1-2. Ha gutadila Ngimbo 25:14, itshi tudi naye gutshita ha gukhala nu ufuta wakola nu Yehowa?

 UDI mutangiza egi makalegelo atshi ana khala nu ndando yavula gula udi mutshigina gukhala nu ufuta wakola nu muthu? Wajiya guzuela egi mafuta abonga adi naye gudizumba nu gudikuatesa. Yajiya gukhala khenji utangijile gale ndo egi, woma udi khadilo dia ndando diajiya gumikuatesa ha gukhala nu ufuta wakola. Uvi gifua luholo muto wa lumene wa longo edi udi guyimonesa, athu adi mutshigina gukhala nu ufuta wakola nu Yehowa, adi naye “gumuvila woma.”​—Tanga Ngimbo 25:14.

² Ikhale tuana kombelela gale Yehowa sendese mualeha, mukut’etu agasue tudi naye gulandula gumuvila woma mu luholo luabonga. Uvi guvila Nzambi woma gudi mukotelesa itshi? Luholo lutshi tuajiya gulonguga ha guvila Yehowa woma? Malongo atshi tuajiya guzula mu gifezegeselo gia Obadia, Nganga-nzambi Wakoma Yoyada nu Fumu Yoase mu ndaga yatadila guvila Nzambi woma?

3. Kotelesa luholo woma wajiya gutubamba.

³ Tuajiya guvua woma gula tuajiya egi ndaga imoshi ya lamba yajiya gutubuila. Woma wa luholo elu udi wabonga, handaga wajiya gutukuatesa ha guzula badesizio abonga. Gula muthu udi muvua woma wa gubua, gajiyilego guwenda mu khulo ya pont. Guvua woma wa gutshita ndaga yabola guajiya gukuatesa muthu ha gulenga malamba. Gula tudi muvua woma ha gubolesa ufuta nu muthu tuana zumba, yajiya gutukuatesa ha gutuna guzuela nga gutshita ndaga yajiya gumusagesa.

4. Satana wana tshigina egi tuvile Yehowa woma mu luholo lutshi?

 ⁴ Satana wana tshigina egi athu akhale muvila Yehowa woma mu luholo luabola. Wana tshigina tutangize egi, Yehowa wana gutuvila khabu tangua diagasue, wana tshigina gutuhana ndola, tuajiyilego nji gumusuanguluisa. (Yobo 4:18, 19) Wana tshigina nji egi tuvuile Yehowa woma wavuila hagula itukange njila ha gumukombelela. Ha gutuna gubua mu muheto wenji tudi naye gusendesa guvila Nzambi woma mu luholo luabonga.

5. Guvila Nzambi woma gudi mukotelesa itshi?

⁵ Muthu wana vila Nzambi woma mu luholo luabonga wana gumuzumba nu gana tshiginago egi nga gima gimoshi gibolese ufuta wenji nu muene. Yesu wakhalele nji ‘muvila Nzambi woma’ mu luholo luabonga. (Heb. 5:7) Gakhalelego muvila Nzambi woma ha gulenga ndola. (Yesh. 11:2, 3) Uvi wakhalele gumuzumba muavula nu wakhalele hehi ha gumutumagela. (Yone 14:21, 31) Gifua Yesu, esue nji tuana nemesa Yehowa muavula handaga wakhala Nzambi wa guzumba, wa ndunge, wana tshita ndaga mu luholo luabonga nu udi nu ngolo jiavula. Tudi mujiya nji egi Yehowa wana gutuzumba muavula, wana gudisagesa mukunda nu ndaga tuana kalagala hana gutulongesa muene. Ndaga tudi mukalagala jiajiya gusuanguluisa Yehowa nga gumuhana gikenene.​—Ngi. 78:41; Ish. 27:11.

6. Mu luholo lutshi tuajiya gulonguga ha guvila Nzambi woma? (Ngimbo 34:11)

⁶ Tuana vualewa ndo nu khadilo dia guvila Nzambi woma, uvi tudi naye gudilonguga. (Tanga Ngimbo 34:11.) Tuajiya gulonguga khadilo diene mu njila ya ima yafugile Yehowa. Gula tuamona luholo “ima yafugile Yehowa” yana monesa ndunge jienji, ngolo jienji nu guzumba guenji mukunda nu esue, mbatusendesa gumunemesa nu gumuzumba muavula diago. (Roma 1:20) Phangi Adrienne udi muzuela egi: “Tangua ngana mona ndunge jia Yehowa mu ima yafugile muene, yana gungukuatesa ha gukotelesa egi Yehowa udi mujiya ndaga jiabonga mukunda nu ame.” Gutangiza muavula mukunda nu ndaga yene guamutumile ha guzuela egi: “Ngana tshigina ndo gutshita nga ndaga imoshi yajiya gubolesa ufuta wami nu Yehowa Mufugi wami.” Aye nji wajiya guzula tangua mu phoso eyi ha gutangigiza gima gimoshi gia fugile Yehowa ba? Gula watshita ngenyi, mbawusendesa gunemesa Yehowa muavula nu gumuzumba.​—Ngi. 111:2, 3.

