ndando ha gutuna emvitasio ya mukhetu waheya. Gukalagala uthambi guana bolesa ufuta wa muthu nu Yehowa; guana tuma nji athu avula ha guzula misongo yajiya guabata gu gufua. (Ish. 7:23, 26) Verse 18 ya mukhapho 9 idi musugisa egi: ‘Athu adi muya gu inzo yenji adi gifua mu Malumba aleha.’ Mukunda natshi athu avula adi mutshigina emvitasio ya mukhetu muene idi mubata gu gufua?​—Ish. 9:13-18.

11. Mukunda natshi gutala pornografi gudi diago ndaga yabola?

¹¹ Muheto wakola wana tuma athu ha gubua mu lamba diene idi gutala pornografi. Athu avula ana tangiza egi gutala pornografi gushigo ndaga yabola. Uvi gutala pornografi gudi ndaga yabola; guana katula muthu ginemua; yana khala nji lamba ha gubemba khadilo diene. Gula muthu watala ifuanesa idi mumonesa ndaga jia musonyi, yana khala lamba ha gujimbila ndaga jiene. Ndaga yabalega gubola idi egi, gutala pornografi guanago gukatula nzala ya gubungisa muila uvi guana kolesa nzala yene muavula diago. (Kol. 3:5; Yak. 1:14, 15) Idi yadiago egi athu avula ana tala pornografi ana kalagala ndaga jia musonyi.

12. Mukunda natshi tudi naye gutshita ngolo ha gutuna gutala ifuanesa yajiya gutuhana matangi a ndaga jia musonyi?

¹² Itshi tuajiya gutshita gula tuamona gifuanesa gia gima gidi mumonesa ndaga jia musonyi mu telefone, gu televizio nga mu Internet? Tudi naye gubemba gutala mbala yimoshi. Ndaga yajiya gutukuatesa ha gutuna makalegelo a luholo elu idi gukotelesa egi ufuta wetu nu Yehowa udi ndaga yabalega ndando. Mangino, ifuanesa iko yanago gumonesa diago pornografi uvi yana tuma athu ha guvua nzala ya gubungisa muila. Mukunda natshi tudi naye guyituna? Handaga tushigo mutshigina gutangiza nga ndaga imoshi yajiya gututuma ha gukalagala uthambi mu matangi. (Mat. 5:28, 29) Mukulu mumoshi mu jina dia David wana khala gu Thaïlande udi muzuela egi: “Ngana gudihula egi, ‘ikhale ifuanesa iko ishigo mumonesa diago pornografi; Yehowa mbawusuanguluga diago gula ngudi mulandula guyitala ba?’ Matangi a luholo elu ana gungukuatesa ha gutshita ndaga nu gutema guagasue.”

13. Itshi yajiya gutukuatesa ha gutshita ndaga nu gutema guagasue?

¹³ Gula tudi muvua woma ha gutuna gutshita ndaga imoshi inyi yajiyilego gusuanguluisa Yehowa, yajiya gutukuatesa ha gutshita ndaga nu gutema guagasue. Guvuila Nzambi woma gudi ‘gisendeselo gia ndunge.’ (Ish. 9:10) Gisendeselo gia Ishima mukhapho 9 gidi muzuelela ndaga yene. Gidi mufuanesa ‘ndunge jia giamatshidia’ nu mukhetu muko.

14. Emvitasio itshi yagudisha idi mu Ishima 9:1-6?

¹⁴ Tanga Ishima 9:1-6. Verse jiji jidi mumonesa emvitasio yakatuga gudi Yehowa handaga muene udi Mufugi, udi nji ha gishina gia ndunge jia maluholo agasue. (Ish. 2:6; Roma 16:27) Verse jiene jidi muzuelela inzo imoshi yakoma idi nu makunji sambadi. Idi mumonesa egi Yehowa wana khala nu khadilo dia guhana, wana kuatesa nji muthu wagasue udi mutshigina guheta ndunge jia Nzambi mu monyo wenji.

15. Nzambi udi gututoga ha gutshita itshi?

¹⁵ Gifezegeselo gia mukhetu udi mumonesa ‘ndunge jia giamatshidia,’ gidi gutulongesa egi  Yehowa wana khala nu khadilo dia guhana, wana gutuhana ima yavula yabonga. Verse jiene jidi muzuela egi, mukhetu muene watamega athu ha gungina mu inzo yenji hagudia ima yabonga yalondega muene nu misunyi nu vinyo. (Ish. 9:2 tala mbimbi goshi’a diyiji) Udi muzuela luko mu verse 4 nu 5 egi: “Mukhetu muene [yakotelesa egi ndunge jia giamatshidia,] udi muwambela muthu wa heya egi: ‘Iza udie dipha diami.’” Mukunda natshi tudi naye gutshigina emvitasio ya guya gu inzo ya ndunge jia giamatashidia ha gudia ima yenji? Yehowa wana tshigina egi an’enji akhale atema nu akhale mu ubambi. Ganago gutshigina egi tuzule badesizio abola ajiya gutubatela malamba nu gikenene. Gishina giene ‘wana gubamba ndunge jienji jia giamatshidia mukunda nu athu abonga.’ (Ish. 2:7) Gula tudi diago muvuila Yehowa woma, mbatukalagala ndaga jidi gumusuanguluisa. Tuana tegelela malongo enji abonga hene tuana guakalegela nu gusuanguluga guagasue.​—Yak. 1:25.

