1. Itshi tudi naye gutshita ha guhuluga mu lusugu lua Yehowa?

 TANGUA Biblia yana zuelela “lusugu lua Yehowa,” yana zuelela tangua Yehowa mbawushiya mbalagaji jienji nu mbawuhuluisa akombeledi enji. Mu tangua dikulu, Yehowa wahanele enya ifutshi iko ndola. (Yesh. 13:1, 6; Ezek. 13:5; Sef. 1:8) Mu masugu etu, “lusugu lua Yehowa” mbalusendesa tangua mafumu a politike mbaashiya Babilona Yakoma. Lusugu luene mbaluhua gusuga ya ita ya Alemagedona. Ha guhuluga mu “lusugu” luene, tudi naye gudilondega sendese mangino. Yesu walongesele egi tushigo naye phamba gukhala hehi mukunda nu “lamba diakola,” uvi tudi naye nji “gulandula gukhala hehi.”​—Mat. 24:21; Luka 12:40.

2. Malongo atshi tuajiya guzula mu mukanda wa 1 Tesalonike?

² Mu mukanda wa thomo wa Tesalonike, mupostolo Phaula wakalegele ifezegeselo yavula ha gukuatesa Aklisto ha gulandula gukhala yagudilonda mukunda nu lusugu lua Yehowa. Phaula wakhalele mujiya egi lusugu lua Yehowa luakhalelego naye guza mutangua diene. (2 Tes. 2:1-3) Uvi watemesele aphangi’enji Aklisto ha gukhala ya gudilondega mukunda nu lusugu luene gifua mbaluza hamene. Esue nji tuajiya gukalegela malongo enji. Tutadilenu ndaga jiazuelele muene gu mihu eyi yalandula: (1) Luholo lutshi lusugu lua Yehowa mbaluza? (2) Akhuatshi mbaashigo muhuluga mu lusugu luene? (3) Luholo lutshi tuajiya gudilondega ha guhuluga mu lusugu luene?

3. Mu luholo lutshi lusugu lua Yehowa mbaluza gifua nzangi mu phipha? (Tala nji gifuanesa.)

³ “Gifua nzangi mu phipha.” (1 Tes. 5:2) Gifezegeselo egi gidi mukatshi dia ifezegeselo thathu yahanele mupostolo Phaula ha gumonesa  luholo lusugu lua Yehowa mbaluza. Matangua avula nzangi jiana tshita ndaga muphushi, jiana kuya mu phipha tangua athu ashigo guamona. Lusugu lua Yehowa maluza nji mu gisagumuisa, athu avula mbaashigo mujiya; nu ene Aklisto a giamatshidia ajiya gudihula ha gumona luholo ndaga mbajikalegewa muphushi. Uvi esue mbatushigo mumona lamba gifua athu abola.

4. Mu luholo lutshi lusugu lua Yehowa ludi gifua misongo ya guvuala?

⁴ “Gifua luholo misongo ya guvuala yana jila mukhetu wa vumo.” (1 Tes. 5:3) Mukhetu wa vumo ganago gujiya diago tangua mbadivuala muene. Uvi wana jiya egi mbawudi muvuala. Gula tangua diene diatagana, diana guza mu gisagumuisa nu misongo yakola, muthu gajiyilego guyikanga njila. Luholo lumoshi nji, tushigo mujiya lusugu nu tangua lusugu lua Yehowa mbaluza. Uvi tudi mujiya egi lusugu luene mbaluza diago. Nzambi mbawusophesa athu abola mu gisagumuisa, nga mumoshi mbagalengigo.

