Biblia yanago guyizuelela. Uvi idi gutuwambela ndaga jiko jiajiya gutukuatesa ha gujiya ndaga yaatumine ha gusala gu Beteleheme ha fundo dia guvutuga gu Nazaleta.

Muanjelo wawambelele Madiya egi, mbawumita vumo nu mbawuvuala mona. Mutangua diene Madiya nu Yozefe akhalele mujinga mu dimbo dia Nazaleta gu Galilea. Galilea yakhalele dimbo dia ba Yozefe. (Luka 1:26-31; 2:4) Gungima tangua akatugile gu Ejipitu, avutugile gu Nazaleta. Yesu wakudile guene, wabuile muenya gu Nazaleta. (Mat. 2:19-23) Gishina giene tuana zuelela dimbo dia Nazaleta gula tuatanga jina dia Yesu nu Yozefe nu Madiya.

Madiya wakhalele nu phangi’enji jina dienji Elizabete. Elizabete muene, wakhalele mujinga gu Yuda. Wakhalele mukaji’a nganga-nzambi Zakaliya; muene wavualele Yone mubatiji. (Luka 1:5, 9, 13, 36) Madiya wayile mutala Elizabete gu Yuda, watshitshile guene mbeji thathu gungima wavutugile gu Nazaleta. (Luka 1:39, 40, 56) Gishina giene Madiya wajiyile membo a gu Yuda.

Gungima Yozefe wakatugile gu Nazaleta, wayile gu Beteleheme handaga enya Roma ambile mukhuala egi, muthu wagasue udi naye “gusonegesa jina” dienji mu “dimbo dienji.” Profesi yazuelele nji egi Masiya mbawuvualewa gu Beteleheme. (Luka 2:3, 4; 1 Sam. 17:15; 20:6; Mika 5:2) Gungima, Madiya wavualele Yesu gu Beteleheme. Yozefe gatshiginyilego egi Madiya awende njila yaleha ha guvutuga gu Nazaleta nu mona wa gitebe. Hene asalele gu Beteleheme. Katuga gu Yelusalema ha guya gu Beteleheme yana khala ba kilometre 9. Ndaga yene yaakuatesele ha guya nu mun’awo gu tempelo ha guhana mulambu gifua luholo Mukhuala wakhalele muzuela.​—Levi 12:2, 6-8; Luka 2:22-24.

Muanjelo wa Nzambi wadiangele guwambela Madiya gutuama egi, mun’enji “mbawuheta nguasa ya ufumu wa Davidi” nu “mbawuhinyina gifua Fumu.” Yajiya gukhala egi Yozefe nu Madiya atangijile egi yakhalele nu ndando egi Yesu avualewe mu dimbo dia Davidi. (Luka 1:32, 33; 2:11, 17) Yajiya nji gukhala egi atangijile egi idi ndaga yabonga ha gusala gu Beteleheme ha gunengenena uu nu tangua mbaajiya ndaga Nzambi udi mutshigina egi atshite.

Tushigo mujiya masugu guvula gutshi akalegele gu Beteleheme tangua dia hetele athu ana tala themua ha guphonga. Uvi akhalele nu inzo yawo; mutangua diene Yesu wakhalele mona wa “gitebe.” (Mat. 2:11) Idi naye gukhala egi hafundo dia guvutuga luko gu Nazaleta, asalele gu Beteleheme masugu avula; hene Beteleheme yabuile gifua dimbo diawo.

Helode wahanele mukhuala egi, “ana mala agasue akhalele nu ivo mbadi nga goshi” mu dimbo dia Beteleheme . . . akhalele naye gushiyiwa. (Mat. 2:16) Tangua muanjelo watemesele Yozefe mukunda nu ndaga yene, Yozefe nu Madiya alengesele Yesu gu Ejipitu. Akhalele guene uu nu tangua Helode wafuile. Gungima, Yozefe wayile nu fami yenji gu Nazaleta. Mukunda natshi atunyile guvutuga gu Beteleheme gungima dia gufua guenji? Handaga Akelawuse muna Helode wakhalele muhinyina gu Yudea, wakhalele muenya khuta. Wakalegele nji ndaga gifua luholo Nzambi wamuwambelele. Dimbo dia Nazaleta diakhalele fundo diabonga dia gusansa Yesu.​—Mat. 2:19-22; 13:55; Luka 2:39, 52.

Idi naye gukhala egi Yozefe wafuile gutuama egi Yesu afue ha guhana athu ako njila ya guya mu dilu. Yozefe mbawufuzumuga ha gujinga ha mavu. Ngenyi athu avula mbaamumona, mbaamuhula mihu hagujiya mukunda natshi gazudile desizio dia gusala gu Beteleheme gungima dia guvualewa gua Yesu.