7. Luholo lutshi isambu yajiya gutukuatesa ha gukudisa khadilo dia guvila Yehowa woma mu luholo luabonga?

⁷ Luholo luko tuajiya gukudisa khadilo dia guvila Nzambi woma idi gutshita isambu mbala jiavula. Tuana jiya Yehowa muabonga tangua tuana tshita isambu muavula. Tangua diagasue tuana toga Yehowa ha gutuhana ngolo ha gukolesela mu malamba tudi mutagana nawo, yana gutuwunguluisa egi Yehowa udi nu ngolo jiavula diago. Tangua tuana gumuhana mersi mukunda nu mulambu wa Mun’enji, yana gutuwunguluisa egi Yehowa wana gutuzumba muavula. Tangua tuana bubila Yehowa ha gutukuatesa mu ndaga imoshi, yana gutuwunguluisa egi udi nu ndunge jiavula diago. Isambu ya luholo elu yana gutukuatesa ha gunemesa Yehowa muavula. Yana gutukuatesa nji ha gutuna gutshita ndaga imoshi yajiya gubolesa ufuta wetu n’enji.

8. Itshi tuajiya gutshita ha gulandula guvila Nzambi woma?

⁸ Tuajiya gulandula guvila Nzambi woma, gula tudi mulonguga Biblia ha guzula malongo mu ifezegeselo ya athu atshitshile ndaga jiabonga nu jiabola. Tuzuelelenu ifezegeselo mbadi ya akombeledi a Yehowa a mu tangua dikulu. Obadia wakhalele mutshita mudimo mu inzo  ya Fumu Ahaba nu Nganga-nzambi Wakoma Yoyada. Gungima tuza muzula malongo mu gifezegeselo gia Fumu Yoase wa gu Yuda munu wasendesele muabonga, uvi gungima wabembele gukombelela Yehowa.

9. Luholo lutshi khadilo dia guvila Yehowa woma diakuatesele Obadia? (1 Mafumu 18:3, 12)

⁹ Fundo dia thomo Biblia idi muzuelela lumene lua Obadia, b idi musendesa nu mbimbi eji: ‘Obadia wakhalele muvila Yehowa woma.’ (Tanga 1 Mafumu 18:3, 12.) Luholo lutshi khadilo dia guvila Yehowa woma diamukuatesele? Diamukuatesele ha gutshita ndaga nu giamatshidia giagasue nu ha gukhala muthu wa gushila mutshima; hene, fumu wamuhanele ginemo gia gutala inzo yenji yagasue. (Fuanesa nu Nehemiya 7:2) Khadilo dia guvila Nzambi woma diakuatesele Obadia ha gukhala nu gikhesa giavula diago. Wajingile mu uhinyinyi wa Fumu Ahaba munu ‘wakalegele ndaga jiabola gu meso a Yehowa gubalega athu agasue ahinyine gutuama dienji.’ (1 Maf. 16:30) Yezabele mukaji’a Ahaba wakhalele mukombelela Bale, gakhalelego muzumba Yehowa nga hazonda. Wakambele gukatula gikombelelo gia giamatshidia mu Ufumu wa iphuta kumi ya nord gu Isalele. Washiyile nji baprofete avula a Nzambi. (1 Maf. 18:4) Idi yadiago egi, Obadia wakhalele mukombelela Yehowa mu tangua dia lamba.

10. Luholo lutshi Obadia wamonesele gikhesa giavula?

¹⁰ Luholo lutshi Obadia wamonesele gikhesa giavula? Tangua Yezabele wasendesele gukamba baprofete a Nzambi ha guashiya, Obadia wazudile baprofete 100 waasuegele ‘mu thundu mbadi. Wahagele athu 50 mosha seso, walanduile guahana ima ya gudia nu meya a gunua.’ (1 Maf. 18:13, 14) Gula nga Yezabele wajiyile ndaga jiakalegele Obadia, nga wamushiyile. Yajiya gukhala egi Obadia wakhalele nji muvua woma wa gufua. Uvi wakhalele muzumba Yehowa nu akombeledi enji muavula gubalega monyo wenji.