5. Mu luholo lutshi lamba diakola didi gifua gosa gudi mutshia?

⁵ Gifua luholo gosa guana gutshia. Gifezegeselo gia thathu giahanele phaula gidi nji muzuelela nzangi jidi mukuya mu phipha. Uvi idi mumonega egi mutangua diene, Phaula wakhalele mufuanesa lusugu lua Yehowa nu luholo gosa guana gutshia. (1 Tes. 5:4) Nzangi jiana guza mukuya mu phipha, jiana gudisagesa egi gualeha ndo gosa gudi mutshia. Gula gosa guasendesa gutshia, athu ajiya guamona, a akuatshi. Luholo lumoshi nji, lamba diakola mbadizola haphelo athu adi mulandula gukalagala ndaga jiabola jianago gusuanguluisa Nzambi, gifua nzangi jidi mulandula gukuya mu phipha. Uvi esue tuajiya gumonesa egi tudi yagudilonda mukunda nu lusugu lua Yehowa gula tudi mutuna makalegelo abola anago gusuanguluisa Nzambi nu tualandula gukalagala “ndaga jidi jiatagana nu ha guwenda mu giamatshidia.” (Ef. 5:8-12) Gungima, Phaula wakalegele ifezegeselo mbadi ha guzuelela athu anyi mbaashigo muhuluga.

6. Mu luholo lutshi athu avula adi mubanda tulo? (1 Tesalonike 5:6, 7)

⁶ ‘Athu adi mubanda tulo.’ (Tanga 1 Tesalonike 5:6, 7.) Paula wafuanesele athu mbaashiyiwa mu lusugu lua Yehowa nu athu adi mubanda tulo. Athu ene anago gujiya ndaga jidi mubalega hehi nu ene nga luholo tangua didi mubalega. Hene gula ndaga imoshi ya ndando yabua, anago gujiya, ana khala nji ndo nu luholo lua gukalagala nga ndaga imoshi. Athu avula mangino adi mubanda tulo mu nyuma. (Roma 11:8) Anago gutshigina egi tudi mujinga mu “masugu a gisugishilo,” ana tshigina nji ndo egi gualeha ndo lamba diakola didi muza. Gula usombegeshi wakoma wakalegewa ha mavu, yana tuma athu ako ha gusendesa gusuanguluga nu lukuma luabonga lua Ufumu. Uvi ha fundo dia gukhala gikole-kole, athu ako avula ana banda gawo tulo mu nyuma. Ikhale athu anyi ana sha gutshigina egi lusugu lua usopheshi mbaluza, ana tangiza egi lusugu luene mbalushigo muza muphushi. (2 Phet. 3:3, 4) Uvi idi nu ndando egi lusugu nu lusugu, tulandule gukhala gikole-kole.

7. Mu luholo lutshi athu mbaashiyiwa mu khabu jia Nzambi adi gifua athu ana kuatewa matombe?

⁷ “Athu ana kuatewa matombe.” Mupostolo Phaula wafuanesele athu anyi mbaashiyiwa gudi Nzambi nu athu ana kuatewa matombe. Athu ana kuatewa matombe, anago gukotelesa muphushi ndaga jidi mubalega hehi nu ene, anago nji guzula badesizio abonga. Luholo lumoshi nji, athu abola anago gutshigina malongo adi gutuhana Nzambi ha gututemesa. Ana tomba njila idi guabata gu gufua. Uvi Biblia yana toga Aklisto ha gutangigiza muabonga. (1 Tes. 5:6) Muenya ndunge mumoshi wana longuga ndaga jia Biblia udi muzuela egi: “Muthu wana khala nu matangi abonga, ganago gubua tunga-tunga gula mulonga wabua, uvi wana khala tedie, ngenyi yana gumukuatesa ha guzula ba desizio abonga.” Mukunda natshi tushigo naye gudisagesa muavula? Gutuna gudisagesa muavula guajiya gutukuatesa ha gutuna gudinginyisa mu ndaga jia politike nga mu ndaga jiko jia ha mavu awa. Luholo tudi musuena hehi nu lusugu lua Yehowa, athu mbaatushinjiga luko muavula ha gudinginyisa mu ndaga jiene. Uvi tushigo naye gudisagesa mukunda nu ndaga mbatuzuela. Nyuma ya Nzambi yajiya gutukuatesa ha gukhala nu guhuima nu gukhala nu matangi abonga nu ha guzula badesizio abonga.​—Luka 12:11, 12.