16. Luholo lutshi guvuila Nzambi woma guakuatesele Alain ha guzula desizio diabonga? Gubonga gutshi gahetele?

¹⁶ Tutadilenu luholo guvuila diago Nzambi woma guakuatesele phangi Alain ha guzula desizio diabonga. Phangi Alain udi mukulu mu hungu, udi nji mulongeshi. Udi muzuela egi: “Mafut’ami avula a mudimo akhalele mutala pornografi ha guheta malongo mu ndaga yatadila gubungisa muila.” Uvi Alain wakhalele mujiya egi ishigo ngenyi. Udi muzuela egi: “Ngatunyile gutala filme jiene handaga ngana zumba Yehowa; ngana gumunemesa nji. Ngawambelele nji mafut’ami a mudimo ndaga yangutumile ha gutuna gutala filme jiene.” Phangi Alain wakalegele malongo adi mukatuga mu ‘ndunge jia giamatshidia’ ha ‘guwenda mu njila ya ndunge.’ (Ish. 9:6) Mafuta a Alain adihudile luholo Alain watunyile gutala filme jia pornografi. Mangino, ako mukatshi diawo ana longuga gale Biblia nu anaya mu gudibungisa gua mu hungu.

17-18. Gubonga gutshi athu ana tshigina emvitasio ya ‘ndunge jia giamatshidia’ ana heta? Gubonga gutshi gudi guanengenena? (Tala nji gifuanesa.)

¹⁷ Yehowa udi mukalegela ifezegeselo ya akhetu mbadi ha gutumonesa luholo tuajiya gukhala nu gusuanguluga mu masugu adi muza. Athu ana tshiginyina emvitasio ya ‘mukhetu wa heya,’ ana suanguluga ha kalagala ndaga jia musonyi. Uvi anago gujiya egi ndaga ana kalagala mbajiabatela malamba mu masugu adi muza. Ndaga jiene mbajiabata gu ‘gufua.’​—Ish. 9:13, 17, 18.

¹⁸ Uvi mu masugu adi muza, ndaga mbajikhala jia gudisha mukunda nu athu ana tshigina emvitasio ya mukhetu udi mumonesa ‘ndunge jia giamatshidia.’ Adi nu gusuanguluga handaga adi nu ima yagasue ana khala nayo funu ha gukolesa ufuta wawo nu Yehowa. (Yesh. 65:13) Yehowa udi muzuela mu njila ya profete Yeshaya egi: ‘Ngutegelelenu  muabonga, dienu ima yabonga; ngenyi mbamusuanguluga muavula nu ima yabalega gubonga.’ (Yesh. 55:1, 2) Tudi naye guzumba ima Yehowa wana zumba nu gutuna ima yana tuna muene. (Ngi. 97:10) Tuana khala nu gusuanguluga handaga tudi nu luendu lua gutamega athu ako ha guheta gubonga gudi mukatuga mu ‘ndunge jia giamatshidia.’ Tudi gifua enya mudimo adi mutamega holu dia dimbo egi: ‘Enue athu aheya izenu haha.’ Esue nu athu ana tshigina emvitasio yetu, tuana heta gubonga mangino, mbatuheta nji gubonga mu masugu adi muza. Ana kolesela ha gutuhana njila ‘yagujinga’ mayilago, luholo tudi ‘muwenda mu njila ya ndunge.’​—Ish. 9:3, 4, 6.

19. Gifua luholo Mulongeshi 12:13, 14, idi guyimonesa, desizio ditshi tudi naye guzula? (Tala nji galuanda “ Guvuila Nzambi Woma Guana Gutubatela Gubonga.”)

¹⁹ Tanga Mulongeshi 12:13, 14. Gukhala nu woma wa diago mukunda nu Yehowa mbagutubamba, mbagutukuatesa nji ha gutuna gukalagala ndaga jia musonyi nu ha gukolesa ufuta wetu n’enji. Woma wene wadiago mbawututuma ha gulandula gutamega athu avula ha guza mukamba ‘ndunge jia giamatshidia’ nu ha guheta gubonga gua ndunge jiene.