11. Luholo lutshi akombeledi a Yehowa a mu tangua dietu ana monesa gikhesa gifua Obadia? (Tala nji gifuanesa.)

¹¹ Mangino akombeledi avula a Yehowa adi mujinga mu ifutshi inyi mudimo wetu watunyishiwe gale. Aphangi awa a mala nu a akhetu ana nemesa mafumu a leta, uvi gifua Obadia ana bembago  gukombelela Yehowa. (Mat. 22:21) Ana monesa egi ana vila Nzambi woma luholo ana gumutumagela ha fundo dia gutumagela athu. (Makal. 5:29) Ana tshita ndaga yene tangua ana landula gulongesa lukuma luabonga nu tangua ana tshita gudibungisa mu gisuegi. (Mat. 10:16, 28) Ana tshita yagasue ha gula aphangi a mala nu a akhetu ahete ima ya gudia ya mu nyuma. Tutadilenu gifezegeselo gia phangi Henri, wana jinga mu gifutshi gimoshi gia Afrique ginyi mudimo wetu watunyishiwe mu tangua dimoshi ngenyi. Mu tangua diene phangi Henri wakhalele mubatela aphangi ako mikanda yana kotelesa Biblia. Wasonegele egi: “Ngakhala muenya sonyi. Uvi ngudi musha mutshima egi guvila Yehowa woma, guene guangukuatesele ha gukhala nu gikhesa giavula.” Aye nji wajiya gukhala nu gikhesa giavula gifua phangi Henri ba? Ayi, wajiya gukhala nu gikhesa gula udi muvila Nzambi woma mu luholo luabonga.

12. Luholo lutshi Nganga-nzambi Wakoma Yoyada nu mukaji’enji amonesele egi akhalele yagujinyina gudi Yehowa?

¹² Nganga-nzambi Wakoma Yoyada, wakhalele muvila Yehowa woma. Ndaga yene yamukuatesele ha gukhala yagujinginyina nu ha gukuatesa athu ako ha gukombelela Yehowa. Wakalegele ndaga yene tangua Ataliya mun’a Yezabele wazudile ufumu gu Yuda mu luholo luabola. Athu akhalele muvila Ataliya woma handaga wakhalele nu khuta, wakhalele mutshigina gushiya ajigulu enji agasue hagula muene hakhenji ahinyine! (2 Gudi. 22:10, 11) Mujigulu wenji mumoshi wahulugile, handaga Yehosheba mukaji’a Yoyada wamubambele. Muene nu mulumi’enji asuegele mona muene nu akhalele gumukuatesa. Ndaga yakalegele Yoyada nu Yehosheba yakuatesele ha gula Ataliya ashiyigo athu agasue akhalele mu fami ya Davidi. Yoyada wakhalele yagujinginyina gudi Yehowa nu gakhalelego muvila Ataliya woma.​—Ish. 29:25.

13. Luholo lutshi Yoyada wamonesele egi wakhalele ya gujinginyina gudi Yehowa tangua Yoase wataganesele ivo 7?

¹³ Yoyada wamonele luko egi wakhalele yagujinyina gudi Yehowa tangua Yoase wataganesele ivo 7. Watshitshile ndaga imoshi. Gula ndaga yabalega muabonga Yoase munu wakhalele mu fami ya Davidi, wakhalele naye gubua fumu. Uvi gula ndaga yene yabalegelego muabonga Yoyada wajiya gushiyiwa. Mu ukuateshi wa Yehowa ndaga jiabalegele muabonga. Mafumu a iphuta nu enya Levi akuatesele Yoyada ha gubuisa Yoase fumu nu ashiyile Ataliya. (2 Gudi. 23:1-5, 11, 12, 15; 24:1) Gungima Yoyada ‘wakotele gikotele nu Yehowa nu fumu nu athu egi, mbaalandula gukombelela Yehowa.’ (2 Maf. 11:17) Yoyada ‘wahagele nji abambi a mifulo ha mifulo ya inzo ya Yehowa hagula athu ashigo aphelegeta anginyigo.’​—2 Gudi. 23:19.

14. Mu luholo lutshi Yoyada wahanewe ginemua luholo luatumbushile muene Yehowa?

¹⁴ Yehowa wadiangele guzuela egi: ‘Mbangutumbuisa athu ana gungutumbuisa.’ Yadiago watumbuishile Yoyada. (1 Sam. 2:30) Ha gufezegesa, wasogesele lumene lua Yoyada mu Biblia hagula tuzule malongo. (Roma 15:4) Tangua Yoyada wafile Yehowa wamuhanele ginemua luholo amufundile “mu dimbo dia Davidi hamoshi nu mafumu, handaga watshitshile ndaga jiabonga gu Isalele, wakhalele muvila Nzambi wa giamatshidia woma nu inzo Yenji.”​—2 Gudi. 24:15, 16.