8. 1 Tesalonike 5:8 idi muzuelela makalegelo atshi mbaatukuatesa ha gukhala gikole-kole nu gubamba matangi abonga? (Tala nji gifuanesa.)

⁸ “Sudigenu gazawu . . . nu . . . gifulu.” Phaula udi gutufuanesa nu masuta adi yagudilonda nu agusudiga ha gulua ita. (Tanga 1 Tesalonike 5:8.) Gula ita yazoga, athu ana jiya egi suta wana khala yagudilonda tangua diagasue ha gulua ita yene. Luholo lumoshi nu esue, tuana monesa egi tudi yagudilondega mukunda nu lusugu lua Yehowa gula tuasudiga gutshigina nu guzumba gifua gazawu nu tuasudiga felela dia guhuluga gifua gifulu. Makalegelo awa ajiya gutukuatesa muavula diago.

9. Luholo lutshi gutshigina guetu guana gutubamba?

⁹ Gazawu ga ita gakhalele mubamba mutshima wa suta. Gutshigina nu guzumba guana bamba nji mutshima wetu wa gifuanesa. Makalegelo ene mbaatukuatesa ha gulandula gukombelela Nzambi nu gulandula Yesu. Gukhala nu gutshigina guana gutukuatesa ha gujiya egi Yehowa mbawutufuta, luholo tuana gumukamba nu mutshima umoshi. (Heb. 11:6) Mbagutukuatesa ha gusala agujinginyina gudi Mutuameji wetu Yesu, ikhale tudi mutagana nu malamba akola. Tuajiya gukolesa gutshigina guetu ha gukolesela mu malamba gula tudi mulonguga ifezegeselo ya athu a mu masugu etu asalele agujinginyina, ikhale atagenele nu usageshi nga lamba diakola dia mbongo. Tuajiya gutuna guzumba mbongo nu gutuna gukamba  gukhala nu ima yavula-vula, ha gulandula gifezegeselo gia athu ashile Ufumu wa Nzambi ha fundo dia thomo mu monyo wawo. b

10. Luholo lutshi guzumba Nzambi nu athu, guana gutukuatesa ha gukolesela?

¹⁰ Guzumba gudi nji nu ndando handaga guana gutukuatesa ha gukhala gikole-kole nu gubamba matangi abonga. (Mat. 22:37-39) Guzumba Nzambi guajiya gutukuatesa ha gukolesela mu mudimo wa gulongesa ikhale tudi mutagana nu malamba mu mudimo wene. (2 Tim. 1:7, 8) Tuana zumba athu anago gukombelela Yehowa, hene tuana landula gulongesa mu terituare yetu, tuana guatamega gu telefone nga guasonegela mikanda. Tuana bemba ndo gualongesa handaga tuana jiya egi gudi nu lusugu athu ene mbaasombegesa makalegelo awo nu mbaasendesa gukalagala ndaga jiabonga.​—Ezek. 18:27, 28.

11. Luholo lutshi guzumba aphangi’etu Aklisto guana gutukuatesa? (1 Tesalonike 5:11)

¹¹ Tuana zumba nji aphangi’etu Aklisto. Tuana monesa guzumba guene tangua tuana gudihana ‘gikhesa nu gudikolesa.’ (Tanga 1 Tesalonike 5:11.) Gifua luholo masuta ana gudikuatesa gu ita, esue nji tudi naye gudihana gikhesa. Idi yadiago egi mutangua dia ita suta wajiya gunamenesa suta na muko uvi nu guyikalagala ndo nu mutshima wabola. Luholo lumoshi nji, tushigo naye gukalegela aphangi’etu Aklisto ndaga jiabola nu mutshima umoshi nga guavutudila gubola mu gubola. (1 Tes. 5:13, 15) Gula tudi munemesa aphangi ana gututuameza mu hungu, tuana monesa nji egi tuana guazumba. (1 Tes. 5:12) Tangua mupostolo Phaula wasonegele mukanda owu, hungu dia gu Tesalonike diakhalele khenji ditagenesa gale ndo givo gimoshi. Idi naye gukhala egi, mala akhalele mutuameza hungu diene akhalelego diago nu eksperianse nu akhalele mujimbila ndaga jiko. Uvi aphangi mu hungu akhalele naye guanemesa. Luholo lamba diakola diasuena hehi, mbatukhala nu funu ya utuameji wa akulu muavula diago. Yajiya gukhala egi mu tangua diene mbayikhala lamba ha guheta utuameji wa Hunji dia Akulu Atuameji nga wa betele, hene idi nu ndando egi sendese mangino tukhale muzumba akulu nu guanemesa. Gula mulonga wabua, tudi naye gulandula gubamba matangi abonga nu gutuna gutala  phamba gubola gua akulu; uvi tudi naye gusha mutshima egi Yehowa wana guatuameza mu njila ya Klisto.

12. Luholo lutshi felela diana bamba matangi’etu?

¹² Felela dietu diana gutukuatesa ha gubamba matangi’etu gifua luholo gifulu giakhalele mubamba muto wa suta. Gukhala nu felela diakola guana gutukuatesa ha gujiya egi, ima yana gutuhana mavu awa yana khala ndo nu ndando. (Fili. 3:8) Felela dietu diana gutukuatesa ha gutuna gudisagesa muavula. Ndaga eyi yakuatesele phangi Wallace nu mukaji’enji Laurinda anyi akhalele mutshita mudimo gu Afrique. Mama wa Laurinda wafuile, gungima tata wa Wallace nji wafuile. Ndaga jiene jiagasue jiabalegele mu sungi ya phoso thathu. Akhalelego nu luholo lua guya mutala enya fami jiawo mukunda nu misongo ya coronavirus. Phangi Wallace udi muzuela egi: “Felela dia gufuzumuga diana gungukuatesa ha guatangiza. Ngana haga ndo matangi mu luholo akhalele gutuama egi afue, uvi ngana tangiza muavula luholo mbaakhala mu mavu ahe-ahe. Felela diene diana gungukuatesa ha gutuna gudisagesa gula ngavua gikenene nga gula ngatangiza athu ngafuishile.”

13. Itshi tuajiya gutshita ha guheta nyuma ya Nzambi?

¹³ “Mujimigo tshuya tua nyuma.” (1 Tes. 5:19) Phaula wafuanesele nyuma ya Nzambi nu tshuya tudi mukatshi dietu. Gula tudi nu nyuma ya Nzambi, yana gutukuatesa ha gukalagala ndaga jiabonga nu gikhesa giagasue. Yana gutuhana nji ngolo jia gutshita mudimo wa Yehowa. (Roma 12:11) Itshi tuajiya gutshita ha guheta nyuma ya Nzambi? Gula tudi guyitoga mu gisambu, tudi mulonguga Mbimbi ya Nzambi nu tudi gudibungisa hamoshi mu ulondegi udi mutuamezewa mu nyuma yene. Gutshita ngenyi mbagutukuatesa ha gukudisa “mabundu a nyuma ya Nzambi.”​—Gal. 5:22, 23.