15. Malongo atshi tuajiya guzula mu gifezegeselo gia Yoyada? (Tala nji gifuanesa.)

¹⁵ Lumene lua Yoyada luajiya gutukuatesa ha gukudisa khadilo dietu dia guvila Yehowa woma. Akulu ajiya gulandula gifezegeselo gia Yoyada gula adi mutshita yagasue ha gubamba imeme ya Nzambi. (Makal. 20:28) Gula athu adi mulandula gifezegeselo gia Yoyada gia guvuila Yehowa woma nu gusala ya gujinginyina  gudi muene, Yehowa wajiya guakalegela ha gutagenesa felela dienji. Muene gajiyilego guabemba. Mavuala ajiya guzula malongo mu luholo Yehowa wakalegele Yoyada ndaga nu gulandula gifezegeselo gienji ha gukalegela athu a gukola ndaga nu ginemua; muavula gubalega gudi aphangi akalegela gale Yehowa mudimo ivo yavula. (Ish. 16:31) Mukut’etu agasue tuajiya guzula malongo mu gifezegeselo gia mafumu a iphuta nu enya Levi anyi akuatesele Yoyada. Tulandulenu gutumagela “athu adi gututuameza” ha guakuatesa.​—Heb. 13:17.

16. Itshi idi mumonesa egi fumu Yoase wakhalele muthu wabola?

¹⁶ Yoyada wakuatesele fumu Yoase ha gukhala nu makalegelo abonga. (2 Maf. 12:2) Hene, tangua Yoase wakhalele muvuala wakhalele mutshigina gutshita ndaga jiakhalele musuanguluisa Yehowa. Uvi tangua Yoyada wafile, Yoase wategelele malongo a mambo a ana a mafumu. Itshi yabuile gungima? Muene nu athu enji ‘asendesele gukombelela makunji a gijila nu isongo.’ (2 Gudi. 24:4, 17, 18) Ndaga yene yahanele Yehowa gikenene giavula, hene ‘waatumidile baprofete ha guakuatesa. . . , uvi ene atunyile guategelela.’ Atunyile nji guvila Zakaliya mun’a Yoyada. Zakaliya wakhalele profete wa Yehowa nu nganga-Nzambi; wakhalele nji gisonyi gia Yoase. Uvi Yoase wamushiyile, ikhale fami yawo yamuhuluishile hakhalele muene mona wazonda.​—2 Gudi. 22:11; 24:19-22.

17. Luholo lutshi ndaga jiabalumugile mukunda nu Yoase?

¹⁷ Yoase gakhalelego muvila Yehowa woma  mu luholo luabonga, hene ndaga jiabolele mukunda nu muene. Yehowa wadiangele guzuela egi: ‘Mbawusegulula athu adi gumusegelula.’ (1 Sam. 2:30) Masuta azonda a Siliya abingile “masuta avula” a Yoase nu ‘amunamenesele muavula’. Tangua enya Siliya avutugile, enya mudimo wa Yoase amushiyile handaga washiyile Zakaliya. Athu amonele egi Yoase gakhalelego watagana ha gufundiwa ‘mu malumba a mafumu.’​—2 Gudi. 24:23-25; tala “fils de Barakia” mu notes d’étude ya Matayo 23:35.

18. Ha gutadila Yelemiya 17:7, 8, luholo lutshi tuajiya gutuna gulandula gifezegeselo gia Yoase?

¹⁸ Malongo atshi tuajiya guzula mu gifezegeselo gia Yoase? Yoase wakhalele gifua mutshi wa gujitshiga shinga hagula ubuigo, handaga miji yenji khenji ijigama gale muabonga ndo. Tangua Yoyada munu wakhalele gifua shinga wafile, muhehe wabola wa ba aposta wabundile, Yoase wabuile mbala imoshi. Gifezegeselo egi gidi gutukuatesa ha gujiya egi tushigo naye guvila Yehowa woma phamba handaga enya fami yetu nga aphangi ako mu hungu ana gutuhana gifezegeselo giabonga. Ha gukolesa ufuta wetu nu Yehowa, tudi naye gulonguga Biblia tangua diagasue, gutangigiza nu gutshita gisambu. Ngenyi mbatumuzumba muavula nu gumunemesa.​—Tanga Yelemiya 17:7, 8; Kol. 2:6, 7.

19. Itshi Yehowa wana gututoga ha gutshita?

¹⁹ Yehowa gana gututoga ndo ha gutshita ndaga jiavula. Uvi ndaga idi muene gututoga idi mu Mulongeshi 12:13, idi muzuela egi: ‘Vila Nzambi wa giamatshidia woma, tumagela mikhuala yenji handaga yene ndaga muthu wagasue adi naye gutshita.’ Gula tudi muvila Nzambi woma, mbayitukuatesa ha gusala ya gujinginyina gudi Yehowa gifua Obadia nu Yoyada, ikhale tuatagana nu ndaga ya luholo lutshi mu masugu adi muza. Gula tuatshita ngenyi, gushigo nga gima mbagibolesa ufuta wetu nu Yehowa.