14. Ndaga jitshi tudi naye gutuna gula tudi mutshigina gulandandula guheta nyuma ya Nzambi? (Tala nji gifuanesa.)

¹⁴ Gula Nzambi watuhana nyuma yenji, tudi naye gutshita ngolo ha gutuna “gujima tshuya tua nyuma yene.” Nzambi wana hana nyuma yenji phamba gudi athu ana khala nu matangi abonga nu makalegelo abonga. Nzambi gajiyilego gulandula gutuhana nyuma yenji gula tudi nu matangi abola nu tudi mukalagala ndaga jiabola. (1 Tes. 4:7, 8) Ha gulandula guheta nyuma ya Nzambi, tushigo  naye nji “gusegulula mbimbi jia baprofete.” (1 Tes. 5:20) Mu verse eyi “mbimbi jia baprofete” jidi mukotelesa, ndaga jiana gutuwambela Yehowa mu njila ya nyuma yenji. Idi nji mukotelesa guza gua lusugu lua Yehowa nu luholo lusugu luene luasuena hehi. Tushigo naye gutangiza egi lusugu lua Yehowa nga ndo ita ya Alemagedona mbayishigo muza mu sungi yetu. Uvi tuajiya gumonesa egi tudi mutshigina egi lusugu luene mbaluza gualeha ndo, gula tudi mutshita ‘midimo idi mumonesa egi tudi ya gujinginyina gudi Nzambi,’ nu tudi mutshita yagasue ha gubamba makalegelo abonga lusugu nu lusugu.​—2 Phet. 3:11, 12.

15. Itshi tuajiya gutshita hagula tuhuigiwago gu ndaga jia mambo nga gu mbimbi jiana zuela bademo? (1 Tesalonike 5:21)

¹⁵ Gualeha ndo mbalagaji jia Nzambi mbajizuela egi: “Tudi mu guhuima nu mu ubambi!” (1 Tes. 5:3) Mbimbi jiana zuela bademo mbajizala ha mavu, mbajihuiga nji athu avula. (Gumo. 16:13, 14) Itshi mbayibuila akombeledi a Nzambi? Mbatushigo muhuigiwa gula tudi ‘mukamba gujiya ndaga jiagasue.’ (Tanga 1 Tesalonike 5:21.) Mbimbi ya Greke yabalumuiwe egi “gukamba gujiya,” yakhalele mukalegewa hagumonesa luholo athu akhalele muphaga utadi wa ndando gifua wolo nga siliva ha gujiya gula udi wabonga. Esue nji tudi naye gukamba gujiya gula ndaga tuana tegelela nu ndaga tuana tanga jidi diago jiabonga. Ndaga eyi yakhalele nu ndando mukunda nu Aklisto a gu Tesalonike. Idi nji nu ndando yavula mangino mukunda nu esue handaga lamba diakola diasuena hehi. Ha fundo dia gutshigina ndaga jiagasue athu adi muzuela, tudi naye gutshita ngolo ha gukamba gujiya gula ndaga tudi mutanga nu ndaga tudi muvua jidi gudivua nu malongo a Biblia nu ndaga jidi muzuela ulondegi wa Yehowa. Gula tuatshita ngenyi, mbatuhuigiwago nga gu mbimbi imoshi yana zuela bademo.​—Ish. 14:15; 1 Tim. 4:1.

16. Felela ditshi diabonga tudi nadio? Desizio ditshi tudi naye guzula?

¹⁶ Tudi mujiya egi, akombeledi a Yehowa mbaahuluga gu lamba diakola. Uvi muthu wagasue mukatshi dietu gashigo mujiya ndaga mbayimubuila hamene. (Yak. 4:14) Uvi ikhale tudi nu monyo mu tangua dia lamba diakola nga tuafua getu gutuama egi lamba diene disendese, Yehowa mbawutuhana monyo wa ivo nu ivo gula tuasala agujinginyina gudi muene. Aklisto ambiwe maji mu nyuma mbaakhala mu dilu nu Klisto. Uvi imeme iko mbayikhala ha mavu mu phaladiso. Mukut’etu agasue, tuhagenu matangi mu felela diabonga tudi nadio, tukhalenu nji ya gudilonda mukunda nu lusugu lua Yehowa!